Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Yésus nenier nelun mula', idi Ieh numak luun pegkung. Kareb Ieh netudo, idi anak-anak sekola'Neh iné' Neneh.
2 Idi Ieh nemada' nedeh, kebalaNeh:
3 "Samal kuan lemulun luk kali' asi'deh pa kiung Allah, ngaceku ideh luk kuan Imet surga.
4 "Samal kuan lemulun luk mesusa' niat, ngaceku ideh miak buken Allah peh.
5 "Samal kuan lemulun luk mebeneh niat, ngaceku ideh miak ngalap luk pijani' Allah.
6 "Samal kuan lemulun luk melau idi meparingku luk matu, ngaceku ideh miak uen ngebor.
7 "Samal kuan lemulun luk méi' nelun baken, ngaceku Allah miak méi' nedeh.
8 "Samal kuan lemulun luk meligan niat, ngaceku ideh miak nier Allah.
9 "Samal kuan lemulun luk nguit lemulun pedo', ngaceku ideh miak tetanen ku anak-anak Allah.
10 "Samal kuan lemulun luk pidereh ngaceku luk matu, ngaceku ideh luk kuan Imet surga.
11 "Samal kuan muyuh kareb lemulun ngedat nemuyuh idi ngedereh nemuyuh idi nguyo nemuyuh dengan mebalih ngaceku Ui.
12 Do' muyuh geriguen idi mawang niat, ngaceku rayeh tu tabpar muyuh déi' surga; ngaceku kudeng ineh teh amung-amung nabi luk atun rat nemuyuh pangeh pidereh teh.
13 "Muyuh mepad kudeng tucu' tana' ini. Iamo' kudeng tucu' pangeh metalang, ieh na mepaci' peh. Idi na ulek neh peh. Do' ieh talan idi ricuen lemulun.
14 "Muyuh ini mepad kudeng acang tana'. Aceh bawang luk luun pegkung na miak melinged.
15 Na lemulun nutud lapung idi ngakeb neneh ku gatang, iamo' ieh nganau' neneh luun dawan, pad ieh ngacang amung lemulun bang ruma' ineh.
16 Kudeng ineh teh do' muyuh maré acang muyuh nelun, pad ideh miak nier kekamen muyuh luk do', idi ngerayeh Taman muyuh luk bang surga.
17 "Aleg muyuh ngerawé Ui pangeh nacing pian ngusag Ukum Musa idi surat nabi-nabi; baken Ui nacing pian ngusag, iamo' ngaceku sikal mangeh amung ineh.
18 Ngerawé do'-do'! Seruked langit idi tana' pana' idi, sebuleng titik idi sebuleng bila' bala luk isuut pana' luk rat bang Ukum na miak metutu', pad macing amung-amung ineh mangun.
19 Ngaceku idé-idé luk sikal ngelaba sebuleng ukum luk isuut, idi luk mada' kudeng ineh kuan lun baken teh, idi ieh luk tetanen isuut bang Imet surga. Iamo' idé-idé luk maya' Ukum ini, idi luk mada' ineh, ieh miak tetanen rayeh bang Imet surga.
20 Ngaceku ineh Ui pebala nemuyuh, kudeng niat muyuh na mesiri meluun ratnan siri niat guru-guru Ukum idi lun Parisi teh, na tu-tu muyuh miak semuet bang Imet surga.
21 "Muyuh pangeh neninger luk paneh bila mon, ieh ineh, 'Aleg iko ngaté, idi idé-idé luk sikal ngaté, ieh miak iten amé' besara'.'
22 Iamo' nekini Ui pebala nemuyuh: idé-idé luk museh inan kinanakneh, ieh miak iten amé' besara, idi idé-idé luk pebala nan kinanakneh, 'Iko mebacé,' ieh miak iten papu' lun luk rayeh; idi idé-idé luk pebala, 'Iko meruden,' ieh luk ngalap ua'neh bang apui.
23 Kareb iko maré baré anun-anun luun bubpun kuan Allah, idi su ineh iko kali' kinanakmu mét niat namu,
24 do' iko necan barému iring bubpun ineh, idi amé' pedo' dengan kinanakmu atun, idi teh iko lemubed maré baré ineh.
25 "Kudeng inan seburur lemulun luk ngadu' namu, idi nguit namu besara', do' iko saget pedo' neneh, kareb nateh iko amé' besara', pad ieh na maré namu papu' lun luk mutut besara', idi lun luk mutut besara' ineh na maré namu nelun pulis, idi pulis na nipa namu bang tutup.
26 Ui pebala namu, iko na miak remuat rat bang tutup ineh, kudeng ketecan sesin pana' luk nateh binayarmu.
27 "Muyuh pangeh neninger luk pangeh bila, 'Aleg pasét.'
28 Iamo' nekini Ui pebala nemuyuh: anid-anid lemulun luk melili ku decur bang niatneh, kareb ieh nier bururneh, pangeh ieh pasét neneh bang niatneh.
29 Kudeng matehmu pa tinueh ngacing sala' kuanmu, do' nakul neneh, idi talan rat namu; ngaceku meluun do' sebabpat bururmu maté ratnan amung babpat bururmu talan bang apui.
30 Kudeng ticu'mu pa tinueh ngacing sala' kuanmu, do' nangal idi nala' neneh, ngaceku meluun do' na luk idi sebabpat bururmu ratnan amung babpat bururmu talan bang apui.
31 "Idi teh pangeh bila, 'Idé-idé luk ngelagkan awanneh, do' ieh maré aceh surat patad neneh.'
32 Iamo' nekini Ui pebala nemuyuh: idé-idé luk ngelagkan awanneh, kudeng baken ratnan pasét, ieh luk maré awanneh pasét, idi idé-idé luk ngaweh decur luk ligkan ineh, ieh pasét teh.
33 "Muyuh pangeh neninger teh luk pangeh bila kuan lun rayeh mon, 'Aleg iko pebulung dengan mebalih; iamo' do' iko ngacing kuan Tuhan amung bulungmu ineh.'
34 Iamo' nekini Ui pebala nemuyuh: aleg tu-tu muyuh pebulung ku surga, ngaceku ieh ineh kerusi Allah.
35 Aleg pebulung ku tana' teh, ngaceku ieh ineh teh luk tapin kukud Allah; aleg pebulung ku bawang Yerusalim, ngaceku ieh ineh bawang Raca' rayeh.
36 Aleg pebulung ku uluhmu teh, ngaceku iko na miak nganau' sengurat abpukmu mebuda' kian mitem lek.
37 Iamo' do' muyuh pebala, 'Mo,' idi 'Na.' Bala luk meluun ratnan ineh macing ratnan Iblis.
38 "Muyuh pangeh neninger luk pangeh bila, 'Mateh su amateh, idi lipen sua lipen.'
39 Iamo' nekini Ui pebala nemuyuh: aleg metueh ratnan lemulun luk dat, iamo' kudeng selemulun mepag pingitmu pa tinueh, do' maré pingitmu pa kabing teh.
40 Kudeng selemulun nguit namu besara', idi ieh ngalap kuyu'mu, do' maré kuyu' boyormu neneh teh.
41 Kudeng selemulun mesaad nguit namu nalan sebatu kiadoneh, do' iko maya' neneh dueh batu kiadoneh.
42 Maré kuan lemulun luk mutuh namu, idi kudeng lemulun sikal ngabit rat namu, do' maré luk pianneh.
43 "Muyuh pangeh neninger luk pangeh bila, 'Do' iko mawa nelun denganmu, idi megateh inan bunu'mu.'
44 Iamo' nekini Ui pebala nemuyuh: do' mawa inan bunu' muyuh, idi sembayang kuan lemulun luk ngedereh nemuyuh,
45 pad muyuh mangunk u anak-anak Taman muyuh luk bang surga. Ngaceku Ieh maré acoNeh merasat kuan lemulun luk dat idi luk do', idi Ieh maré udan kuan lemulun luk matu idi lemulun luk na matu teh.
46 Petuluké Allah maré tabpar nemuyuh, kudeng muyuh mawa inan lemulun luk mawa nemuyuh? Lun luk ngalap usin pupuk pana' nganau' luk kudeng ineh teh?
47 Idi kudeng muyuh maré tabi' kuan kinanak-kinanak muyuh mo' sebuleng, do'ké kekamen muyuh rat nelun baken? Lun na manu pana' nganau' luk kudeng ineh teh.
48 Do' muyuh meligan, mepad kudeng Taman muyuh luk bang surga ineh meligan teh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA