Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Duang allopa na pangramean Paskah sola pangramean ngkande Roti Tangkeragi. Ia to kapala imang sola guru agama nnangah bang lalan la njokko buni Puang Isa anna bunoi.

² Apa nakua to kapala imang sola guru agama, "Danggi' na ia ke wattu pangramean nadipugauk, nasaba' wa'ding marongka to tobuda."

³ Ia tonna jio kota Betania to Puang Isa lan bolana Simon to masolak tonna anu', denmi mesa' baine male lako Puang Isa mbawa minynya'-minynya' lan bittolo' pualam to gaja suli' allinna, to waka' busarungngu' digaraga. Ia tonna cumadokkomo Puang Isa kumande, nale'toi joo bittolo' natua'i joo minynya'-minynya' de' ulun-Na Puang Isa.

⁴ Ba'tu pira-pira tau ntuu jio magalli, anna sipangkada-kada nakua, "Ah, apara ia bua'na joo minynya'-minynya' dipaboro-boro?

⁵ Na ia joo wa'ding dibaluk la'bi tallu ratuh dinar, na ia to allinna diben tokaasi-asi." Magalli tuu lako tau lako joo baine.

⁶ Apa nakua Puang Isa, "Eloranni ia! Danggi' mirekaii! Melo to napugauk lako Aku'.

⁷ Ia to tokaasi-asi, la den punala bang ia lan tangnga-tangngami. Na ia ke madoang kamu' ntulungngi, wa'ding bang ia moi piran. Apa ia tee Aku' te'da kutorro tarruh lan tangnga-tangngami.

⁸ Ia tee baine mpugaukmi ia to pakullena. Naminynyakki jolomo' la mpasadiai to kadilamunan-Ku'.

⁹ La miingaran tee kadang-Ku' kumua, umbo-umbo dinii lan tee lino mpangpeissenan Kareba Kasalamatan, tuli la dicurita todai to apa napugauk joo baine, dinii nningaranni!"

¹⁰ Yudas Iskariot, iamo sala mesa'na to sangpulo dua anak gurun-Na Puang Isa, male lako kapala imang, la mpangpejokkoan Puang Isa.

¹¹ Liwa' sannang tuu lako kapala imang ssa'dingngi, namangngaku la mbenni doi'. Nnangahmi wattu melo to Yudas Iskariot la nanii mpangpejokkoan Puang Isa.

¹² Ia tonna allo bungahna pangramean ngkande Roti Tangkeragi, iamo to allo panggeresan bembala' kande Paskah, mekutanami to anak gurun-Na Puang Isa nakua, "Oo Puang, umbora to takadoangngi, la kinii mpasadianki' kande Paskah?"

¹³ Jaji nasuami Puang Isa to dua anak gurun-Na nakua, "Malemo kamu' sola dua lako kota, na la sitammu kamu' mesa' muane mbawa busu ponno wai. Male kamu' sola,

¹⁴ ammipekutananni lako ampu bola to nanii mentama kumua: napekutanan Gurungki', 'Umbora to la kunii ngkande kande Paskah sola anak gurung-Ku'.'

¹⁵ La napakitan kamu' ngenan maluah jao loteng to sadia sola parewananna la dipake. Pasadian ngasanki' ntuu jio."

¹⁶ Malemi tama kota sola dua, naampa' ngasanni susi to napauanni Puang Isa. Napasadiami to kande Paskah.

¹⁷ Ia tonna bongimo, ratumi Puang Isa sola anak gurun-Na.

¹⁸ Ia tonna kumande ngasan unapa, nakuamo Puang Isa, "La miingaran tee kadang-Ku' kumua, den kamu' mesa' la mpangpejokkoanna', to kusolan kumande tee too!"

¹⁹ Gaja sussami to anak gurun-Na tonna sa'dingngi to Puang Isa mangkada susi joo, anna pada mekutana nakua, "Oo Puang, tantu te'da na aku' tasanga?"

²⁰ Mebalimi nakua, "Sala mesa'mi tee sangpulo dua kusinduan kumande.

²¹ Ia tee Aku' Anak Mentolino, nang la matena', susi to diuki' lan Sura' Allataala. Apa macilaka to tompangpejokkoanna'. La'bi melo ia, kenna danggi' pissen nadijajian."

²² Ia tonna kumandemo sola ngasan, naalami Puang Isa joo roti, namangkurru sumanga' lako Puang Allataala, namane' nti'pek-ti'pekki, anna benni anak gurun-Na nakua, "Alai mikandei, batang kale-Ku' tee."

²³ Mangkai joo, nnalami isotan anggoro', namangkurru sumanga' lako Puang Allataala, namane' mbenni anak gurun-Na, anna mangngiso' anggoro' sola ngasan.

²⁴ Nakuamo Puang Isa, "Rara-Ku' tee, to mpaassah basse-Na Puang Allataala, rara to dipato'do la ndampangan buda tau.

²⁵ La miingaran tee kadang-Ku' kumua, te'damo kulanniso' pole'pa anggoro', ke te'dapi naratu Puang Allataala mangparenta susi Raja. Iapi joo wattu kumane' nniso' anggoro' baru lan Kaparentan-Na."

²⁶ Mangkai joo, mpakkelonganmi kelong pangpujian, namane' male de' Buntu Zaitun.

²⁷ Mangkai joo, nakuanmi Puang Isa to anak gurun-Na, "La misalaina' sola ngasan. Susi to diuki' lan Sura' Allataala nakua Puang Allataala kumua, 'La kubunoi to tomangrewana, anna sisarak-sarak to bembala'na.'

²⁸ Apa ia ke dipatuo pole'mo' jio mai kamatean, la kujoloi kamu' male re' tana Galilea."

²⁹ Mebalimi Petrus nakua, "Oo Puang, moi nasalai ngasanmiki' titi' mati', te'da kulassalaiki'!"

³⁰ Nakuamo Puang Isa ngkuanni, "Ee Petrus! La muingaran tee kada kupauanko kumua, te'dapa napenduan kekkua to manuk tee bongi, mupentallunmo mpessakkannina'."

³¹ Mattongan-tonganni Petrus mebali nakua, "Oo Puang, moi antapada mate, nang te'da kulampessakkanniki'." Mangkada ngasanni to anak gurun-Na susi joo.

³² Ia tonna ratumo Puang Isa lako bara'bah zaitun disanga Getsemani nakuamo lako anak gurun-Na, "Nteemo kamu' cumadokko, kumalepa massambajang."

³³ Nasolanmi to Petrus, Yakub na Yahya. Mangpamulami masussa penawan-Na, nagaja parri' too nasa'ding.

³⁴ Nakuamo lako joo tallu anak gurun-Na, "Liwa' masussanna penawang-Ku', susi to kumua la matemo'. Torromo kamu' ntee, tapada merroja."

³⁵ Malemi ba'tu pirang-pirang tengkan, nasuju' massambajang nakua, "Oo Ambe', te'da to apa tanglawa'ding jaji, ke Kita'. Lendokanni tee kamaparrisan jio mai kale-Ku', ke wa'dingngi. Apa tangngia pakkaeloran-Ku' to la jaji, apa pakkaeloran-Ta' Kita'."

³⁶ (14:35)

³⁷ Mangkai joo, polemi Puang Isa lako to nanii tallu anak gurun-Na, natimba'i simammasan. Nakuamo lako Petrus, "Ee Simon, mamma'rokoka? Tangmukulle unamoraka merroja sangjang bang?"

³⁸ Nakua toopa, "Majaga kamu', mimassambajang too, danggi' mituru'i ke disede kamu' mpugauk dosa. Sitonganna madoang to penawammi mpugauk katonganan, apa te'da mikullei, sanga malamma to sipa' tolino."

³⁹ Male pole' omi Puang Isa massambajang, na ia to passambajang-Na susi una to jolona.

⁴⁰ Mangkai joo, polemi lako to nanii tallu anak gurun-Na, natimba'i omi simammasan, sanga gaja rojai. Te'da naissen to apa la napau lako Puang Isa.

⁴¹ Ia tonna mangpentallunnamo pole, nakuanmi to anak gurun-Na, "Mamma' bang unapara kamu'ka mpessau bo'jo'mi? Ganna'mi! Nadete'mi wattung-Ku' tee Aku', Anak Mentolino, la dipangben lako kuasanna tomadosa.

⁴² Mi'cokmo kamu', tamale. Kitari! Ia to tolampangpejokkoanna', ratumi."

⁴³ Ia tonna mangkada unapa Puang Isa, ratumi Yudas, to sala mesa'na anak gurun-Na, ssolan buda tau sitakin pa'dang sola mbawa tarasulu', to nasua kapala imang, guru agama na pekaamberan to-Yahudi.

⁴⁴ Mangka jolomo joo tompangpejokkoanni mpaui lako tuu lako tau kumua, "Ia to tau kuudung, iamo taunna. Jokkomi, namijagai meloi mibawa."

⁴⁵ Ratumi lako ntuu joo ngenan, ta'pa malemi Yudas lako Puang Isa namangkada nakua, "Oo Guru!" anna udungngi.

⁴⁶ Na ia joo tobuda ratu sola Yudas, njokkomi Puang Isa anna pumpungngi.

⁴⁷ Apa sala mesa'na to tau jio, ta'pa nnonok pa'dangna, napa'dangngii to kaunanna Imang Lompo, nata'tak to talinganna.

⁴⁸ Nakuanni Puang Isa tuu lako tau, "Misangaraka parampo'na', ammiratu sitakin pa'dang sola mbawa tarasulu' la njokkona'?

⁴⁹ Allo-alloki' sola ke mangngajahhina' jio Bola Puang Allataala na te'da mijokkona'. Apa nang la jajimi susi joo, dikua anna jaji to diuki' lan Sura' Allataala."

⁵⁰ Sipalaianmi to anak gurun-Na Puang Isa ssalaii.

⁵¹ Den tokallolo, medodo bangri, undi nturu' Puang Isa. La najokko toda tau,

⁵² apa nalossokanni to dodona, namale kinjara' mangkale-kale.

⁵³ Malemi tuu lako tau ssolanni to Puang Isa lako bolana Imang Lompo. Ia to kapala imang, guru agama na pekaamberan to-Yahudi sirempun ngasanni ntuu jio.

⁵⁴ Naturu'i mambela-bela bangngi Petrus to Puang Isa, ratu lako rante bolana Imang Lompo. Ntuu jio nanii Petrus cumadokko sola pangjaga mendarang.

⁵⁵ Ia to kapala imang sola padanna Pangbicara Agama mpengkulle-kullei nnampa' kasa'bian tangtongan, la nanii mpasalai to Puang Isa, anna wa'ding dipangpebunoan, apa te'da naampa' kumua mpugaukki kasalan.

⁵⁶ Moi buda tau menjaji sa'bi tangtongan, apa ia to kasa'bianna, sisala ngasan bang.

⁵⁷ Denmi ba'tu pira-pira tau ke'deh, mpau kasa'bian tangtongan nakua,

⁵⁸ "Denmo kisa'dingngi tee tau nakua, 'La kuro'pokan tee Bola Puang Allataala pangkabua' tolino, na tallung allora kunii mpake'dehhi to laenna, to tangngia pangkabua' tolino.'"

⁵⁹ Apa ia to kasa'bianna tuu lako tau, sisala ngasan bang una.

⁶⁰ Ke'dehmi joo Imang Lompo, namangkada lako Puang Isa nakua, "Te'daraka mulampebalii to diparapasanko?"

⁶¹ Apa kamma' bangngi to Puang Isa. Te'da bang namebali. Pissenpa to Imang Lompo mekutana nakua, "Ikomoraka Raja Mangpasalama', Anak Allataala to disompa?"

⁶² Mebalimi nakua, "Ie', Aku'mo. La mikitana' tee Aku', Anak Mentolino, cumadokko jio sa'de kanan-Na Puang Allataala to makuasa, na la ratuna' jao mai langi' lan saleu'."

⁶³ Gaja gallii joo Imang Lompo anna ca'ce-ca'cei to pakeanna namangkada nakua, "Te'damo nadiparallui to sa'bi.

⁶⁴ Misa'ding kalenamo to kadan-Na, kumua ncapa'i Puang Allataala. Ia tee too, matumbara kamu' pahangmi?" Mesa' kada ngasanmi nakua, "Madosai to Puang Isa, sipato'mo Ia ke dibunoi."

⁶⁵ Den ba'tu pira-pira tau ncikkudui to Puang Isa, nasapu'i to lindo-Na, nasijangguru'i, nakuanni, "Ee nabi! Tappuike', indara to njangguru'ko?" Ia to tomangjaga jio mentama toda ntampelengngi.

⁶⁶ Jio bang unapa rante bola to Petrus, naratu ntuu jio mesa' baine kaunanna Imang Lompo.

⁶⁷ Ia tonna kitami to Petrus mendarang, nakaje'jekmi nakuanni, "Tangngiko todaraka sibawanna joo Puang Isa to-Nazaret."

⁶⁸ Apa messakkanni Petrus nakua, "Te'da kupahangngi. Te'da too kuissenni apara tuu musanga." Malemi Petrus lako babangan. [Ia joo wattu, kekkuami to manuk.]

⁶⁹ Ia joo baine kaunan nakaje'jekki to Petrus, anna kuanni to tau ntuu jio, "Ia toda tee tau sala mesa'na anak gurun-Na joo tau."

⁷⁰ Apa messakkan omi Petrus. Te'da namasai joo, ia tuu lako tau ke'deh ntuu jio ngkuan omo Petrus, "Te'damo nasalai, anak gurun-Nako, nasaba' to-Galileako."

⁷¹ Massapah tonganmi to Petrus nakua, "Tampak ropu ke la kuissenni joo tau misanga!"

⁷² Ia joo wattu kekkua penduanmi to manuk. Naingaranmi Petrus to apa mangka nakuanni Puang Isa kumua, "Te'dapa nakekkua penduan to manuk, mupentallunmo mpessakkannina'." Ta'pa kumarrakmi Petrus nna'de-a'de.

Markus

Video Markus 14

Ikuti Kami:

KONTAK | PARTISIPASI | DONASI