Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Isa Almasih dilayiekan di kota Betlehem, di nagari Yudea, pado maso pamarentahan Rajo Herodes. Pado wakatu itu, ado babarapo urang ahli alimu bintang dari nagari matoari tabik, nan datang ka Yerusalem.

² Urang-urang tu bi batanyo kian kumari, "Dimanyo Anak tu, nan dilayiekan untuak ka manjadi Rajo urang Yahudi? Kami lah manampak bintang-Nyo tasumbua di sabalah ka matoari tabik, kami kamari ko, untuak ka manyambah Inyo."

³ Kutiko Rajo Herodes mandanga kaba nan bakcando itu, inyo sabana takajuik, baitu pulo kasadonyo urang di Yerusalem.

⁴ Mako disuruahnyolah kasadonyo imam-imam kapalo, sarato jo guru-guru agamo banso Yahudi, untuak bakumpua. Sasudah tu, inyo batanyo kabake imam-imam, sarato jo kabake guru-guru agamo tu, "Dima tampek layienyo Rajo nan dijanjikan dek Allah tu?"

⁵ Urang-urang tu bi manjawab, "Di kota Betlehem di nagari Yudea. Dek karano, bakcando ikolah nan disurekkan dek surang nabi di dalam Alkitab,

⁶ 'Angkau Betlehem, di nagari Yehuda, angkau sabananyo indaklah nan disangko ketek, di antaro kota-kota nan gadang di Yehuda. Dek karano, dari angkau ka datang surang pamimpin, nan ka mamimpin umaik-Den Israel.'"

⁷ Sasudah mandanga katarangan nan bakcando itu, mako Herodes mamanggie, ahli-ahli alimu bintang dari nagari matoari tabik tu, sacaro jo ba anok-anok. Mako batanyolah inyo kabake urang-urang tu, pabilo bana tapeknyo bintang tu muloi nampak?

⁸ Sasudah tu, inyo manyuruah urang-urang tu ka Betlehem, sambia bapasan bakcando iko, "Payilah, carilah Anak tu sacaro taliti. Jikok angku-angku lah basuwo jo Inyo, agiah kabalah ambo, buliah nak payi pulo ambo untuak manyambah Inyo."

⁹ Sudah tu bi barangkeklah urang-urang tu. Inyo bi manampak pulo baliak, bintang nan lah inyo liyek dulu tu, di subalah ka matoari tabik. Baralah kagadangnyo ati urang-urang tu maliyek bintang tu! Bintang tu mandawuluinyo bajalan, sudah tu, bintang tu baranti, tapek bana di ateh tampaik Anak tu barado.

¹⁰ (2:9)

¹¹ Urang-urang tu bi masuak ka dalam rumah tu, tibo di dalam nampaklah dek inyo, Anak tu basarato jo mandeh-Nyo Siti Maryam. Urang-urang tu bi sujuik manyambah Anak tu, sudah tu inyo bukaklah bungkuih barang bawok-annyo, inyo pasambahkanlah kabake Anak tu ameh, kumayan, sarato jo mur.

¹² Allah mamparingekkan urang-urang tu di dalam rasiyan, supayo jan babaliak kabake Rajo Herodes. Mako bi pulanglah urang-urang tu ka kampuangnyo malalui jalan nan lain.

¹³ Sasudah ahli-ahli bintang tu barangkek, malekaik Tuhan manampakkan diri kabake Yusuf di dalam rasiyan. Malekaik tu bakato, "Herodes bamukasuik nak ka mancari Anak ko, untuak ka dibunuahnyo. Dek karano itu, jagolah, bawoklah Anak ko sarato jo mandeh-Nyo mangunsi ka Mesir. Manataplah disinan, sampai Ambo tibo pulo baliak isuak ma agiah tawu."

¹⁴ Yusuf tasintak, malam tu juwo inyo bawoklah Anak tu sarato jo Siti Maryam mangunsi ka Mesir.

¹⁵ Inyo manatap disinan sampai Herodes mati. Dek nan baitu, mako basuwoanlah apo nan lah dikatokan dek Tuhan, malalui nabi-Nyo, bakcando iko, "Aden ma imbau Anak-Den kaluwa dari Mesir."

¹⁶ Kutiko Herodes tawu, baraso ahli-ahli bintang dari nagari matoari tabik tu, lah mangicuahnyo, mako tabiklah suganyo. Inyo parentahkanlah untuak mambunuah kasadonyo paja ketek laki-laki, nan ba umua duwo tawun ka bawah di Betlehem, sarato jo di nagari nan sakuliliang tu. Itu sasuwai jo katarangan nan didapeknyo dari ahli-ahli bintang tu, tantang sajak pabilo bintang tu muloi nampak.

¹⁷ Dek nan baitu, mako basuwoanlah apo nan lah dikatokan dek Nabi Yeremia, iyolah,

¹⁸ "Di Rama tadanga suwaro ratok, kaluah kasah sarato jo tangih. Rahel maratok-i anak-anaknyo; Inyo indak niyo dibujuak, dek karano anak-anaknyo indak bi ado lai."

¹⁹ Sasudah Herodes mati, kutiko itu Yusuf sadang di Mesir juwo lai, surang malekaik Tuhan tibo baliak kabake inyo, manampakkan diri dalam rasiyan.

²⁰ Malekaik tu bakato, "Urang-urang nan baniyaik ka mambunuah Anak ko, lah bi mati. Dek karano itu, jagolah lai, bawoklah Anak ko sarato jo mandeh-Nyo, babaliaklah ka Israel."

²¹ Yusuf tasintak, mako inyo bawoklah Anak tu sarato jo Siti Maryam babaliak ka Israel.

²² Tapi, kudian Yusuf mandanga kaba, baraso Arkelaus anak Herodes, lah manggantikan apaknyo manjadi rajo, di nagari Yudea. Dek karano itu, Yusuf takuik payi ka sinan. Sasudah inyo mandapek pitunjuak dari Tuhan dalam rasiyan, mako payilah inyo ka daerah Galilea.

²³ Di Galilea inyo manatap di kota nan banamo Nazaret. Dek nan baitu, mako basuwoanlah apo nan lah dikatokan dek nabi-nabi tantang Anak tu: "Inyo ka dinamokan Urang Nazaret."

Matius

Video Matius 2

Ikuti Kami:

KONTAK | PARTISIPASI | DONASI