Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Jesus bengket ku Kota Jeriho janah terus Ia erdalan mentasi kota e.

² I bas kota e lit me sekalak kepala pengalo cuke, gelarna Sakeus. Ia bayak.

³ Ia merincuh kal ngidah ise kin Jesus e. Tapi la idahna perbahan nterem kal jelma arah lebena dingen ia pe gendek ka.

⁴ Emaka kiam ia ngelebei jelma si nterem e, jenari inangkihna batang kayu, guna ngenehen Jesus si mentas arah dalan e.

⁵ Asum Jesus seh i bas ingan e, itatap Jesus ku datas janah nina man Sakeus, "O Sakeus pedasken nusurken! Sabap sendah kesilang ateKu i rumahndu."

⁶ Minter nusur Sakeus janah ialo-alona Jesus alu ermeriah ukur.

⁷ Tapi jungut-jungut kalak si nterem ngidah si e nina, "Kesilang Ia i rumah kalak perdosa."

⁸ Tapi tedis Sakeus janah nina man Tuhan, "Setengah i bas erta-ertangku kubereken man kalak musil; janah adi lit kalak nggo kutipu, kuulihken man bana empat kali lipat."

⁹ Ngaloi Jesus nina, "I bas wari enda nggo reh keselamaten man isi jabu enda. Kam pe kesusuren Abraham kap.

¹⁰ Sabap Anak Manusia si isuruh Dibata reh guna nelamatken kalak si papak."

¹¹ Sanga jelma si nterem sangana denga megiken Jesus ngerana, ituriken Jesus sada perumpaman. Paksa e nandangi seh me Ia ku Jerusalem, janah iakap kalak maka pedas me i idah manusia Kinirajan Dibata.

¹² Erkiteken si e nina Jesus man kalak enda, "Lit me sekalak si biak raja berkat atena ku kuta si ndauh guna iesahken jadi raja. Kenca iesahken e atena minter mulih.

¹³ Tapi ope denga ia berkat, idilona sepuluh kalak juak-juakna. Jenari iberekenna sekalak-sekalak sada duit emas. Janah nina man kalak enda, 'Pergunaken duit enda jadi pokokndu erbinaga seh aku mulih.'

¹⁴ Tapi anak kutana erelem-elem man bana, emaka ikirimna utusenna ndapeti alu ngataken, 'Kami la setuju ia jadi raja kami.'

¹⁵ Kenca ia iesahken jadi raja, mulihken ia. Jenari idilona juak-juak si sepuluh kalak ndube ngadap man bana guna meteh asa kai buena untung si idatna sekalak-sekalak.

¹⁶ Ngadap me juak-juak si pemena nina, 'O, tuan, nggo kudat untungna sepuluh duit emas nari alu duit si iberekenndu mbarenda.'

¹⁷ Nina tuan man bana, 'Merandal, kam juak-juak si mehuli! Perbahan kam tutus i bas si kitikna, emaka kubereken man bandu kuasa i bas sepuluh kota.'

¹⁸ Ngadap si peduaken nina, 'O tuan alu sada duit emas si iberekenndu bangku mbarenda, nggo dat aku untungna lima duit emas nari.'

¹⁹ Man bana nina tuan e, 'Kam erkuasa i bas lima kota.'

²⁰ Ngadap si peteluken, 'O tuan, enda duit emasndu; kubuniken gelgel nari i bas saputanganku.

²¹ Mbiar kal aku kam, sabap kam kalak kejam. Ibuatndu si labo sikerajangenndu janah iperanindu si la isuanndu.'

²² Ngaloi tuan e man bana, 'Kam juak-juak si jahat! Kam kuukum rikutken pengeranandu. Bahanlah maka aku kalak kejam, kubuat si labo sikerajangenku janah kuperani si labo kusuan.

²³ Adi bage, ngkai maka la itamakenndu duitku e ku bas bank? Gelah kenca aku mulih banci kualoken ras bungana.'

²⁴ Jenari nina man kalak si tedis i je, 'Buatlah duit e i bas ia nari, jenari bereken man kalak si nggo idatna sepuluh duit emas.'

²⁵ Nina kalak ndai, 'O tuan, nggo kap lit sikerajangenna sepuluh duit emas.'

²⁶ Ngaloi raja e, 'Kukataken man bandu maka man kalak si lit ibereken kap tole; tapi kalak si la lit, si sitik i bas ia pe ibuat ka i bas ia nari.

²⁷ Genduari baba ku jenda kerina imbang-imbangku si la ia setuju aku jadi rajana, jenari bunuh ia i lebe-lebengku!'"

²⁸ Kenca ikataken Jesus perumpaman e, IteruskenNa PerdalanenNa ku Jerusalem.

²⁹ Asum Ia nggo ndeher ku Betpage ras Betani, e me daerah i Uruk Seton, IsuruhNa dua kalak ajar-AjarNa leben,

³⁰ nina, "To lawes ku kota si arah lebendu ah. Seh kenca kam ku bas kota e, idapetindu kari sada kalde tambat, kalde si langa pernah iersak kalak. Osari nalina, jenari baba ku jenda.

³¹ Adi lit kari kalak nungkun man bandu, 'Ngkai maka iosarindu?', nindulah, 'Perlu Tuhan.'"

³² Emaka lawes si dua kalak ndai janah idapetina kerina bagi si nggo ikataken Jesus e.

³³ Asum iosarina nali kalde ndai nina empu kalde man bana, "Ngkai maka iosarindu?"

³⁴ Erjabap ia, "Perlu Tuhan."

³⁵ Jenari ibabana kalde e man Jesus. Ikimbangkenna uisna ku gurung kalde e jenari isampatina Jesus ngersaksa.

³⁶ Asum iterusken Jesus PerdalanenNa, ikimbangken kalak uis i bas pasar.

³⁷ Kenca Ia nggo ndeher ku Jerusalem, ngincuah i Uruk Seton nari, mulai me ajar-ajar si nterem si ngikutken Ia ersurak-surak. Alu sora si megang ipujina Dibata, meriah ukurna perbahan tanda sengget si idahna.

³⁸ Ersurak-surak ia nina, "Ipasu-pasu gelah Raja si reh i bas Gelar Tuhan! Keriahen i Surga ras pujin man Dibata!"

³⁹ Piga-piga kalak Parisi si ikut i bas kalak si nterem e ngerana man Jesus nina, "O Guru, suruh min sinik ajar-AjarNdu e."

⁴⁰ Ngaloi Jesus, "Adi sinik kalak enda, batu-batu enda me si ersurak."

⁴¹ Reh deherna me Jesus ku Jerusalem, janah kenca IdahNa kota e ItangisiNa,

⁴² nina, "Ah andiko, mehuli kal adi ietehndu kai si baci erbahan perdamen. Tapi genduari la kam ngasup ngidahsa!

⁴³ Reh me pagi paksana maka ikeleweti imbang-imbangndu kam alu benteng-benteng pertahanen, jenari ikepungna janah ijapa nari pe reh serangen.

⁴⁴ Kerina kam pagi ikernepkenna ras anak-anakndu. La ipelepasna sada batu pe i bas inganna si gelgel, sabap la ipegermetkenndu ndigan reh Dibata ndahi kam!"

⁴⁵ Jenari bengket Jesus ku bas Rumah Pertoton. IpelawesNa kerina kalak si erbinaga i je.

⁴⁶ Nina man kalak e, "Lit kap tersurat i bas Pustaka Si Badia, maka nina Dibata, 'RumahKu Rumah Pertoton kap.' Tapi nggo ijadikenndu jadi asar penamun."

⁴⁷ Tep-tep wari Jesus ngajar i bas Rumah Pertoton e. Imam-imam si mbelin ras guru-guru agama Jahudi bage pe peminpin-peminpin bangsa Jahudi sanga ndarami dalan guna munuh Jesus.

⁴⁸ Tapi la ietehna kuga carana, sabap jelma si nterem erngena ate nandangi Jesus janah meriah ukurna megiken pengajaren Jesus.

Lukas

Video Lukas 19

Ikuti Kami:

KONTAK | PARTISIPASI | DONASI