Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Yesus wosupu 'o Betlehemuoka, 'o Yudea ma tonaoka, ma 'orasi ge'ena 'o Herodes wokoana. De yamuruo naga yoba-barija 'o ngoma 'o diwangoka yolega ma diai dinaoko 'o wange ma siwaroko, yaoko 'o Yerusalemuoko.

² 'Ona yokakasano-sano, "Kiaka 'o ngowaka gee wosupuokau 'o duniano la wodadi 'o Yahudioka manga Koana? Ngomi miamakekau to 'una wi no-nako, 'o ngoma dina 'o wange ma siwaroka, so ngomi mioboa miosuba 'unaka."

³ Ma Koana 'o Herodes wo'isenoka ma habari ge'ena, de witodokana, koge'enali mita 'awi kawasa yoodumu 'o Yerusalemuoka.

⁴ So ge'enaka de wakisuloko 'o 'imam ma saeke de 'o Yahudioka manga 'agamaka yodoto-dotoko yomalomuno. Yomalomuno de wosano, "Kiaka dua 'o Koana wimoi ma Jo'oungu ma Dutu Wiiri-irikokau wosupu?"

⁵ 'Ona yosango, "'O Betlehem ma kotaka 'o Yudea ma tonaoka. Sababu 'isoka gee 'o nabii wimoi wosilefokau,

⁶ 'Ngona Betlehem, 'o Yehuda ma tonaoka! 'Igou-goungu ngona konotingoonuwa naga 'o Yehuda ma kota 'ila-laagomo ma sigoronaka. Sababu ngonano dua 'asa wosupu wimoi wodadi balusu gee dua wakipareta de wakipaliara 'awi kawasa 'o Israeloka.'"

⁷ 'O Herodes wo'isenoka koge'ena, de kawomasibongonino waki'asoko yoba-barija 'o ngoma yolega ma diai dinaoko 'o wange ma siwaroko. 'Asa de wosano, "Kauruosi niamake 'o ngoma ge'ena 'ibaorino?"

⁸ Ge'enaka de wakisuloko 'o Betlehemuka yotagi de wakisibesesongo 'ato, "Niotagi, la nianonu niosidi-diai 'o ngowaka ge'ena. De nako winimakekau, niaino niositotara ngoino la ngoi mita taika towisuba."

⁹ Ge'enaka de 'ona yotagi de yamakekauoli ma ngoma gee 'o wange ma siwarie 'ibao-baorino. 'Ona yomorene gee yamakeka ma ngoma ge'ena 'itagi 'isira-sira de 'imaogoro ge'ena ma ngowaka ma dekude daku.

¹⁰ (2:9)

¹¹ 'Ona yowosama ma woaka ge'ena de wimake 'o ngowaka gu'una de ma 'esa ngo Maria, ge'enaka de yobukuku yasuba 'o ngowaka ge'ena, de yapelenga manga harataa ma ngiioka de yokula manga su-suba ge'ena la 'o guraci, de 'o manyanyi, de 'o gota ma tigono ma bounu yaowa-owa posironga 'o mur.

¹² Ma Jo'oungu ma Dutu wakisitiari manga naneroka, la 'uwa yolioli 'o Herodesika. So 'ona yolio manga tonakisa yaboa 'o ngekomo 'iregu.

¹³ Ma 'orasi yoba-barija 'o ngoma yolega ma diai go'ona yolioka, de 'o Yusuf wonanere 'ato ma Jo'oungu ma Dutu wi mala'ekati 'iboa de 'ingose, "'O Herodes winonu 'o ngowaka gu'una womau wito'oma. So nomomikie la wonisiowara 'o ngowaka gu'una de ma 'esa 'o Mesirika. De ge'enakasi doka notamaa sigado tonisidemoli."

¹⁴ Ge'enaka de 'o Yusuf womomiki so kage'ena ma obiri de 'o ngowaka ge'ena de ma 'esa wakisiowarokau 'o Mesirika.

¹⁵ 'Ona yogogere kadoka sigado 'o Herodes wosongenoka. Koge'ena 'idadi la 'imatiai moteke ma Jo'oungu ma Dutu wi demo 'o nabii wimoi wosihabariokau, "'Ai ngowaka towi'asoko 'o Mesirino."

¹⁶ 'O Herodes wanako 'ato yoba-barija 'o ngoma 'o diwangoka yolega ma diai dinaoko 'o wange ma siwaroko go'ona wisihagakau, de wi do'otasa 'irama. So wosuloko 'o Betlehemuoka de ma date-dateoka manga ngowaka 'o nauru ma 'umuru 'o taunu modidi de 'isikauku 'iodumu yakokito'oma moteke to 'ona manga demo gee yamakeka 'o ngoma ge'ena de 'isiino.

¹⁷ So ge'ena 'imatiai gee 'isoka ma Nabii Yeremia wongosekau 'ato,

¹⁸ "'O Ramaka yo'isene yoto-tora de yogaribetongo. Ngo Rahel mi ngowa-ngowaka makidagari, de miaru ma mooluku sababu mi ngowaka koyaki'iwau."

¹⁹ Ma 'orasi gee 'o Herodes wosongenokau, 'ena 'o Yusuf ka 'o Mesirokasi, de ma Jo'oungu ma Dutu wi mala'ekati moi 'imasidumutoli wi naneroka.

²⁰ De 'ingose 'ato, "'O nyawa gee yomau yato'oma 'o ngowaka ge'ena, yosongenokau. So nomomiki, na'ese 'o ngowaka ge'ena de ma 'esa la nioliou 'o Israelika."

²¹ 'O Yusuf womomiki so wa'ese 'o ngowaka ge'ena de ngo Maria de waki'asa yolio 'o Israelika.

²² Ma gee 'o Yusuf wogi'isenoka 'ato 'o Arkelaus 'o Herodes wi ngowaka gu'una, ma dea witagaliokau wodadi Koana 'o Yudeaka, so kawododatoka ge'enaka waika. So ma Jo'oungu ma Dutu wisisahe 'itiaiokasi wi naneroka, 'asa de wosiika 'o Galilea ma daeraaka.

²³ So ge'enaka waika de wogogere 'o Nazaret ma kotaka. Koge'ena 'idadi la 'isoka 'o nabii ma sirasi yosidemokau ma ngale 'o ngowaka ge'ena, "'Una 'asa wisironga 'o Nazaretioka ma nyawa."

Matius

Video Matius 2

Ikuti Kami:

KONTAK | PARTISIPASI | DONASI