Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Me I'ila Yesu niha sato andrõ, mõi Ia yaw̃a ba hili. Me no dumadao Ia, la'ondrasi Ia ira nifahaõ-Nia.
2 Aefa da'õ Ibõrõtaigõ wamahaõ ya'ira:
3 "Ya'ahowu niha saboto ba dõdõ wa lõ fa'abõlõnia fõna Zo'aya; me ya'ira dania zi tobali ono mbanua amatõrõw̃a Lowalangi!
4 Ya'ahowu niha sabu tõdõ; me Lowalangi dania zondrara tõdõra!
5 Ya'ahowu niha sangidengide'õ ya'ia; me ya'ira dania zanema si no Ifabu'u Lowalangi!
6 Ya'ahowu niha somasi sibai mamalua somasi Lowalangi; me Lowalangi dania zame'e fa'atobõnõ khõra!
7 Ya'ahowu niha sangahakhõsi tõdõ niha bõ'õ; me Lowalangi dania zangahakhõsi tõdõ ya'ira!
8 Ya'ahowu niha satulõ tõdõ; me ya'ira dania zangila Lowalangi!
9 Ya'ahowu niha samalua fangatulõ ba gotalua niha; me ya'ira dania nifotõi Ono Lowalangi!
10 Ya'ahowu niha nifakao bõrõ wamalua somasi Lowalangi; me ya'ira dania zi tobali ono mbanua amatõrõw̃a Lowalangi!
11 Ya'ahowu ami na la'o'aya, ba na lafakao, ba na labõbõgõ zi lõ duhu khõmi, bõrõ me nifahaõ-Gu ami.
12 Ira sama'ele'õ fõnami gõi no lafakao si mane da'õ. Mi'omusoi'õ ba mi'owuawua'õ dõdõmi; bõrõ so mbuala sebua nihõnagõ Zo'aya khõmi."
13 "Asio gulidanõ ami. Na taya wa'asi'asi nasio, hadia labe'e fangasingasininia mangawuli? Lõ gunania sa'ae. Ha tõ nitibo'õ ia ba nihundrahundra niha sato.
14 Haga gulidanõ ami. Banua si so ba zuzu hili tebai tobini.
15 Lõ niha somasi manunu fandrunia, ba ibalugõ wandru andrõ faoma karaw̃a. Hiza i, itou'õ wandru andrõ ba naha wandru ena'õ ihagaini niha si so yomo ba nomo.
16 Ya simanõ gõi hagami ena'õ humaga fõna niha, ena'õ la'ila nilaumi si sõkhi, ba lasuno Namami si so ba zorugo."
17 "Bõi miw̃a'õ tõdõmi ba wangeheta huku agama niha Yehuda si mane nifahaõ Moze ba ira sama'ele'õ mõi Ndra'o. Tenga ba wangeheta mõi Ndra'o, no ba wamazõkhi ya'ia tobali mo'ahonoa.
18 Mitõngõni! Fatua so mbanua si yaw̃a awõ danõ, sambua niti ba ma hurufo side'ide sibai gõi moroi ba huku andrõ lõ teheta, na lõ a'oi itõrõ fefu!
19 Bõrõ da'õ, na so zi lõ molo'õ huku andrõ, hew̃a'ae ha fondrege zide'ide, ba ma samahaõ niha bõ'õ wamalua fa lõ molo'õ andrõ, ya'ia andrõ wondrege zide'ide ba gamatõrõw̃a Lowalangi. Ba niha solo'õ huku andrõ ba samahaõ niha bõ'õ ba wamalua si manõ gõi, ya'ia zi tobali sebua ba gamatõrõw̃a Lowalangi.
20 Mihaogõ wanõngõni: Tebai tobali ami ono mbanua ba gamatõrõw̃a Lowalangi, na lõ tohude ami moroi ba zangila amakhoita awõ Warizai'o andrõ ba wamalua ohitõ dõdõ Lowalangi!"
21 "No aboto ba dõdõmi wa so wamahaõ moroi khõ ndra tuada si mane da'e: Bõi amunu niha, haniha zamunu niha, lõ tola lõ lafatõrõ khõnia huku.
22 Iada'e Uw̃a'õ khõmi, haniha zofõnu ba niha, lafatõrõ ia ba huku; ba haniha zi falele, ba la'ohe fõna zamatõrõ huku ba agama. Haniha zanguma'õ ba niha, 'Owõhõ mowa' ba sinangea nitibo'õ bakha ba galitõ narako.
23 Bõrõ da'õ, na samuza ma'õkhõ mibe'e game'elami khõ Lowalangi, ba ba ginõtõ da'õ gõi itõrõ tõdõmi niha safõkhõ tõdõ khõmi,
24 abõlõ sõkhi, rõi ua game'ela andrõ, ba milau mangatulõ khõnia. Aefa da'õ, awena angawuli ba wame'e ame'ela andrõ khõ Lowalangi.
25 Na so niha sangadugõ ya'ugõ ba zanguhuku, atulõ'õgõ ua khõnia fatua so ginõtõ, ba fatua lõ ofeta'õ fõna zangahuku. Na lõ õtandraigõ wangatulõ'õ, ba ibe'e ndra'ugõ niha andrõ fõna zangahuku ba sanguhuku andrõ ibe'e ndra'ugõ ba danga wolisi. Aefa da'õ ibe'e ndra'ugõ ba gurunga folisi andrõ.
26 Tõrõ tõdõu da'e: Tebai mõi'õ baero moroi ba gurunga, na lõ õbu'a fefu gõmõu andrõ."
27 "No mi'ila wa so wamahaõ si mane da'e: Bõi ohorõ.
28 Iada'e Uw̃a'õ khõmi: niha samaigi ira alawe si fao fangisõ, no ihorõni ndra alawe andrõ ba dõdõnia.
29 Na hõrõu kambõlõ mbõrõ wa õlau horõ, ko'e ia ba tibo'õ! Abõlõ sõkhi na aheta sambua ndrotondrotou, moroi na tetibo'õ zi sambua botou ba narako.
30 Na tangau kambõlõ mbõrõ wa õlau horõ, taba ba tibo'õ dangau andrõ! Abõlõ sõkhi na aheta zi tambai dangau andrõ moroi na fefu mbotou mõi ba narako."
31 "So gõi wamahaõ si mane da'e: niha samabali fo'omonia, lõ tola lõ'õ ibe'e zura wabalisa khõnia.
32 Iada'e Uw̃a'õ khõmi: haniha zamabali fo'omonia hew̃a'ae tenga bõrõ horõ, niha da'õ zamobõrõ horõ wo'omonia, na ifuli mangowalu wo'omonia andrõ. Niha sangowalu zui khõ ndra alawe si manõ, no fao gõi wohorõ."
33 "No mi'ila wa so wamahaõ khõ ndra tuada si mane da'e: bõi mifalimo ba wawu'usa li. Hadia zi no õfabu'u fõna Lowalangi si fao fahõlusa wamalua, lõ tola lõ'õ õfalua.
34 Iada'e Uw̃a'õ khõmi: bõi mi'ae ba hõlu. Bõi fahõlu ami ba dõi mbanua si yaw̃a, bõrõ me banua si yaw̃a no nahia Lowalangi.
35 Bõi gõi fahõlu ami ba dõi danõ, bõrõ me ulidanõ no danedane gahe Lowalangi; bõi gõi fahõlu ami ba dõi Yeruzalema, bõrõ me Yeruzalema no banua razo sebua.
36 Bõi gõi fahõlu ami ba dõi hõgõmi, bõrõ me sara bu lõ mi'ila mi'aitõni ma zui mi'afusi'õ.
37 &Wa'õ, 'Ya'ia na ya'ia' ma zui 'Tenga na tenga' -- bõrõ me si tõra moroi ba da'õ ba moroi khõ Gafõkha."
38 "No mi'ila wa so gõi wamahaõ si mane da'e: hõrõ wangali hõrõ, ifõ wangali nifõ.
39 Ba hiza Uw̃a'õ iada'e khõmi: bõi milau mbalõ ba niha solau si lõ sõkhi khõmi. Na so zamalisi bo'õmi kambõlõ, akha gõi ifalisi mbo'õmi kabera.
40 Ba na so zangadugõ ya'ami khõ zanguhuku ba wangokhõgõ barumi, mibe'e khõnia gõi mbarumi sebua.
41 Na so zamaso ya'ami we'amõi awõnia irugi sakilo wa'arõu, mi'ae'e awõnia dua kilo fa'arõu.
42 Na so zangandrõ hadia ia khõmi, mibe'e khõnia. Bõi mitimba na so niha samalali khõmi hadia ia."
43 "No mi'ila wamahaõ si mane: mi'omasi'õ nawõmi ba mifa'udusi nudumi.
44 Ba iada'e Uw̃a'õ khõmi: mi'omasi'õ zi fa'udu khõmi, ba mi'angandrõ salahi zamakao ya'ami,
45 ena'õ tobali ami Ono Namami andrõ si so ba zorugo. Bõrõ me Ifa'aso haga luo-Nia Lowalangi ba niha si sõkhi tõdõ ba he gõi ba niha si lõ sõkhi tõdõ. Ifa'aso deu ba niha satulõ ba he gõi ba niha samalua si lõ sõkhi.
46 Bõrõ na ha sangomasi'õ ya'ami mi'omasi'õ, hadia guna wa Isulõni Lowalangi zi manõ? Hadia tenga si manõ gõi zanema beo wamalua si manõ?
47 Na ha awõmi manõ mi'owai, hadia hudemi? Lalau zi manõ gõi ya'ira niha si lõ aboto ba dõdõ Lowalangi!
48 Ya mo'ahonoa ami si mane Amami andrõ si so ba zorugo so'ahonoa."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA