Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Duwo ari lai Ari Rayo Paskah, sarato jo Ari Rayo Roti nan Indak Baragi. Imam-imam kapalo jo guru-guru agamo Yahudi sadang mancari aka, baa caro untuak ka manangkok Isa Almasih sacaro ba anok-anok, supayo dapek mambunuah Baliau.

² "Tapi, jan di kutiko ari rayo ko lai kito lansuangkan, apo nan kito mukasuik tu," kecek urang-urang tu, "baiko bisa mambuwek urang kalibuik."

³ Kutiko Isa Almasih sadang di Betania, di rumah si Simon, nan dawulu bapanyakik kulik nan babahayo, ado surang padusi nan tibo kabake Baliau. Padusi tu mambawok boto pualam, nan barisi minyak arun nan sangaik maha, nan dibuwek dari urek kayu nan sangaik arun. Kutiko Isa Almasih sadang makan, mako inyo bukaklah sumbek boto tu, sudah tu inyo tuwangkan minyak arun tu ka ateh kapalo Baliau.

⁴ Babarapo urang nan ado disinan bi bangih, sambia mangecek sasamo inyo, "Apo gunonyo minyak arun tu dibuwang-buwang?

⁵ Minyak tu bisa dijuwa, jo arago nan labiah dari tigo ratuih pitih perak, sudah tu pitihnyo bisa di agiahkan ka urang-urang nan bansaik!" Mako bi bangihlah urang kabake padusi tu.

⁶ Tapi Isa Almasih bakato, "Padiyakan sajolah inyo! Baa pulo mangko angku-angku nan seso? Inyo mangarajokan sasuatu nan elok sarato nan tapuji kabake Ambo.

⁷ Urang-urang nan bansaik, ka salamonyo tatap ado di antaro angku-angku. Satiyok wakatu, jikok angku-angku lai namuah, angku-angku bisa manolong inyo. Tapi nan Ambo ko indak ka salamonyo doh babaua jo angku-angku.

⁸ Urang padusi ko lah mangarajokan apo nan bisa inyo karajokan. Inyo lah malimau-i Ambo jo minyak arun, sabalun tibo ari pangubuaran Ambo.

⁹ Picayolah! Dima sajo di ateh dunia ko, Injil nan dari Allah dibaritokan, mako apo nan lah dikarajokan dek urang padusi ko, ka tatap dicuritokan pulo sabagai untuak mangana inyo."

¹⁰ Si Yudas Iskariot, salah surang dari pangikuik Isa Almasih nan duwo baleh, inyo bamukasuik nak ka mangkianaik-i Isa Almasih, mako payilah inyo kabake imam-imam kapalo.

¹¹ Sanang bana ati imam-imam kapalo, dek mandangakan mukasuik si Yudas tu, inyo bajanji ka mambarikan pitih ka si Yudas. Muloi dari sajak itu, si Yudas taruih mancari-cari kutiko nan baiak, supayo dapek manyarahkan Isa Almasih.

¹² Di ari nan partamu, di Ari Rayo Roti nan Indak Baragi -- di kutiko urang sadang mandabiah domba Paskah -- pangikuik-pangikuik Isa Almasih, bi batanyo kabake Baliau, "Dima nan katuju di Angku tampaiknyo untuak makan makanan Paskah, buliah nak kami sadiyokan?"

¹³ Mako disuruahlah dek Isa Almasih duwo urang pangikuik-Nyo, Baliau bakato, "Payilah ka kota, tibo disinan angku-angku ka basuwo jo surang laki-laki, nan mambawok kendi barisi ayie. Turuikkanlah inyo

¹⁴ taruih, sampai ka rumah nan dimasuak-inyo, sudah tu katokanlah kabake urang nan punyo rumah tu, 'Angku Guru batanyo, dima tampaiknyo nan bisa dipakai, untuak tampaik Baliau mamakan makanan Paskah jo pangikuik-pangikuik-Nyo?'

¹⁵ Mako urang nan punyo rumah tu ka manunjuakkan kabake angkau, tampaik nan cukuik gadang di ateh loteng. Tampaik tu lah basegehi, langkok jo alaik-paragaiknyo. Mako sadiyokanlah sagalo sasuatunyo untuak kito di tampaik tu."

¹⁶ Sudah tu kaduwo urang pangikuik Baliau tu, payi ka kota. Tibo disinan, inyo mandapati sagalo sasuatunyo, tapek bana bakcando nan lah dikatokan dek Isa Almasih. Mako disadiyokannyolah makanan Paskah di tampaik tu.

¹⁷ Malamnyo, tibolah Isa Almasih sarato jo pangikuik-Nyo nan duwo baleh.

¹⁸ Samantaro inyo sadang bi makan, mako bakatolah Isa Almasih, "Dangakanlah nan Ambo katokan ko: salah surang di antaro angku-angku, nan kiniko makan samo-samo jo Ambo ko, ado nan ka mangkianaik-i Ambo."

¹⁹ Baru mandanga nan baitu, sangaik ibonyo ati pangikuik-pangikuik Baliau tu. Satiyok-tiyok inyo tu, muloi bi batanyo kabake Baliau, "Kan indak ambo doh urangnyo Ngku, nan Angku katokan tu?"

²⁰ Baliau manjawab, "Urang tu adolah salah surang dari angku-angku nan duwo baleh ko, nan makan sapiriang jo Ambo.

²¹ Batua Anak Manusia ka mati bakcando nan tatulih di Alkitab. Tapi baralah ka cilakonyo urang nan mangkianaik-i Anak Manusia tu! Labiah elok lai di urang tu jikok inyo indak dilayiekan ka dunie ko!"

²² Kutiko urang-urang tu sadang bi makan, Isa Almasih ma ambiak roti sarato manayiakkan dowa syukur kapado Allah. Kudian Baliau mambalah-balah roti tu jo tangan-Nyo, sudah tu Baliau barikan kabake pangikuik-pangikuik-Nyo, sambia bakato, "Ambiaklah ko, makan lah, ikolah tubuah Ambo."

²³ Sasudah tu Baliau ma ambiak cawan anggur. Baliau manayiakkan dowa syukur pulo kapado Allah, mako Baliau barikan pulo cawan tu kabake pangikuik-Nyo. Kudian kasadonyo urang-urang tu bi maminun anggur tu.

²⁴ Baliau bakato pulo, "Ikolah darah Ambo, nan mansahkan pajanjian Allah, darah nan dicurahkan untuak banyak urang.

²⁵ Picayolah: Ambo indak ka maminun anggur ko lai, sampai tibo masonyo isuak, kutiko Ambo maminun anggur nan baru, samo jo angku-angku di dalam Karajaan Allah."

²⁶ Kudian urang-urang tu bi malagukan lagu pujian. Sasudah tu inyo bi payi ka Bukik Zaitun.

²⁷ Kudian Isa Almasih bakato kabake pangikuik-Nyo, "Angku-angku kasadonyo ka bi lari maninggakan Ambo. Dek karano di Alkitab ado tatulih nan bakcando iko, 'Allah ka mambunuah tukang gubalonyo, mako dombanyo ka baserak-serak.'

²⁸ Tapi sasudah Ambo di iduikkan baliak dari mauik, mako Ambo ka mandawului angku-angku ka Galilea."

²⁹ "Indak Ngku," kecek si Petrus, "biyapun kasadonyo urang-urang ko bi maninggakan Angku, nan ambo indak, ambo ka tatap jo Angku kama Angku payi."

³⁰ "Kana-ilah nan Ambo katokan ko," kecek Isa Almasih, "malam ko juwo, sabalun ayam bakukuak duwo kali, angkau lah tigo kali ma engkari Ambo."

³¹ Si Petrus manjawab ba iyo bana, "Biyapun ambo ka musti mati, nan ambo ka tatap jo Angku juwo, ambo ka tatap mangaku, baraso ambo adolah pangikuik Angku!" Pangikuik-pangikuik nan lain, bi mangatokan baitu pulo.

³² Sampailah Isa Almasih sarato jo pangikuik-Nyo di tampaik nan banamo Getsemani, Baliau bakato ka pangikuik-Nyo, "Duduaklah disiko, samantaro Ambo payi badowa."

³³ Mako Baliau ajaklah si Petrus, si Yakobus, sarato jo si Yahya payi samo-samo jo Baliau. Ati Baliau sadiah bacampua rasah.

³⁴ "Ibo sangaik rasonyo ati Ambo," kecek Isa Almasih ka pangikuik-Nyo tu, "rasonyo bakcando urang nan ka mati parasaan Ambo. Tagaklah disiko, bajago-jagolah!"

³⁵ Baliau payi agak manjauah, sudah tu Baliau tasungkua ka tanah, muloilah Baliau badowa. Di dalam dowa-Nyo Baliau mamintak, jikok buliah Baliau janlah mangalami maso sansaro tu.

³⁶ Baliau bakato, "Bapak, oih Bapak, indak ado doh sasuatu nan mustayie dek Angkau. Ilakkanlah sansaro ko dari Ambo. Tapi janlah manuruikkan kandak Ambo, tapi kandak Bapaklah nan ka tajadi."

³⁷ Sasudah tu Isa Almasih babaliak, Baliau dapek-i pangikuik-pangikuik-Nyo sadang talalok. Baliau batanyo ka si Petrus, "Oih Simon, talalok pulo angkau? Indak talok doh di angkau bajago-jago agak sajam?"

³⁸ Mako bakatolah Baliau kabake pangikuik-pangikuik-Nyo, "Bajago-jagolah, sarato badowalah supayo angku-angku jan sampai mangalami cobaan. Batua roh angku-angku niyo nak mangarajokan apo nan baiak, tapi di angku-angku indak talok, dek karano tabiyaik manusia tu lamah."

³⁹ Sakali lai Baliau payi badowa, Baliau badowa sarupo jo kato-kato nan Baliau katokan cako juwo.

⁴⁰ Sasudah tu Baliau babaliak pulo ka pangikuik-pangikuik-Nyo, Baliau dapek-i urang-urang tu sadang talalok pulo, dek karano matonyo sangaik mangantuak. Mangkonyo urang-urang tu indak tantu lai apo nan ka dikatokannyo kabake Baliau.

⁴¹ Kutiko Isa Almasih babaliak nan katigo kalinyo kabake pangikuik-Nyo, Baliau bakato, "Bi lalok juwo lai, bi balapeh panek juwo lai angku-angku? Alah jadi tu! Alah tibo wakatunyo Anak Manusia ka disarahkan ka tangan urang-urang badoso.

⁴² Jagolah lai, molah kito barangkek. Liyeklah tu! Urang nan mangkianaik-i Ambo lah tibo!"

⁴³ Samantaro Isa Almasih sadang mangecek bakcando itu, tibolah si Yudas, salah surang dari pangikuik Baliau nan duwo baleh tu. Samo-samo jo inyo tibo pulo urang banyak, nan mambawok padang jo palakak. Urang-urang tu disuruah dek imam-imam kapalo, dek guru-guru agamo sarato dek pamimpin-pamimpin Yahudi.

⁴⁴ Si Pangkiyanaik lah manunjuakkan suatu tando ka urang-urang tu. "Nama urang nan den ibu, itulah Urangnyo" kecek si Yudas ka urang-urang nan ka manangkok tu, "Tangkoklah Inyo, sudah tu, bawoklah Inyo jo panjagoan nan arek."

⁴⁵ Dikutiko si Yudas tibo, inyo lansuang payi mandakek kabake Isa Almasih sambia manyapo, "Angku Guru!" sudah tu inyo ibu Baliau.

⁴⁶ Kudian urang-urang nan tibo samo-samo jo si Yudas tu, manangkok Isa Almasih sarato mampilanggui Baliau.

⁴⁷ Tapi salah surang dari urang nan ado disinan, mancabuik padangnyo, mako inyo cetehlah talingo pisuruah imam basa tu sampai putuih.

⁴⁸ Mako bakatolah Isa Almasih kabake urang-urang tu, "Apokoh Ambo ko urang jahek, mangkonyo angku-angku tibo jo padang sarato jo palakak untuak ka manangkok Ambo?

⁴⁹ Satiyok ari Ambo ma aja di Rumah Tuhan di adok-an angku-angku, tapi angku-angku indak manangkok Ambo doh. Tapi, iyolah samustinyo baitu, supayo basuwoanlah apo nan lah tatulih di Alkitab."

⁵⁰ Kasadonyo pangikuik Isa Almasih, bi tabang ambua lari maninggakan Baliau.

⁵¹ Ado surang anak mudo, inyo hanyo mamakai salai kain untuak manutuik-i badannyo, inyo tu sato pulo manuruikkan Isa Almasih. Urang-urang nan banyak bamukasuik pulo nak ka manangkok inyo,

⁵² mako inyo lapehkanlah kainnyo tu, sudah tu inyo lari batilanjang.

⁵³ Isa Almasih dibawok ka rumah imam basa. Disinan lah bakumpua kasadonyo imam kapalo, pamimpin Yahudi, sarato jo guru-guru agamo.

⁵⁴ Si Petrus payi manuruikkan Isa Almasih dari jauah, sampai masuak ka alaman rumah imam basa. Tibo disinan inyo duduak dakek api untuak ma angekkan badan, samo jo pangawal-pangawal.

⁵⁵ Imam-imam kapalo, sarato jo kasadonyo anggota Mahkamah Agamo Yahudi, ba usawo untuak mancari bukti-bukti nan ka dapek manyalahkan Isa Almasih, supayo Baliau bisa dijatuahi ukunan mati. Tapi indak ciyek juwo doh bukti nan didapek dek urang-urang tu.

⁵⁶ Sambuah sasi nan di imbau untuak mambarikan katarangan nan palasu taradok diri Isa Almasih, tapi katarangan urang-urang tu, antaro nan surang jo nan lain balawanan.

⁵⁷ Ado babarapo urang sasi tagak, inyo mambarikan katarangan nan palasu tantang diri Isa Almasih bakcando iko,

⁵⁸ "Kami ado mandangakan Urang ko mangatokan, 'Ambo ka maruntuahi Rumah Allah nan dibuwek dek manusia ko, sasudah tigo ari, Ambo ka managakkan nan lain, nan indak dibuwek dek tangan manusia.'"

⁵⁹ Tapi, katarangan urang-urang tu pun balawanan, antaro nan ciyek, jo nan ciyek lai.

⁶⁰ Mako tagaklah imam basa, di adok-an kasadonyo urang-urang tu, inyo batanyo kabake Isa Almasih, "Apokoh Angkau indak manulak, jo sagalo tuduahan nan dibabankan kabake Angkau tu?"

⁶¹ Tapi Baliau anok sajo. Indak ciyek juwo doh nan dijawab dek Baliau. Mako batanyo pulolah imam basa tu sakali lai kabake Baliau, "Apokoh Angkau Rajo Panyalamaik, Anak Allah Nan Mahasuci?"

⁶² "Ambolah Urang-Nyo," kecek Isa Almasih, "sudah ko kasadonyo angku-angku ka maliyek Anak Manusia ko, duduak di sabalah suwok Allah Nan Mahakuwaso, Isuak Inyo ka tibo baliak dalam awan dari langik!"

⁶³ Mandangakan nan baitu, imam basa tu mancabiak-cabiak-i bajunyo sambia bakato, "Indak paralu lai di kito sasi!

⁶⁴ Kalian lah mandangakan sandiri kato-kato-Nyo nan mampasando-sandokan Allah. Kiniko apo lai kaputusan dari angku-angku?" Kasadonyo urang-urang tu lah supakaik mamutuihkan, baraso Isa Almasih sabana basalah, patuik bana di ukun mati.

⁶⁵ Ado babarapo urang nan disinan, inyo lah muloi maliyua-i Baliau, urang-urang tu manyawok-i mato Baliau, sudah tu inyo tinju, kudian urang tu batanyo, "Cubolah takok, siyakoh urang nan maninju Wa-ang ko?" Pangawal-pangawal pun sato pulo manampa Isa Almasih.

⁶⁶ Samantaro si Petrus sadang ado di alaman, salah surang palayan nan padusi dari imam basa, datang ka sinan.

⁶⁷ Kutiko inyo maliyek si Petrus sadang basangai di dakek api, inyo caliak bana roman si Petrus jaleh-jaleh, sudah tu inyo batanyo, "Angkau kan iyo sato pulo, manuruikkan si Isa urang Nazaret tu?"

⁶⁸ Tapi si Petrus indak mangaku. "Ambo indak tawu, ambo indak mangarati apo nan angkau mukasuikkan," keceknyo ka palayan tu. Sudah tu, si Petrus payi ka pintu kaporo rumah imam basa tu. [Sakutiko tu juwo ayam bakukuak.]

⁶⁹ Sasudah tu, nampak pulolah baliak si Petrus dek palayan nan padusi tu, inyo mangecekkan pulo kabake urang-urang nan ado di sinan, "Inyo ko, iyo tamasuak pangikuik si Isa dari Nazaret pulo ko!"

⁷⁰ Tapi si Petrus indak juwo mangaku. Indak lamo sasudah tu, urang-urang nan ado disinan mangecek pulo ka si Petrus, "Indak dapek dimungkie-i lai, angkau iyo salah surang pangikuik si Isa dari Nazaret tu, dek karano, angkau urang dari Galilea!"

⁷¹ Mako basumpah-sumpahlah si Petrus, inyo mangatokan, "Ambo indak bakatawuan bagai doh, jo Urang nan angku-angku mukasuikkan tu!"

⁷² Sakutiko tu juwo, bakukuaklah ayam nan kaduwo kalinyo. Mako takanalah dek si Petrus, dek karano Isa Almasih lah mangecekkan kabake inyo, "Sabalun ayam bakukuak duwo kali, nan angkau lah tigo kali ma engkari Ambo." Mako manangihlah si Petrus tasadu-sadu.

Markus

Video Markus 14

Ikuti Kami:

KONTAK | PARTISIPASI | DONASI