Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Naonda ing ki Yesus pinononggadídon kom Betlehem, butá in Yudea kon tungkuḷ ki Raja Herodes, namangoidon kon Yerusalem intau mita im Mayusi nongkon Timur.
2 Bo mosia nolibó magí-makow: "Kon onda degá in Sia, raja intau Yahudi inta bagu pinononggadí tua? Kami aindon noko'ontong kon tundi-Nya kon dotá in Timur, bo kami na'a mamangoi sim mosumbah ko'i-Nia."
3 Náonda ing ki Raja Herodes bo bayongan intau kon Yerusalem nokodongog kon soáḷ tatua, no'italikokog totok mosia.
4 Dá sinipunnya in imang mita tongguḷunya bo guru mita in agama intau Yahudi. Bodongka nolibó ko'i monia, "Kon onda im popononggadían ko'i Mesias?"
5 Tubag monia ko'inia: "Kom Betlehem, butá in Yudea, sin nana'a im pinais kom bonu im buk i nabi:
6 Bo ikow Betlehem, butá i Yohuda, ikow in de'emanbí totok im mo'intok kon sigad monia inta nomarentah kon Yohuda. Sin nongkon inimubí na'a mo'isindog in tobatú intau inta mobalí itoi, Sia inta moḷukad kom bayongan umat-Ku kon Israel."
7 Bo inumado-adop makow ki Herodes nogoiní kon intau mita Mayusi tatua bo nolibó ko'i monia kinotalit mongo dodai onda tundi tatua inontong.
8 Onda intua pinotabánya intau mita i Mayusi tatua minayak im Betlehem, takin koyow: "Bayak bo tayakdon kopira'an adí tatua, bo náonda i mo'ulí monimu in Sia, ḷagi angoi poguman ko'inakó simbá aku'oi mamangoi doman mosumbah ko'i-Nia."
9 Nokodongog makow kong koyow i raja natua, nobuatdon mosia, bo mosia noko'ontong kon tundi inta aindon inontong monia kon Timur inumuna ko'i monia bo nogogai kon tombutungmai in tampat inta pinogukatan kon Adí tatua. Naonda i mosia noko'ontong kon tundi tatua, nopia-pia totok ing gina monia.
10 (2:9)
11 Bo sinumuotdon mosia kom bonu im baḷoi tatua bo no'indoi kon Adí tatua takin ki Maria ki iná-Nya. Mosia sinumungkud bo nosumbah ko'i-Nia. Mosia nobuká kon tampat pobobonuan kom barang monia bodongka nobogoi im barang pinosumbah koi-Nia. Barang inta inogoi monia tua im buḷawan, kamanya, bo taḷong mobondu.
12 Bo lantaran mosia aindon kinoyowan kom bonu in togo'indop simbá dona'aidon mayak bui ko'i Herodes. Dá mosia nobuidon kon lipú monia tontaní ta'e nongin daḷan ibanyadon.
13 Naonda intau mita im Mayusi minayakdon, malaikat i Tuhan nokipogontong ko'i Yusup kom bonu in togo'indop bo noguman: "Pobangondon ikow bo gamádon in Adí tatua bo dia takin ki iná-Nya, poḷaguidon kom butá im Mesir bo pogutunpa kon tua modapot in Aku'oi bui mosingog ko'inimu, sing ki Herodes moramiji motayak kon adí tatua bo limodon".
14 Doḷompa doman tua ki Yusup nobangon bo nodia kon Adí tatua takin ki iná-Nya bodongka noḷagui minayak im Mesir.
15 Bo nogutun kon tua, nodapot ing ki Herodes minatoi. Tua komintan nobalí simbá motompodon onu im pinoguman i Tuhan kon nabi-Nya, nana'a: "Nongkon Mesir inoiní-Ku ing ki Adí-Ku."
16 Naonda ing kinota'auan i Herodes kon sia aindon inakaḷan in intau mita Mayusi tatua, sinumorú totok in sia. Manangka intua pinokilimodnya im bayongan adí kom Betlehem bo kon lipú inta noyodiugeamai. Bayongan adí inta umur doyowa notaong mamonag, tua sinantúnya podudui wakutu inta kinota'auanya nongkon intau mita im Mayusi tua.
17 Tua in nobalí simbá motompodon singog i Tuhan inta pinoyaput i Nabi Yeremia, nana'a:
18 "Kinodongogandon in tombá kon Rama, ombaḷ bo amui inta totok mokokuyang; ki Rahel mongombaḷmai ko'i adínya mita, bo sia doí dondo'uḷugan, sing ki adínya mita diá don."
19 Naonda ing ki Herodes minatoi, malaikat i Tuhan namangoidon bui nokipogontong ko'i Yusup kom bonu in togo'indop, bo noguman,
20 "Pobangondon, gamádon Adí tatua bo dia takin ki iná-Nya bo bayakdon kom butá Israel, sim mosia inta molimod kon Adí tatua, ai minatoi."
21 Dá ki Yusup nobangon domandon, ginamánya Adí tatua bo dinianya takin ki iná-Nya bo minayak kom butá Israel.
22 Ta'e naonda in dinongognya kong ki Arkhelaus in nobalí raja kon Yudea nomaḷui ko'i Herodes ki amánya, no'ondok in sia mayak intua. Ta'e malaekat bui noguman ko'inia kon togo'indop, dá ki Yusup minayak ing Galilea.
23 Kon tua, sia nogutun kon lipú inta tangoinya Nazaret. Tua komintan nobalí simbá motompodon Pirman inta aindon pinoyaput i nabi mita, kon sia in tangoion, "Intau Nazaret."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA