Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Masuk ma Jesus hu Jeriko, lanjar montas ma Ia hunjai.
2 Jadi adong ma ijai sada halak, kopala ni sijalo sohei, na margoran si Sakeus; na bayak do ia.
3 Ipindo uhurni do sihol mangidah rupa ni Jesus, tapi seng tarbahensi halani halak na mabuei ai, ai parbadan na pondok do ia.
4 Gabe marlintun ma ia dompak lobei, ipanangkih ma sada hayu anak, ase taridahsi Ia, ai hunjai do dalan sibontason-Ni.
5 Dob das Jesus bani ianan ai, mangkawah ma Ia hu atas, anjaha nini ma hu bani, “Ale Sakeus! Podas ma susur, ai maningon tondok do Ahu i rumahmu sadari on!”
6 Jadi podas ma ia susur, anjaha ijalo ma Ia ibagas malas ni uhur.
7 Jadi mangidah ai, marungut-ungut ma sidea haganup, nini ma, “Tondok do Ia hape bani sada halak pardousa!”
8 Jongjong ma si Sakeus, ihatahon ma bani Tuhan in, “Eak Tuhan, satongah humbani artangku hubere ma bani halak na masombuh, anjaha anggo adong na hutipu, ompat lompit ma ai hupaulak.”
9 Jadi ihatahon Jesus ma hu bani, “Jumpahan haluahon do rumah on sadari on, ai anak ni si Abrahan do homa ia.
10 Ai na roh do Anak ni Jolma in mangindahi anjaha paluahkon na magou.”
11 Sanggah na tangi ai sidea bani hata-Ni, inunut Jesus ma marlimbaga, halani dohor ma Ia hu Jerusalem, anjaha iagan sidea, mintor sipatalaron ma Harajaon ni Naibata.
12 Jadi nini ma, “Adong ma sada halak na sangap, na laho hu nagori na daoh, laho manjalo harajaon bani, dob ai mulak do ia use.
13 Jadi idilo ma sapuluh halak juakjuakni, ibere ma bani sidea sapuluh kati pirak, anjaha nini ma hubani sidea, ʻTiga-tigahon hanima ma on ronsi na mulak ahu!ʼ
14 Tapi sogam do uhur ni hasoman ni warga negara mangidahsi, gabe isuruh sidea ma suruhan hun pudini, mangkatahon, ʻSeng ra hanami, halak on manrajai hanami!ʼ
15 Ase dob ijalo harajaon ai, mulak ma ia, anjaha isuruh ma na mandilo juakjuakni ai, na dob manjalo duit ai, sihol mambotoh pasal untung ni sidea bei.
16 Jadi roh ma na parlobei ai, nini ma, ʻHam tuannami, sapuluh kati do untung ni na sakati ondi!ʼ
17 Gabe nini ma hu bani, ʻDear ma ai, ale juakjuak na madear! Halani hatengeran do ho bani na otik, sapuluh huta ma kuasaanmu.ʼ
18 Dob ai roh ma na paduahon ai, nini ma, ʻHam tuannami, lima kati do untung ni na sakati ondi!ʼ
19 Jadi nini ma homa hu bani, ʻIa ho, lima huta ma gomgomanmu!ʼ
20 Dob ai roh ma na legan ai, nini ma, ʻHam tuannami, na ham ma pirakta na sakati ondi, ai hubungkus do in ibagas saputanganku.
21 Ai biar do uhurhu mangidah ham, halani halak na koras do ham. Ibuat ham do na so ninahkonmu anjaha ipariamai ham do na so sinuanmu.ʼ
22 Nini ma hu bani, ʻAle juakjuak na jahat, domu hubani hatamin do uhumanku ho! Ibotoh ho do hape halak na koras do ahu, sibuat na so hunahkon anjaha na marpariamai na so husuan.
23 Mase ma lang ipabungahon ho duitkin, ase hutunggu in rap pakon bungani bani parrohku?ʼ
24 Jadi nini ma hubani na jongjong ijai, ʻBuat hanima ma bagianni ai, anjaha bere hanima ma ai bani parbagian na sapuluh ai!ʼ
25 Jadi nini sidea ma hu bani, ʻHam tuannami, domma sapuluh kati bani!ʼ
26 Huhatahon ma bennima, ʻBani ganup na marnadong bereon do, tapi buaton do humbani na so marnadong na adong bani hinan.
27 Tapi anggo munsuhkai, na so ra rajaankai, boan hanima ma hujon, anjaha bunuh ma sidea i lobeihu.ʼ”
28 Jadi dob ihatahon sonai, itoruskon Jesus ma mardalan, laho tangkog hu Jerusalem.
29 Jadi daskonsi Ia dohorhon Betpage ampa Betania, na bani dolog, na margoran Jetun ai, isuruh ma dua halak humbani susian ai,
30 anjaha nini ma, “Laho ma hanima hu huta na i lobeinima in, anjaha masukkonsi hanima, jumpah hanima ma tambat ijai anak ni halode, na so ongga ihunduli halak. Tanggali hanima ma ai, lanjar boan ma hujon!
31 Jadi anggo adong na manungkun hanima, ʻMase itanggali hanima in?ʼ hatahon hanima ma, ʻNa porlu do in bani Tuhan in.ʼ”
32 Dob ai laho ma na sinuruh ai, anjaha jumpah sidea ma songon na hinatahon-Ni ai bani sidea.
33 Sanggah na mananggali anak ni halode ai sidea, ihatahon simadasi ai ma bani sidea, “Mase itanggali nasiam anak ni halode in?”
34 Jadi ibalosi sidea ma, “Na porlu do in bani Tuhan in!”
35 Jadi itogu sidea ma ai bani Jesus; iamparhon sidea ma hiou ni sidea hu atas ni halode ai, anjaha ipahundul sidea ma Jesus hu atas ni ai.
36 Anjaha, sanggah na montas ai Ia, iamparhon sidea ma hiou ni sidea bani dalan ai.
37 Tapi laho manjumpahkon tuadan na i Dolog Jetun ai, mamungkah malas ma uhur ni susian na buei ai, ipuji sidea ma Naibata marsora na gogoh halani haganup hagogohon, na dob nididah ni sidea,
38 nini ma, “Napuji ma Raja in, na roh marhitei goran ni Tuhan! Damei do i surga, anjaha hasangapon ma i babou!”
39 Deba humbani Parisei, na adong i tongah-tongah ni halak na mabuei ai, mangkatahon hu Bani, “Guru, pandang Ham ma susian-Mu in.”
40 Jadi nini ma marbalos, “Huhatahon ma bani nasiam: Porini sip sidea, dilo-dilo ma batu in!”
41 Jadi, sanggah na lambin dohor Ia, anjaha taridah ma huta ai, gabe itangisi ma ai,
42 nini ma, “Ambit itanda ham ma namin bani ari on na padamei ham! Tapi ponop do in nuan humbani matamu.
43 Na roh ma ari bamu, hubuon ni munsuhmu ma ham, inggotanni anjaha sosakanni ma ham liot.
44 Anjaha panepneponni ma ham rap pakon anakmu, na i tongah-tongahmu in, anjaha seng paturutonni age dua batu patindih, halani seng itandai ham panorang panohuon bamu.”
45 Dob ai masuk ma Jesus hu rumah panumbahan ai, jadi iusir ma hunjai siparjualan.
46 Nini ma hubani sidea, “Tarsurat do, rumah partonggoan do rumah-Ku, hape liang ni panamum do in ibahen nasiam.”
47 Anjaha ari-ari do Ia mangajari i rumah panumbahan ai. Ia sintua ni malim ampa sibotoh titah ampa pambobai ni bangsa ai, ipindahi sidea do dalan laho mamunuh-Si,
48 tapi seng ibotoh sidea, aha sibahenon ni sidea, ai sai longkot do uhur ni na mabuei Bani, marosuh do sidea mambogei-Si.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA