Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Waktu Isa sampai di Yerikho, Ia kuruk untuk ngelintasi kota seno.

² Di kota ano wat sai jelma kepala penagih pajak sai mebatin. Gelarni Zakheus.

³ Ia mirak ngeliak sapa Isa ano, kidangni mani jelma lamon nihan rik ia tenggalan mebuntak, maka ia mak behasil ngeliak Isa.

⁴ Jadi, ia tegar mena jak ulun-ulun, kak raduni cakak batang in dapok ngeliak Isa sai serebok lagi haga liu di dudi.

⁵ Waktu Isa sampai di batang ano, Ia ngeliak mik atas rik cawa, "Zakheus, regah geluk! Mani Nyak haga ratong mik lambanmu rani inji."

⁶ Zakheus geluk-geluk regah rik nyambut Isa riang nihan.

⁷ Sunyinni jelma sai ngeliak hal seno mulai besungut-sungut. Tian cawa, "Iih! Ia ngeratongi lambanni ulun sai mak mebetik!"

⁸ Kak raduni di lambanni, Zakheus cecok rik cawa jama Isa, "Tuhan, separo jak hartaku haga kusedekahko jama jelma mejerih; rik sapa sai pernah kutipu, haga kubayar luot jama ia pak kali lipat!"

⁹ Kak raduni cawa Isa, "Rani inji niku rik unyinni keluargamu diselamatko ulih Allah rik dikeni hurik sai ampai, mani niku juga keturunan Abraham.

¹⁰ Anak Manusia ratong untuk nyepok rik nyelamatko ulun sai sesek."

¹¹ Sementara ulun masih ngedengiko Isa cawa, Ia nyeritako sai perumpamaan. Mani, pada waktu seno Ia lagi wat redik Yerusalem, rik ulun nyangko kik Allah geluk memerintah sebagai Raja di dunia.

¹² Isa cawa, "Wat sai bangsawan mik di negeri sai jaoh haga dilantik jadi raja, kak raduni muloh luot.

¹³ Semakkung berangkat, ia ngurau puluh jelma sai ngelayani ia, raduni ngeni jama tian masing-masing sekeping duit emas. 'Bedagangdo jama duit inji sementara nyak mik,' cawani jama tian.

¹⁴ Kidang penduduk negeri udi nyuoh jama ia. Jadi, radu ia mik, tian ngirim utusan untuk ngucakko, 'Sekam mak haga jelma inji jadi raja sekam.'

¹⁵ Kidang bangsawan ano dilantik jadi raja, kak raduni muloh mik negerini. Kak raduni ia ngurau jelma-jelma sai ngelayani ia ngehadap, untuk ngilu pandai pira untung sai radu didapok tian.

¹⁶ Jelma sai ngelayani sai mula-mula ratong rik cawa, 'Tuan, sai duit emas sai Tuan keniko udi, radu kujadiko puluh.'

¹⁷ 'Bagus,' ani tuan ano, 'niku jelma sai ngelayani sai betik! Mani delom hal-hal sai lunik niku dapok dipercaya, nyak haga ngejadiko niku jelma sai bekuasa jak puluh kota.'

¹⁸ Jelma sai ngelayani sai kerua ratong rik cawa, 'Tuan, sai duit emas sai Tuan keniko udi, radu kujadiko lima.'

¹⁹ Jama jelma sai ngelayani ano raja udi cawa, 'Niku haga kujadiko jelma sai bekuasa jak lima kota.'

²⁰ Jelma sai ngelayani sai bareh ratong rik cawa, 'Tuan, ajo duitmu; nyak nyegokkoni delom setangan.

²¹ Nyak rabai jama Tuan, mani Tuan jelma sai keras. Tuan ngakuk api sai lain milik Tuan, rik Tuan ngakuk hasil di rang sai mak ditanom ulih Tuan.'

²² Raja udi cawa jama ia, 'Niku jelma sai ngelayani sai jahat! Nutuk cawa-cawamu tenggalan nyak haga ngehukum niku. Niku pandai nyak jelma sai keras: nyak ngakuk api sai lain hakku rik ngakuk hasil di rang sai mak kutanom.

²³ Kik injuk reno mengapi niku mak ngurukko duit ano di bank in kik nyak muloh nyak dapok nerima duit seno jama bungani?'

²⁴ Kak raduni raja ano cawa jama jelma-jelma sai cecok di disan, 'Akuk duit ano jak ia rik keniko jama jelma sai ngelayani sai ngedok puluh duit emas ano.'

²⁵ Kidangni jelma-jelma udi cawa, 'Tuan, ia radu ngedok puluh.'

²⁶ Raja udi ngejawab, 'Ingok: jelma sai radu ngedok, jama ia haga dikeni lebih lamon lagi. Kidang jelma sai mak ngedok api sai wat jama ia haga diakuk muneh jak ia.

²⁷ Rik tano usung mik dija musuh-musuhku ano sai mak setuju nyak jadi rajani. Bunuh tian unyinni di hadapanku!'"

²⁸ Seraduni Isa ngucakko sunyinni ano Ia lapah di hadap tian mik nuju Yerusalem.

²⁹ Waktu sampai redik Betfage rik Betania di Bukit Zaitun, Ia ngayun rua jelma sai nutuk Ia mik mena.

³⁰ "Mikdo mik pekon sai di hadap ano," cawa Isa jama tian, "kik keti kuruk di disan, keti haga ngeliak sai anak keledai teikok. Keledai udi makkung pernah ditunggangi jelma. Lepasko keledai udi rik usung mik dija.

³¹ Kik ulun betanya jama niku, 'Mengapi keti ngelepasko keledai ano?' ucakko, 'Tuhan memerlukoni.'"

³² Kerua jelma sai nutuk Isa ano mik, rik ngehalu unyinni gegoh jama sai dicawako-Ni.

³³ Selagi tian ngelepasko anak keledai ano, sekedauni cawa jama tian, "Mengapi keti ngelepasko keledai ano?"

³⁴ Tian ngejawab, "Tuhan memerlukoni."

³⁵ Kak raduni tian ngusung anak keledai ano mik jama Isa. Raduni tian ngepikko jubahni tian di atas keledai ano rik nulung Isa cakak di atasni.

³⁶ Sewaktu Ia liu sambil nunggangi keledai ano, jelma-jelma bareh ngebentangko jubahni tian di renglaya.

³⁷ Waktu Isa hamper sampai di Yerusalem, di renglaya sai nurun di Bukit Zaitun, sunyinni jelma-jelma sai nutuk Ia sai lamon ano mulai beseru-seru memuji Allah rik ngucapko terima kasih jama Ia mani sunyinni keajaiban sai radu tian saksiko.

³⁸ Tian cawa, "Diberkatido Raja sai ratong atas gelar Tuhan! Sejahtera di surga, rik terpujido Allah!"

³⁹ Pira jelma Farisi jak hantara jelma lamon udi cawa jama Isa, "Bapak Guru, kayunko jelma-jelma sai nutuk Bapak ngehema."

⁴⁰ Isa ngejawab, "Percayado! Kik keti ngehema, batu-batu inji haga mekik."

⁴¹ Waktu Isa makin redik jama Yerusalem, rik ngeliak kota ano, Ia ngehiwangini.

⁴² Cawa-Ni, "Kesian, hara betikni, kik rani inji niku pandai api sai dapok ngeratongko perdamaian! Kidangni tano niku mak dapok ngeliakni.

⁴³ Niku haga ngalami sai waktu, di dipa musuhmu nyani halangan-halangan di kelilingmu; tian haga ngepung niku rik ngedesak niku jak sunyin penjuru.

⁴⁴ Tian haga ngehancorko niku jejama unyinni pendudukmu; rik mak ngedok sai batu pun haga ditaganko tian tinggal tesusun di rangni, mani niku memperhatiko waktu Allah ratong untuk nyelamatko niku!"

⁴⁵ Isa kuruk mik Lamban Ibadah rik mulai nguser jelma-jelma sai bedagang di dudi.

⁴⁶ Cawa-Ni jama tian, "Di delom Alkitab tetulis injuk reji: Allah cawa, 'Lamban-Ku haga jadi lamban rang bedua.' Kidang keti nyanini sarang penyamun!"

⁴⁷ Unggal rani Isa ngajar di delom Lamban ibadah. Imam-imam kepala, rik guru-guru agama, juga jelma-jelma sai mimpin Yahudi mirak ngebunuh Ia,

⁴⁸ kidang mak mansa renglaya untuk ngeguaiko hal seno, mani sunyinni jelma terus ngedengiko Ia, rik tepikat jama cawa-cawa-Ni.

Lukas

Video Lukas 19

Ikuti Kami:

KONTAK | PARTISIPASI | DONASI