Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sesampun Deside Isa tebijeang lẽq kote Betlehem lẽq negeri Yudea, lẽq jaman Raje Herodes, dateng dengan-dengan ahli ilmu bintang lẽman Timuq ojok Yerusalem.

² Ie pade beketuan lẽq embẽ-embẽ, "Lẽq mbẽ Ie, Almasih, raje dengan Yahudi saq baruq tebijeang nike? Tiang pade serioq bintang-Ne tiwoq lẽq sedi timuq, dait tiang pade dateng jari nyembah Ie."

³ Sewaktu Raje Herodes pirengang berite nike, ie tinjot gati, maraq nike ẽndah selapuq dengan lẽq Yerusalem.

⁴ Make kumpulangne selapuq imam kepale dait ahli-ahli Taurat bangse Yahudi. Terus Raje Herodes beketuan lẽq ie pade, "Lẽq mbẽ Almasih gen tebijeang?"

⁵ Jawab ie pade, "Lẽq kote Betlehem, lẽq negeri Yudea. Sẽngaq maraq niki araq tetulis siq sopoq nabi,

⁶ 'Hai Betlehem, lẽq negeri Yehuda, side ndẽq saq paling kodẽq lẽq antare ie pade saq mrẽntah Yehuda. Sẽngaq lẽman side gen dateng sopoq pemimpin saq gen mimpin umat Tiang Israel.'"

⁷ Sesampun nerimaq penjelasan nike, Herodes secare tedoq-tedoq ngempoh ahli-ahli bintang lẽman Timuq nike, dait secare teliti gati Herodes beketuan lẽq ie pade, piran bintang nike mulai penggitan.

⁸ Sesampun nike ie pade teprẽntah siq Herodes ojok Betlehem, siq pesen niki, "Lumbar dait selidik pacu-pacu hal-hal mengenai Kanak nike. Lamun side pade sampun bedait kance Ie, sampẽang hal nike tipaq tiang, adẽq tiang ẽndah dateng nyembah Ie."

⁹ Beterus ie pade lumbar. Ie pade serioq malik bintang saq sampun ie pade serioq sendẽqmanne lẽq sedi timuq. Ie pade cemoh gati serioq bintang nike! Bintang nike terus lampaq senjuluq ie pade, terus ndot tepat lẽq atas taoq Kanak nike.

¹⁰ (2:9)

¹¹ Ie pade tame ojok dalem balẽ nike dait serioqne Kanak nike kance Mariam, mamiq bini-Ne. Ie pade sujut nyembah Kanak nike, dait bukaq tangkaq dowẽne, terus ngaturang lẽq Ie, emas, menyan dait mur.

¹² Allah peringet ie pade langan ngimpi adẽq ie pade ndẽq tulak ojok Herodes. Jari ie pade ulẽq ojok negerine liwat langan saq lain.

¹³ Sesampun ahli-ahli bintang nike lumbar, malaẽkat Tuhan rauh ojok Yusup lẽq dalem impi. Malaẽkat nike bemanik, "Herodes beniat boyaq Kanak nike jari nyematẽq Ie, keranaq nike becat ures, jauq Kanak nike dait mamiq bini-Ne beterus pelai ojok Mesir. Ndot lẽq taoq nike jangke Tiang dateng badaq side malik."

¹⁴ Yusup ures, dait kelem nike juaq ie jauq Kanak nike dait mamiq bini-Ne ngalih ojok Mesir.

¹⁵ Ie pade ndot lẽq derike jangke Herodes ninggal. Siq care nike telaksane selapuq saq temanikang siq Tuhan langan nabi-Ne, "Tiang ngemanikang Bije Tiang lẽman Mesir."

¹⁶ Sewaktu Herodes wikan bahwe ie sampun teakalang siq ahli-ahli bintang lẽman negeri timuq nike, Herodes jari menggah gati. Beterus prẽntahangne nyematẽq selapuq kanak-kanak mame saq beumur lẽq bawaq due taun saq araq lẽq Betlehem dait sekiterne. Hal nike sesuai keterangan saq ie terimaq lẽman ahli-ahli bintang, mengenai piran waktune bintang nike penggitan.

¹⁷ Siq care nike telaksane napi saq sampun tesampẽang siq Nabi Yeremia,

¹⁸ "Lẽq Rama kedengahan suare tangisan, dait suare dengan ngerung ẽroq asẽq. Rahel tangis bije-bijene; ie ndẽq mẽlẽ tehibur sẽngaq bije-bijene sampun ndẽq araq."

¹⁹ Sesampun Herodes ninggal, sewaktu Yusup masih araq lẽq Mesir, sopoq malaẽkat Tuhan rauh malik ojok Yusup lẽq dalem impi.

²⁰ Malaẽkat nike bemanik, "Dengan-dengan saq beniat nyematẽq Kanak nike sampun ninggal. Keranaq nike ures, jauq Kanak nike dait mamiq bini-Ne tulak ojok Israel."

²¹ Beterus Yusup ures, dait jauqne Kanak nike kance mamiq bini-Ne tulak ojok wilayah Israel.

²² Laguq sesampun tedengah siq Yusup bahwe Arkelaus, bije Herodes sampun jari raje lẽq negeri Yudea gentiq bapaqne, Yusup ndẽq bani lumbar ojok derike. Sesampun teican petunjuk langan impi, ie lumbar ojok daẽrah Galilea.

²³ Lẽq derike ie ndot lẽq sopoq kote aranne Nazaret. Siq care nike telaksane napi saq tesampẽang siq nabi-nabi mengenai Kanak nike: "Ie gen tesebut Dengan Nazaret."

Matius

Video Matius 2

Ikuti Kami:

KONTAK | PARTISIPASI | DONASI