Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dua wongi tõ luo Fasa ba luo Gowasa Roti si Lõ Mu'aisõni. La'alui lala ira ere sebua ba sangila amakhoita ba wondra'u Yesu ba zi lõ oroma, ba ba wamunu Ya'ia.
2 Ba lamane, "Bõi talau da'õ ba ginõtõ Gowasa, bõrõ ma dania humufa niha."
3 Me so Yesu ba Mbetania, ba nomo Zimoni si no irai mofõkhõ bou auri, so ndra alawe sangondrasi Ya'ia. I'ohe sambua mbulibuli so'õsi fanikha samohua. Sebua bõli wanikha andrõ, nifazõkhi moroi ba w̃a'a geu samohua. Iboto mbulibuli ba ifaduwa ba hõgõ Yesu wanikha andrõ, me mangamanga Ia.
4 Ba so õsa zi so ba nomo andrõ zofõnu, faoma lamane khõ nawõra, "Hadia guna wa i'alimagõsi wanikha samohua andrõ?
5 Tola mu'amawa ia mena'õ ba tatema mbõli tõlu ngaotu firõ; ba kefe andrõ tola mube'e ba niha si numana!" Mofõnu ira ba ndra alawe andrõ.
6 Ba hiza Imane Yesu, "Bõi mitegu ia! Hana wa mibusi dõdõnia? No ilau zi sõkhi ba soadu khõ-Gu.
7 Lõ mamalõ so ba gotaluami zi numana. Ba hiza tenga si'ogõtõ'õ so Ndra'o khõmi.
8 No ilau zi tola ia ira alawe andre. Fatua lõ irugi inõtõnia, no ihõnagõ ibayoini Ndra'o fanikha samohua ba wogo'o Ya'o.
9 Ya faduhu dõdõmi ba zi sagõrõ ulidanõ, gofu heza la'ombakha'õ Duria Somuso Dõdõ soroi Lowalangi, ba tedunõdunõ gõi nilau ndra alawe andre ba wanõrõ tõdõ ya'ia."
10 Yuda banua Gariota, samõsa moroi ba gotalua nifahaõ Yesu si felendrua. Mõi ia khõ ndra ere sebua ba wemanga mbõli Yesu khõra.
11 Ba omuso sibai dõdõra me larongo zi manõ, ba lafabu'u wame'e kefe khõ Yuda. Andrõ ibõrõtaigõ i'alui lala senahõi Yuda ba wemanga bõli Yesu.
12 Ba ngaluo si fõfõna ba Gowasa Roti si Lõ Mu'aisõni, la'ondrasi Yesu ira nifahaõ-Nia. Sito'õlõnia ba luo da'õ lataba mbiribiri Fasa. Bõrõ da'õ lasofu khõ Yesu ira nifahaõ-Nia, "Heza zomasi'Õ mafa'anõ gõ Wasa khõ-U, Ama?"
13 Ifatenge darua ba gotaluara Yesu. Imane, "Mi'ae miyomo ba mbanua, ba da'õ dania falukha ami samõsa ndra matua solohe rumbi so'õsi idanõ. Mi'o'õ ia,
14 ba nomo si mõi ia yomo, ba khõ zokhõ omo andrõ, mimane, 'Isofu khõu Guru, heza nahia I'a Wasa si fao ira nifahaõ-Nia?'
15 Ituturu dania khõmi niha andrõ sambua mbate'e sebua ba zi sagõtõ, ba nomo andrõ. No mufa'anõ mbate'e andrõ, awõ gamagama fefu. Mifa'anõ ba da'õ khõda."
16 Ba mõi nifahaõ Yesu si darua andrõ ba fasa. Ba da'õ alua fefu zi mane ni'ombakha'õ Yesu. Lafa'anõ Wasa ba da'õ.
17 Bonginia, tohare Yesu awõ ndra nifahaõ-Nia si felendrua.
18 Me no dumadao ira ba meza, Imane khõra Yesu, "Mifondrondrongo da'e: samõsa ba gotaluami zi manga mbõli-Gu, si manga awõ-Gu iada'e."
19 Abu dõdõ ndra nifahaõ Yesu. Ba oi zara lasofu khõ Yesu, "Hadia ya'odo Ama?"
20 Imane Yesu, "Samõsa ia moroi ba gotaluami si felendrua andre. Ya'ia zi falulu manga khõ-Gu.
21 Mate dania Nono Niha andrõ si mane si no musura bakha ba Mbuku Ni'amoni'õ. Ba alai niha si manga mbõli Nono Niha andrõ! Abõlõ sõkhi ba niha andrõ na lõ irai tumbu ia mege!"
22 Me manga na ira, Ihalõ roti Yesu I'aohasi gõlõ Lowalangi. Iboboto roti andrõ, aefa da'õ Ibe'e khõ ndra nifahaõ-Nia Imane, "Mi'a, boto-Gu da'e!"
23 Aefa da'õ Ihalõ sambua mako nagu. I'aohasi gõlõ Lowalangi, ba Ibe'e mako andrõ khõ ndra nifahaõ-Nia. Aefa da'õ labadu nagu andrõ dozi ira.
24 Imane Yesu, "Do-Gu da'e sanga'aro'õ fawu'usa li Lowalangi, ba do nifaduwa salahi zato.
25 Ya faduhu dõdõmi: Lõ Ubadu nagu andre sa'ae irugi ginõtõ wamadu-Gu agu si bohou si fao ya'ami ba Gulidanõ si Bohou khõ Nama-Gu."
26 Aefa da'õ la'anunõisi sambua zinunõ. Ba aefa manunõ ira, mõi ira ba Hili Zaitu.
27 Imane khõra Yesu, "Moloi ami fefu dania mirõi Ndra'o. Bõrõ me no musura ba Mbuku Ni'amoni'õ, 'Ibunu dania gubalo andrõ Lowalangi, ba muzawili mbiribiri andrõ.'
28 Ba na no aefa maoso Ndra'o mangawuli, ba Ufowaõwaõ fõnami we'amõi ba Galilea."
29 Imane Fetero, "Lõ'õ, he larõi Ndra'ugõ fefu Ama, ba ya'o ba lõ urõi Ndra'ugõ."
30 Imane khõnia Yesu, "Tõngõni, bongi andre gõi, lõ fakhamõ mendrua kali miwo manu silatao, ba no medõlu õ'osilõ'õgõ Ndra'o."
31 Ifuli i'abe'e'õ wanguma'õ Fetero, "Ba he matedo awõ-U Ama, ba ma'ifu lõ uw̃a'õ wa lõ u'ila Ndra'ugõ!" Ba fefu nifahaõ bõ'õ oi law̃a'õ zi manõ gõi.
32 Ba larugi sambua nahia nifotõi Gezemane. Imane Yesu khõ ndra nifahaõ-Nia, "Midadao ba da'e fatua mõi Ndra'o mangandrõ."
33 I'ohe awõ-Nia ndra Fetero, Yakobo ba Yohane. Ibõrõtaigõ ihawui Ia fa'ata'u ba fa'abu dõdõ.
34 Imane ba nifahaõ-Nia si datõlu andrõ, "Wa'abu dõdõ-Gu, hulõ zi mate Ndra'o. Mi'iagõ da'e ba bõi mifõrõ!"
35 I'arõu'õ Ia Yesu ma'ifu ba Ibalõduhini tou danõ wangandrõ. Ba wangandrõ-Nia I'andrõ ena'õ italu'i Ia famakao andrõ.
36 Imane, "He Ama, Amagu, lõ hadia ia si tebai Ndra'ugõ. Heta khõ-Gu wamakao andrõ. Ba bõi ya'alua ba zomasi Ndra'o, ya'alua ba zomasi Ndra'ugõ."
37 Aefa da'õ mangawuli Yesu ba I'ila no momõrõ ndra nifahaõ andrõ. Imane Yesu khõ Wetero, "He Simoni, hadia si mõrõ ndra'ugõ? Ha ba zi sambua za manõ, tebai zi lõ mõrõ ndra'ugõ?"
38 Aefa da'õ Imane khõra Yesu, "Bõi mifõrõ, mi'angandrõ fabõi itõrõ ami fanandraigõ. Omasi dõdõmi wamalua si sõkhi, ba hiza lõ fa'abõlõmi me no ambõ fa'abõlõ nõsi."
39 Ifuli mõi mangandrõ Yesu, fagõlõ manõ wangandrõ-Nia si mane mege.
40 Aefa da'õ Ifuli Ia khõ ndra nifahaõ-Nia, ba I'ila no mõrõ gõi ira, me no abõlõ wanukõura. Ba lõ la'ila hadia niw̃a'õra khõ Yesu.
41 Me mangawuli Yesu khõra ba zi medõlu kali, Iw̃a'õ khõra Yesu, "Hadia mõrõ ami nasa ba molombase? No abõnõ! Hiza, no irugi inõtõ labe'e ba danga niha si so horõ Nono Niha.
42 Mifaoso, mofanõ ita. Hiza! No tohare niha si manga mbõli-Gu andrõ!"
43 Fatua na muhedehede Yesu, i'anemai'õ tohare Yuda, samõsa moroi ba gotalua ndra nifahaõ-Nia. Fao khõnia niha sato solohe fõda ba fagado. No nifatenge ndra ere sebua, ba sangila amakhoita awõ ndra salaw̃a niha Yahudi andrõ ira.
44 No ibe'e dandra si manga mbõli andrõ. Imane khõra, "Niha si fa'ago bawa khõgu, da'õ nihania. Mira'u Ia ba mi'ohe Ia ba mi'a'aro'õ wanaro Ya'ia."
45 Me tohare Yuda, idõlõ ia khõ Yesu ba imane, "He Amagu Guru!" Aefa da'õ fa'ago bawa ia khõ Yesu.
46 Niha si fao khõ Yuda andrõ lara'u Yesu ba labõbõ danga-Nia.
47 Samõsa zi so ba da'õ zanõbi fõda ba igukhui dalinga zawuyu gere sebua irege aetu.
48 Imane khõra Yesu, "Hadia, sorabu Ndra'odo andre, wa tohare ami molohe fõda awõ wagado ba wondra'u Ya'o?
49 Ero ma'õkhõ Ndra'o ba Nomo Zo'aya, ba lõ mira'u Ndra'odo. Ba hiza no si manõ ena'õ alua hadia ia zi no musura ba Mbuku Ni'amoni'õ."
50 Oi moloi ndra nifahaõ Yesu, larõi Ia.
51 So samõsa nono matua solo'õ Ya'ia samake baru muko. Ba lara'u ia mena'õ niha sato.
52 Ba iheta mbarunia andrõ moloi ia lõ nukhanukha.
53 La'ohe Yesu ba nomo gere sebua. Ba da'õ owulo ira, awõ ndra salaw̃a niha Yahudi ba sangila amakhoita.
54 I'o'õ Yesu Fetero, irugi golayama nomo gere sebua, ba da'õ mudadao ia, ilau moleu awõ ndra sanaro ba da'õ.
55 Ba la'alui zi tobali lohelohe ira ere sebua awõ Zanguhuku ba Agama ba wamõbõgõ horõ khõ Yesu, ena'õ la'etu'õ huku famunu khõ-Nia. Ba hiza ma'ifu lõ lasõndra.
56 Ato sasi nikaoni ba wame'e famaduhu'õ faya khõ Yesu. Ba fefu wamaduhu'õ nibe'era oi lõ faoma.
57 Ba so õsa sasi muzizio ira ba labe'e wamaduhu'õ faya sanandrõsa khõ Yesu.
58 Lamane, "No marongo wehede niha andre sanguma'õ, 'Ududugõ dania nomo Lowalangi andre nifazõkhi danga niha, ba ha tõlu ngaluo Ufuli U'otomosi si tenga nifazõkhi danga niha.'"
59 Ba hiza oi lõ faoma wamaduhu'õ niha andrõ.
60 Ba muzizio gere sebua fõnara fefu, isofu khõ Yesu, "Hadia lõ Õtema li wangadura Ya'ugõ andrõ fefu?"
61 Ba lõ hedehede Yesu. Ma'ifu lõ Itema li. Ifuli isofu khõnia ere sebua andrõ imane, "Hadia Ya'ugõ Razo Sangorifi andrõ, Ono Lowalangi fondrege Ni'amoni'õ?"
62 Imane Yesu, "Ya'odo da'õ! Ba mi'ila dania Nono Niha andrõ dumadao ba gambõlõ Lowalangi Fondrege Zabõlõ, so Ia ba lawuo moroi mbanua si yaw̃a!"
63 I'anema'õ isika nukhania ere sebua ba imane, "Lõ moguna sa'ae sasi!
64 No mirongo samõsa wehede-Nia fango'aya Lowalangi. Iada'e hadia gangetulami?" Ba la'etu'õ fefu wa no mosala Yesu, ba sinangea nihuku famunu.
65 Ba ibõrõtaigõ ladidiloi Yesu. La balugõ hõrõ-Nia ba labõbõzi Ia, lamane, "Tandraigõ tahõ, haniha zamõzi Ya'ugõ?" Fao gõi ndra sanaro andrõ wamõzi Yesu.
66 Fatua so ba golayama Wetero, ba tohare samõsa ndra alawe sawuyu gere sebua.
67 Me i'ila moleu Wetero ba zinga galitõ, ihaogõ wamaigi mbawa Wetero ba imane, "Ya'ugõ gõi nifahaõ Yesu banua Nazareta andrõ?"
68 Ba i'osilõ'õgõ Fetero, imane ba zawuyu andrõ, "Hadia niw̃a'õu, lõ aboto ba dõdõgu." Aefa da'õ numalõ Wetero ba mbawa gõli nomo gere sebua andrõ. [Ba ginõtõ da'õ sibai, miwo manu.]
69 Ifuli i'ila Wetero sawuyu ira alawe andrõ ba da'õ. Imane ba niha si so andrõ, "Niha andrõ samõsa moroi ba gotalua nifahaõ Yesu!"
70 Ba ifuli i'osilõ'õgõ Fetero. Lõ ara aefa da'õ, lamane zui niha si so ba da'õ khõ Wetero, "Tebai lõ'õ, ya'ugõ samõsa ba gotaluara, bõrõ me moroi ba Galilea ndra'ugõ!"
71 Ibõrõtaigõ mõi ba hõlu Wetero. Imane, "He mate, lõ u'ila haniha niw̃a'õmi andrõ!"
72 Ba ginõtõ da'õ sibai gõi miwo manu si mendrua. Itõrõ tõdõ Wetero niw̃a'õ Yesu khõnia wanguma'õ, "Lõ fakhamõ miwo manu si mendrua, ba no tõlu kali õfaduhu'õ wa lõ õ'ila Ndra'odo." Ba ilau mege'ege Fetero, irege adõ'udõ'u ia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA