Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sewaktu Deside Isa tame kote Yeriko, Ie bemargi liwatin kote nike.

² Lẽq kote nike araq sopoq kepale penagih pajek saq sugih. Aranne Zakeus.

³ Zakeus melẽt serioq sai Deside Isa nike, laguq lantaran luwẽq gati dengan dait awakne cẽndẽq, make ie ndẽq mauq serioq Deside Isa.

⁴ Jari, Zakeus pelai senjuluq dengan-dengan, terus ie taẽk lẽq sopoq lolo kayuq, adẽqne mauq serioq Deside Isa saq karing semendaq gen liwat lẽq derike.

⁵ Waktu Deside Isa rauh lẽq bawaq lolo kayuq nike, Deside Isa cingakin andang atas dait bemanik, "Zakeus, becat turun! Sẽngaq jelo niki Tiang harus madẽq lẽq balẽnde."

⁶ Zakeus becat-becat turun dait sambut Deside Isa siq cemohne.

⁷ Selapuq dengan saq serioq hal nike mulai ngerumun, ie pade bebase, "Ie madẽq lẽq balẽn dengan bedose!"

⁸ Sesampun lẽq balẽne, Zakeus nganjeng dait matur lẽq Deside Isa, "Junjungan Saq Mulie, separo lẽman dowẽn tiang gen tiang bẽng ojok dengan miskin; dait napi-napi saq sampun tiang bait lẽman dengan secare ndẽq jujur, gen tiang tulakang malik lẽq ie empat kali lipet!"

⁹ Deside Isa bemanik lẽq Zakeus, "Lẽq jelo niki keselametan sampun rauh lẽq keluarge niki, sẽngaq ie ẽndah keturunan Ibrahim.

¹⁰ Bije Manusie rauh jari boyaq dait nyelametang dengan saq sesat."

¹¹ Lẽq waktu dengan-dengan masih dengahang Deside Isa bebaos, Deside Isa nyeriteang sopoq perumpamean. Sẽngaq, lẽq waktu nike Deside Isa kenyeke araq lẽq dẽkẽt Yerusalem, dait ie pade paran bahwe Kerajaan Allah gen becat penggitan.

¹² Deside Isa bemanik, "Araq sopoq dengan mẽnak lumbar ojok negeri saq jaoq gen telantik jari raje, beterus tulak.

¹³ Sendẽqman lumbar, ie ngempoh sepulu pelayanne, dait sebilang dengan bẽngne sopoq kẽpẽng emas terus bebase lẽq ie pade, 'Kadu kẽpẽng niki bedagang jangke tiang tulak malik.'

¹⁴ Laguq rakyat lẽq negerine nike meriq lẽq ie. Jari, sesampun ie lumbar, ie pade ngirim utusan jari nyampẽang, 'Tiang pade ndẽq mẽlẽ dengan niki jari raje tiang pade.'

¹⁵ Laguq mẽnak nike telantik jari raje, beterus tulak ojok negerine. Langsung ie ngempoh pelayan-pelayan saq sampun ie bẽng kẽpẽng nike jari nenaoq pire bati saq sampun ie pade mauq.

¹⁶ Pelayan saq penembẽq dateng dait matur, 'Paq, sopoq kẽpẽng emas saq pelungguh icanin nike, sampun tiang jariang sepulu.'

¹⁷ 'Bagus,' basen raje nike. 'Side pelayan saq bagus! Sẽngaq lẽq hal-hal saq kodẽq side bau tesaduq, tiang gen jariang side penguase lẽq sepulu kote.'

¹⁸ Pelayan saq kedue dateng dait matur, 'Paq, sopoq kẽpẽng emas saq pelungguh icanin nike, sampun tiang jariang lime.'

¹⁹ Raje nike bebase lẽq pelayan nike, 'Side gen tiang jariang penguase lẽq lime kote.'

²⁰ Pelayan saq lain dateng dait matur, 'Paq, niki kẽpẽng pelungguh; tiang simpen lẽq dalem saputangan.

²¹ Tiang takut lẽq pelungguh, sẽngaq pelungguh dengan saq keras. Pelungguh bait napi saq nẽnten jari dowẽn pelungguh, dait pelungguh bait hasil lẽq taoq saq nẽnten pelungguh talet mẽsaq.'

²² Raje nike bebase lẽq ie, 'Side pelayan saq jahat! Sesuai ucapan-ucapande mẽsaq tiang gen hukum side. Side nenaoq tiang dengan saq keras: Tiang bait napi saq ndẽq jari dowẽn tiang dait bait hasil lẽq taoq saq ndẽq tiang talet mẽsaq.

²³ Lamun maraq nike kembẽq side ndẽq serahang kẽpẽng tiang nike ojok dengan saq ngelampaqang kẽpẽng adẽq lẽq waktu tiang tulak bau tiang terimaq kẽpẽng nike bareng rẽntenne?'

²⁴ Beterus raje nike bebase lẽq dengan-dengan saq nganjeng lẽq derike, 'Bait kẽpẽng nike lẽman ie dait bẽng ojok pelayan saq bedowẽ sepulu kẽpẽng emas nike.'

²⁵ Laguq dengan-dengan nike bejawab, 'Paq, ie sampun bedowẽ sepulu.'

²⁶ Jawab raje nike, 'Tiang badaq side: sebilang dengan saq sampun bedowẽ, gen teican luwẽqan malik. Laguq dengan saq ndẽq bedowẽ napi-napi, napi saq araq lẽq ie gen tebait ẽndah lẽman ie.

²⁷ Laguq mangkin side jauq ojok deriki musuh-musuh tiang nike saq ndẽq setuju tiang jari rajene. Matẽq ie pade selapuq lẽq julun tiang!'"

²⁸ Sesampun Deside Isa manikang selapuqne nike Ie bemargi lẽq julun ie pade jari nerusang ojok Yerusalem.

²⁹ Sewaktu sampun rapet pemargian-Ne Betpage dait Betania lẽq Bukit Zaitun, Deside Isa ngemanikang due pengiring-Ne lampaq bejulu dait bepesen,

³⁰ "Silaq lumbar ojok kampung saq araq lẽq julunde nike: Lamun side pade tame lẽq derike, side pade gen serioq sopoq bagal saq masih odaq tegeteng. Bagal nike ndẽq uwah tetunggang siq dengan. Lekaq getenganne terus jauq ojok deriki.

³¹ Lamun araq dengan saq beketuan lẽq side, 'Kembẽq side pade lekaq getengan bagal nike?' Badaqang bahwe, 'Junjungan Saq Mulie merluang bagal nike.'"

³² Kedue pengiring Deside Isa nike lumbar, terus daitne selapuqne tepat maraq saq temanikang siq Deside Isa.

³³ Sewaktu ie pade lekaq getengan bagal nike, ẽpẽne beketuan lẽq ie pade, "Kembẽq side pade lekaq getengan bagal nike?"

³⁴ Jawab ie pade, "Junjungan Saq Mulie merluang bagal niki."

³⁵ Beterus ie pade jauq bagal nike ojok Deside Isa. Bongkor bagal nike ie pade lamak siq jubah ie pade, dait tulungne Deside Isa taẽk lẽq atas bagal nike.

³⁶ Sewaktu Deside Isa liwat nunggang bagal nike, dengan-dengan kelat jubahne lẽq rurung.

³⁷ Sewaktu Deside Isa sampun rapet Yerusalem, lẽq langan saq nurunang lẽq Bukit Zaitun, selapuq pengiring-pengiring-Ne saq luwẽq nike mulai memuji Allah dait ngucapang syukur tipaq Allah lantaran ie pade sampun nyaksiang muqjizat-muqjizat.

³⁸ Ie pade bekuih, "Teberkahin Raje saq rauh dalem pesẽngan Tuhan! Damẽ sejahtere lẽq sorge dait kemuliean lẽq taoq saq maheagung!"

³⁹ Dengan-dengan Parisi saq araq lẽq antare dengan luwẽq nike matur lẽq Deside Isa, "Paq Guru, manikang pengiring-pengiring Pelungguh adẽqne tedoq."

⁴⁰ Jawab Deside Isa, "Tiang badaq side! Lamun ie pade tedoq, batu-batu nike gen nyurak."

⁴¹ Sewaktu Deside Isa sayan rapet kote Yerusalem dait cingakin kote nike, Ie besermin.

⁴² Deside Isa bemanik, "Periak, bagus gati lamun jelo niki side nenaoq napi saq bau datengang perdamẽan; laguq mangkin side ndẽq bau serioq ie.

⁴³ Side gen ngalamin sopoq mase, bahwe musuh-musuhde gen piaq halangan-halangan lẽq sekeliningde, ie pade gen ngepung side dait desek side lẽman selapuq andang.

⁴⁴ Ie pade gen ngancurang side bareng selapuq pendudukde; dait ndẽq gen araq sopoq batu saq masih beronjoq maraq bẽngan, sẽngaq side ndẽq nenaoq waktu Allah rauh tipaq side!"

⁴⁵ Deside Isa tame ojok Gedẽng Allah dait mulai sediq selapuq pedagang lẽq derike.

⁴⁶ Manik Deside Isa lẽq ie pade, "Lẽq dalem Kitab Suci tetulis Manik Allah maraq niki: 'Gedẽng Tiang gen jari gedẽng taoq bedo'e.' Laguq side pade jariang ie taoqne bekumpul dengan-dengan jahat!"

⁴⁷ Sebilang jelo Deside Isa ngajahang lẽq dalem Gedẽng Allah. Imam-imam kepale dait ahli-ahli Taurat serte pemimpin-pemimpin Yahudi beniat nyematẽq Deside Isa,

⁴⁸ laguq ie pade ndẽq taoq, berembẽ harus ngelaksaneang hal nike, sẽngaq selapuq dengan terus doang dengahang Deside Isa dait seneng lẽq pengajahan-Ne.

Lukas

Video Lukas 19

Ikuti Kami:

KONTAK | PARTISIPASI | DONASI