Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Gee 'o Yesus wakimake 'o nyawa manga gudai yoboano de 'o gigie ma dekuoka wosaude so wogogeruku, de wi do-domoteke yoboa.

² Ge'enaka de wakidotoko wongose 'ato,

³ "Yosanangioka 'o nyawa gee yomamaoku koyomado-do'oawa de duga ka ma Jouka yomasiga-gao; 'ona ge'ena ma Jo'oungu ma Dutu wi kawasa!

⁴ Yosanangioka 'o nyawa gee manga singina 'iga-gamamu; 'ona 'asa ma Jo'oungu ma Dutu wakiaru!

⁵ Yosanangioka 'o nyawa gee manga singina 'ima-ma'ai; ma Jo'oungu ma Dutu 'asa wakidototomo 'awi jaji 'onaka!

⁶ Yosanangioka 'o nyawa gee yonyafisuu yodiai ma Jo'oungu ma Dutu wi mau; 'ona 'asa wakikula sigado yakiduga!

⁷ Yosanangioka nago'ona gee yosimara'ai 'o nyawaka; 'ona mita 'asa ma Jo'oungu ma Dutu wakisimara'ai!

⁸ Yosanangioka 'o nyawa gee manga singina 'itebi-tebini ma Jo'oungu ma Dutu wi bionoka; 'ona 'asa ma Jo'oungu ma Dutu wimake!

⁹ Yosanangioka 'ona gee 'o nyawa yosikakatiai; ma Jo'oungu ma Dutu 'asa wakisironga to 'una 'awi ngowa-ngowaka!

¹⁰ Yosanangioka 'ona gee yamake 'o sangisara 'o nyawano sababu yadiai ma Jo'oungu ma Dutu wi mau; 'ona ge'ena ma Jo'oungu ma Dutu wi kawasa!

¹¹ Niosanangioka ngini nako nisiti-tingoono, nisangisara, de nisigurubungu ma ngale ngoi.

¹² 'O nabii ma sirasi gee ngini koni'iwasi mita yakisangisarakau 'isoka koge'ena. Salingou kaniomore-morene sababu nia parasengi ma amoko daku 'o sorogaaka ma Jou wadua-duangou."

¹³ "Ngini ne'ena 'isoka 'o gasi 'o dunia ma nyawaka. Nako 'o gasi koiosawau, de kaidadiosi yadiai 'iosali? Koi'iwau ma faedaa, so kaya'umo de 'o nyawa yadoko-doko.

¹⁴ Ngini ne'ena 'o darangi 'o dunia ma nyawaka. 'O kota daku 'o gigie ma dekuoka koidadiwa yosidutuluku.

¹⁵ Komoiwa 'o silo yatuuika de 'o pa'udi yositamunuku, ma 'ena ma ngiioka yositodenguku la 'o nyawa 'iodumu 'o woa ma dodaka gee yomasimake.

¹⁶ Koge'enali mita nia darangi ge'ena salingou 'isiwara 'o nyawaka, la 'ona yamake 'okia sonaa niodi-diai yaowa-owa ge'ena, de wisitedene nia Dea 'o sorogaaka."

¹⁷ "'Uwa niongose 'ato ngoi taino ne'ena taisanga 'o Musa wi besesongo de 'o nabii-nabii manga do-dotoko. Ngoi taino kotaisanguwa so 'ena tosidumutu ma ngale ma gou-goungu.

¹⁸ Niongano-nganono! Nako 'o diwanga de 'o dunia ka de ma 'enasi, ge'ena ka ma eta ma koiisanguwa ma besesongo ge'ena, nako 'iodumu gee ma besesongoka ge'ena koidadiwasi.

¹⁹ Sababu ge'ena nago'ona yaparene 'o do-dotoko ge'ena ngaro ka ma eta, de yosidotoko 'o nyawaka la 'ona mita koge'ena, 'ona ge'ena dua 'ifoloi yotingoono ma Jo'oungu ma Dutu wi kawasaka. Ma gedagee yamoteke ma besesongo ge'ena de yosidotoko 'o nyawaka koge'enali, 'ona ge'ena dua yoamoko ma Jo'oungu ma Dutu wi kawasaka.

²⁰ So niongano-nganono! Nako ngini niomau niodadi ma Jo'oungu ma Dutu wi kawasa, ge'ena salingou ngini 'ifoloide niodiai ma Jo'oungu ma Dutu wi mau de godagee 'o Yahudioka manga 'agamaka yodoto-dotoko de 'o Farisioka."

²¹ "Ngini nianakokau nanga edete de nanga dotumu yakisidotoko konee: ''Uwa nioto'oma; nago'ona yoto'oma dua yakihukumu.'

²² Ma ne'ena ngoi tinisidemo, nago'ona bato ngaro kayongamo duga 'o nyawaka, 'ona 'asa yakihukumu. De nago'ona yodoana 'o nyawaka, 'ona 'asa 'o 'agama ma balusu yakihukumu. De nago'ona yositi-tingoono 'o nyawaka, 'ona 'asa yakihukumu 'o 'uku ma lurusoka.

²³ Sababu ge'ena nako nia su-suba niokula ma Jo'oungu ma Dutuka la nimamaoku 'ato naga 'o nyawa manga singina niasiriku,

²⁴ ge'ena salingou nianoakosi nia su-suba ge'ena 'o su-suba 'idu-dutuuku ma dateoka, la niotagi niomasilo-loakasi gee manga singina niasiri-sirika. Ge'enaka 'asa de niolio niosisuba 'ania su-suba ge'ena ma Jo'oungu ma Dutuka.

²⁵ Nako la moikani nikalaki 'o hakimika, ge'ena konisitotaruawasi 'ena nimasikalo-loakau. Nako ko'uwa ge'ena dua 'o hakimika ni'asa, de dua 'o hakimi ma balusu wosulokoli 'awi ro-riwoka, de 'ona nisingosama 'o buika.

²⁶ De tinisidemo nginika: Ma raiokau dua ngini koidadiwasi niosupu nako nia nagimi koniabootuawasi niafangu."

²⁷ "Ngini nianakokau 'o do-dotoko 'isoka konee: ''Uwa niosongou.'

²⁸ Ma ne'ena ngoi tinisidemo, nagu'una 'o ngeweka moi waungini la de wi nyafisuu, 'una ge'ena wosongouokau de 'o ngeweka gumuna 'awi singina ma dodaka.

²⁹ Nako nia ako ma songona nisiotaka 'o dorouku, ge'ena niapeleuru la nia'umoka. Yaowa nia roese ma kia sonaa ngai moi nia'umo, la 'uwa sigado 'o 'ukuka nidugumo.

³⁰ Nako nia giama ma songona nisiotaka 'o dorouku, nia'ogu la nia'umoka. Yaowa nia giama ma songona koi'iwaka, la 'uwa sigado ngini 'o 'ukuka nidugumo."

³¹ "De ma 'ena mita 'o do-dotoko 'isoka konee: 'Nago'ona manga wekata yaoluku, salingou 'o ngo-ngoluku ma surati yokula manga wekatika.'

³² Duga ne'ena ngoi tinisidemo nginika: Nagu'una wi wekata komosongouwa de mioluku, 'una wodiai muna mosongou nako la momodokali. De nagu'una womingaamoko 'o di-dilikutu gumuna, 'una mita wosongou."

³³ "Ngini nianakokau nanga edete de nanga dotumoka manga do-dotoko konee: ''Uwa niaparene nia sasi, 'okia naga niosasiokau ma Jo'oungu ma Dutu wi bionoka, salingou niadiai.'

³⁴ Ma ne'ena ngoi tinisidemo nginika: Ka ma eta ma 'uwa niosasi, ngaro de 'o diwanga ma, sababu ge'ena ma Jo'oungu ma Dutu wi ngii ma ngale wopareta;

³⁵ bolo de 'o dunia, sababu ge'ena ma Jo'oungu ma Dutu wi dou ma ha-hangi; bolo de 'o Yerusalem, sababu ge'ena ma Koana ma Amoko wi kota.

³⁶ Mita 'uwa niosasi de nia saeke, sababu ngini koniadadiwa niodiai nia utu 'i'arese bolo 'itaromo ngaro ka ngai moi ma.

³⁷ Kaniongose duga, 'Ia', bolo 'Ko'uwa'. Nako 'ipaili de ge'ena, ge'ena ka 'o Tokata ma Koanino."

³⁸ "Ngini mita nianakokau 'o do-dotoko 'isoka konee: ''O nyawa manga ako niatorou to ngini mita yatorou, de 'o nyawa manga 'ingiri niatotaka to ngini mita yatotaka.'

³⁹ Ma ne'ena ngoi tinisidemo nginika, 'uwa niakigogola gee 'o nyawa yoba-badingaka nginika. De nako nisiti-tingoono nia gotoaka ma ginirakino yapoka, ge'ena yaowa ma gubalioli niosidakunu.

⁴⁰ De nako 'o nyawa nikalaki 'o hakimika de yomau nia baju ya'ese, ge'ena nia juba mita niakikulaka.

⁴¹ De nako yopa-pareta moi yoboa la yopakisaa manga gina nia'asa ma gurutu 'o kilo moika, ge'ena salingou nia'asa 'o kilo modidika.

⁴² Nako 'o nyawa 'o kianikia yomaga'asoko nginika, niakikulaka. Mita nako nia kianikia yomadabau, 'uwa koniakikulawa."

⁴³ "Ngini nianakokau mita ma ngale 'o do-dotoko 'isoka konee: 'Niakidora nia ma-manai, de niakidu'uduku gee nia saturuu.'

⁴⁴ Ma ne'ena ngoi tinisidemo: Niakidora nia saturuu, de niakisilahidoa godagee niba-badingaka,

⁴⁵ la ngini 'asa niodadi nia Dea 'o sorogaaka wi ngowa-ngowaka. Sababu ma Jo'oungu ma Dutu wi wange ma ako wosibaoro, ma ngale 'o nyawa ma owa de mita 'o nyawa ma dorou. 'Una wosiguti 'o besaka, ma ngale 'o nyawa manga 'ahu yaowa-owa de mita 'ito-torou.

⁴⁶ Sababu nako niakisibosono duga ka kiaka naga gee 'ona mita nisibosono nginika, ge'ena kaimatero de 'o balasitengi yoga-ga'asoko yadi-diai. So dua 'okia ma Jo'oungu ma Dutu winisiparasengi?

⁴⁷ De nako niakitabea duga ka gee nia nyawaka, 'okia niofoloide? 'O nyawa gee kowinakowa ma Jo'oungu ma Dutu mita yodiai koge'ena!

⁴⁸ 'Ania Dea 'o sorogaaka 'o nyawa 'iodumu wadora ma gou-goungu. Ngini mita salingou koge'ena."

Matius

Video Matius 5

Ikuti Kami:

KONTAK | PARTISIPASI | DONASI