Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali i Yesu rapoanaka nja’u kota Betlehem nja’u propinsi Yudea. Tempo rapampoanaka etu i Makole Herodes semo to mangkuasang tau ri tana etu. Wali tempo etu ratamo bara sawei mba’a tau to mangansani batuanginya batu’e. Sira ma’i yako ri tana to tondo mata nu eo rata nja’u Yerusalem. Wali sira mampotanaka resi tau nja’u ria, sira manganto’o,
2 “Kami owo rata yako ri tana to nja’u tondo mata nu eo. Naka pei kami ma’i ri tana ngkomi si’i apa seore, tempo nja’uwa nja’u tana mami etu, tempo etu kami re’e mangkita sampa’i batu’e to bou. Wali kami mampondayaka batu’e etu bara mawali tondong mangkonong pampoana nu makole ngkomi to Yahudi. Wali kami ma’i mangaliwu Ia see maya mampue mampakabae Ia. Wali imbare tampa kare’eNya?”
3 Wali pampotanaka ntau etu nadonge seja i Makole Herodes. Wali tempo ia mangandonge etu ia masusa kojo rayanya, pasi samparia tau to maroo ri Yerusalem sira masusa seja rayanya.
4 Wali tempo etu i Herodes mampasiromunaka samparia kepala kepala nto pampue pasi tau to mampoguru porenta i Musa. Ia mampotanaka resi sira bara imbare darapampoanaka i Kerisitu, Makole Parajanji i mPue Allah.
5 Wali sira mangansono, “Nja’u Betlehem ri propinsi Yudea si’i, apa ewa see natulis nto pantuntu tuntu i mPue Allah tempo owi,
6 to’onya, ‘O to Betlehem. Kota ngkomi to kodi kojo ri tana Yehuda. Pei nempo taa malagi tau, kota ngkomi semo to bae batuanginya, apa yako Betlehem damasuwu samba’a makole to damangkampang komi to Israel, komi to taungKu semo.’” Etu semo gombo i mPue Allah.
7 Wali yako etu i Herodes mampotuunaka jamo tau to mangansani batuanginya batu’e etu damampotango ia apa ia rani mangakal sira. Panewa ojo karata nsira resi ia, ia magombo resi sira panewa mampotanaka, ia manganto’o, “Mpia pasuwu nu batu’e to kita ngkomi etu?” Wali sira mangansono gombonya etu,
8 panewa ia mampokau sira yau njo’u Betlehem. Ia manganto’o, “Inta pei liwu Ana kodi etu. Ane nurata ngkomi, pakarebaka muni resi aku see aku yau seja damampue mampakabae Ia.”
9 Wali ojo karoonya sira mampodongeka gombo i makole etu, sira polas. Pasi tempo sira polas etu sira mangkita wo’u muni batu’e to kita nsira tempo sira nja’u tana tondo mata nu eo seore. Wali batu’e etu mawali mata njaya nsira, panewa batu’e etu mandoo ndate wawo banua to nakanja’u nu Ana kodi to naliwu nsira.
10 Wali bae kojo kandende ndaya nsira mangkita batu’e etu.
11 Wali ojo karata nsira nja’u banua to nasuduka nu batu’e etu, sira masua pei mangkita Ana kodi sindarandara pei indoNya, i Maria. Wali sira madungku yau ri wawo ntana mampue mampakabae Ana kodi etu. Panewa sira mangua tampa ngkasuginya pei mangansora Ia. Sora etu weyawa, pasi dua ngaya soga to matao waunya, to rato’oka kemenyan pasi mur.
12 Yako etu sira yore, pei tempo sira yore sira mangipi. Ri raya mpangipinya etu i Pue Allah mampogomboka sira, Ia manganto’o, “Ane mawolili muni komi ne’emo liu njo si Herodes.” Wali tempo sira meyoko dayau muni njo’u lipu nsira, sira mangalulu jaya to yusa.
13 Wali ojo payoko nsira etu panewa i Yusup ia re’e seja pangipinya. Ri raya mpangipinya etu ia mangkita samba’a pomakau i mPue. Wali pomakau etu manganto’oka ia, to’onya, “Pambangu Yusup! Oko Ana kodi pasi indoNya pei piyai lo’u tana Mesir. Pei karoo la’u ria sampe rata temponya to aku damanganto’oka korom ma’i muni. Ika ewa see apa i Herodes re’e mangansongka damangaliwu Ana kodi si’i darapopate yau.”
14 Wali yako etu i Yusup mangendo muni yako ri raya ngkayorenya. Ia mambangu pei mangoko Ana kodi pasi indoNya panewa sira togo meyoko ri raya mburi etu semo dayau lo’u tana Mesir.
15 Wali ojo karata nsira la’u tana Mesir, sira maroo-roo la’u ria sampe rata temponya kapate i Herodes, roo see sira togo mawolili muni ri tana Israel. Wali palaong etu mawali see tibanang gombo i mPue to naporata nto pantuntu tuntuNya tempo owi, to manganto’o, “Aku mampokio anangKu dama’i yako la’u tana Mesir.” Etu semo gombo i mPue Allah to nato’o nto pantuntu tuntuNya tempo owi.
16 Wali tau to mangansani batuanginya batu’e etu sira tamo liu resi i Herodes, wali manasa resi i Herodes ia natipu nsira. See naka ia maja’a kojo rayanya. Wali ia mangampokau tentaranya yau njo’u Betlehem pasi njo’u lipu-lipu to ri awenya. Ia mampokau sira damampopate yau samparia ana to langkai to nja’u ria to owo re’e rataka to dua nto’umo. Naka pei ia mangika ewa see apa ane ewa panto’o ntau to nansani batuanginya batu’e etu, bara ewa wetu semo umurnya Ana kodi to ia mangaliwu.
17 Wali tentara i Herodes mangika ewa wimba to rapokauka sira mangika etu. Wali maroso kojo loo ntau tumangi nja’u kota kota etu apa malagi ngana ntau napopate yau ntentara etu. Wali palaong etu mangabanang gombo to nato’o nto pantuntu tuntu i mPue Allah tempo owi, i Yeremia.
18 Ia mangaligi mangkonong kamawo ndaya nsira, to’onya, “Ri kota Rama radonge loo ntau to tumangi-mangi pasi maroso loonya mangantangis apa mawo kojo rayanya. I Rahel, bue ngkita tempo owi, ia tumangi mangantangis ngananya pasi bo’onya rapolindo apa sira tamo re’e.” Etu semo gombo i Yeremia tempo owi.
19 Wali yako etu i Herodes mate yau. Ojo kapatenya etu, i Yusup mangkita wo’u samba’a pomakau i mPue Allah ri raya mpangipinya la’u tana Mesir. Pomakau etu manganto’o,
20 “Pambangu, oko Ana kodi pasi indoNya pei powalili muni ndeku tana Israel, apa tau to rani mampopate yau Ana etu, sira paka roomo namate yau.”
21 Wali i Yusup mangendo muni yako ri raya ngkayorenya etu. Ia mambangu pei mangoko Ana kodi pasi indoNya panewa sira mawolili muni ndeku tana Israel.
22 Pei ri raya mpalinjanya etu i Yusup mangandonge kareba manganto’o i Arkhelaus, ana i Herodes, mangkuasang tau ri propinsi Yudea mangabolos pa’anya. Wali i Yusup meka rayanya yau muni ri kota Betlehem apa nja’u seja nja’u propinsi Yudea to nakuasang nu ana i Herodes etu. Pasi ia re’e wo’u pangipinya pei ri raya mpangipinya etu ia napatiendoka wo’u i mPue Allah, wali see naka ia yau njo’u propinsi Galilea to nja’u seja nja’u tana Israel.
23 Wali ojo karata nsira sana ri Galilea etu, sira yau ri kota to rato’oka Nasaret pei maroo nja’u ria. Wali palaong etu mawali see tibanang gombo to nato’oka nto pantuntu tuntu i mPue Allah tempo owi mangkonong i Yesu, sira manganto’o, “Ia darato’oka To Nasaret.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA