Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nyak mirak keti pandai injuk repa hibatni nyak bejuang untuk niku rik untuk tian sai di Laodikia rik sunyin sai mak kenal jama nyak secara pribadi.

² Sunyinni inji kulakuko in hati tian jadi kuat rik tian saling mengasihi sehingga tian kuat besatu. Jama injuk reno tian temon-temon mengerti rik yakin rik kenal jama rahasia-Ni Allah, yakdo Almasih tenggalan.

³ Almasihdo sai nyingkapko sunyin kebijaksanaan rik pengetahuan-Ni Allah sai tumbai tesegok.

⁴ Nyak ngeni pandai inji in keti dang ditipu ulih sapa pun juga sai banguk manis jama niku.

⁵ Mani walaupun nyak bejaohan jak keti, anggapdo bahwa nyak hadir di hantara keti. Rik nyak riang ngeliak keti sehati rik kuat percaya jama Almasih.

⁶ Puari-puari radu nerima Isa Almasih sebagai Tuhan. Ulihni seno hagani hurik besatu jama Ia

⁷ rik bebakak di delom Ia. Hagani keti ngebangun hurikmu jama Almasih sebagai dasar. Hagani keti makin percaya jama Almasih, nutuk api sai radu diajarko jama niku. Rik hagani hatimu meluap-luap jama ngucapko terima kasih.

⁸ Hagani keti behati-hati, dang sampai wat sai narik keti jama pikeran-pikeran manusia sai mak beguna, melainko angkah nyesekko. Pikeran-pikeran ano lain jak Almasih, melainko jak pendapat manusia gaoh rik jak ruh-ruh jelma sai nguasai dunia.

⁹ Mani sunyin kepribadian Allah tinggal jama Almasih, yakdo jama kemanusiaan-Ni.

¹⁰ Rik mani hurik besatu jama Almasih, keti pun dikeni hurik sepenuhni. Mani Almasihdo kepala atas unggal ruh sai bekuasa rik sai memerintah.

¹¹ Mani besatu jama Almasih, keti radu disunat, lain jama sunat sai disani ulihni manusia, melainko jama sunat sai disani ulih-Ni Almasih, sai ngebebasko keti jak kuasa tabiat sai bedusa.

¹² Mani waktu keti dibaptis, keti dikubor jama-jama Almasih; rik jama baptisan udi juga, keti nutuk dihurikko luot jejama Almasih mani keti percaya jama kuasa Allah sai radu ngehurikko Almasih jak kematian.

¹³ Tumbai, keti radu mati secara rohani mani keti bedusa, rik mani keti mak disunat secara laher. Kidang tano Allah ngehurikko keti jejama jama Almasih. Allah radu ngampuni sunyin dusa ram,

¹⁴ rik ngebatalko surat hutang tehadap ram, sai ngancam ram jama syarat-syarat sai mebiak. Jama nyalibko surat udi di kayu salib, Allah ngehapusko sunyin dakwaan tehadap ram.

¹⁵ Di salib udi Almasih nyani sunyin ruh-ruh sai memerintah rik bekuasa jadi mak bedaya lagi. Tian dijadiko tuntonan umum waktu Almasih ngegiring tian sebagai tawanan delom barisan kemenangan-Ni.

¹⁶ Ulihni seno dang naganko jelma nyalahko keti tentang kanikan rik inuman, atau tentang rani-rani suci keagamaan, atau perayaan-perayaan bulan ampai, ataupun tentang rani Sabat.

¹⁷ Sunyinni ano angkah halinu gaoh jak hal-hal sai haga ratong, kidang kenyataan jak hal-hal udi iado Almasih!

¹⁸ Dang keti naganko diri dirugiko ulih ulun sai icak-icak ngerendahko diri rik sai nyumbah malaikat-malaikat. Jelma udi mepungah jama pikeran-pikeranni sai dunia rik ngerasa bangga atas pengliakanni sai khusus,

¹⁹ sehingga mak lagi begantung jama Almasih sai jadi kepala. Di debah pimpinan-Ni Almasih, sunyin badan dipelihara rik disatuko ulih sendi-sendini, rik betumbuh untuk kehaga-Ni Allah.

²⁰ Keti radu mati jejama Almasih, rik radu dibebasko jak ruh-ruh sai nguasai alam inji. Nah, mengapi keti hurik injuk jelma sai masih dikuasai ulih dunia inji? Mengapi keti tunduk jama atoran-atoran injuk inji,

²¹ "Dang nyadak inji", "Dang ngerasako udi", "Dang nilut inji"?

²² Sunyin atoran ano iado tentang hal-hal sai reno dipakai mak beguna lagi. Udi angkah atoran-atoran rik ajaran-ajaran sai disani ulihni manusia.

²³ Sangun keliakanni hal udi bijaksana, jama anjuranni in jelma nyumbah malaikat, ngerendahko diri rik nyiksa diri; kidang sunyinni ano mak beguna untuk ngendaliko nafsu manusia.

Kolose

Video Kolose 2

Ikuti Kami:

KONTAK | PARTISIPASI | DONASI