Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Jadi, kana rasanimiu yaku nompasimbuku mpuu nantulungi komiu bo tona ri ngata Laodikia, bo pura-pura tona anu dopa nosisani ante yaku.

² Yaku nompasimbuku ala raramiu pura-pura rapakaroso bo komiu mosangu rara bo mosimpotove. Apa ane ivesia, pomparasayamiu mpuu-mpuu maroso bo komiu ledo molengga-lengga sabana nisanimiumo anu nakana. Jadi komiu mosisani belo nte i Kristus, Iamo poko nia nu Alatala, nia anu nitabuniaka lako ri nggauluname.

³ I Kristusmo topompopaisani pura-pura noto bo pangisani nu Alatala anu dopa nisani ntona.

⁴ Patuju ntesaku hitu ala komiu ledo rabagiu ntona ante tesa-tesara anu nompakaluu raramiu.

⁵ Sabana nau yaku nakavao lako nte komiu, riara ntaiku yaku naria ri situ nte komiu. Bo nadamba mpuu raraku nangepe komiu nosangu rara bo ledo nolengga-lengga nomparasaya i Kristus.

⁶ Sampesuvu-sampesuvu, nitarimamiumo i Yesus Kristus najadi Tupumiu. Jadi komiu kana batena matuvu mosangu rara ante Ia.

⁷ Katuvumiu nosangu rara nte Ia kana masimbayu mpo kayu nandate kalena, bo banua da kapombangu-banguna ri bavo pandasi naroso. Komiu kana mantambai karoso pomparasayamiu, evamo nipatuduki ka komiu. Bo komiu kana masaro mosukuru nte Alatala.

⁸ Komiu kana mainga, nee sampe komiu rabagiu ntona ante pepatuduki ledo nakana bo ledo ntoto noguna. Apa pepatuduki haitu aga nangoseaka pekiri nu manusia, bo nopuna lako ri *malaeka-malaeka nadaa anu nombakuasai dunia. Pepatuduki haitu ledo nopuna lako nte i Kristus.

⁹ Apa nau i Kristus najadi manusia, pura-pura inggu bo kuasa nu Alatala naria riara karoNa bo ledo nakura nuapa-nuapa.

¹⁰ Bo komiu natuvu mpuu bo ledo nakura nuapa-nuapa sabana komiu nosangu rara ante i Kristus. I Kristus nalangapa nturoNa pade pura-pura anu nakuasa bo anu nomparenta ri suruga bo dunia.

¹¹ Kita nosangu rara ante i Kristus jadi kita nireke *nisuna. Tapi posunata haitu ledo anu nipovia nu manusia ri karota tapi anu nipovia i Kristus riara ntaita. Batuana, kita nikabasaka lako ri kuasa nu dosa.

¹² Tempo kita nidiu tandana kita topangoseaka i Kristus, nireke kita namate bo nitana nosanggani-nggani ante i Kristus. Bo nireke muni kita nipakatuvu mpanjili nosanggani-nggani ante i Kristus, sabana kita nomparasaya kuasa nu Alatala anu nompakatuvu mpanjili i Kristus lako ri kamateNa.

¹³ Bara ipia dopame komiu nomparasaya i Kristus, komiu nireke namate sabana komiu nadosa bo ledo nangoseaka atura-atura nu Alatala. Tapi sii-sii, Alatala nompakatuvu komiu nosanggani-nggani nte i Kristus, bo pura-pura dosamiu niampungiNamo.

¹⁴ Bara ipia kita masipato rahuku nu Alatala bo rapopogaa lako nte Ia sabana kita nombaliunaka parentaNa. Tapi tempo i Yesus nipaku ri *kayu salib, domo nireke nu Alatala pombaliunakata bo nikabasakaNa kita lako ri atura-atura niliunakata haitu. Sabana haitu, domo paraluu kita rahuku.

¹⁵ Bo tempo i Yesus nipatesi nipaku ri kayu salib, nidagiNa pura-pura *seta bo malaeka nadaa anu nakuasa. NilelakasiNamo kuasara nomparenta bo nipopakitaNa ka pura-pura isi dunia Iamo padagi bo ira nidagiNamo.

¹⁶ Jadi sampesuvu-sampesuvu, nee rapariara tesa ntona madota mompasuu komiu mangoseaka ada nu agamara. Nipakasalara komiu sabana komiu nangande bara nanginu anu nipopali nangoseaka ada-adara, atau komiu ledo nangoseaka ada eo-eo mbaso agamara, eo mbaso kagero bula, bara *eo-eo penonto. Nee rapariara tesara haitu

¹⁷ sabana atura-atura bo ada-ada ivehaitu aga nojalili anu belo makava nggapurina. Tapi anu nakava bo anu nijalili haitu, iamo i Kristus.

¹⁸ Jadi, ane maria tona nompakasala komiu sabana ledo nioseakamiu pepatudukira, nee rapariaramiu tesara, mbelaka komiu masalandala bo ledo manggava belo nijanji nu Alatala ka komiu. Tona haitu aga madota mompasuu komiu netiede rara bo nombasomba malaeka-malaeka. Ira nangoeka pangisanira sabana naria anu nikitara riara panggita. Nalanga bayangi rarara, bo pepatudukira aga nopuna lako ri pekirira mboto anu nangoseaka dunia hitu.

¹⁹ Tona haitu domo nanjarumaka i Kristus. Tano mai, i Kristusmo nirapaka Balengga ntopomparasaya, bo kita anu nomparasaya nirapaka karoNa. I Kristusmo nompiara karoNa bo nompopakasangu todeaNa nasimbayu mpo uva bo oyu nipasiumpu bo nompopasidumpa buku-buku majadi sangu karo. Jadi Iamo nanggeniaka karoNa, haitumo todeaNa, nantambai naroso, nangoseaka dota nu Alatala.

²⁰ Namala raulita kita topomparasaya i Kristus namate nosanggani-nggani nte Ia, bo nikabasaka lako ri kuasa malaeka-malaeka nadaa anu nombakuasai dunia. Jadi nakuya komiu da nangoseaka atura-atura ri dunia hitu nasimbayu mpo tona anu dopa nosisani nte i Kristus?

²¹ Nakuya komiu da nangoseaka atura-atura evamo: Nee manggingisi hitu! Nee rapetami kandea haitu! Nee mantui anu nipopali!

²² Atura-atura ivehaitu ledo ria gunana ka kita sabana atura haitu aga notesa kandea bo anu nipake sampalai bo nalipo. Kakanana atura-atura haitu aga nopuna lako ri parenta-parenta bo pepatuduki manusia.

²³ Atura-atura haitu nabelo mpuu ri panggita nu manusia, sabana topangoseaka atura-atura haitu nikita eva tona natutu mpuu noagama; nipakaedera rarara bo nioseakara atura-atura anu nompandasa karora mboto. Tapi kakanana atura-atura haitu ledo ria gunana, sabana ledo nantulungi kita menonto novia anu nipodota rarata nadaa.

Kolose

Video Kolose 2

Ikuti Kami:

KONTAK | PARTISIPASI | DONASI