Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ I Yesus nipoanaka ri ngata Betlehem ri bagia Yudea. Tempo haitu Magau Herodes noparenta. Naupu pompoanaka i Yesus, nakavamo topande nanggita betue. Ira nakava lako ri mpandakena hau ri ngata Yerusalem,

² bo nekutanamo ira, "Ri umba Ia, anu majadi Magau ntoYahudi, anu dako nipoanaka? Nikita kami betueNa nebonda ri mpandakena bo kami nakava mombasomba Ia."

³ Nangepe tesa haitu natekajamo bo nasesa rara Magau Herodes, bo ivesia muni pura-pura tupu ngata Yerusalem.

⁴ Jadi nipasiromu Magau Herodes puramo balengga-balengga ntopanggeni pesomba bo *guru-guru agama bo nipekutanana, "Ri umba ngata rapompoanaka Magau Topepakasalama anu nijanji nu Alatala?"

⁵ Nesana ira, "Ri ngata Betlehem ri bagia Yudea, sabana naria tesa nTupu nitulisi nu *nabi nggaulu ivei:

⁶ 'Iko, ngata Betlehem ri bagia Yudea, Nau ngata kodi, iko ngata nelabi nopoko ri panggita nu pakeni ntoYudea. Sabana lako nte iko kana meumba saito pakeni anu moevu todeaKu *toIsrael.'"

⁷ Naupu haitu Magau Herodes nompokio tona lako ri mpandakena haitu mosintomu nggalino ante ia, bo nipekutanana pakabelo-belo tempo peonga betue nipeintara haitu.

⁸ Naupu haitu nitudunamo ira hau ri ngata Betlehem. Niulikana ira, "Koimo komiu hau ri ngata haitu bo elo pakabelo-belo ngana haitu. Bo ane rakavamiu ia, uli ka yaku, ala yaku muni hau mombasomba Ia."

⁹ Naupupa nangepe tesa magau haitu, nalaimo ira. Bo betue nipeintara ri mpandakena nokolu ka ira sampe nenonto ri toto nu banua niponturo nu ngana kodi haitu.

¹⁰ Tempo nikitara betue haitu, nadamba mpuumo rarara.

¹¹ Bo nesuamo ira riara nu banua bo nikitara ngana kodi haitu ante tinana i Maria. Bo nantaputumo ira nombasomba Ia. Naupu haitu nibukaramo peti pomboli kakalumanara, bo nidekeira ka Ia pedekei-pedekeira, haitumo bulava, bo rongaya lana dupa nasuli mpuu alina, haitumo *kemenyan bo *mur.

¹² Naupu haitu, Alatala nompopainga ira riara pangipira, ala nee manjili hau nte Magau Herodes. Jadi nalaimo ira hau manjili ri ngatara mboto nangoseaka dala ntanina.

¹³ Nalaipa tona lako ri mpandakena, nakavamo saito malaeka nTupu riara pangipi i Yusuf bo nanguli, "Pembangumo, kenimo ngana ntali-tina haitu masalisa hau ri tana Mesir, sabana Magau Herodes mangelo ngana haitu rapatesina. Ponturomo hamai sampe yaku makava vai nte iko."

¹⁴ Jadi nembangumo i Yusuf bo bongi haitu nikenina ngana ntali tina nalai hau ri tana Mesir.

¹⁵ Bo ira nonturo hamai sampe namate Magau Herodes. Ivesiamo nadupa tesa nTupu nipasimbayu nu *nabi nggaulu ivei: "Yaku nompokio anaKu mesuvu lako ri tana Mesir."

¹⁶ Nisani Magau Herodespa ia niakalani ntopande nanggita betue haitu, nagigi mpuumo rarana. Bo ia nombatudu tantarana hau mompatesi pura-pura ngana langgai noumuru rompae bo anu dopa nagana rompae ri ngata Betlehem bo ri ngata-ngata ri sinjorina. Umuru nu ngana nipatesi nangoseaka kasaena peonga betue nipeinta ntopande nanggita betue pangane.

¹⁷ Ante kajadia haitu nadupamo tesa nTupu nipasimbayu Nabi Yeremia nggaulu ivei:

¹⁸ "Ri ngata Rama niepe suara ntopotumangi nabuku mpuu rarana. Haitumo i Rahel nantangisi ana-anana. Ledo nadota ia rapakavoe rarana sabana anana domo naria."

¹⁹ Naliu Magau Herodes namate, i Yusuf da nonturo ri Mesir. Nakavamo saito malaeka nTupu riara pangipina

²⁰ nanguli, "Pembangumo! Kenimo ngana ntali tina haitu hau manjili ri tana Israel, sabana namatemo tona madota mompatesi Ia."

²¹ Jadi nembangumo i Yusuf bo nikeninamo i Maria ntali ana nanjili hau ri tana Israel.

²² Tapi niepenapa i Arkelaus, ana Magau Herodes nanjambei tuamana nomparenta bagia Yudea, naekamo rarana mapola hamai. Alatala notesa vai ka ia riara pangipina, jadipa napolamo ira hau ri bagia Galilea.

²³ Bo nonturomo ira ri ngata nosanga Nazaret. Ivesiamo kadupana tesa nTupu nipasimbayu nabi-nabi nggaulu ivei: "Ia rauli ntona toNazaret."

Matius

Video Matius 2

Ikuti Kami:

KONTAK | PARTISIPASI | DONASI