Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Gee 'o Yesus wa'adono 'o Yerikhoka, de kawogila-gilaka watoaka ge'ena ma kotaka.

² Ge'ena ma kotaka 'o pajaki yoga-ga'asoko manga balusu wimoi wokaya-kaya 'awi ronga 'o Zakheus.

³ 'Una womau wimake 'o Yesus ge'ena 'o nyawa ma gu-gudaioka. Duga 'una kawidipokoka, so kowimakekawa 'o Yesus.

⁴ So 'una wakirebese 'o nyawa yoku-kudai go'ona de wodoa 'o gotade, la wimake 'o Yesus gee dua ma etasi de waboa ge'enano.

⁵ Gee 'o Yesus wa'adono ma gotano ge'ena de womalega dakuie de kawongosekau, "Zakheus, taitika no'uti, sababu ne'ena ma wange ngoi salingou totulu 'ani woaka!"

⁶ 'O Zakheus kawijapatioka wo'uti de kawomore-morene widawongo 'o Yesus.

⁷ 'O nyawa yoodumu gee yamake-make ge'ena yokurubungu. 'Ona kayongosekau, "Ee tei, 'una wotulu 'o nyawa ma dorouka!"

⁸ 'O Yesus 'o Zakheus 'awi woakau de 'o Zakheus woma'oko de kawongosekau 'o Yesusika, "Jou, 'ai harataa ma songona 'asa takikula 'o nyawa yosusa-susaka, de nago'ona bato gee takiforikiokau, 'asa tofanguoli 'onaka 'ilape soatuku!"

⁹ Ge'enaka de 'o Yesus kawongosekau, "Ne'ena ma wange, ngona de 'ani woa ma dodaku nioodumu ma Jo'oungu ma Dutu winisilahakau de winikula 'o 'ahu ma sungi sababu ngona mita 'o Abrahamuno.

¹⁰ Ngoi 'o Nyawa ma Ngowaka toboa 'o duniano ma ngale tomau takisilaha 'o nyawa yoliba-liba."

¹¹ 'O nyawa yosigisene ma gu-gudaioka 'o Yesus wobicara, de 'o Yesus wosijarita 'o 'ade-'ade moi. Sababu, ma 'orasi ge'ena 'una 'o Yerusalem ma datekokau, de 'o nyawa-nyawa 'ona yomangano-nganono ma Jo'oungu ma Dutu dua wacobou wopareta ma ngale wokoana 'o duniaka.

¹² So 'o Yesus wo'ade-'ade konee, "Naga ma Koana wi ngowaka wimoi wotagi 'o daeraa 'ikuru-kurutika ma ngale wigoraka wodadi koana, ge'enaka deika wolioli ge'ena ma daeraaka.

¹³ Kowotagiwasi de waki'asokino 'awi ro-riwo yamogiooko, de wakikula 'o pipi 'o guraci 'o nyawa moi 'o ngai moi. De kawongosekau 'onaka, ''O pipi ne'ena niapake ma ngale nimawukunu ma 'orasi ngoi totagioka.'

¹⁴ Duga ma daeraa ma dutu go'ona widu'uduku, so wopasaka de 'ona yosidingoto manga nyawa, ma ngale wosidemo 'ato, 'Ngomi miooluku 'o nyawa nu'una wodadi 'amia koana.'

¹⁵ Duga ma Koana ma ngowaka gu'una kawigoraka wodadi koana, ge'enaka de wolio 'awi daeraaka. Kawototarika de 'awi ro-riwo gee 'o pipi wakikula-kula wakikoki'asoko yotaari, womau wosikanako 'okia moioka ma 'utungu yamakeno.

¹⁶ 'O ro-riwo gee wosira-sirano woboa kawongosekau, 'Tuangi, 'o pipi 'o guraci 'o ngai moi nokula-kulano ngoioka gee 'idadi 'o ngai mogiookokau.'

¹⁷ Ma bereki gu'una kawongosekau, ''Alele! Ngona 'o ro-riwo ma owa. Sababu 'o hali ma di-dingoonoka 'idadi toningaku, ngoi 'asa tonigoraka 'o kota 'o ngai mogiooko napareta.'

¹⁸ 'O ro-riwo wimoioli woboa de kawongosekau, 'Tuangi, 'o pipi 'o guraci 'o ngai moi gee nokula-kulano ngoioka, 'idadi 'o ngai motoakau.'

¹⁹ Ma koana gu'una kawongosekau 'o ro-riwoka, 'Ngona 'asa napareta 'o kota 'o ngai motoa.'

²⁰ 'O ro-riwo 'iregu woboa de kawongosekau, 'Tuangi, neda 'ani pipi ngoi ta'iunika 'o mosaka tosisaono.

²¹ Ngoi tonidomodongo, Tuangi, sababu ngona 'ani singina 'ikuata. Ngona nomadegese 'okia naga gee ko to ngonakawa, de ngona nomadunguunu 'o joro ma sowoko gee ko to ngonawa nitudukoka!'

²² Ma koana gu'una kawongosekau 'unaka, 'Ngona 'o ro-riwo ma dorou! Moteke to ngona ma sirete 'ani demo-demo, ngoi 'asa tonihukumu. Ngona nanako ngoi 'o nyawa ma singina 'isau-sauku; ngoi tomadegese 'okia naga gee ko to ngoiokawa de tomadunguunu 'o joro ma sowoko gee kiaka ko to ngoiwa 'ai tudukoka.

²³ Nako koge'ena de 'ido'oa so ma pipi ge'ena konokulakawa 'o nyawaka gee yomanarama yosinonu-nonu ma dogo, la gee toliono de 'idadi toside'ese de ma dogoka?'

²⁴ Ge'enaka ma koana gu'una kawongosekau 'awi nyawaka gee yoma'oko-'okode ge'enaka, 'Ma pipi 'unaka gee nia'ese la niokulaka 'o ro-riwoka gee 'awi pipi 'o saaka 'o ngai mogiookoka.'

²⁵ Ma 'o nyawa-nyawa kayongosekau, 'Tuangi, to 'una 'o ngai mogiookokau.'

²⁶ Ma koana gu'una wosango, 'Niongano-nganono: 'O nyawa gee to 'ona de ma 'enau, 'onaka 'asa yakikula 'ifoloi 'ikudai. Ma 'o nyawa gee to 'ona koi'iwa, 'okia naga gee 'onaka ma dua ya'eseka.

²⁷ De ma 'orasi ne'ena niaki'asanou gee 'isa-saturuu, gee yooluku ngoi todadi koana. Niakito'omaka yoodumu 'ai bionoka!'"

²⁸ 'O Yesus wosidemoka 'iodumu ge'ena, de 'una wosira-sira yosikaika 'o Yerusalemuka.

²⁹ Gee ya'adonoka rekeni 'o Betfage de 'o Betaniaka 'o Zaitun ma gigieka, de 'awi do-domoteke yamididi wakisuloko yosira.

³⁰ De 'o Yesus kawongosekau 'onaka, "Niotagi 'o soanika gee nia bionika doka. Nako ge'enaka niowosama, dua niamake 'o keledai ma ngowaka 'isipusuika. 'O keledai ge'ena koma'iwasi 'o nyawa ya'asa. Niasose de nia'asano ningino.

³¹ Nako 'o nyawa yosano nginika, ''Ido'oa so niasose 'o keledai ge'ena?', niosidemo 'ato, 'Ma Jou woparaluu.'"

³² 'O Yesus 'awi do-domoteke yamididi go'ona yotagi, de yakokimake 'isoka gee 'o Yesus wosidemokau.

³³ 'Ona yasose ma keledai ma ngowaka ge'ena, de ma dutu kawongosekau 'onaka, "'Ido'oa so niasose 'o keledai ge'ena?"

³⁴ 'Ona yosango, "Ma Jou woparaluu."

³⁵ Ge'enaka de 'ona ya'asa ma keledai ma ngowaka ge'ena 'o Yesusika. 'Asa de manga baju yosinao ma keledai ma dekuku, de wiriwo 'o Yesus woparene ma keledai ma dekude.

³⁶ Gee 'una woboa woparenuku 'o keledaioka, de 'o nyawa-nyawa manga baju yosinao 'o tapakioko ma ngale wihoromati.

³⁷ Gee 'o Yesus wa'adonoka rekeni 'o Yerusalemuka, 'o ngekomoka gee 'isikauku 'i'uti-'uti 'o Zaitun ma gigieka. De 'awi do-domoteke yoku-kudai go'ona yoodumu yosigaso-gasoko ma Jo'oungu ma Dutu wisiarene de yo'amalaha sababu 'iodumu 'o no-nako 'ihera-herangi gee 'ona yamakekau.

³⁸ 'Ona yosigasoko yongose 'ato, "Ma Jo'oungu ma Dutu wonisibarakati ngona gee noboa de to 'una 'awi kuasa! 'Alele! Ma Jo'oungu ma Dutu de de ngone pomakasanangiokali de wonasilaha! Powisiarene sababu 'awi singina 'isure!"

³⁹ 'O Farisioka yamuruo naga ge'ena dau yoku-kudaioka gee kayongosekau 'o Yesusika, "'Aba Guru, nakitawanono la 'uwa koge'ena yongose."

⁴⁰ 'O Yesus wosango, "Tinisidemo! Nako 'ona yomariidi, 'o teto-teto ne'ena 'asa 'ima'orese."

⁴¹ Gee 'o Yesus kaifoloi monga wasori 'o Yerusalem de wamake ma kota ge'ena, de wodagari.

⁴² Wosibetongo, "Ee sioko, 'ifoloi yaowa nako ne'ena ma wange mita ngini niasahe 'okia salingou 'iparaluu ma ngale nisisanangi! Ma ne'ena ngona konamakewa ge'ena.

⁴³ Sababu dua 'asa ma 'orasi ya'adono, gee nisa-saturuu 'asa nifati nisibululunu.

⁴⁴ 'Ona 'asa nitorouoka ngona Yerusalem, de ni kawasa, so ma teto ka 'o ngai moi ma dua koi'iwa yamadaka 'imakaretenuku ma ngiioka, sababu ngona konokalesanguwa ma 'orasi ma Jo'oungu ma Dutu woboa ma ngale wonisilaha!"

⁴⁵ 'O Yesus wowosama ma Jo'oungu ma Dutu 'awi Woaka de wakiginiiki yomawuku-wukunu gee ma Jo'oungu ma Dutu wi Woa ma si'abeka.

⁴⁶ Kawongosekau 'onaka, "Naga 'o Buku 'Itebi-tebinoka 'isilefoku ma Jo'oungu ma Dutu wongose konee: ''Ai Woa ge'ena 'o lahidoa ma ngii.' Ma ngini niadiai 'o go'ora ma 'igutu!"

⁴⁷ 'O wange 'isinoimi 'o Yesus wodotoko ma Jo'oungu ma Dutu 'awi Woaka. 'Ena 'o 'imam ma sae-saeke de 'o 'agamaka yodoto-dotoko, de mita 'o Yahudioka manga balu-balusu yosikanonu 'o ngekomo ma ngale wito'oma.

⁴⁸ Duga koyodamakewa ma ngekomo ma ngale wito'oma, sababu 'o nyawa 'iodumu koyomaogoruwa yosigisene 'unaka, de manga singina yadaene 'awi demo-demo.

Lukas

Video Lukas 19

Ikuti Kami:

KONTAK | PARTISIPASI | DONASI