Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Anjaha mangidah halak na mabuei ai, tangkog ma Ia hu sada dolog, dob hundul Ia, roh ma susian-Ni ai hu Bani.
2 Dob ai ibuha ma pamangan-Ni, laho mangajari sidea, nini ma,
3 “Martuah ma na sombuh tonduy, ai bani sidea do Harajaon nagori atas in!
4 Martuah ma na pusok uhur, ai siapohon do sidea!
5 Martuah ma na lamlam uhur, ai teanon ni sidea do tanoh on!
6 Martuah ma na horahan loheian bani hapintoron, ai sipabosuron do sidea.
7 Martuah ma na idop uhur, ai siidopan do sidea.
8 Martuah ma paruhur na borsih, ai idahon ni sidea do Naibata!
9 Martuah ma sibahen damei, ai goranon do sidea anak ni Naibata!
10 Martuah ma na pinarburu ni halak halani hapintoron, ai bani sidea do Harajaon nagori atas in!
11 Martuah ma hanima anggo irehei halak hanima barang iparburu, barang ipatubuh-tubuh bagei ni hata na masambor, na so tongon dompak hanima halani Ahu!
12 Malas ma uhurnima anjaha marolob-olob, ai banggal do upahnima i nagori atas, ai sonai do iparburu nabi-nabi na parlobei hun bennima.”
13 “Hanima do garam ni dunia on! Tapi anggo mambar in, aha ma bahenon paporadkon? Seng marguna be in, siambukkononkon mando in ase idogei-dogei halak.
14 Hanima do panondang ni dunia on! Seng boi ponop huta na i atas dolog.
15 Seng irungkubkon halak tumba bani suluh na pinagarani, tapi hu atas sagakan do ibahen, ase isondangi haganup na i rumah ai.
16 Sonai ma marsinalsal panondangnima i lobei ni halak, ase ididah horjanima na dear in, ase ipuji sidea Bapanima na i nagori atas in.”
17 “Ulang ma iagan uhurnima roh Ahu, laho manrumbakkon titah in pakon hata ni nabi-nabi, seng roh Ahu laho manrumbakkon, tapi laho pajongjongkon do.
18 Ai na sintong do hatang-Kon bennima, ronsi seda langit pakon tanoh on, na so bulih maseda humbani titah in sada titik atap sada garis pe, paima saud haganupan in.
19 Ase barang ise na manrumbakkon sada pe humbani titah sietekan in, anjaha ipodahkon sonai bani jolma, ai do goranon sietekan i Harajaon nagori atas in; tapi na mandalankon anjaha na mangajarhon in, ai do goranon na banggal i Harajaon nagori atas in.
20 Ai Huhatahon ma bennima, anggo seng daoh dearan hapintoronnima marimbang hapintoron ni sibotoh surat ampa Parisei, sabonar na so boi do hanima masuk hu Harajaon nagori atas in.”
21 “Ibogei hanima do hata hubani ompung na lobei, ʻUlang ho mamunuh! Ia pamunuh siuhumon do.ʼ
22 Tapi Ahu mangkatahon bennima, ise na marah bani sanina, maningon boanon do hu pangadilan. Anjaha ise na mangkatahon bani saninani ʻNa oto,ʼ maningon boanon do hu pangadilan atas, anjaha na mangkatahon ʻE na gila,ʼ maningon iuhum ibagas naraka.
23 Halani ai, anggo iboan ho galanganmu hu anjapanjap, anjaha taringat uhurmu bani sogam ni uhur ni saninamu bam,
24 tadingkon ma galanganmai i lobei ni anjapanjap ai, laho ma ho lobei mardear ampa saninamai, dob ai pe ase roh ho mangondoskon galanganmai!
25 Podas ma ho mardear pakon imbangmai, sanggah rap ope ho pakonsi i pardalanan, ase ulang iondoskon imbangmai holi ho hu panguhum, gabe iondoskon panguhum ai ho bani upasni, anjaha inahkon ho hubagas tutupan.
26 Sintong do na Huhatahon on bam, seng bulih ho maluah hunjai, anggo lape igalar ho haganup utangmu, ronsi sarimis.”
27 “Ibogei hanima do hata na mangkatahon, ʻUlang ho marbangkis!ʼ
28 Tapi Ahu mangkatahon bennima, barang ise na mangidah naboru anjaha oji ia, domma marbangkis ia ibagas uhurni.
29 Anggo sangsi ho halani mata siamunmu, pulsitkon ma in anjaha ambukkon, ai dearan do magou sada pagorimu, ulang hibul angkulamu igijigkon hubagas naraka.
30 Anjaha anggo sangsi ho halani tanganmu siamun, rotap ma in anjaha ambukkon, ai dearan do magou sada pagorimu, ulang hibul angkulamu igijigkon hubagas naraka.”
31 Ihatahon ope, “Barang ise na manirangkon na binuatni, maningon bereonni do surat sirang.
32 Tapi Ahu mangkatahon bennima, barang ise na manirangkon binuatni, anggo seng halani parbangkison, na pabangkiskonsi do ai. Parbangkis do homa na mambuat na sirang ai.”
33 “Ambah ni ai, ibogei hanima do hata hubani ompung na lobei, ʻSeng bulih bijahononmu na so tongon! Na dob nibulawankon bani Naibata, maningon galaronmu do ai!ʼ
34 Tapi Ahu mangkatahon bennima, sabonar na so bulih do hanima marbija barang marbulawan pe, age hu langit, ai paratas ni Naibata do ai,
35 age hu tanoh, ai sidogeian ni nahei-Ni do in, age hu Jerusalem, ai huta ni Raja na Banggal in do ai.
36 Age bani ulumu seng bulih ho marbija, ai seng markuasa ho mambahen lopak atap birong jambulanmu age sada.
37 Sonon ma hatanima, ʻEak, anggo eak, lang, anggo lang.ʼ Lobih hunjai, humbani na jahat ma ai.”
38 “Ibogei hanima do hata na mangkatahon, ʻMata do gantih ni mata, ipon gantih ni ipon.ʼ
39 Tapi Ahu mangkatahon bennima, ulang imbang hanima na jahat! Anggo adong na manompas huyummu siamun, tarehon homa age huyummu sambilou!
40 Anggo adong na mambahen parkara bamu, laho mambuat bajumu, bere ma homa mantelmu bani!
41 Anggo adong na mamaksa ho mardalan pakonsi sabatu, irikkon ma ia dua batu.
42 Bere ma halak na mangindo bam! Ulang tundali na sihol manginjam hun bamu!”
43 “Ibogei hanima do hata na mangkatahon, ʻHolong ma uhurmu bani hasomanmu, tapi sogam ma bani munsuhmu!ʼ
44 Tapi Ahu mangkatahon bennima, haholongi hanima ma munsuhnima, anjaha tonggohon hanima ma na marburu hanima,
45 ase gabe anak ni Bapanima na i nagori atas ai hanima, ai ipapoltak do mata ni ari-Ni bani parjahat ampa parbujur, anjaha iparoh do udan bani parpintor ampa pargeduk.
46 Ai anggo holong uhurnima pitah bani na marholong ni uhur bennima, aha ma upahnima? Ai sijalo sohei pe, ai lang sonai do ibahen?
47 Anjaha anggo saninanima do hansa itabi hanima, aha ma hasurungannima? Ai sipajuh begu-begu pe, ai lang sonai do ibahen?
48 Ai pe, maningon gokan dear do hanima, songon Bapanima i nagori atas, na Gokan Dear in!”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA