Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sarạeng i Yesus nahumpạ su Yerikho, i Sie měngkatewe rimal᷊engu soa ene.
2 Su soa ene piạ sěngkatau těmbonangu maghaghělle bea kalạ, Arenge i Zakheus.
3 I sie mapulu makasilo kai i sai Mawu Yesus ene, kụ ual᷊ingken taumata tumanịu l᷊awọ dingangu i sie sẹ̌sane kai masanạ, ute i sie tawe nakasilo si Yesus.
4 Kutẹu i sie timal᷊ang nangal᷊amona taumata l᷊awọ, bọu e naawị su kalu, tadeạu makasilo si Yesus kụ tạ kaděngụe sarung sumahe sene.
5 Sarạeng i Yesus nahumpạ su kalu ene, i Sie rimal᷊ingara mase nẹ̌bera, "Zakheus lighạko ěnaẹ dělusẹ̌! U Iạ e kai mapulu mawunạ su wal᷊enu sahěllo ini."
6 I Zakheus měngkatewe masahawụ-sahawụ dimělusẹ̌ dingangu nanarimạ si Yesus napenẹ u ral᷊uasẹ̌.
7 Kěbị taumata nakasilo hal᷊ẹ̌ ene nanětạe němpẹ̌gahutụ. I sire nẹ̌bera, "Sih! I Sie tamai makisake su wal᷊en taumata ral᷊aị!"
8 Bọu e su wal᷊ene, i Zakheus dimarisị dingangu nẹ̌berạ e si Yesus, "Mawu, sěmbahạgeang bọu arětạku, takụ ionggọ su taumata kasiang; dingangu balạe i sai wọu takụ kinaakal᷊eng, sarung takụ baehang kapia si sie ěpạ u sul᷊e!"
9 Mase angkuěng i Yesus, "Su sahěllo ini i kau ringangu kal᷊awọu ral᷊ohon bal᷊enu masal᷊amatẹ̌ dingangu ghěllikangu pẹ̌bawiahẹ̌ buhu, batụu mang i kau lai hiten Abraham.
10 Ahus'u Taumata ruměnta mědeạ dingangu mapakasal᷊amatu apang něngkapal᷊idẹ̌."
11 Piạ e i sire wẹ̌dang kạpẹ̌dẹ̌daringihe si Yesus měbẹ̌bisara, i Sie nẹ̌běken papinintu sěmbaụ. Batụu su orasẹ̌ ene i Sie maraning Yerusalem, dingangu taumata mạngiral᷊ingu Mawu Ruata seng lighạ mẹ̌parenta kere sěngkatau Ratu su dunia.
12 Mawu Yesus něhengetang, "Piạ sěngkatau tuhasẹ̌ kụ nakoạ sol᷊ong banua marau mědeạu mahengkẹ makoạ datu, mase mẹ̌sul᷊e kapia.
13 Bědang ta něbẹ̌buạ, i sie nẹ̌kui mapul᷊ongkatau ěllange, mase nangonggọu roitẹ̌ bul᷊aeng pẹ̌sěngkal᷊ěpa si sire pẹ̌sěngkatau. 'Pěmpẹ̌dagangken doitẹ̌ ini karěngụewen iạ suraral᷊engang,' angkuěnge si sire.
14 Arawe ral᷊ohon soa ene měbẹ̌binsị i sie. Kutẹu, sarạeng i sie seng napaghohẹ̌ i sire něndolohu rarolohang tadeạu apạul᷊ịu, 'I kami madiring tau ini ipakakoạ datung kami.'
15 Kaiso tuhasẹ̌ ene nahengkẹ naratu bọu e nẹ̌sul᷊e su wanuane. Měngkate apa masahawụ i sie kimui manga ěllange apẹ̌tẹ̌těngo, tadeạu makakasingkạu kal᷊awọu untunge nikatarimạ i sire.
16 Ěllang humotonge riměnta ringangu nẹ̌bera, 'Mawu, doitẹ̌ bul᷊aeng kụ nionggọ u Mawu e, seng takụ kinakoạ mapul᷊ong kal᷊ěpa.'
17 'Mapaelẹ̌,' angkuěngu mawune, 'i kau ěllang mapia! Ual᷊ingu su manga hal᷊ẹ̌ dararodọ, i kau wotonge kapěngumbalaěng ute, iạ sarung mẹ̌koạ si kau mangawasa soa mapul᷊o.'
18 Ěllang karuane riměnta ringangu nẹ̌bera u, 'Tuang, doitẹ̌ bul᷊aeng sěngkal᷊ẹ̌pa nionggọ i Tuange, seng takụ nikakoạ l᷊ima.'
19 Su ěllang ene, datu e nẹ̌bera, 'I kau sarung mangawasa soa lima.'
20 Ěllang kewelai wal᷊ine riměnta, kụ nẹ̌bera, 'Tuang, ini roit'u; takụ niresọ su ral᷊ungu lenso.
21 Iạ kai mạtakụ si Tuang batụu i Tuang kai taumata mahẹ̌gisẹ̌. I Tuang kawe mạngal᷊ạ apam bal᷊ine tataghuaneng i Tuang, dingangu i Tuang mạměnsạ su tampạ tawe niasị i Tuang.'
22 Datu ene nẹ̌bera si sie, 'I kau ěllang dal᷊aị! Mẹ̌takaewen baweranu sẹ̌sanu iạ sarung měhukung i kau. I kau masingkạ u iạ taumata mahěgisẹ̌: iạ měngal᷊ạ apang kụ bal᷊ine tataghuanengku, dingangu mạměnsạ su tampạ tawe takụ piněngasikang.
23 Mạeng kerene unụe i kau tawe nanowa roitẹ̌ ene su bank tadeạu su tempon iạ mawal᷊ị, iạ nakapanarimạ bue roitẹ̌ dingangu untune?'
24 Mase ratu ene nẹ̌bera si sire apan mạhundarisị sene, 'Al᷊ạ e roitẹ̌ ene wọ'i sie kụ gělịko su ěllang kụ mạnaghuang doitẹ̌ bul᷊aeng mapul᷊o ene.'
25 Arawe i sire ene němpẹ̌bera, 'Mawu, i sie seng něnaghuang mapul᷊o.'
26 Datu e simimbang, 'Tahěndunge: i sain seng piạ si sie, sarung tambaěng iapakal᷊awọ. Arawe i sain tawe apa ute, apan ene si sie sarung pěngal᷊akeng lai wo'i sie.
27 Kụ orasẹ̌ ini ute wawạe ramahi apan dumarokạ si siạ e, ringangu tawe mapulu iạ makoạ datun sire. Patẹ e i sire kěbị su těngoku!'"
28 Sarạeng i Yesus něhengetang u kěbị ene, i Sie rimal᷊eng su těngon sire nẹ̌timona Yerusalem.
29 Sarạeng seng maraning Betfage ringangu Betania su Wukid'u Zaitun, i Sie rimoloh'u murit'E ruang katau niapangal᷊imona.
30 "Dakọko sarang kampong pai tẹ̌tatěngoěng," angkuěng i Yesus si rẹ̌dua, "kereu i rua masuẹ̌ sene i rua měntěhang makasilo anạ u kalide sěmbaụ mạl᷊aikị. Kalide ene wẹ̌dang tawe nisẹ̌sakeěngu taumata. Lukạe kalide ene ringangu wawạ e ramahi.
31 Kereu taumata makiwal᷊o si rua, 'Unụe i rua něluka kalide e?' pẹ̌berako, 'Mawu e měgẹ̌gausẹ̌.'"
32 I rẹ̌dua murit'i Yesus e natamai ringangu kinaẹ̌bakeng kěbị e kahěngang kerẹewe niweran Yesus.
33 Kutẹu i rẹ̌dua kapẹ̌lukane anạ u kalide e, taghuange nẹ̌bera si rẹ̌dua, "Unụe i rua měluka kalide ene?"
34 I rẹ̌dua simimbahẹ̌, "Mawu měgẹ̌gausẹ̌."
35 Bọu e i rẹ̌dua nẹ̌bawa anạ u kalide e sarang anung Yesus. Mase i rẹ̌dua němilạu pakeang i rẹ̌dua su tal᷊ětugu kalide e kụ niapaawị i Yesus su wowong kalide ene.
36 Kutẹu i Sie simahe apid'u kạsakene kalide e taumata l᷊awọe němpamilạem pakeang i sire su ral᷊eng.
37 Su tempong i Yesus maranịeng mahumpạ u Yerusalem sural᷊eng kụ dumẹ̌sungu Wukid'u Zaitun, kěbị manga murit'E makěpal᷊ẹ̌ ene nanětạ e měmpẹ̌dalon tingihẹ̌ maihạ mědẹ̌dalo Mawu Ruata ringangu makịtarimakasẹ si Sie ual᷊ingu kal᷊awọu munara makạl᷊aherang kụ seng kinasilon sire e.
38 I sire němpẹ̌bera maihạ, "Al᷊amatẹ̌ kawuạko su Ratu kụ kạděntane su ral᷊ungu areng u Mawu! Pẹ̌darame su sorga dingangu apakaraloko Mawu Ruata!"
39 Pirang katau tau Farisi wọu tal᷊oaran taumata l᷊awọ e němpẹ̌bera si Yesus, "Tuang Guru, pẹ̌beraiko manga murit'i Tuang apakarěmasẹ̌."
40 Mawu Yesus simimbang, "Pangimangke! Kereu i sire marěmasẹ̌ ute manga watu ini sarung měmpẹ̌gio."
41 Sarạeng i Yesus lụhaungkeng Yerusalem kụ nakasilọ e soa ene, i Sie simangịen soa ene.
42 Angkuěng'E, "Pirua, kerẹeng kapiane, kereu sahěllo ini i kau masingkạu apan makarěntan pẹ̌darame! Kaiso orasẹ̌ ini e i kau tawe makasilo ene.
43 I kau sarung makapěndang su sěnsul᷊e tempo suapan sekẹ u e mẹ̌koạ sasahaghe ipělikụ si kau; i sire sarung měmpẹ̌liwung si kau ringangu měmpaněsẹ si kau wọu kěbị tampạ.
44 I sire sarung mapakasilakạ i kau ringangkewen taumata ral᷊ohonu e; kụ tawẹ manga watu sarang sěmbaụ iwalan sire mạdal᷊ěnsung su tampạ e, batụu i kau tawe měnẹ̌naungu tempon Mawu Ruata ruměnta mapakasal᷊amat'i kau!"
45 Mawu Yesus simuẹ̌ su Wal᷊em Mawu kụ nanětạ nanokol᷊u mal᷊ahumbal᷊ụ su tampạ ene.
46 "Su ral᷊ungu Winohẹ Susi," angkuěng'E si sire, "mạbawohẹ kere ini: Mawu Ruata e něhengetang, 'Bal᷊e-Ku kai sarung makoạ bal᷊eng pẹ̌kakal᷊iomanengang.' Kutẹu kahiang kamene nikakoạ liangu taha pěhampasẹ̌!"
47 Ěllo-ěllo i Yesus mạněntiro su ral᷊ungu Wal᷊em Mawu. Manga imang těmbonange ringangu manga mananěntiro agama, ringangkewen manga pangahạu tau Yahudi e mapulu mamate si Sie,
48 kutẹu tawe nakareạ dal᷊enge měnsang kereapa mẹ̌koạ hal᷊ẹ̌ ene, ual᷊ingu kěbị taumata měngkate rụdaringihẹ̌ si Sie ringangu rudaringihẹ̌ manga hengetang'E.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA