Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali tempo i Yesu mangkita tau boros etu, Ia mandake sangkodi nto’u woto mpantana see tau boros maya mangkita pasi mangandonge Ia. Roo see Ia matunda. Pasi anaguruNya yau ri aweNya.
2 Wali Ia mula mampotunde tau boros etu, Ia manganto’o,
3 “Masanang tau to mampongakung sira tare karoso ndaya ane taa nawaika i mPue Allah. Sira masanang apa sira mawali tau to Makolenya i Pue Allah.
4 Masanang tau to re’e ri raya ngkamawo ndayanya ri tempo si’i apa sira darapakalindo.
5 Masanang tau to taa mabae-bae rayanya apa lino si’i damawali sira puenya.
6 Masanang tau to rani kojo rayanya mangika anu to singkonong pei i Pue Allah, apa i Pue Allah damangabanang pamporani ndaya nsira etu.
7 Masanang tau to sangkani mamporayang sa’e apa i Pue Allah damampaponsanika pamporayangiNya resi tau etu.
8 Masanang tau to ojo pamporani i mPue Allah to napobuuka nsira, apa sira damangkita i Pue Allah.
9 Masanang tau to mangansawang yununya to masimpayu raya nsira naka mawali masingkatao muni. Masanang tau etu apa sira darato’oka ana i mPue Allah.
10 Masanang tau to rasesai apa saba mangalulu anu to singkonong pei i Pue Allah. Naka pei sira masanang apa sira mawali tau to Makolenya i Pue Allah.
11 Masanang komi ane sa’e mampoja’a pasi mangansesai komi, pasi ane sa’e mangawutis manganto’o mpangayangaya gombo to maja’a mangkonong komi apa saba komi Aku puenya.
12 Apa ewa see seja nawali resi to pantuntu tuntu i mPue Allah tempo owi. Sira seja nasesai ntau. Wali nempo komi rasesai seja, pakasanang. Masipato komi ndende kojo raya ngkomi, apa bae kojo ntanapa to danawaika i mPue Allah komi ndate saruga.”
13 Wali yako etu i Yesu manganto’oka sira rapa, Ia manganto’o, “Komi raporapaka ewa bure apa bure bae kojo batuanginya resi to lino. Pasi komi seja bae batuanginya resi samparia to lino. Pei ane bure etu tamo masi, wimba daraika mampakamasi wo’u? Taa maya! Wali bure etu tamore batuanginya, see naka bure etu jamo darataji yau pei danalombu yau ntau.Wali ne’e mandoo mangalulu pamporani i mPue Allah see Ia tiroowa maya mangampake komi damangansawang yunu ngkomi to lino apa bae kojo batuanginya palaong to etu.
14 “Pasi komi raporapaka seja ewa pansona to mampakareme tampa to mawuri. Pobuuka kota to ndate rapa mpantana. Ane kota to etu taa maya rawuni apa remenya nakita ntau boros. Wali ewa see seja gombo ngkomi pasi lengko ngkatuwu ngkomi mawali ewa reme to taa seja maya rawuni pasi to mampaponsanika sa’e jaya damangarata katuwu.
15 Pasi tau ane mangantuni pansona, ia taa mangabombongika yau ember. Ia mangoko pei mamposaka ri tampa to masipato rapangamposaka pansona etu, wali samparia to re’e ri raya banua etu mareme.
16 Wali ewa naika mpansona etu mampakareme banua, ewa see seja lengko ngkatuwu ngkomi nakita ntau boros. Wali ika palaong to matao see sira damangkita pasi damangabarong Pa’a ngkomi to ndate saruga.” Wali etu semo rapa to nato’oka i Yesu sira.
17 Yako etu i Yesu manganto’o wo’u, to’oNya, “Wali bara re’e komi to mampobuuka naka pei Aku nama’i damanganto’oka komi ne’emo mangaluluka porenta i Musa pasi anu to napotundeka nto pantuntu tuntu i mPue Allah tempo owi. Pei si’a ewa see. Aku si’a ma’i damangayali yau porenta i Musa pasi anu to napotundeka nto pantuntu tuntu i mPue Allah. Pei Aku ma’i mampakanasaka ewa wimba kamonsonya batuanginya anu to nato’o nsira etu.
18 Apa kamonsonya, ewa wimba kasaenya yakowa re’e yangi pasi lino, ewa see seja kasaenya porenta i Musa. Pasiwa samba’a hurup bara titik nempo kodi kojo, tare to darayali yau.
19 Wali bara re’e tau to bo’onya mampalaika nempo samba’a porenta, nempo porenta to taa bae kojo batuanginya, pasi ia mampotundeka sa’e see sa’e taa seja mangalulu. Wali i semasema to mangika palaong to ewa wetu, tau etu taa damangarata angga to bae tempo i Pue Allah mawali Makole nto lino. Pei i sema-sema to mangalulu pasi mampotundeka sa’e porenta etu, tau etu damangarata angga to bae tempo i Pue Allah mawali Makole nto lino.
20 Wali Aku manganto’oka komi, tau to mampoguru porenta i Musa, pasi to Yahudi to aliran Parisi, sira mangepe sira madota mangika lengko to singkonong pei i Pue Allah. Pei nempo madota sangkodi sira, pei kamonsonya sira taa maya mawali tau to Makolenya i Pue Allah. Wali aku manganto’oka komi, pakadota wo’u pei sira see komi damawali tau to Makolenya i Pue Allah.”
21 Wali yako etu i Yesu manganto’oka wo’u sira, Ia manganto’o, “Komi room mangandonge mangkonong porenta to nato’o nu bue-bue ngkita tempo owi. Sira manganto’o, ‘Ne’e mampopate sa’e. Ane re’e tau to mampopate sa’e, tau etu masipato danahuku nto pobotus.’ Ewa see nato’o nu bue-bue ngkita,
22 Pei Aku manganto’oka komi, tau nempo ojo maja’a rayanya resi yununya, tau etu masipato danahuku nto pobotus. Pasi i sema-sema manganto’oka yununya, ‘Bea korom!’ tau etu masipato seja danahuku nto pobotus. Pei i sema-sema to manganto’oka yununya, ‘Korom taa kojo re’e batuanginya!’ tau etu masipato darapanasok yau lo’u apu naraka.
23 “Wali see naka rapanya ane komi mangkeni pampuemu njo’u palampa darapampueka resi i Pue Allah, panewa rata nja’u ria komi mangendo re’e yunumu to masusa rayanya apa saba palaong to nuika ngkomi,
24 ane ewa see peas ruyu. Piyaika ruyu pampuemu etu ri tango mpalampa pei inta resi yunumu pei masingkatao muni resi ia. Roo see panewa pawolili muni njo’u palampa pei pampueka pampuemu.
25 “Wali si’i wo’u rapa. Bara re’e tau to masusa rayanya apa saba palaong to nuika ngkomi resi ia, pasi tau etu rani mangkeni palaong etu resi to pobotus. Ane ewa see, pakajoli masingkatao muni resi ia tempo tiroowa ri raya mpalinja yau mampago to pobotus naka ne’e ia damangkeni korom ri tango nto pobotus etu. Apa ane mampotango to pobotus, to pobotus etu bara damangawaika komi resi tau daratarungku.
26 Pasi ane ewa see, Aku manganto’oka komi monso pu’u komi taa damasuwu muni yako ri tarungku etu ane tawa mampakalino denda to nato’o nsira. Wali sira taa damampakakodi denda etu nempo sangkodija to tawa rabayar.”
27 Wali yako etu i Yesu manganto’o wo’u, to’oNya, “Komi re’e seja mangandonge mangkonong porenta to nato’o nu bue-bue ngkita tempo owi, to’onya, ‘Ne’e masala.’
28 Pei Aku manganto’oka komi i sema-sema tau to re’e pamporaninya to maja’a tempo mangalo’aka to we’a, tau etu roomo masala resi ia ri rayanya.”
29 Wali yako etu i Yesu manganto’o, “Ane mata ngkomi to sambali mangalo’aka anu to taa matao ralo’aka, see naka komi mawali dosa ri rayamu, ane ewa see pakadota kojo mampandooka mangika dosa etu. Kadota ngkomi etu maya raporapaka ewa tau to mangansu’i yau sambali matanya etu pei taji yau see tamo maya mangalo’aka anu to taa matao ralo’aka etu. Apa to tao-tao nempo jamo sambalija matamu sakowa korom kabaenya rataji yau lo’u apu naraka.
30 Pasi ane palemu to sambali mampolengkoka pamporani ndayamu to maja’a, ane ewa see pakadota kojo mampandooka mangika palaong to etu. Kadota ngkomi etu maya raporapaka wo’u ewa tau to mangampu’ak yau palenya sambali etu see tamo mangika palaong to maja’a etu. Apa to tao-tao nempo sambalija palemu sakowa korom kabaenya rataji yau lo’u apu naraka.
31 “Wali re’e wo’u porenta to manganto’o, ‘I sema-sema to langkai to rani mampoga’aka rongonya, tau etu taa maya taa mangikaka ia ruyu sura manganto’oka, “Aku kupoga’aka korom.”’ Ewa wetu nato’o mporenta.
32 Pei Aku manganto’oka komi, i sema-sema to langkai to rongonya tare masala, pei ia tiroo mampoga’aka rongonya etu, batuanginya saba tau etu semo naka pei tomalenya etu damawali tau to masala ane ia mamporongo wo’u to langkai to yusa. Pasi i sema-sema to langkai to mamporongo tau we’a to roomo maga’a yako ri rongonya, tau etu masala seja.”
33 Wali roo see i Yesu manganto’o wo’u, “Komi mangansani seja porenta to rato’oka resi tau to tempo owi, porenta etu manganto’o, ‘Ika kojo anu to komi roomo mamparajanjika ri tango i mPue Allah. Ne’e mangika parajanji etu roo see taa mangabanang.’ Etu semo porenta to rato’o tempo owi.
34 Pei Aku manganto’oka komi ane mangika parajanji ne’e kojo mangampake gombo to ewa si’i mampakatantu parajanji etu. Ne’e manganto’o, ‘Anu to ndate saruga semo mawali matamanasangku.’ Ne’e manganto’o ewa see, apa saruga etu semo to rato’oka gadera to napotunda i mPue Allah maporenta.
35 Pasi ne’e seja manganto’o, ‘Anu to re’e ri lino, etu semo mawali matamanasangku.’ Ne’e manganto’o ewa see apa lino semo to rato’oka tampa to napamposaka i mPue Allah witiNya. Pasi ne’e seja manganto’o, ‘Anu to nda’a Yerusalem, etu semo mawali matamanasangku.’ Ne’e manganto’o ewa see apa Yerusalem semo kota i Makole to bae kojo kuasaNya.
36 Pasi ne’e seja manganto’o, ‘Wo’ongku semo mawali matamanasangku.’ Ne’e manganto’o ewa see apa komi tare kuasa mangawali sakowa santoko wayuamu mawali buya bara meta. Ojo i Pue Allah semo to re’e kuasa mangika palaong to etu.
37 Wali to tao-tao komi ojo manganto’o, ‘Iya,’ ane masipato rato’o iya. Pasi manganto’o, ‘Taa,’ ane masipato rato’o taa. Ewa see raika apa ane kita mangadugangika parajanji, to etu yako resi i Kepala nto pantipu semo.”
38 Wali yako etu i Yesu manganto’o wo’u, “Komi re’e seja mangandonge porenta to manganto’o, ‘Tau to mampakaja’aka yau sambali mata nsa’e, tau etu darapakaja’aka yau seja sambali matanya. Pasi tau to mangampu’a sampa’i ngisi nsa’e, tau etu darapu’a seja sampa’i ngisinya.’ Etu semo to nato’o mporenta.
39 Pei Aku manganto’oka komi ne’e mansawa ane re’e tau to mangika maja’a resi komi. Rapanya ane re’e tau to mangantoposaka panganamu to sambali, waika wo’u panganamu to sambali wo’u napontoposaka seja.
40 Pasi ane re’e tau to mampakasala komi pei mangkeni komi njo’u to pobotus see damangarata bajumu, waika seja ia bajumu to makumba wo’u.
41 Pasi ane re’e tau to mampakasaaka komi mangkoyo ngaya-ngayanya samba’a kilometer kalongkonya, koyoka ia ngaya ngayanya etu dua kilometer kalongkonya.
42 Pasi ane re’e tau to mamporapi bara kesaa resi komi, waika tau etu anu to naporapi etu. Pasi ane re’e tau to rani mangada bara kesaa resi komi, papongadaka ia anu to naporani etu.”
43 Wali roo see i Yesu manganto’o, “Komi re’e mangandonge gombo ntau to manganto’o, ‘Porayang yunumu pei matao ane maja’a nukita balimu.’
44 Pei Aku manganto’oka komi, porayang seja balimu, pei matao raika magombo resi tau to mampoja’a komi. Pasi ika matao resi tau to maja’a nakita komi, pasi pokaikaika tau to mampakasala pasi to mangansesai komi.
45 Ika ewa wetu see damiyala komi monso pu’u ngana mPa’a ngkomi to ndate saruga. Apa i Pue Allah mangika mata nu eo damangansindo samparia tau, nempo tau to maja’a bara to matao. Pasi Ia mangawaika seja uja resi samparia tau, nempo tau to mangika lengko to singkonong pei Ia bara tau to taa.
46 Wali matao komi mangika ewa wetu apa ane ojo tau to mamporayang komi to nuporayang ngkomi, taa masipato komi danawaika i mPue Allah ntanapa. Apa sakowa to pantagi asele to biasa mangantipu sa’e sira mamporayang seja tau to mamporayang sira.
47 Pasi ane komi mangika matao ojo ri yunu ngkomi semo, ane ewa see tare pasisalanya komi pei sa’e. Apa sakowa tau to taa mangansani i Pue Allah, sira mangika seja ewa wetu.
48 Pei komi ngana i mPue Allah, wali to tao-tao lengko ngkatuwu ngkomi matao wo’u pei lengko ntau to taa mangansani Ia etu. Wali see naka masipato komi mamporayang samparia tau sewaju ewa Pa’a ngkomi to ndate saruga Ia mamporayang samparia tau.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA