Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Naonda ing ki Yesus noyaputdon kon Yerikho, Sia minayak turus bo diaí nongandu-ngandup kong kotaí tatua.
2 Kon tua oyuíon intau tangoinya ki Zakheus. Sia na'a, itoi im mononagih kom pajak.
3 Sia mo'ibog totok mo'indoi mongo ki ine ing ki Yesus tua, ta'e lantaran intau modamaḷ totok daí diaí moko'ontong in sia, apapa doman sia no'ompa.
4 Daí noribatuk in sia inumuna kon intau mita tatua bo noponik kom pangkoi ing kayu ara simbaí moko'ontong ko'i Yesus, inta mo'italib kon tua.
5 Naonda ing ki Yesus no'iyaput kom pangkoi ing kayu tatua, iḷumangag in Sia bo noguman, "Zakheus, ḷagidon poponag! Sin Aku'oi musti mongandup kom baḷoimu in singgai na'a!"
6 Daí pona-ponag ing ki Zakheus bo notarima ko'i Yesus takin pia ing gina.
7 Ta'e intau mita inta noko'ontong kon tua mulaidon mongunsingog kai monia, "Ih! Sia mongandupbií kom baḷoi in intau inta diaí mopia!"
8 Kom baḷoinya tatua, ki Zakheus sinimindog bo noguman ko'i Tuhan, "Tuhan, kapunya'anku tobotak ogoikudon kon intau mita bogaí bo aka oyuíon doman in intau inta pernah inuboḷanku, yo pobuionkudon bui ko'inia ko'opat noguntuḷ ing kobayongea!"
9 Bo ki Yesus noguman ko'inia, "Singgaipa doman tana'a mo'ikow motoḷuaídií pinosaḷamat i Allah bo inogoian ing kobiagan mobagu, sin ikow nion ki adiíbií doman i Abraham.
10 Sing ki Adií Intau mamangoi motayak bo moposaḷamat kon intau inta nongobuli."
11 Ko wakutu intau mita mokidongogpamai ko'i Yesus nongonguman, Sia nongongumandon kon tobatuí porumpama'an. Sin, wakutu intua Sia nodiugdon kon Yerusalem bo kai monia kamai ki Allah in ḷagi bidon momarentah saḷaku Raja kon dunia na'a.
12 Ki Yesus nongonguman nana'a, "Oyuíon tobatuí intau moḷoben inta minayak ing kotaí inta noyayuk sim baliíon monia raja, mopaḷut makow kon tua sia mobuidon mangoi kon lipuínya.
13 Ko wakutu in diaípa minayak, sia nogoinií kom bobantungnya taya mopuḷuh bo nobogoi in doit buḷawan tumongo batuí ko'i monia takin koyow nana'a, 'Tana'a in doit pakeídon monimu pobukaí kon usaha ko wakutu in aku'oi mayak.'
14 Ta'e intau mita inta tolipuíannya mosakií ing gina ko'inia, daí naonda in sia minayak, intau mita inta mosakií ing gina ko'inia tua nopotabaí doman in tobatuí intau sim moguman nana'a, 'Kami in doiíbií aka intau tana'a mobalií raja nami.'
15 Ta'e umpakahbií natua, sia tatapbií doman binalií raja. Nopaḷut makow kon tua sia nobuidon mangoi, bo pinoki'oiniínyadon im bobantungnya mita inta ain inogoiannya in doit buḷawan tatua sim po'indoian mongo tongonudon ing ka'untungan monia.
16 Bobantung inta muna namangoi bo noguman nana'a, 'Tuang, doit buḷawan tobatuí i tuang aindon nodia kong ka'untungan mopuḷuh doman in doit buḷawan.'
17 Daí ki tuang tatua notubag, 'Mopia intua, ikow bobantung inta mopia! Sin ikow mota'au pirisayaan kon oaíidan inta mo'intok. Tuamai baliíonkudon ikow ponguasa kom mopuḷuh ing kotaí.'
18 Onda intua bobantung induanya namangoi bo noguman nana'a, 'Tuang, doit buḷawan tobatuí i tuang aindon nodia kon ka'untungan lima doman in doit buḷawan.'
19 Daí raja tatua noguman ko'inia, 'Ikow im mobaliídon ponguasa kon lima ing kotaí.'
20 Bobantung ibanea doman namangoi bo noguman nana'a, 'Tuang, na'a in doit i tuang; binakutkudon in lenso bo sinaguí.
21 Sim mo'ondok in aku'oi ko'i tuang, sing ki tuang intau motogat ing gina. Bo umuran mogamaí kon onu inta de'eman kapunya'an i tuang. Mokoyut doman kon inta de'eman pinomuḷa i tuang tontanií.'
22 Daí raja tatua noguman kom bobantungnya tatua, 'Hoi bobantung inta mora'at! Poduduidon in singogmu mita tatua daí hukumonku in ikow. Kinota'a-ta'aumubií makow kon aku'oi na'a intaubií inta totok motogat bo inta mo'ibog mogamaí kon onu inta de'eman kapunya'anku bo inta mo'ibog doman mokoyut kon inta de'eman pinomuḷaku.
23 Aka natua yo nongonu sin doitku in diaíbií sinaguímu kom bang, simbaí naonda in aku'oi namangoi doit tatua mota'auku bui gamaan takin ka'untungannya?'
24 Onda intua raja tatua noguman kon intau mita inta sinimindog kon tua, 'Gamaí in doit tatua ko'inia bo ogoi kom bobantung inta mopuḷuhdon in doit buḷawannya tua.'
25 Ta'e intau mita tatua noguman, 'Tuang, ko'inia mopuḷuhdon in doit buḷawan.'
26 Ta'e raja tatua notubag, 'Pokotorop: intau inta nobayongdon ing ko'inia, duganganbií bui. Ta'e intau inta diaí in onu bo onu ko'inia, yo onu in oyuíonpa ko'inia, gamaíanbií doman.
27 Bo tana'a makow in tokodiadon mangoi in intau mita inta mongosakií ing gina ko'i nakoí bo inta doií aka aku'oi mobalií raja ko'i monia. limod im mosia kon tayowonku!'"
28 Naonda ing ki Yesus nosingog kon tua komintan, Sia inumuna ko'i monia minayak in Yerusalem.
29 Naonda in nodiugdon kom Betpage bo Betania kom Buḷud in Zaitun, Sia nopotabaí kom murií-Nya doyowa mayak umuna takin koyow nana'a,
30 "Bayakdon kon lipuí inta kon tayowonmai nion, bo aka mo'ikow bo tumu'otdon kon lipuí tatua, yo mo'ikow im moko'ontong kong ki adií ing keledai tobatuí inta kotogo-togot. Keledai tatua diaípa dodai onda sinakoian in intau. Daí bukaídon ing keledai tatua bo dia mangoi.
31 Aka oyuíon im moliboí ko'inimu nana'a, 'Nongonu sim bukaanbií monimu ing keledai tatua?' Daí tubagai nana'a, 'Ki Tuhan moparaḷu.'"
32 Bo minayakdon murií-Nya doyowa tatua, bo onu ing kino'bayaían monia tua totu'ubií kon naí inta pinoguman-Nya.
33 Bo naonda im binukaí monia ing keledai tatua, ki toginya noliboí, "Nongonu sim bukaanbií monimu ing keledai tatua?"
34 Daí mosia notubag doman nana'a, "Ki Tuhan moparaḷu."
35 Naonda in diniadon monia ing keledai tatua ko'i Yesus, intau mita nopoaíip in jubah kon likud ing keledai tatua bo notuḷung nopoponik ko'i Yesus kong keledai tatua.
36 Kowakutu in Sia kotako-takoipa kong keledai tatua, intau mita nopo'ompatdon in jubah monia kon yuaík in daḷan.
37 Naonda ing ki Yesus nodiugdon kon Yerusalem, kon daḷan inta mosilig kom Buḷud in Zaitun, komintan dumodudui-Nya inta mobarong tua, kopiadon momaḷuí mondayow ko'i Allah bo mopoyaput in singog sukur ko'i-Nia, sim mosia aindon noko'ontong kon inta mokoherang inaidan-Nya.
38 Mosia nomaḷuí nana'a, "Binarakatan in Raja inta namangoi kom bonu in tangoi Tuhan! Dodamean kon soroga, bo dinayo-dayowdon ing ki Allah!"
39 Tongonumai intau im Parisi inta no'itakin kon intau moaíntoí tatua noguman ko'i Yesus, "Pak Guru, poki'gogaiaidon momaḷuí in dumodudui-Mu mita tanion."
40 Daí ki Yesus notubag, "Poguman-Kudon ko'i monimu! aka mosia na'a bo kibio-bioímaidon, yo batu bidon mita tanion im momaḷuí."
41 Ta'e naonda ing ki Yesus nodiugdon kon Yerusalem, nongombaḷ in Sia noko'ontongmai kong kotaí tatua,
42 bo poḷat nosingog, "Ka'asih ule, mopiadon totok aka singgai in na'a kota'auanmudon onu inta mota'au mokopoaíngoi kon dodamean! Ta'e tana'a ikow diaíbií moko'ontong.
43 Sim mo'iangoibií in wakutunya saturumu mamangoi molipung ko'inimu takin kakuatan monia. Kopungon bo sisiíon monia im mo'ikow nongkon bayongan arah.
44 Rimumudon monia in ikow takin intaumu mita inta nogutun kon na'a; bo diaíbií tobatuípamai im batu im pomayakpa makow monia mo'itudu motompia kon tampatnya. Sin diaíbií kong ginamu makow ing ki Allah mamangoi moposaḷamat ko'inimu!"
45 Ki Yesus sinumu'ot kom Baḷoi Tuhan bo mulai noguntun kon intau mita inta mopopotaḷui mita kon tua.
46 Sia noguman ko'i monia nana'a, "Oyuíon pinais nana'a: Baḷoi-Ku in sinagoibií Baḷoi Pososambayangan, ta'e na'a im binalií bidon monimu pugad im mogogagow."
47 Pomuḷoi in singgai Sia mayak mobogoi in totunduí kom bonu im Baḷoi Tuhan. Imang mita itoi bo mototunduí mita kon agama takin itoi mita intau Yahudi moroncana molimod ko'i-Nia,
48 ta'e diaípa noko'ulií kon daḷan mogaid kon soaáḷ tatua, sim bayongan intau umuranbií mo'ibog mokidongog ko'i-Nia, bo totok mo'ibog im mosia mokodongog kon singog-Nya mita.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA