Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ibogonku im baí kota'auan doman monimu in rorigaku wakutu in noramiji nogaid sing kopontingan monimu bo kopontingan monia inta kon Laodikia bo ko'i monia komintan inta diaípa nonota'au ko'inakoí.
2 Na'a komintan inaidanku simbaí moropotdon ing gina monia bo mositabian poḷat mobiag motobatuí, sahingga mosia totu-totu'udon momangarti bo moyakin poḷat monota'au kon onu inta binuni i Allah, tuata ing ki Kristus tontanií.
3 Ki Kristusbií tua im mobukaí kom bayongan pandoi bo pongotahuan i Allah inta kolipod no'ibunipa.
4 Na'a im pogumanku ko'i monimu, simbaí diaí im mo'ikow uboḷan in intau mita inta tongaí mopia kom bibig.
5 Sin umapakbií kita nogiyayuían, ta'e anggapdon aku'oi nionbií kon yuaí-yuaík monimu. Bo mopiabií totok ing ginaku moko'ontong ko'i monimu motobatuí kong gina bo umuran moropot im pirisaya monimu ko'i Kristus.
6 Tai utat mita ain notarima ko'i Kristus Yesus saḷaku Tuhan. Manangka intua kobiagdon im mo'ikow motobatu' takin-Nya,
7 bo monguakat kom bonu i Kristus Yesus. Mo'ikow musti moposindogdong ing kobiaganmu bo ki Kristus in dodoyonanmu. Mustidon modugang im pirisaya monimu ko'i Kristus, podudui onu inta ain sinunduí ko'i monimu. Bo ginamu in umurandon mo'ibo-ibog mopoyaput in sukur moaíntoí.
8 Mustibií mokopo'ingat im mo'ikow, dikabií modapot oyuíon im mokodondouḷug ko'i monimu takin pomikiran-pomikiran inta tongaí pinodoyon kom pandoi intau inta diaí im baragunanya, ta'e tongaí mokopoyaying kom pirisaya. Pomikiran mita tatua de'emanbií nongkon i Kristus, ta'e tongaíbií nongkon pomikiran in intau bo nongkon roho mita inta nonguasa kon dunia.
9 Sim bayongan kapribadian i Allah no'ipasdon ko'i Kristus, inta kom bonu ing ka'ada'an-Nya saḷaku intau.
10 Bo lantaran nobiag notobatuí i Kristus, daí mo'ikow inogoiandon ing kobiagan. Sing ki Kristus in tongguḷu im bayongan roho inta nongawasa bo inta nomarentah.
11 Lantaran notobatuí takin i Kristus, daí mo'ikow ain sinunat, ta'e de'emanbií sunat inta inaidan in intau, ta'e sunatbií inta inaidan i Kristus, inta nopobebas ko'i monimu nongkon kawasa in tabiat inta binaradosa.
12 Sing kowakutu im mo'ikow binaptis, mo'ikow iḷobongdon noyotakin i Kristus; bo takin doman baptisan tatua, mo'ikow no'itakin doman biagon bui moyotakin i Kristus lantaran mo'ikow mopirisaya kong kawasa i Allah inta ain nomiag ko'i Kristus nongkon kinopatoian.
13 Kolipod, mo'ikow aim minatoi secara rohani lantaran mo'ikow binaradosa, bo lantaran mo'ikow diaí sinunat inta inaidan in intau. Ta'e tana'a ki Allah ain nomiag ko'i monimu noyotakin i Kristus. Ki Allah ain nongampung kom bayongan dosa naton,
14 bo pinopatan-Nyadon in surat bobolian ko'i naton, inta mongancam ko'i naton takin sarat mita inta mongobogat. Takin cara nopopakuí in surat bobolian tatua kong kayu pinoyotalempang, ki Allah nomopat kom bayongan inta pinonapud ko'i naton.
15 Kong kayu pinoyotalempang tatuata pinomia i Kristus im bayongan roho inta nomarentah bo inta nongawasa diaídon nokopongonu bui. Mosia pinomiadon tontonan im bayongan intau kowakutu in diaan i Kristus im mosia saḷaku intau inta sinoko domok kom pawai kino'untungan-Nya.
16 Manangka intua dona'aidon pomayak makow intau mopotaḷaí ko'i monimu kon soaáḷ ka'anon ande inumon, ande so'ḷ mita singgai moḷoben in agama, andeka poraya'an mita buḷan mobagu, ande soaáḷ singgai in Sabat.
17 Tua komintan tongaíbií olinow nongkon soaáḷ mita inta mo'iduduimai, ta'e inta monyata nongkon soaáḷ mita tatua ing ki Kristusbií!
18 Donaaibií pomayak makow monimu im porugionmai in intau mita inta ki ubo-uboḷmai mokopo'ompaí kon dodia bo inta mosumbah kom malaekat mita. Intau tatua mokaḷakuang takin pikirannya mita inta modunia bo dumodia kon inta o'ontongon mita monia,
19 sahingga in diaídon kumadai ko'i Kristus inta nobalií tongguḷu. Kom bonu im pimpinan i Kristus, bayongan awak iḷukadan bo sinobatuí in sendinya mita, poḷat nobiag podudui ibog i Allah.
20 Mo'ikow aim minatoi noyotakin i Kristus, bo aim pinobebas nongkon roho mita inta nongawasa kon dunia na'a. Daí nongonu sim mo'ikow in nobiagbií naí intau inta kinawasa'anpa in dunia na'a? Nongonu sim mo'ikow in dumuduipabií kon atorang mita naí tana'a:
21 "Dona'ai mokadai kon na'a", "Dona'ai moka'an kon tua", "Dona'ai moliai kon na'a?"
22 Bayongan atorang tatua im mongonaibií soaáḷ mita inta naonda im pakeíon diaídon im baragunanya. Tua in tongaíbií atorang bo totunduí mita inta pinomia in intau.
23 Memang ko'ontongan soaáḷ tatua naonda bo mobijaksana, takin tongganutnya simbaí intau mosumbah kom malaekat, mokopo'ompaí kon dodia bo moposikisa in awak; ta;e bayongan tua diaíbií im baragunanya mogator kon napusu ande ibog in intau.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA