Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Yésus tinganak déi' Baitlahim bang bawang Yudia, kareb imet Raca' Herodés, idi tuda'-tuda' lun luk mileh nier gituen nacing rat pa busat aco iné' Yerusalim,
2 keburi'deh, "Su apehké Raca' lun Yahudi luk tinganak mebaruh? Ngaceku kai pangeh nenier gituenNeh luk pa busat aco. Idi kai macing sikal sembayang Neneh."
3 Kareb Raca' Herodés neninger bala ineh, ieh megagau. Kudeng ineh teh amung lun bang bawang Yerusalim teh.
4 Idi ieh nengamung amung imam rayeh idi guru-guru Ukum, keburi'neh, "Iapehké su luk inan Keristus tinganak?"
5 Idi kebaladeh, "Déi' Baitlahim luk bang bawang Yudia. Kudeng ineh luk inayud nabi, kebalaneh,
6 'O Baitlahim luk bang bawang Yudia, na iko isuut rat arang lun luk ngimet raca' Yudia; ngaceku rat namu miak remuat aceh lun luk ngimet luk sikal nguyut pupuKu lun Israil.'"
7 Idi Herodés nelulem nawar nelun luk mileh nier gituen ineh, idi nengelio nedeh do'-do' idan gituen ineh nekali'deh.
8 Idi ieh nengecuk nedeh amé' déi' Baitlahim, keburi'neh, "Amé' muyuh nakap do'-do' anak luk isuut ineh. Kareb muyuh kali' Neneh, do' muyuh mada' negku, pad ui pana' miak amé' sembayang Neneh."
9 Idi ideh nenalan; idi gituen luk sinierdeh pa busat aco ineh nenalan pa atundeh, idi gituen ineh nugka' pa luun su luk inan anak ineh.
10 Kareb ideh nenier gituen ineh ideh pelaba awang niat.
11 Idi ideh iné' bang ruma' idi ideh nenier anak ineh dengan tinanNeh Mariam, idi ideh netekeradung sembayang Neneh. Pangeh ineh ideh nengukab pati'deh, idi nemaré baré Neneh, ieh ineh amas, idi luk sabpen luk do' buen, idi mur.
12 Allah nemebpeng nedeh bang nupideh na lemubed amé' inan Raca' Herodés teh, idi ideh nuli' maya' dalan baken.
13 Litad ideh nuli', inan aceh melaikat Tuhan nesilagan ni Yusup bang nupineh, idi kebalaneh, "Tumui iko, idi nated anak dengan tinanNeh, idi buro amé' Masir, idi tudo déi' pad ui mada' namu, ngaceku Herodés nakap anak ineh pian ngaté Neneh."
14 Idi Yusup netumui idi nenated anak ineh dengan tinanNeh kareb medacem, idi iné' Masir.
15 Idi ieh netudo déi' pad macing Herodés naté, pad ngacing luk bila Tuhan dengan tang nabi, kebalaNeh, "Ui pangeh nenawar AnakKu lu deléi rat Masir."
16 Kareb Herodés nekali' ieh sinaluk lun mileh luk rat pa busat aco ineh, idi ieh pelaba gateh niat. Idi ieh nengecuk lemulun amé' ngaté amung anak deléi luk déi' Baitlahim idi luk bang amung-amung babpatneh, luk ulun dueh lak amé' pa beneh, maya' kareb luk pangeh linio lun luk mileh ineh neneh.
17 Kudeng ini luk pangeh mangun luk bila Nabi Yeremia, kebalaneh:
18 "Inan aceh tang pindenger déi' Rama, inan luk nangi' idi temido teh. Rakel nangi' ku anakneh; na ieh mia buken, ngaceku amung anakneh luk isuut pangeh naté."
19 Kareb Herodés pangeh naté, idi aceh melaikat Tuhan nesilagan ni Yusup bang nupineh déi' Masir.
20 Idi keburi' melaikat neneh, "Tumui iko idi nated anak luk isuut ineh dengan tinanNeh, idi muli' amé' bawang Israil; ngaceku ideh luk sikal ngaté anak ineh pangeh naté."
21 Idi Yusup netumui idi nenated anak luk isuut ineh dengan tinanNeh idi iné' bawang Israil.
22 Kareb ieh neninger Arkilaus pangeh nengelibal tamanneh Herodés mangun ku raca' Yudia, idi Yusup matot amé' déi', iamo' ngaceku pangeh bida' Allah kuanneh bang nupi, idi ieh nelemubed iné' bang bawang Galilia.
23 Idi ieh iné' tebawang bang bawang Nasarét; pad ngacing luk bila nabi-nabi, kebaladeh, "Ieh miak tetanen Lun Nasarét."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA