Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali naka pei aku manganto'o gombo etu apa aku rani komi mangansani ewa wimba kabeunya palaong to aku mangika mangansawang komi, pasi tau to nja'u Laodikia, pasi samparia tau to yusa to tawa simparata pei aku.
2 Naka pei aku rani komi mangansani mangkonong palaongingku etu see komi samparia damawali maroso raya ngkomi pasi kanjo'u-njo'u tidugadugang komi masiporayang. Apa ane ewa see, komi damangarata kasugi to bae kojo. Kasugi etu, etu semo kapande pasi kanasa. Wali yako resi i Kerisitu semo kita mangarata kasugi etu. Etu semo songka i mPue Allah to rawuni tempo ruyu. Wali i Kerisitu maya raporapaka ewa tampa napamposayaka ntau kasuginya. Pasi yako resi i Kerisitu semo kita mangarata samparia kapande pasi kanasa to raporapaka ewa kasugi etu.
3 (2:2)
4 Wali aku manganto'oka komi gombo si'i see komi taa danatipu ntau to ojo mangamomis komi.
5 Wali tuwutuwuja komi damampodongeka gombongku etu, apa aku nempo longko yako resi komi, pei rayangku re'e sindara-ndara pei komi si'i-si'i. Pasi aku ndende rayangku mampobuuka komi masintuwu pasi komi mainti pangaya ngkomi resi i Kerisitu.
6 Wali seore komi mangantima i Kerisitu Yesu, Pue ngkita, yako ri pangaya ngkomi, wali ewa wetu seja ika lengko ngkatuwu to masipato raika apa komi samba'a pei Ia.
7 Wali i Kerisitu raporapaka ewa tana to mampakainti kaju apa la'u kalenya. Pasi Ia raporapaka seja ewa pondasi to mampakaroso banua. Wali matao seja komi mawali ewa kaju to mainti pasi banua to maroso etu apa komi samba'a pei i Kerisitu. Pasi pakaroso pangaya ngkomi singkonong ewa to roomo rapotundeka komi, apa ane ewa see bae kojo kandende ndaya ngkomi manganto'oka i Pue Allah tarima matao.
8 Wali pakatao kojo see komi taa na'akal ntau to magombo yako ri kapande nto lino. Apa gombo ntau etu kamonsonya tare batuanginya pasi ojo mangantipu tau. Tau etu ojo mampotundeka sa'e mangkonong ada to napotundeka nu bue-bue ngkita to lino. Pasi sira mampotundeka sa'e pampobuuka ntau mangkonong lino si'i. Wali anu to napotundeka nsira etu si'a yako resi i Kerisitu kama'inya.
9 Wali tare batuanginya mampodongeka tau etu apa kita re'e i Kerisitu. Ia mawali to lino, pei nempo ewa see, samparia to re’e resi i Pue Allah paka re'e seja resi Ia.
10 Wali i Kerisitu semo kepala to mangkuasang samparia kepala pasi samparia to re'e kuasanya. Pasi samparia to re’e resi i Kerisitu etu paka re'e seja resi komi apa komi samba'a pei i Kerisitu.
11 Wali apa saba komi samba'a pei i Kerisitu, see naka komi ralapa yako kuasa mpampobuuka to masae. Komi maya raporapaka ewa tau rasui. Rasui etu si'a rasui to naika nto lino, pei komi ewa rasui ri raya ngkomi saba to naika i ngKerisitu tempo Ia mate ri kaju pasape.
12 Apa tempo komi rabaptis rapasimba'a resi i Kerisitu, tempo etu komi nato'o i mPue Allah rapongkeli sindara-ndara pei i Kerisitu. Pasi tempo etu komi nato'o seja i mPue Allah rawangu muni sindara-ndara pei Ia. Wali naka pei komi nato'o i mPue Allah ewa wetu apa komi mangaya kuasa i mPue Allah to mangawangu muni i Kerisitu yako ri kapateNya.
13 Wali tempo ruyu, tempo komi tawa mangaya, tempo etu komi ewa mate apa saba dosa to nuika ngkomi. Pasi komi tawa ewa rasui raya ngkomi. Pei nempo ewa wetu, si’i-si’i i Pue Allah roomo mampotuwu komi sindara-ndara pei i Kerisitu. Wali naka pei kita tuwu, apa i Pue Allah roomo mangalapa dosa ngkita.
14 Ane tempo ruyu, kita rato'oka masipato rahuku apa kita taa mangalulu porenta-porenta to ratulis ri raya mporenta i Musa. Pei tempo i Kerisitu mate rapaku ri kaju pasape, i Pue Allah ewa mangkeni yau porenta etu pei mangampaku seja ri kaju pasape sindara-ndara pei Ia. Wali see naka tamo re'e to manganto'o kita masipato darahuku.
15 Pasi tempo i Kerisitu mate ri kaju pasape etu, tempo etu i Pue Allah manganangi samparia kuasa measa to rato'oka makolenya pasi samparia measa anu paka re'e kuasanya. I Pue Allah manganangi measa etu panewa mampasiromunaka sira ri tangonya samparia anu to re'e see mampakanasa kojo sira nangimo.
16 Wali saba i Pue Allah roomo ewa mampaku seja porenta i Musa ri kaju pasape, ne'e mampodongeka tau to manganto'o komi sala apa komi taa mangalulu samparia ada mporenta to tempo ruyu etu. Ewamo ada mangkonong pangkoni pasi anu to rainu, bara mangkonong roa to naika nto Yahudi ponto to'u pasi ponto wuya, bara mangkonong eo to napandoo nto Yahudi.
17 Apa samparia ada mporenta i Musa etu ojo ewa lengke to taa mayoas mangkonong anu to monso to darata. Pei i Kerisitu semo anu to monso etu. Wali ane ratamo anu to monso, tamo re'e batuanginya mangampake lengke to taa mayoas etu.
18 Wali re'e tau to mangepe sira semo to bae angganya apa sira manganto’o sira mandudu ngkani mangkita pangkita to taa rapobiasa. Tau etu manganto'o ne'e mangei pei kamonsonya sira semo to mangei. Pasi sira manganto'o to taotao kita ojo mampue resi pomakau i mPue Allah yako ndate saruga. Wali a'i-a'i, ne'e natipu ntau to ewa wetu apa kamonsonya tare to naika nsira see masipato sira mawali mangei. Apa pampobuuka nsira ojo pampobuuka nto lino.
19 Pasi tau etu raga'a yako resi i Kerisitu, kepala ngkita to mangawaika kita karosonta. Wali ewa rapanya koro ntau, samparia saganya napasingkenta nu yotusnya pasi uanya, pei naka pei tuwu pasi maroso saba yako wo'onya semo. Pasi ewa see seja kita to raporapaka ewa koro i ngKerisitu. Kita seja rapasimba'a, pei ojo yako resi Ia to wo'o ngkita naka pei kita kanjo'u-njo'u karoso-roso tuwu singkonong ewa wimba pamporani i mPue Allah.
20 Wali tempo i Kerisitu mate ri kaju pasape, tempo etu komi seja mate sindara-ndara pei Ia, wali ewa tau mate tamo mangalulu ada, ewa see seja komi tamo mansarumaka ada nto lino. Wali see naka komi tamo rapakasaaka mangalulu pampobuuka ntau mangkonong lino si'i. Wali maka pei komi mangika lengko ngkatuwu ewa tau to tiroowa nakuasang nu lino si'i? Maka pei komi tiroowa mangaluluka ada to ojo yako ri pampobuuka nto lino?
21 Ada etu ewamo ada to manganto'o, "Ne'e mangkomor anu etu", pasi "Ne'e mampeyaa pangkoni etu", pasi "Ne'e mampotaka anu etu".
22 Pei kamonsonya samparia anu to rapomalika etu taa singkasaenya nakare’e apa samparia etu naika i mPue Allah paka darapake yau. Wali ada to ewa wetu ojo porenta to naika nto lino pasi to napotundeka nto lino.
23 Kamonsonya tau to mangalulu kojo ada etu, ane ri pangkita nto lino sira re'e kapandenya pasi madota kojo mangalulu agama. Sira manganto'o, "Kami taa kojo mangei," pei kamonsonya sira mangei semo. Pasi sira mangansesai koro nsira mangalulu porenta nu agama nsira etu. Pei kamonsonya porenta-porenta to nalulu nsira etu tare batuanginya apa tare kuasa manganta'amaka pampobuuka pasi pamporani ndaya nsira to maja'a. Wali see naka ne'e kita mangalulu anu to napotundeka nsira.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA