Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kutiko Isa Almasih lah tibo di Yerikho, Baliau taruih juwo bajalan malintehi kota tu.

² Di kota tu ado surang kapalo tukang mintak pajak, nan kayo. Namonyo si Zakheus.

³ Inyo niyo pulo nak maliyek, roman muko Isa Almasih tu, tapi, dek karano urang nan sangaik rami, sadangkan inyo sandiri, badannyo randah, mako indak dapek doh inyo nak maliyek Isa Almasih.

⁴ Dek karano itu, inyo balari untuak mandawului urang nan rami tu, sudah tu inyo mamanjek ka batang kayu, supayo inyo dapek maliyek Isa Almasih, nan sabanta lai, Baliau ka lalu disinan.

⁵ Kutiko Isa Almasih lah tibo di dakek batang kayu tu, Baliau maliyek ka ateh sambia bakato, "Oih angku Zakheus, capeklah turun! Dek karano Ambo musti singgah kiniko ka rumah angku."

⁶ Zakheus bagageh turun, angek bana atinyo, inyo lansuang payi untuak manyalami Isa Almasih.

⁷ Kasadonyo urang nan bi maliyek kajadian tu, muloi mambirutok. Inyo bi mangatokan, "Ndeh! Baa ko nan sabananyo, kok Baliau niyo singgah di rumah urang nan indak baiak!"

⁸ Kamudian, satibo di rumahnyo, Zakheus tagak, inyo bakato kabake Isa Almasih, "Tuhan, sapaduwo dari arato bando ambo, ka ambo sidakahkan kabake urang nan bansaik; baitu pulo, kok siya-siyanyo nan lah ambo kicuah, mako ambo ka mambayie baliak kabake inyo, sabanyak ampek kali lipek!"

⁹ Sudah tu Isa Almasih bakato, "Di ari ko juwo, angkau sarato jo kasadonyo kaluarga angkau, disalamaikkan dek Allah, sarato dibarikan iduik nan baru, dek karano, angkau adolah katurunan Nabi Ibrahim pulo.

¹⁰ Anak Manusia datang ka dunie untuak mancari, sarato jo manyalamaikkan urang nan sasek."

¹¹ Samantaro urang sadang bi mandangakan Isa Almasih mangecek, Baliau mancuritokan pulo ciyek parumpamoan. Dek karano, dikutiko itu Baliau sadang barado di dakek kota Yerusalem, urang manyangko baraso Karajaan Allah ka sacapeknyo kaliyatan.

¹² Isa Almasih bakato, "Adolah surang urang babanso, nan nak payi ka nagari nan jauah, untuak ka di angkek manjadi rajo, sasudah tu inyo babaliak ka kampuangnyo.

¹³ Sabalun inyo barangkek, inyo ma imbau sapuluah urang palayannyo, inyo ma agiahkan kabake satiyok palayannyo tu sakapiang pitih ameh. 'Manggalehlah jo pitih ko samantaro ambo sadang payi bajalan,' keceknyo kabake palayan-palayannyo tu.

¹⁴ Tapi panduduak nagarinyo tu jajok kabake inyo. Dek karano itu, sasudah inyo barangkek, urang-urang tu mangirin utusan untuak payi mangatokan, 'Kami indak namuah doh, jikok urang ko nan ka manjadi rajo di nagari kami.'

¹⁵ Tapi urang babanso tu, jadi juwo di angkek manjadi rajo, indak lamo sasudah tu inyo babaliak ka nagarinyo. Basigageh inyo ma imbau kasadonyo palayannyo untuak manamuinyo, supayo inyo dapek mangatawui bara labo nan lah inyo padapek.

¹⁶ Palayan nan partamu tibo, sambia bakato, 'Angku, pitih ameh nan ciyek sari, nan angku agiahkan tu, lah ambo jadikan sapuluah.'

¹⁷ 'Santiang wa-ang,' kecek induak samangnyo tu, 'wa-ang adolah palayan nan elok! Dek karano dalam parkaro-parkaro nan ketek wa-ang dapek dipicayoi, mako ambo ka manjadikan wa-ang panguwaso untuak sapuluah buwah kota.'

¹⁸ Palayan nan kaduwo tibo sambia bakato, 'Angku, pitih ameh nan ciyek sari, nan angku agiahkan tu, lah ambo jadikan limo.'

¹⁹ Kabake palayan tu rajo tu bakato, 'Wa-ang ka ambo jadikan panguwaso untuak limo buwah kota.'

²⁰ Palayan nan lain bi tibo pulo, sambia bakato, 'Angku, ikonyo-ah pitih angku nan dulu; ambo andokkan dalam salabeta.

²¹ Ambo takuik kabake angku, dek karano angku urangnyo sanga. Angku ma ambiak apo nan indak punyo angku, angku ma ambiak asie di tampaik nan indak angku mananaminyo.'

²² Rajo tu bakato kabake palayannyo, 'Wa-ang adolah palayan nan jahek! Sasuwai jo kato-kato wa-ang sandiri, wa-ang ka den ukun. Layi mah wa-ang tawu, baraso aden urangnyo sanga: aden ma ambiak sasuatu nan indak punyo den, sarato ma ambiak asie di tampaik nan indak den tanami.

²³ Jikok baitu, baa mangko indak wa-ang masuakkan sajo pitih den tu ka lumbuang pitih nagari, buliah pabilo aden lah pulang, aden dapek ma ambiak pitih den tu baliak sarato jo bungonyo?'

²⁴ Kudian rajo tu mangecek kabake urang-urang nan bi tagak disinan, 'Ambiaklah baliak pitih tu dari paja ko, sudah tu agiahkanlah kabake palayan nan lah mampunyoi sapuluah pitih ameh tu.'

²⁵ Tapi urang-urang tu bi mangatokan, 'Angku, inyo lah mampunyoi sapuluah pitih ameh.'

²⁶ Tapi rajo tu bakato, 'Kana-ilah apo nan ambo katokan ko: urang nan lah mampunyoi, kabake inyo ka dibarikan nan labiah banyak lai. Tapi kabake urang nan indak punyo sabuwah alah joh, malah, apo nan ado dinyo tu pun ka diambiak pulo.

²⁷ Kiniko bawoklah kamari kasadonyo musuah-musuah den tu, urang-urang nan indak suko aden jadi rajonyo. Bunuahlah inyo kasadonyo di adok-an den ko!'"

²⁸ Sasudah Isa Almasih mangatokan kasadonyo tu, Baliau bajalan di adok-an urang-urang nan banyak, manuju ka Yerusalem.

²⁹ Kutiko lah tibo di dakek Betfage jo Betania di Bukik Zaitun, Baliau manyuruah duwo urang pangikuik-Nyo payi bajalan labiah dawulu.

³⁰ "Payilah ka kampuang nan di adok-an tu," kecek Baliau kabake nan baduwo tu, "jikok angku-angku lah tibo disinan, angku-angku ka manampak sikua anak kaladai sadang tapauik. Kaladai tu, alun sakali juwo lai diracak urang. Bukaklah pauiktannyo, sudah tu bawoklah kamari.

³¹ Jikok ado urang nan batanyo ka angku-angku, 'Baa mangko angku-angku bawok kaladai tu?' katokanlah kabake urang tu, 'Tuhan nan mamaralukannyo.'"

³² Kaduwo urang pangikuik Baliau tu payi, inyo mandapati kasadonyo tu, tapek bana, samo jo bakcando nan dikatokan dek Isa Almasih.

³³ Samantaro inyo mambukak tali anak kaladai tu, urang nan punyo kaladai tu bakato kabake inyo, "Oih, baa mangko angku-angku bukak pauiktan kaladai tu?"

³⁴ Inyo bi manjawab, "Tuhan nan mamaralukannyo."

³⁵ Sudah tu inyo mambawok anak kaladai tu kabake Isa Almasih. Kudian inyo bi mangambangkan jubahnyo dipungguang kaladai tu, sarato manolong Baliau untuak nayiak ka atehnyo.

³⁶ Samantaro Baliau lalu maracak kaladai, urang-urang tu bi mangambangkan jubahnyo di tangah jalan.

³⁷ Kutiko Baliau lah ampia ka tibo di Yerusalem, dakek labuah nan manurun di Bukik Zaitun, kasadonyo pangikuik-pangikuik Baliau nan sambuah tu muloi malagukan lagu puji-pujian kapado Allah, sarato mangucap syukur kapado Tuhan dek karano kasadonyo mukjizat nan lah inyo caliak.

³⁸ Urang-urang tu bi manyorakkan, "Dibarakaik-ilah Rajo nan datang ateh namo Tuhan! Aman santoso di sarugo, sarato kamuliaan bagi Allah!"

³⁹ Babarapo urang Farisi di antaro urang nan banyak tu, mangecek kabake Isa Almasih, "Angku Guru, suruahlah pangikuik-pangikuik Angku tu anok."

⁴⁰ Isa Almasih manjawab, "Picayolah ka kecek Ambo! Jikok urang-urang tu anok, mako batu nan banyak ko nan ka basorak."

⁴¹ Kutiko Isa Almasih lah batambah dakek ka Yerusalem, Baliau manangih, dek manampak kota tu.

⁴² Baliau mangatokan, "Ndeh ibonyo Ambo jo angkau, baralah ka eloknyo, jikok di ari ko angkau tawu, jo apo nan dapek mambawok padamaian untuak angkau! Tapi kiniko angkau indak dapek doh maliyeknyo.

⁴³ Isuak angkau ka marasokan suatu maso, kutiko tu musuah angkau ka mambuwek pilakuik di sakuliliang angkau; inyo ka mangapuang angkau, sarato jo ka manyasakkan angkau dari sagalo suduik.

⁴⁴ Inyo ka bi mancayiekan angkau samo-samo jo kasadonyo panduduak angkau; indak ciyek juwo doh batu bangunan ko, nan ka inyo padiyakan talatak elok di tampaiknyo, dek karano angkau indak mamparatikan, di kutiko Allah datang untuak manyalamaikkan angkau!"

⁴⁵ Isa Almasih masuak ka dalam Rumah Tuhan, Baliau ma usie kasadonyo urang-urang nan manggaleh disinan.

⁴⁶ Baliau bakato kabake urang-urang tu "Di dalam Alkitab, ado tatulih nan bakcando iko: Allah mangatokan, 'Rumah Den ka manjadi rumah tampaik badowa.' Tapi di angku-angku bajadikan tampaik sarang panyamun!"

⁴⁷ Satiyok ari Isa Almasih ma aja di dalam Rumah Tuhan. Imam-imam kapalo, jo guru-guru agamo, sarato jo pamimpin-pamimpin Yahudi, baniyaik nak ka mambunuah Baliau,

⁴⁸ tapi urang-urang tu indak dapek jalan, untuak ka malansuangkan niyaik buruaknyo tu, dek karano kasadonyo urang sangaik sukonyo mandangakan pangajaran Isa Almasih, sarato sangaik pulo sukonyo jo sagalo kato-kato Baliau.

Lukas

Video Lukas 19

Ikuti Kami:

KONTAK | PARTISIPASI | DONASI