Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ngoi tomau la nianako kokia ngoi tomariwo tomanarama ma ngale tiniriwo ngini de mita gee yongaku-ngaku 'o Laodikia ma kotaka, de 'o nyawa 'iodumu gee koinako-nakowasi.

² Ngoi koge'ena todiai la ngini 'o Koloseka de mita 'ona gee 'o Laodikiaka 'ania singina 'ikuata de 'imore-morene, de ngini 'asa nimakadora moi de moi so nimarimoi. De ngini nioodumu 'asa 'ifoloi nianako de ma gou-goungu niasahe 'okia naga gee ma sira ma Jo'oungu ma Dutu kowosisupuwasi ge'ena la ma Kristus.

³ Sababu ka ma Kristusoka duga 'iwaiti ma Jo'oungu ma Dutu 'awi barija de 'awi cawaro.

⁴ Ne'ena tosidemo nginika la 'uwa 'o nyawa nisihaga de 'o demo-demo gee po'isenika 'isure-sure 'ena momongo ka 'o ngeluku.

⁵ Sababu ngaro ngone pomakakurutoka ma katiningano-nganono. De ngoi tomorene to'isene ngini ka 'o singina moi, de nia ngo-ngaku 'ikua-kuata ma Kristusika.

⁶ Ngini niongakuokau 'ato 'o Yesus 'una ge'ena ma Jou. Sababu ge'ena ngini salingou 'ania 'ahu moteke to 'una 'awi mau,

⁷ de 'uwa nimasipidili 'unaka. Salingou ka 'una 'ania 'ahu ma titi. Salingou kaniongaku monga ma Kristusika moteke 'awi demo gee nisidotokokau. De ngini salingou kaitaurika nio'amalaha.

⁸ Niomanako-nako, la 'uwa 'o nyawa nisihaga de 'o di-dibangi gee ma faedaa koi'iwa-'iwa so duga kanisiliba. 'O di-dibangi ge'ena ko ma Kristusinowa so 'ena ka 'o nyawa ma 'atorangino de 'o sagala ngomasino gee 'o duniaka 'ipa-pareta.

⁹ Sababu kokia naga ma Jo'oungu ma Dutu, ge'ena 'iodumu naga 'o Yesusoka gee ma 'orasi 'una wodadi 'o nyawa.

¹⁰ Ngini ma gou-goungu niamakekau 'o 'ahu ma dutu, sababu ngini niomarimoi de ma Kristus. 'Una wapareta 'o sagala ngomasa gee 'iku-kuasa de 'ipa-pareta.

¹¹ Sababu ngini nimarimoiokau de ma Kristus so ngini matero kanisunakau. Ge'enau so ngini nisipidilokau 'ania 'ahu 'isowo-sowonoka. Nisipidili 'ania 'ahu 'isowo-sowonoka gee 'isi'ade-'ade 'isoka nisunakau, ge'ena ko 'o nyawawa yodiai ma 'ena ma Kristus 'awi kuasa.

¹² Sababu gee ngini ni'osiki, ge'ena ngini nimasidosongene de nisidobo'osuku de ma Kristus, ma ngale niamadakau 'ania 'ahu 'isowo-sowono. De sababu ni'osiki so ma Jo'oungu ma Dutu winikula 'o 'ahu ma sungi ge'ena la nio'ahu de ma Kristus sababu ngini niongaku ma Jo'oungu ma Dutu 'awi kuasaka gee wisimomikokau ma Kristus wosongenukou de.

¹³ Ma sira ngini nio'ahu ko de ma Jo'oungu ma Dutuwa so matero kaniosongenokau, sababu niabiasakau niosowo-sowono de sababu ngini 'isoka 'o nyawa manga singina koyasunawa ma ngale manga 'ahu ma sira koyamadawa. Duga ma 'orasi ne'ena ma Jo'oungu ma Dutu winikulakau 'o 'ahu ma ngale nimasida'ahu de ma Kristus. Ma Jo'oungu ma Dutu kowosi-singinawau nanga so-sowono,

¹⁴ de ma Jo'oungu ma Dutu kowapakewau 'o surati gee 'isilefo-lefoku nanga so-sowono ma ngale paparenokau 'o 'agama ma besesongo 'o Musa wosidoto-dotoko, gee 'inasisala-sala de 'inasitu-tubuso. Ma Jo'oungu ma Dutu kowapakewau ma surati gee 'isilefo-lefoku nanga so-sowono, ma ngekomo 'o Yesus wosongene 'o salipoka.

¹⁵ 'O salipoka, ma Kristus wosikalakau 'o sagala ngomasa ma dorou gee 'ipa-pareta de 'iku-kuasa. De ma sagala ngomasa ge'ena ma Kristus wadiai matero kawapusuika de mita wadiai 'isoka wi dudunisa 'imote-moteke la 'o nyawa 'o duniaka yanako 'ato 'una wosikalakau 'o sagala ngomasa 'ipa-pareta ge'ena.

¹⁶ So 'uwa nimasidabika 'o nyawa nisisala ma ngale 'okia naga nia'odomo de nia'okere, bolo 'o 'agamaka ma rame gee 'o taunu 'isinoi-noimi yodiai ma wange 'ita-tantuu, bolo 'o mede ma sungi 'isinoi-noimi yosuba ma Jouka. De mita ma ngale 'o Yahudioka Pomaoma-omasa ma Wange.

¹⁷ 'Iodumu ge'ena duga ka ma gurumini 'okia naga gee dua 'asa 'iboa, ma 'iwaiti ma gou-goungu ge'ena la ma Kristus.

¹⁸ Ngini nimadagakunokau ge'ena la nia ngo-ngaku 'ikua-kuata, so 'uwa nimasidabika 'o nyawa gee yoma'uca-'uca manga singina 'itipokoku nisihaga de 'ania parasengi koniamakewau. 'Ona ge'ena 'o mala'ekati yasuba-suba de yomaie-ie, manga di-dibangi ka 'okia sonaa 'o duniaka de yositii-tiingi manga mo-make.

¹⁹ 'Ona yomasipidilokau ma Kristusoka, ge'ena la 'o jamati 'iodumu wapa-paliara gu'una. Ma Kristus 'awi baliara ma sigoronaka, 'una wokula 'o guata 'awi roesika ma ngekomo 'o nguroto de 'o boboo gee 'isidadi 'o roese moi ge'ena la 'o jamati. So ma rai 'awi roese ge'ena la 'o jamati kaisiika monga manga ngo-ngaku 'ikuata, moteke ma Jo'oungu ma Dutu 'awi mau.

²⁰ Ngini ni'osiokau ge'ena ma ngale nimasidosongenokau de ma Kristus de nisipidilokau 'o sagala ngomasa gee 'ipa-pareta 'o duniaka ma kuasa ma sigoronaka. De 'ido'oa so ngini nio'ahu moteke 'o nyawa 'o duniaka manga di-dibangi? 'Ido'oa so ngini niodomoteke 'o 'atorangi naneda,

²¹ "'Uwa nia'ao de 'uwa niataili 'o 'inomo naneda bolo nageda, de kaniatigi ma 'uwa"?

²² 'O 'atorangi 'iodumu ge'ena duga ka 'okia sonaa gee papake 'iduanga de ma faedaa koi'iwau. 'O 'atorangi de 'o do-dotoko koge'ena ge'ena ka 'o nyawa yodiaiku.

²³ Ma 'atorangi moi-moi ne'ena ngaro pamakeka 'isoka de ma kumati, ge'ena ma ngale yosuba moteke to 'ona manga mau, yomadiai 'isoka yomasitipokoku, de mita yomasangisara. Ma 'o 'atorangi moi-moi ge'ena ma faedaa koi'iwa ma ngale yatatoko 'o nyawa ma nyafisuu.

Kolose

Video Kolose 2

Ikuti Kami:

KONTAK | PARTISIPASI | DONASI