Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nima' negku maré kali' nemuyuh ratnan tuehku ngakem kuan muyuh idi kuan lun Laudikia, idi teh kuan amungdeh luk mili' negku ini.
2 Ui nganau' kudeng ini pad niatdeh mekuu', idi ideh perurum bang awa, idi manu dengan matu-matu ngaceku ideh kali' luk inalum Allah, ieh ineh Keristus.
3 Keristus ineh taka luk ngukab amung-amung ileh idi do' kali' Allah luk inalum mepad kudeng binaweh luk meraga.
4 Ui mala ini, pad seburur pana' na naluk nemuyuh ku bala luk pelaba, paci'.
5 Ngaceku sagan pana' bururku na muneng, iamo' rohku ngedengan nemuyuh, idi ui mawang niat, ngaceku ui nier ulun muyuh idi anu muyuh luk lutep bang Keristus.
6 Muyuh pangeh nengalap Keristus Yésus Tuhan tau. Ngaceku ineh, do' ulun muyuh lutep bang Neneh.
7 Do' muyuh inan uat bang Neneh idi do' ulun muyuh piduten luun tapin ineh, ieh ineh Keristus. Idi do' anun muyuh amé' rayeh, maya' kudeng luk pangeh bida' kuan muyuh. Do' muyuh mepanu' ku ubur.
8 Matar do'-do', pad seburur lemulun pana' na naban nemuyuh ku ilehneh idi salukneh luk mo'-mo', luk maya' bada' tepun-tepun idi roh-roh tana' ini, baken maya' Keristus.
9 Ngaceku bang Keristus amung-amung riput luk meligan ratnan Allah pamung dengan ayu burur.
10 Idi muyuh pana' miak uen ngeriput bang Neneh. Keristus ineh mangun ku luk rayeh pa luun amung-amung luk ngimet idi lalud teh.
11 Idi dengan Keristus teh muyuh sinunat ku aceh sunat luk baken dengan ticu' lemulun, ieh ineh ku sunat Keristus luk muit nemuyuh ratnan burur luk mesala'.
12 Kareb muyuh rireb, muyuh tinanem dengan Keristus, idi bang rereb ineh teh muyuh pangeh tinui teh dengan Keristus, ngaceku manu inan lalud Allah luk nenui Neneh rat arang lun naté ineh.
13 Idi muyuh pana' atun pangeh naté ngaceku sala' idi ulun burur muyuh luk na sinunat. Meluun teh muyuh pangeh inulun Allah pad-pad denganNeh. Idi Ieh pangeh nemaré do' ratnan amung-amung sala' tau.
14 Ieh pangeh metueh ratnan Ukum, idi Ieh nengiu' surat baleh luk petulu ruen tau mayar. Ieh nengiu' ineh kareb Ieh nenapek ineh luun kayuh salib.
15 Idi luun salib ineh Keristus nenala' amung-amung luk ngimet idi amung-amung lalud luk na melagan, idi Ieh metueh pad Ieh nengegala' laya' deh kareb Ieh nenguit nedeh pekarur mepad kudeng lun luk tiban.
16 Ngaceku ineh aleg nima' seburur lemulun pana' ngesala' nemuyuh ngaceku ratnan akan idi luk rupen, idi ratnan aco luk rayeh, idi Bulan luk Mebaruh, idi Aco luk inan Mudeng.
17 Idi ieh ineh mangun ku lungung-lungung ratnan amung-amung luk miak macing, iamo' luk tuneh ieh ineh Keristus.
18 Aleg muyuh saluken lemulun luk pian ngebeneh bururneh pa kiung melaikat idi sembayang nedeh. Lemulun luk kudeng ineh megéi' pebala ratnan luk sinierneh, pad ieh ngedita' bururneh ngaceku pian mebala. Iamo' terawéneh maya' ulun tana' ini.
19 Idi na ieh merapet inan Keristus luk mangun ku Uluh ineh. Pa liang imet Keristus amung-amung burur miak panin idi uen ngamung ratnan langod tulang idi urat-urat idi temubu' maya' pian Allah.
20 Muyuh pangeh naté pad-pad dengan Keristus nepuit ratnan bada' roh-roh tana' ini. Ngudehké muyuh ngebeneh burur muyuh kuan amung-amung ukum ada' ayu-ayuneh muyuh mulun bang tana' ini.
21 Ukum ada', ieh ineh "Aleg ngimet, aleg nila', aleg ngakem."
22 Amung ukum ineh na ulekneh, kareb ineh pangeh pikai, ngaceku amung ineh ukum idi bada' luk inau' lemulun mo'.
23 Sagan pana' ayuneh amung ukum ineh ratnan ileh, dengan mesaad sembayang inan melaikat, dengan ngebeneh niat idi ngurat burur; iamo' amung ukum ineh na ulekneh, idi na miak muit nemuyuh ratnan pinian burur muyuh sebuleng.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA