Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tapi ipangindo uhurhu do, ase ibotoh nasiam, sonaha banggal ni halojaonku mangkopkop nasiam ampa sidea na i Laodikea, ampa haganup na so ongga mangidah bohingku ope,
2 ase tarapoh uhur ni sidea, ase marpardomuan ibagas holong, ase bayak bani pangarusion na gok, anjaha ase itandai sidea pasal rusia ni Naibata, in ma Kristus in.
3 Ibagas Ia do ponop sagala arta na marisi hapentaran ampa habotohon.
4 Huhatahon pe in, ase ulang adong na mangoto-otoi nasiam marhitei pandei ni parsahap.
5 Ai padaoh-daoh pe ibagas pardagingon, rap pakon nasiam do ahu ibagas tonduy, marmalas ni uhur mangidah partorsani bani nasiam ampa partotap ni haporsayaon nasiam bani Kristus.
6 Ai pe, songon panjalo nasiam bani Kristus Jesus, Tuhan in, sonai ma marparlahou nasiam ibagas Ia,
7 marurat anjaha ipauli-uli ibagas Ia, jonam marhaporsayaon, songon na dob niajarhon bani nasiam, anjaha lambin martarima kasih.
8 Jaga ma nasiam, ase ulang adong halak na mangagou nasiam marhitei hapentaron dunia ampa sipaoto-oto na lumei, na maronjolan bani tonah-tonah ni jolma, bani kuasa ni unsur-unsur dunia on, seng bani Kristus.
9 Ai ibagas Ia do marianan haganup hagogok ni hanaibataon marrupahon angkula,
10 anjaha ibagas Ia do gabe gok nasiam, Ia do kopala ni sagala pamarentahan ampa kuasa.
11 Lanjar ibagas Ia do nasiam tarsunat, sedo binahen ni tangan, ai ma mananggalhon daging pardousaon, marhitei parsunaton na ibagas Kristus.
12 Ai tartanom do nasiam rap pakon-Si ibagas pandidion in, anjaha ibagas ai do homa nasiam ipapuho rap pakon-Si marhitei haporsayaon bani hagogohon ni Naibata, na papuhohon-Si humbani hamatean.
13 Ase nasiam, na matei hinan ibagas panlanggaron ampa ibagas daging na so tarsunat in, rap pakon-Si do nasiam ipapuho, dob isasap sagala panlanggaronta,
14 marhitei na isasap surat utang dompak hita, ai ma paraturan na mangimbang hita, anjaha ipadaoh do ai hun tongah-tongahta, ipakuhon bani silang ai.
15 Irampas do sinjata humbani siparkuasa ampa sipargogoh; talar do ipatontonkon sidea, marhamonangan do Ia dompak sidea.
16 Ai pe, ulang ma iuhumi halak nasiam halani sipanganon ampa siinumon barang halani pesta barang poltak ni bulan barang halani ari Sabat pe.
17 Halinoh ni na sihol roh ai do in, tapi Kristus do anggo badanni.
18 Ulang ma ra nasiam rampason pasal upah hamonangan nasiam marhitei halak, na mangkarosuhkon parnalangon diri ampa parsombahon bani malekat, na mangunsagah bani na nididahni ibagas alatan ni tonduyni, na pabanggal-banggal diri, lang maralasan, marhitei pingkiran pardagingon,
19 tapi lang totap marsijoloman bani ulu in, ai ma na mansarihon angkula in anjaha padomuhon marhitei urat-urat ampa ringring, gabe marbanggal domu hubani ranggian ni Naibata.
20 Anggo domma matei nasiam rap pakon Kristus dompak kuasa unsur-unsur ni dunia on, mase ma ra nasiam paksaon marhitei paraturan-paraturan, songon halak na manggoluh i dunia on:
21 Ulang jamah on, ulang pangan, ulang giut!
22 Haganupan ai magou do anggo domma hona pakei. Titah ampa podah-podah ni jolma tumang do ai.
23 Tongon, songon na marisi hapentaran do ai idahon, ai ionjolhon do hadaulaton, na marnalangkon diri, na mangarsik-arsik angkula; tapi seng na marguna ai manlawan hisap ni daging.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA