Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tiang melẽt side pade nenaoq berembẽ beratne tiang bejuang umaq side dait umaq ie pade saq lẽq Laodikia dait jari selapuq saq ndẽqman kenal tiang secare pribadi.

² Selapuqne niki tiang laksaneang adẽq atẽ ie pade jari kuat dait ie pade saling kasihin sehingge ie pade jari teguq besopoq. Siq care nike ie pade jari tetu-tetu ngerti dait yakin serte paham rahasie Allah, saq temaksut nike Almasih mẽsaq.

³ Lẽq dalem Almasih nike tesimpen selapuq harte hikmat dait penenaoq lẽman Allah.

⁴ Tiang badaq niki adẽq side pade ndaq tetipu siq sai juaq saq manis-manis ucapanne lẽq side.

⁵ Sẽngaq timaq tiang bejaoqan kance side pade, anggep bahwe tiang araq lẽq antare side pade. Dait tiang seneng serioq side pade idup tertib dait teguq beriman tipaq Almasih.

⁶ Semeton senamian sampun nerimaq Deside Isa Almasih sebagẽ Tuhan. Keranaq nike side pade harus tetep idup lẽq dalem Ie,

⁷ imande maraq akah lolo kayuq saq kuat dait tepenganjeng lẽq atas-Ne, side pade harus tetep teguq lẽq dalem iman side pade, maraq saq sampun teajahang lẽq side. Dait atẽnde harus belimpah-limpah siq rase syukur.

⁸ Side pade harus onyaq-onyaq ndaq jangke araq saq pengaruhin siq pengajahan-pengajahan saq palsu dait ndẽq araq manpaatne. Pengajahan-pengajahan nike asalne lẽman adat istiadat dait roh-roh dunie, ndẽqne berasal lẽman Almasih.

⁹ Sẽngaq lẽq dalem Almasih meneng selapuq kepribadian Allah secare sempurne.

¹⁰ Side pade ẽndah sampun tejariang sempurne lẽq dalem Almasih. Almasih nike kepale selapuq pemrẽntah dait penguase.

¹¹ Sẽngaq lẽq dalem Almasih, side pade sampun tesunat, ndẽqne siq sunat saq tepiaq siq manusie, laguq siq sunat saq tepiaq siq Almasih, saq bẽbasang side pade lẽman kuase tabiat saq bedose.

¹² Sẽngaq sewaktu side pade tebaptis, side pade tekubur bareng-bareng kance Almasih; dait siq baptisan nike ẽndah, side pade milu teidupang malik bareng-bareng kance Almasih, sẽngaq side pade percaye lẽq kuase Allah saq sampun ngidupang Almasih lẽman ninggal.

¹³ Laẽq, side pade sampun matẽ secare rohani lantaran dose-dosende dait lantaran side pade ndẽq tesunat secare lahiriah. Laguq mangkin Allah ngidupang side pade bareng-bareng kance Almasih. Allah sampun ngampunin selapuq dosente,

¹⁴ dait surat hukumante, saq ngancem kadu sarat-sarat saq berat nike tebatalang siq Almasih. Siq care surat nike tepakuq lẽq kayuq salib, Allah ngapus selapuq tuduhan tipaq ite.

¹⁵ Lẽq salib nike Almasih miaq selapuq roh-roh saq mrẽntah dait bekuase jari ndẽq bedowẽ kekuatan malik. Ie pade tejariang pantoan dengan luwẽq sewaktu Almasih gadingang ie pade jari tawanan dalem arak-arakan kemenangan.

¹⁶ Keranaq nike ndaq ngalurang dengan ngukum side pade mengenai keloran atao ineman, atao mengenai hari-hari raye agame, atao perayaan-perayaan bulan baru, atao mengenai jelo Sabat.

¹⁷ Selapuqne nike cume bayangan lẽman hal-hal saq gen dateng, laguq kenyataan lẽman hal-hal nike setetune Almasih!

¹⁸ Ndaq side pade ngalurang diriqde terugiang siq dengan saq puraq-puraq ngerendahang diriqne dait nyembah malaẽkat-malaẽkat. Dengan nike sombong siq pikiran-pikiranne saq duniawi dait bangge-banggeang penyerioqan-penyerioqanne.

¹⁹ Ie pade ndẽq teguq betegelan lẽq Ulu, saq ngicanin keloran tipaq selapuq awak dait saq ngubungang selapuq awak nike jari sopoq awak langan sendi-sendi dait uwat-uwatne. Langan Ulu nike ẽndah selapuq awak sayan belẽq menurut pekayunan Allah.

²⁰ Lamun side pade sampun ninggal bareng kance Almasih, dait sampun tebẽbasang lẽman roh-roh dunie, kembẽq side pade idup maraq dengan saq masih tekuasein siq dunie niki? Kembẽq side pade taat lẽq aturan-aturan maraq niki,

²¹ "Ndaq tegel niki", "Ndaq rasaq nike", "Ndaq kintur niki?"

²² Selapuq aturan nike sesampunne tekadu ndẽq araq manpaatne malik. Nike cume aturan-aturan dait pengajahan-pengajahan saq tepiaq siq manusie.

²³ Aturan-aturan niki, timaq ruene penoq hikmat siq ibadah saq tepiaq mẽsaq, misalne ngerendahang diriq, nyiksaq diriq, laguq selapuqne nike ndẽq araq manpaatne kecuali jari muasang napsu manusie.

Kolose

Video Kolose 2

Ikuti Kami:

KONTAK | PARTISIPASI | DONASI