Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Are Paska ban Paraya’an Roti Se Ta’ Eragi’i la korang dhu are. Mam-imam kapala ban ru-guru agama nyare jalan baramma carana se terro mega’a Isa tape se ta’ etemmowa oreng, ban baramma se mateyana.

² "Tape ta’ ekenneng jalannagi e baktona paraya’an," ca’na reng-oreng jareya, "dhaggi’ pas baridhu."

³ E settong are Isa badha e Betania, e bengkona Simon se tao andhi’ panyaket kole’ budhuk. E bakto jareya badha oreng babine’ kasorang nyander ka Isa. Babine’ jareya ngeba butol dhari marmar aesse mennya’ ro’om se larang, se ekagabay dhari mo’-ramo’ se ro’om. Teppa’na Isa adha’ar, babine’ jareya mabella butolla, mennya’na laju eserammagi ka serana Isa.

⁴ Reng-oreng se badha e jadhiya badha se padha peggel sarta padha saleng ngoca’, "Apa gunana mennya’ jarowa ewang-buwang?

⁵ Mennya’ jareya ekenneng juwal lebbi dhari tello ratos pesse salaka, pessena ekenneng bagi ka oreng mesken!" Reng-oreng jareya gigir ka babine’ gella’.

⁶ Tape Isa adhabu, "La dina, ra, panneng! Arapa ba’na ma’ masossa babine’ reya? Oreng reya ngalakone barang se bagus ka Sengko’.

⁷ Oreng mesken salanjangnga badha e antarana ba’na, ban bila’a bai mon ba’na akarep, ba’na bisa nolong reng-oreng jareya. Tape Sengko’ ta’ salanjangnga apolong ban ba’na.

⁸ Babine’ reya ngalakone barang se ekenneng lakone aba’na. Sengko’ eserame mennya’ ro’om, eparanta kaadha’ sabellunna Sengko’ ekoburragi.

⁹ Paparcaja, ya! E saantero dunnya, e dhimma’a bai Kabar Bagus dhari Allah eberta’agi oreng, lalakonna babine’ reya bakal ecareta’agiya keya menangka parengeddan ka aba’na."

¹⁰ Saellana jareya Yudas Iskariyot, sala settong dhari moredda Isa se dhubellas oreng jarowa, entar ka mam-imam kapala, maksodda akiyanadana Isa ka reng-oreng jareya.

¹¹ Reng-oreng jareya ce’ peragga ngedhing oca’na Yudas, sarta ajanji aberri’a pesse ka Yudas jareya. Daddi Yudas laju molae nyare kasempadan se akiyanada ka Isa se epassra’agiya ka mam-imam kapala jareya.

¹² E are parmola’an e dhalem Paraya’an Roti Se Ta’ Eragi’i, teppa’ baktona oreng nyambelli dumba Paska, red-moredda Isa atanya, "Esadhiya’agiya e ka’imma dhadha’aran Paskana Panjennengngan?"

¹³ Isa laju makon moredda kadhuwa, dhabuna, "Kassa’ entar ka kottha, e dhissa’ ba’na bakal tatemmowa ban oreng lalake’ se ngeba kendhi aesse aeng. Toro’ bunte’ oreng jareya

¹⁴ ka bengko se emaso’e oreng jareya. Ba’na pas ngoca’ ka se andhi’ bengko, ‘Ca’epon Guru, e ka’imma Guru sareng red-moredda se adha’ara dhadha’aran Paska?’

¹⁵ Oreng jareya tanto laju noduwagi ka ba’na kennengngan se lebar e bagiyan attas. Kennengngan jareya la eator, genna’ ban pakakassa. Paranta kabbi e jadhiya kaangguy Sengko’ ban ba’na."

¹⁶ Mored se kadhuwa jareya mangkat ka kottha. E jadhiya se kadhuwa jareya nemmo akantha apa se la edhabuwagi Isa kabbi; se kadhuwa jareya laju maranta dhadha’aran Paska.

¹⁷ E baja malem Isa rabu ka jadhiya asareng ban moredda se dhubellas oreng.

¹⁸ Teppa’na padha adha’ar, Isa adhabu, "Edhingngagi: e antarana ba’na se sateya reya ngakan abareng ban Sengko’, badha settong se bakal akiyanadana Sengko’."

¹⁹ Ngedhing dhabuna Isa jareya red-moredda padha takerjat, laju padha atanya ate-gante, "Tantoepon se emaksod Panjennengngan banne abdina, ta’ enggi?"

²⁰ Dhabuna Isa, "Oreng jareya sala settong e antarana ba’na se dhubellas reya, se ngakan sapereng bi’ Sengko’.

²¹ Pajat Pottrana Manossa bakal seda’a akantha se la esebbuttagi e dhalem Alketab. Tape calaka’ onggu oreng se akiyanadi Pottrana Manossa jareya! Lebbi becce’ ja’ sakenga oreng jareya ta’ elahirragi sakale!"

²² Teppa’na se laen padha ngakan, Isa mondhut roti laju adu’a asokkor ka Allah. Rotina pas ethok-ketthok bi’ astana, laju eparengngagi ka red-moredda sambi adhabu, "Mara kala’ pas kakan, areya’ Tang badan."

²³ Saellana jareya Isa laju mondhut pialana anggur, pas adu’a asokkor ka Allah, sarta marengngagi piala jareya ka red-moredda; red-moredda jareya padha ngenom anggur jareya.

²⁴ Saellana jareya Isa adhabu, "Areya’ Tang dhara se ngessa’agi parjanjiyanna Allah, dhara se epangalocor kaangguy oreng sabannya’na.

²⁵ Paparcaja, ya: Sengko’ ta’ kera ngenom anggur reya pole sampe’ baktona Sengko’ ngenom anggur se anyar abareng ban ba’na e Dunnyana Rama Se Anyar."

²⁶ Samarena jareya Isa ban red-moredda anyanye amolja’agi Allah. Saellana laju padha mangkat ka Gumo’ Jaitun.

²⁷ Isa pas adhabu pole ka red-moredda, "Ba’na bakal padha’a buru adina’agi Sengko’. Sabab e dhalem Alketab esebbuttagi, ‘Allah bakal mateyana se ngowan, ban ba-dumbana bakal asalebbudana.’

²⁸ Tape saellana Sengko’ epaodhi’ pole, Sengko’ ajangadha’ana ba’na ka Galilea."

²⁹ "Bunten," ca’na atorra Petrus, "sanajjan se laen adinggallagi Panjennengngan, abdina bunten, ta’ kera."

³⁰ Dhabuna Isa ka Petrus, "Kaenga’e, ya, malem reya keya, sabellunna ajam akongko’ dhu kale, ba’na la tello kale mongkere Sengko’."

³¹ Petrus nyaot epaterrang, "Sanare abdina kodu mate asareng Panjennengngan, abdina ta’ kera ngoca’ ta’ kennal ka Panjennengngan!" Ban red-moredda se laen ngoca’ kantha jareya keya.

³² Isa ban red-moredda napa’ ka Getsemani; Isa laju adhabu ka red-moredda jareya, "Ba’na toju’ e dhinna’ gallu sabatara Sengko’ entara adu’a."

³³ Isa laju ngajak Petrus, Yakobus ban Yahya. Panggaliyanna molae arassa sompek tor ngalengsang.

³⁴ "Tang ate ce’ sompegga," ca’na dhabuna ka red-moredda se katello gella’, "sampe’ rassana akantha se mateya. Ba’na neng e dhinna’ gallu, ya, ban aga-jaga!"

³⁵ Isa maso’ ka dhalemman sakone’, laju asojud ka tana sambi adu’a. E dhalem du’ana Salerana nyo’on ka Allah sopaja mon eparengngagi ja’ sampe’ epananggung kasangsara’an rowa.

³⁶ "Rama, Rama kaula," ca’na panyo’onna, "tadha’ barang se mohal monggu ka Junandalem. Lopoddagi Abdidalem dhari kasangsara’an ka’dhinto’. Namong ja’ norodi karep Abdidalem, kadi ponapa ca’epon kasokanna Junandalem."

³⁷ Saellana jareya Isa abali, red-moredda etemmo padha tedhung. Isa adhabu ka Petrus, "Simon, ba’na tedhung, ya? Ta’ bisa, ya, ba’na aga-jaga saejjam balakka’?"

³⁸ Isa laju adhabu ka red-moredda, "Mara aga-jaga ban adu’a me’ olle ba’na ta’ ekenneng coba. Pajat, errohna ba’na endha’ ngalakone barang se bendher, tape ba’na ta’ sanggup sabab tabi’adda manossa reya ta’ kowat."

³⁹ Isa nyengla pole dhari jadhiya, pas adu’a ngangguy ca’-oca’ se padha ban se jang adha’an.

⁴⁰ Samarena pas abali pole ka kennengnganna red-moredda ban red-moredda jareya etemmo tedhung pole, sabab ce’ ngantogga. Reng-oreng jareya ta’ tao kodu mator baramma ka Isa.

⁴¹ E bakto abali katellokaleyanna, Isa adhabu ka red-moredda, "Ba’na gi’ tedhung ban aistirahat, ya? Ella, la cokop! Sateya la napa’ baktona Pottrana Manossa kodu epassra’agi ka reng-oreng se dusa.

⁴² Mara jaga, mara ajalan! Arowa’ oreng se akiyanadi Sengko’ la dhateng!"

⁴³ Teppa’na Isa gi’ abu-dhabu, pas dhateng Yudas, iya areya sala settong dhari moredda. Yudas etoro’ bunte’ oreng sabannya’na se padha ngeba peddhang ban thong-penthong. Reng-oreng jareya eotos mam-imam kapala, ru-guru agama ban pin-pamimpin Yahudi.

⁴⁴ Se akiyanat jareya la aberri’ tandha ka reng-oreng se sabannya’na gella’, oca’na, "Oreng se eseyom bi’ kaula, ganeka orengnga. Tangkep, pas bakta, jaga palerres."

⁴⁵ Sanapa’na ka jadhiya, Yudas nyander ka Isa, laju mator, "Guru!" pas nyeyom Isa.

⁴⁶ Reng-oreng se abareng Yudas nyander, Isa etangkep, pas ekalenthong.

⁴⁷ Tape sala settong dhari reng-oreng se badha e jadhiya ngonos peddhangnga laju mokol dunorra imam agung sampe’ kotthong kopengnga.

⁴⁸ Isa laju adhabu ka reng-oreng jareya, "Apa Sengko’ reya oreng jahat, ya, me’ ba’na sampe’ ngeba peddhang ban thong-penthong se mega’a Sengko’?

⁴⁹ Sabban are Sengko’ ngajar e Padalemman Socce e adha’na ba’na, tape bi’ ba’na Sengko’ ta’ epega’. Tape pajat kodu kalakon kantha reya, sopaja kalakon apa se esebbuttagi e dhalem Alketab."

⁵⁰ Red-moredda Isa padha buru, guruna edina’agi.

⁵¹ Badha oreng gi’ dha-ngodha kasorang, pera’ ngangguy kaen linen salambar se ebetbeddagi ka badanna; oreng jareya noro’ bunte’ Isa. Oreng jareya bi’ reng-oreng se bannya’ epega’a,

⁵² tape oreng jareya mokka’ kaenna, pas buru abangkang.

⁵³ Isa laju egiba ka bengkona imam agung. E jadhiya akompol mam-imam kapala, pin-pamimpin Yahudi ban ru-guru agama.

⁵⁴ Petrus noro’ bunte’ Isa dhari jauna, maso’ ka taneyanna bengkona imam agung. E jadhiya Petrus toju’ maanga’ badanna e seddi’na kampowan, apolong ban para pangawal.

⁵⁵ Mam-imam kapala ban sakabbiyanna Mahkamah Agama aehteyar nyare bukte se masala’a Isa sopaja bisa’a eokom mate, tape ta’ nemmo.

⁵⁶ Bannya’ sakse se epadhateng egabaya sakse palsu, tape katerranganna reng-oreng jareya ta’ padha se settong ban settongnga.

⁵⁷ Saellana jareya pas badha reng-oreng se manjeng aberri’ kasakseyan palsu kantha reya,

⁵⁸ "Kaula mereng oreng paneka ngoca’ sapaneka, ‘Sengko’ magujura Padalemman Socce gabayanna manossa reya, ban saellana olle tello are Sengko’ maddegga pole se banne gabayanna manossa.’"

⁵⁹ Tape katerranganna reng-oreng jareya tadha’ se cocoga keya se settong ban settongnga.

⁶⁰ Imam agung jareya pas manjeng e adha’na reng-oreng se badha e jadhiya, pas atanya ka Isa, "Apa ba’na ta’ nyaodana se earannagi reng-oreng reya?"

⁶¹ Tape Isa mendel, ta’ adhabu pa-apa sakale. Imam agung gella’ atanya pole, "Apa ba’na reya Rato Panyalamet, Pottrana Allah Se Mahakudus?"

⁶² "Iya, bendher," ca’na dhabuna Isa, "ban ba’na bakal nangaleyana Pottrana Manossa alenggi e kanganna Allah Se Mahakobasa, ban rabu e dhalem ondhem dhari langnge’!"

⁶³ Daddi imam agung pas bit-nyebbit kalambina sarta ngoca’, "Samangken pon ta’ parlo sakse pole!

⁶⁴ Sampeyan ampon padha meyarsa dibi’ ca’-oca’na oreng paneka se metenna asmana Allah. Samangken ponapa potosanna sampeyan?" Reng-oreng jareya kabbi padha motose ja’ Isa sala ban kodu eokom mate.

⁶⁵ Badha reng-oreng se molae nyopae Isa, socana etotobi bi’ rambing sarta laju epokole. "Mara tebbak," ca’na reng-oreng jareya, "sapa se mokol ba’na?" Wal-pangawal ro’-noro’ kantha jareya keya.

⁶⁶ Sabatara Petrus gi’ badha e taneyan, sala settong dhari bareng bine’na imam agung entar ka jadhiya.

⁶⁷ E bakto nangale Petrus maanga’ badanna e seddi’na kampowan, babine’ jareya mandeng ka Petrus sarta pas ngoca’, "Sampeyan gu ta’ abareng bi’ Isa dhari Nazaret ka’issa’?"

⁶⁸ Tape Petrus mongker. "Sengko’ ta’ tao ban ta’ ngarte apa maksodda ba’na," ca’na Petrus ka barengnga imam agung jareya. Petrus laju nyengga ka labang sakethengnga bengkona imam agung jareya. [E bakto jareya ajam akongko'.]

⁶⁹ Bareng se babine’ gella’ nangale’e Petrus pole, pas ngoca’ ka reng-oreng se badha e jadhiya, "Oreng ganeka pajat sala settong dhari reng-oreng se abareng Isa!"

⁷⁰ Tape Petrus mongker pole. Ta’ abit dhari jareya reng-oreng se badha e jadhiya ngoca’ pole ka Petrus, "Ba’na ta’ bisa mongker pole. Ba’na pajat sala settong dhari red-moredda Isa rowa, sabab ba’na oreng Galilea!"

⁷¹ Petrus pas aso-pesowan sambi ngoca’, "Kaula ta’ kennal ka oreng se ekamaksod bi’ sampeyan ganeka!"

⁷² E bakto jareya keya ajam akongko’ kadhukaleyanna. Ban Petrus laju enga’ apa se edhabuwagi Isa ka aba’na, "Sabellunna ajam akongko’ dhu kale, ba’na la tello kale mongkere Sengko’." Daddi Petrus laju nanges gut-sergudan.

Markus

Video Markus 14

Ikuti Kami:

KONTAK | PARTISIPASI | DONASI