Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Naonda ing ki Yesus noko'ontong kon intau moántó tua, Sia notakod kom buḷud, bo naonda ilimitú in Sia, murí-Nya mita namangoidon ko'i-Nia.
2 Kon tua ki Yesus nomangkoi notundú ko'i monia:
3 "Kosanangdon gina in intau inta nobogá kon tayowon i Allah, si mosia tua inta mobalí umat i Allah.
4 Kosanangdon gina in intau inta nokuyang ing gina, si mosia tua iropotanbí ing ginanya.
5 Kosanangdon gina in intau inta moáḷus in oáid bo pososingog si mosia tua i motarima kon dandi i Allah.
6 Kosanangdon gina in intau inta mo'ibog totok mogaid kon inta mobanar, sim bayongan tua in ogoibí i Allah.
7 Kosanangdon gina in intau inta mopia ing gina, si mosia i motarima doman kong kopopia i Allah.
8 Kosanangdon gina in intau inta motulid ing ginanya, si mosia tua inta moko'ontong ko'i Allah.
9 Kosanangdon gina in intau inta mo'ibog in dodamean, si mosia tua in tangoion ki adí mita i Allah.
10 Kosanangdon gina in intau inta pinogutú lantaran mogaid kon inta kino'ibog i Allah, si mosia doman tua inta moyotakin i Allah.
11 Kosanangdon i mo'ikow, inta lantaran Aku'oi, mo'ikow siningkule bo pinogutú takin pinoponapudan inta mora'at.
12 Koḷungangadon bo kopiadon ing gina monimu, sim moḷoben i moulímu kon soroga, sin nabi tungkuḷ intua pinogutú doman monia natua."
13 "Mo'ikow nion simuton in dunia. Aka simuton tatua moliaudon, yo onu im pogibung ko'inia? Diá bidon im baragunanya, dongka bidon ḷumbu'on bo koritakan in intau.
14 Mo'ikow bayag in dunia. lipú inta kon tudu im buḷud diábí mo'ibuni.
15 Apa doman diábí intau inta mopoyongkit makow in togá bo tungkubannya im belek, tantú tuduonnyabí kon tampat pototuduan kon togá sahingga monimbayag kom bayongan intau inta kom bonu im baḷoi tatua.
16 Natua doman bayagmu musti monindar kon tayowon intau, simbá ontongon monia in oáidmu mita inta mopia bo modayow ko'i Amámu inta kon soroga."
17 "Dona'aidon sangkaan monimu, kon Aku'oi i mamangoi momopat kon hukum i Musa andeka buk mita i nabi. Aku'oi mamangoi de'emanbí momopat kon tua, ta'e mongintompodbí.
18 Poguman-Ku ko'i monimu: Solama ḷangit bo butá na'a diápa mo'inggamá yo tobatúmai in hurup andeka titik, kon hukum i Musa diábi inggamáan, ko wakutu im bayongan tua diápa nobalí komintan.
19 Tuamai ki ine im monginggamá kon tobatúmai im parentah kon hukum i Musa, tongákabí topilik, bo motundú kon inta diá mo'itutui kon intau ibanea, yo sia tua in tampaton kon tampat inta mo'ompá totok kong karaja'an i Allah. Ta'e ki ine inta mogaid bo motundú kom bayongan inta parentah kon hukum i Musa, yo sia tua im moko'ulí kon tampat inta moḷantud kong karaja'an i Allah.
20 Tuamai Aku'oi mosingog ko'inimu: Aka ikow bo diá mogaid kon onu inta kino'ibog i Allah mo'iliu kom mototundú mita kon agama Yahudi bo intau mita im Parisi, yo mo'ikow in diábí mobalí umat i Allah."
21 "Mo'ikow ain nokodongog kon onu inta aim pinoguman kom mogoguyang naton, nana'a: Dona'ai molimod, ki ine im molimod yo hukumon.
22 Ta'e Aku'oi i moguman ko'i monimu: Pomuḷoi intau inta tumorú, ko'i utatnya yo musti hukumon; bo ki ine i moguman ko'i utatnya kaper yo musti popotayow kon itoi in agama, bo ki ine i moguman, 'Pompuḷong!' yo musti (pogonag) kon naraka inta kodoko-dokot.
23 Manangka intua aka ikow modia kon onu inta ogoi posumbah ko'i Allah bo wakutu intua mo'ikow nokotorop kon oyúon ki utatmu mosakí ing gina ko'inimu,
24 yo taláaipa onu inta diniamu posumbah tatua kon tayowon im meja pogogukatan kon sosumbah bo bayakdon muna poyodame i utatmu tatua bain tua bo bayakdon pobogoi kon onu im posumbahmu ko'i Allah.
25 Aka ikow bo koyota-yotakin in saturumu, yo ḷagidon poramiji moyobayat wakutu ing kon daḷanpa, simbá diá posarahkannya ikow kon hakim, bo hakim tatua moposarahkan kom moḷoḷukad kom ponjara, bodongka bonuon monia kom ponjara in ikow.
26 Aku'oi moguman ko'inimu: Ikow in diápabí poḷuaion monia kom ponjara aka diápa ko'ubolianmu im bolimu ko'inia."
27 Mo'ikow ain nokodongog kom Pirman inta noguman nana'a: Dona'ai monualing.
28 Ta'e Aku'oi im moguman ko'inimu: Pomuḷoi intau inta mokobobuimai kom bobay tobatú bo mo'ibog ko'inia, yo sia tua aindon nonualing takin bobay tatua kom bonu ing ginanya.
29 Manangka intua aka matamu koḷanan bo mokobaradosa ko'inimu, yo manikah kuil bo ḷumbúdon intua, si manikah bo ko'inggamáan im mata tobatú daripada awakmu komintan pogonag kom bonu in naraka.
30 Ná tua doman aka limamu koḷanan mokobaradosa kónimu, yo pongkó makow bo ḷumbúdon intua! Sim manikah bo diá kolima tosimpaḷ daripada awakmu komintan mo'ibonu kon naraka.
31 "Ki Musa ain nomais nana'a: Ki ine intau mongga'at ko'i buḷoinya bobay musti mobogoi in surat talak ko'i buḷoinya tua.
32 Ta'e Aku'oi moguman ko'inimu: Pomuḷoi intau inta mongga'at ko'i buḷoinya kolikudbíin nonualing, yo siabí tua in nokopopisí ko'i buḷoinya nonualing, bo ki ine i motonibuḷoi takin bobay inta aing gina'at tua, yo sia doman noyotakin nonualing."
33 Mo'ikow ain nokodongog doman kon onu inta aim pinoguman i Tuhan kom mogoguyang naton: Dona'ai mongibot kon soáḷ mita uboḷ, ta'e manikah bo kadaidon in ibotmu tua kon tayowon i Tuhan.
34 Ta'e Aku'oi moguman ko'inimu: Dikadon moko'imotanmai mongibot bo popodoyon kon ḷangit, sin ḷangit tua in tampat pomomarentaan i Allah,
35 andeka mongibot bo popodoyon kom butá sim butá na'a im baya-baya'an-Nya makow, andeka mongibot popodoyon kon Yerusalem, sin Yerusalem tua kotá i Raja Moḷoben.
36 Dona'aidon doman ikow mongibot podoyon kon uḷumu, sin diábí ing kawasamu mongimbudó andeka moginrondí kon to'ugatmai im bu'okmu.
37 Aka totu'u, yo poguman kon totu'u, bo aka diá, yo poguman doman diá. Sin onu in no'iliu kon tua yo nongkon inta mora'atbí.
38 Mo'ikow aindon doman nokodongog kom Piman: Mata toliuan mata, ingipon toliuan doman ingipon.
39 Ta'e Aku'oi i moguman ko'inimu: Dona'ai mo'ikow motulí kon intau inta nopoáid i mora'at ko'inimu. Ta'e nana'abí in aidai, aka ki ine i monokap kom putongimu koḷanan, yo ogoi doman im putongimu koḷoigi.
40 Bo kon intau inta mo'ibog mopongadu ko'inimu kon hakim, sin sia mo'ibog in ḷambungmu, yo ogoidon doman in jubahmu.
41 Bo ki ine kabí im momakisa ko'inimu mayak toribu nometer, yo dugangaidon makow mayak takinnya doyowa noribu nometer ing koyayuknya.
42 Ogoiai monag intau inta mo'igum bo dona'aidon monolak kon intau inta mamangoi moḷuan ko'inimu.
43 "Aindon dinongog monimu im Pirman nana'a: Kotabibí in yobayatmu ta'e dikadon moyobayat in saturumu.
44 Ta'e tana'a Aku'oi moguman ko'inimu: Kotabibí in saturumu bo sambayangaidon mosia inta nomogutú ko'inimu.
45 Aka mo'ikow mogaid kon natua, yo mo'ikow mobalí ki adí mita i Amámu inta kon soroga, inta mobogoi mata in singgai kon intau mora'at bo kon intau mopia, bo Sia doman inta mobogoi in uyan kon intau inta mobanar bo kon intau inta mo'uboḷ.
46 Ta'e aka mo'ikow bo tongá motabi kon intau inta motabi doman ko'inimu, onubí im mangalenya? Diá kinota'auan monimu degá kon mononagi mita doman kom pajak mogaid doman kon natua?
47 Bo aka mo'ikow bo tongá doman mohormat ko'i utat mita, onubí in no'iliu kon oáid in intau ibanea? Intau doman inta diá monota'au ko'i Allah mogaid doman kon natua!
48 Manangka intua mo'ikow musti mogaid kon inta totok mopia ná ki Amámu inta kon soroga ain nogaid kon inta totok i mopia."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA