Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lelek fo Yesus nita hataholi makadotok sila la boema, Ana kae leo pupukuk esa lain neu. Nangatuuk boema ana mana tunga nala mai tungan,

² boema Ana mulai nanolis la'eneu,

³ "Maua-manalek neu hataholi fo name'da nana balakain ta, de namahena neu ka'da Lamatua ka mesa kana; nanahu sila nde da'di Manetualain hataholi kamahehele nala!

⁴ Maua-manalek neu hataholi fo dale na he'di sa; nanahu neukose Manetualain kokoe-nanasis!

⁵ Maua-manalek neu hataholi fo mana makaloe-makadae ao ka; nanahu neukose Manetualain tao natetu hala hehelu na, neu hataholi sila la!

⁶ Maua-manalek neu hataholi fo nahiik tao-no'i Manetualain hihii-nanaun; nanahu neukose Manetualain fes hata fo lahii kana!

⁷ Maua-manalek neu hataholi fo mana sue-lai hataholi fe'e ka; nanahu neukose Manetualain sue-lais boe!

⁸ Maua-manalek neu hataholi fo dale na malalaok; nanahu neukose lalelak Manetualain.

⁹ Maua-manalek neu hataholi fo nini mole-dame nai hataholi daebafa ka tala'da; nanahu neukose Manetualain sipo kasa da'di Manetualain ana nala!

¹⁰ Maua-manalek neu hataholi mana doidoso ka, nana fefepa-lili'uk hu ka nde ana tao-no'i Manetualain hihii-nanaun; nanahu sila nde da'di Manetualain hataholi kamahehele nala!

¹¹ Maua-manalek neu emi, metema hataholi nakamumulu-nakamamaek emi, ala fepa-li'u emi, ma lakasasa'ek dede'a pepekok neu emi, nanahu Au.

¹² Nabi makahulu kala boeo, ala fepa-li'us sama leo emi boe. Mamahoko ma hika-setelee leona, nanahu Lamatua ka sadia basa ngga'di matua ina nai nusa so'da ka, soaneu emi so."

¹³ "Emi ia masi daebafak. Metema masi ka masin ta soona, ade hapu tao namasi selu kana do? Masik ndia sosoa-ndandaan ta so, de ka'da tapahenin fo hataholi la heheta-aa'i lakalulutu kana.

¹⁴ Emi ia mangale'do daebafak. Kota manai pupukuk lai na, kota ndia ta hapu nananafunik fa.

¹⁵ Hataholi a de'de na banu ka soona, ana ta tatanaketu banuk ndia fa. Tehu ana fua banuk ndia neu mamana madema esa lain, fo daenga banuk ndia nasalaa na basa hataholi manai uma ndia dale ka.

¹⁶ Leondiak boe emi muse da'di mangale'dok nai hataholi a matan, fo ela lita emi tatao-nono'i malole ma, fo no enok ndia, hataholi a hapu koa-kio emi Amam manai nusa so'da ka."

¹⁷ "Emi boso maedaenga Au mai fo Au loseheni Musa hoholo-lalanen ma nabi la nanoli nala. Au ta mai loseheni fas, tehu Au mai afa'da mangalele'do sosoa-ndandaa matetu nala.

¹⁸ Mafandendelek leona te! Losa lalai no daebafa ka beita mopo fas soona, dede'ak sila la de'ek esa, do titianak esa boeo, ta mopo fas, makanaema basa-basas lala'ena beita da'di fa!

¹⁹ Hu ndia de, metema see la'olena paleta sila la, leomae ka'da de'ek esa boe, boema nanoli hataholi fe'e kala fo ala tao leondiak boe, soona neukose hataholi ndia ana da'di kome'doana nanseli nai Manetualain hataholi kamahehele nala tala'da. Nasafali na, ba'eneu see fo nakalala'ok paleta sila la no malole na, boema nanoli hataholi fe'e kala, fo daenga ala tao leondiak boe, soona neukose ana da'di matuaina nai Manetualain hataholi kamahehele nala tala'da.

²⁰ Da'di, mafandendelek leona te: emi ta hapu da'di Manetualain hataholi kamahehele nala fa, metema emi ta tunga matalolole Manetualain hihii-nanaun lenaheni mese agama la ma hataholi Farisi la fa!"

²¹ "Emi bubuluk ita bei-ba'i kai nala nanoli nala nae leo ia: Boso manisa; ba'e neu see fo nanisa soona, muse huku hataholi ndia.

²² Tehu besak ia, Au afa'da neu emi te, ba'eneu see fo namanasa hataholi fe'ek soona, neukose ana hapu huhukuk nai Mana Maketu Mala'di Agama Matua matan. Ma ba'enu see naseo hataholi nae, 'Nggoak' soona, hataholi ndia nandaa tapan leo tasi ha'ik dale neu.

²³ Hu ndia, de makanaema hataholi esa nai emi tala'da, nini tutunu-hohotuk fe Manetualain, tehu nai dale nameme'da na, hataholi bei nape'da dale non soona,

²⁴ ela leo bee na, ana la'oela tutunu-hohotun ndia neme mei tutunu-hohotuk lain, fo neu mole-dame no hataholi ndia. Basa ndia soona, besa ka ana fali seluk, fo ana fe tutunu-hohotun neu Manetualain.

²⁵ Leo uni ka, hapu hataholi kalaak emi leo mana kee-fula manai lai na neu, soona mole-dame mon beidai ana beita losa mana kee-fula manai lai na fa. Metema ta soona, neukose hataholi ndia, ana kalaak emi leo mana kee-mana fula neu, fo basa soona no emi leo polisi la neu. Fo daenga polisi la tao emi leo bui dale neu.

²⁶ Ma mafandendelek leona te: Tao leo bee o neukose emi ta hapu kalua neme bui ndia dalek mai fa, losa faik bee, emi baeketu basa emi huta bu'u mala lala'ena."

²⁷ "Emi bubuluk basan, hapu nanoli ka nae leo ia, boso hohonge.

²⁸ Tehu besak ia, Au afa'da neu emi: ba'eneu see fo ana mete inak esa, tutika dale na nakababale no inak ndia soona, hataholi ndia ana hohonge no inak ndia nai dalen dale so.

²⁹ Metema o mata kona ma nini salak fe o soona, e'doheni o matam ndia fo tapahenin! Malole lenak mopo o matam seli, neme ala tapa o leo tasi ha'ik dale no o matam duas no'u.

³⁰ Metema o lima kona ma nini salak fe o soona, te'te ma o limam ndia, fo tapahenin. Malole lenak mopo o limam seli, neme ala tapa o leo tasi ha'ik dale no o limam duas no'u."

³¹ "Hapu nanoli ka nae leo ia boe: Metema hataholi esa elaheni saoina na soona, ana muse fe saoinan ndia susula naelak.

³² Tehu besak ia, Au afa'da neu emi: metema touk esa ana elaheni saoinana, te see ko na inak ndia ta leo-la'o nasala fa, soona touk ndia nde tao na saoina na ana hohonge, metema inak ndia ana sao seluk. Ma touk see sao na ina maela saok ndia soona, touk ndia boeo ana hohonge ndia boe."

³³ "Emi bubuluk basa, ita bei-ba'i kai nala nanoli nala nae leo ia: boso malelesi hala hehelu ka. Hu ndia de metema o helu basa hata esa no sosoo-susupak nai Manetualain matan, soona o muse tao matetun.

³⁴ Tehu besak ia, Au afa'da neu emi basa mala: boso soo-supa minik lalai a makandondook, nanahu lalai a nde bee na, Manetualain mamana tutuun ndia,

³⁵ do soo-supa minik daebafa ka, nana daebafa ka nde bee na Manetualain ta'bu ei na nde ndia; do ana soo-supa minik Yerusalem na'de na, nanahu ndia nde kota Manek matua ina.

³⁶ Boeo boso soo-supa minik o langa ma, nana o ta tao malelak o langa doo ma da'di fulak do nggeok, leomae ka'da dook esa boe.

³⁷ Ka'da mafa'da mae, 'Hei' do 'Ta' lenak neme ndia mai soona, basa sila la neme nitu mai ndia."

³⁸ "Emi boeo bubuluk basa, hapu nanoli ka nae leo ia: matak nggati matak, ma nisik nggati nisik.

³⁹ Tehu besak ia, Au afa'da neu emi: boso mape'da dalek neu hataholi fo mana tao mangalauk neu emi a. Dede'a nasafali na nae, metema hataholi fapa neu emi nasebu'u kona ma, soona solok emi nasebu'u kii ma neu, fo ana fapa selu kana boe.

⁴⁰ Boema metema hataholi kalaak emi leo manakee-manafula la meu, fo nakaseti emi fe emi ba'du ma leo ndia neu soona, fe emi ba'du manalu ma neu boe.

⁴¹ Makanaema hataholi mana koasa matua esa, nakaseti emi lepa bua lo'an dodoo na kilo esa, soona lepa mini bua-lo'as sila dodoo na losa kilo dua.

⁴² Metema hataholi neu noke emi hata esa, soona fen leona. Boema metema hataholi noke tona emi hatam esa, soona fen."

⁴³ "Emi boeo bubuluk basa, hapu nanoli ka nae leo ia: sue-lai emi tolanoo mala, boema makamuu-makadau emi musu noo mala.

⁴⁴ Tehu besak ia, Au afa'da emi: sue-lai emi musu noo mala, boema hule-haladoi fe hataholi mana fepa-li'u emi a,

⁴⁵ fo ela emi Amam manai nusa so'da ka, Ana tao emi da'di Ndia anan. Nanahu Manetualain sue-lai hataholi malole a ma hataholi mangalau ka boe. Ana fe hataholi mana tao ndoo sa ma hataholi mana tao mangalau ka u'dan no'u-no'u.

⁴⁶ Nanahu metema emi sue-lai ka'da hataholi mana sue-lai emi soona, sosoak hata Manetualain muse balas emi tatao-nono'im ndia? Ade mana susu bea la boeo, ala ta tao leondiak fa do?

⁴⁷ Boema metema emi fe ha'da-holomata neu ka'da emi nonoo mala mesa kasa soona, ade emi lena ma nde bee? Nanahu hataholi fo ta lalelak Manetualai na boeo, ala tao leondiak boe!

⁴⁸ Emi Amam ma nai nusa so'da ka boeo, Ana sue-lai basa hataholi lala'ena no matetu-mandaak. Hu ndia de emi boeo muse tao leondiak."

Matius

Video Matius 5

Ikuti Kami:

KONTAK | PARTISIPASI | DONASI