Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Yésus nesemuet lemaba bawang Yeriko.
2 Idi inan selemulun, luk ngadanneh Sakius, ieh ineh lun rayeh luk ngamung usin pupuk, idi ieh teh mula' binaweh.
3 Idi ieh nenakap dalan sikal nier idéké Yésus ineh, iamo' na miak ngaceku lemulun mula', idi teh ieh mebeneh.
4 Idi ieh nupun iné' pa atun lun mula', idi nemanad aceh lawa gita' sikal nier Yésus, ngaceku su ineh Ieh miak lemaba.
5 Kareb Yésus nacing su luk inanneh ineh, idi Yésus pana' nenier déi' dita' idi nepebala neneh, "O Sakius, remurut iko dengan mesaget, ngaceku bang aco sini na miak na Ui umak ruma'mu."
6 Idi dengan mesaget ieh neremurut idi nenguit Neneh dengan mawang niat.
7 Amung lemulun luk nenier ratnan ineh dureng-dureng, idi nepebala, "Ieh iné' tudo dengan lun luk mesala'."
8 Sakius netuped idi nepebala inan Tuhan, "Sebuang ratnan binawehku, O Tuhan, ui maré kuan lemulun luk masi', idi kudeng ui pangeh nengalap binaweh dulun dengan naluk, ui maré lemubed apat kua' kinula'neh."
9 Idi kebala Yésus neneh, "Bang aco sini ulun nacing kuan uang tetek ruma' ini, ngaceku lemulun ini teh luk iniap ku anak Ibrahim.
10 Ngaceku Anak-Lemulun nacing nakap idi ngulun luk neraruh.
11 Kareb lun mula' neninger bala ineh, idi Ieh nemada' aceh luk pinginud teh. Ieh pangeh muneng ku Yerusalim, idi bang terawé lun mula' Imet Allah miak siren kareb aco sineh teh.
12 Ngaceku ineh kebala Yésus, "Inan seburur lun do' luk nenalan iné' bawang luk mado, pad ieh miak mangun ku raca'. Pangeh ineh ieh miak lemubed.
13 Kareb nateh ieh nenalan ieh nenawar pulu' burur demulunneh idi nemaré kuan anid bururdeh sebalad amas kebalaneh, 'Do' muyuh pepua' pad macing ui muli'.'
14 Iamo' lun bang bawang ineh megateh neneh, idi nengecuk lun duken ngerada' neneh, keburi'deh, 'Kai na sikal lemulun ini mangun ku raca' kai.'
15 "Lun do' ineh kinikit mangun ku raca', idi ieh nuli'. Ieh petacu nawar amung-amung demulun luk inanneh nemaré balad amas ineh, pad ieh miak kali' tuda' luk ilapdeh.
16 Idi luk pun-pun iné' neneh, idi nepebala, 'O tuan, sebalad amasmu ineh pangeh mangun ku pulu' balad.'
17 Idi keburi' tuan ineh neneh, 'Do' luk inau'mu, O demulun luk do'! Ngaceku iko pangeh nelutep bang luk isuut, iko miak ngimet pulu' bawang.'
18 Idi luk kedueh iné' neneh, keburi'neh, 'O tuan, sebalad amasmu ineh pangeh mangun ku limeh balad.'
19 Idi keburi' tuan kuan demulun ineh teh, 'Iko miak ngimet limeh bawang.'
20 Idi luk baken iné' matun neneh, keburi'neh, 'O tuan, ini sebalad amasmu, luk dinugku bang belaca.
21 Ui matot namu, ngaceku iko selemulun luk metueh niat; iko ngalap luk na iko kuan, idi ngeranih luk na tinibumu.'
22 Idi kebala tuan ineh neneh, 'O demulun luk dat, dengan balamu ineh ui ngukum namu. Pangeh iko kali', idi ui ini selemulun luk metueh niat, luk ngalap anun-anun luk na ui kuan, idi ngeranih anun-anun luk na tinibuku.
23 Anunké punneh iko na nganug usinku bang béng? Idi kareb ui macing miak ui ngalap lemubed dengan uli'neh.'
24 Idi ieh nepebala nan lemulun luk tuped déi, 'Do' muyuh ngalap rat neneh balad amas ineh, idi maré neneh kuan lemulun luk inan pulu' balad.'
25 Idi keburi'deh neneh, 'O tuan, ieh inan pulu' balad.'
26 Ui pebala nemuyuh, idé-idé luk inan anun-anun, kuan lemulun ineh miak barén teh, iamo' lemulun luk na anun-anun, anun luk ieh kuan pana' miak lapen rat neneh peh.
27 Iamo' bunu'-bunu'ku ineh luk na sikal negku mangun ku raca'deh, do' nguit nedeh amé; tungé' idi ngaté nedeh pa kiungku.'"
28 Kareb Yésus pangeh nepebala kudeng ineh, idi Ieh nenalan atun amé' Yerusalim.
29 Kareb Ieh nacing muneng ku Baitpagi idi Baitani déi' Pegkung Saitun, idi Ieh nengecuk dueh burur anak sekola'Neh,
30 kebalaNeh, "Amé' medueh bang bawang luk pa atun medueh, kareb medueh semuet bang bawang ineh, medueh miak papu' aceh anak keladai inabet, luk na tupu inan lun netudo luunneh atun. Do' neka abetneh, idi nguit neneh amé' tungé'.
31 Kudeng idé-idé ngitun nemedueh, 'Anunké punneh medueh neka neneh?' do' mala kudeng ini, 'Tuhan pian ku ieh.'"
32 Idi didueh nenalan, idi didueh nekali' matu kudeng luk bida' Yésus nedidueh ineh.
33 Uned didueh neka abet anak keladai ineh, idi lemulun luk kuan anak keladai ineh nepebala nedidueh, "Anunké punneh medueh neka anak keladai ineh?"
34 Idi keburi' didueh, "Tuhan pian ku ieh."
35 Idi didueh nenguit neneh amé' ni Yésus, idi didueh nemalad ayung didueh sebuleng luun anak keladai ineh, idi nenganau' Yésus tudo luunneh.
36 Idi kareb uned Ieh nalan, idi inan lemulun nemalad kibung uned dalan.
37 Kareb Ieh pangeh muneng ku su luk inan irang Pegkung Saitun, idi amung-amung anak sekola' luk mula' ineh mawang niat idi ngubur Allah dengan arod luk rayeh, ngaceku amung-amung kekamen luk melalud luk sinierdeh ineh,
38 kebaladeh, "Samal kuan Raca' luk macing bang ngadan Tuhan; awang déi surga, idi ubur kuan Allah!"
39 Idi arang lun mula' ineh inan tuda'-tuda' lun Parisi luk nepebala Neneh, "O Guru, mebpeng anak-anak sekola'Mu ineh."
40 Idi kebala Yésus, "Ui pebala nemuyuh, kudeng ideh pirud, kali' rungen batu-batu miak ngitang."
41 Kareb Yésus muneng ku Yerusalim, idi Ieh nenier bawang ineh idi Ieh nenangi',
42 kebalaNeh, "Pelaba do' kudeng aco sini iko kali' ratnan luk miak nguit awang! Iamo' nekini iko na miak nier ineh.
43 Aconeh miak macing namu, idi bunu'-bunu'mu miak ngar libut-libutmu, idi ngerieng namu idi ngelibut namu.
44 Ideh miak ngusag namu idi ngaté anak-anakmu, idi sebuleng batu pana' luk pebuun dengan luk baken na ketecan bang namu, ngaceku iko na nekali' karebneh Allah iné' ngulun namu."
45 Yésus nesemuet bang Ruma' Allah, idi nengimun masut lemulun luk pepua' déi',
46 kebalaNeh, "Pangeh inayud, 'Ruma'Ku miak tetanen ruma' luk inan sembayang.' Iamo' muyuh ini nganau' neneh mangun ku lubang lun mano."
47 Idi anid-anid aco Yésus nemada' bang Ruma' Allah ineh. Iamo' imam-imam rayeh idi guru-guru Ukum, dengan lun rayeh pupu ineh nenakap dalan sikal ngaté Neneh.
48 Idi na ideh kali' anun-anun luk miak ruendeh ineh, ngaceku amung pupu ineh merapet Neneh idi sikal ninger balaNeh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA