Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Gee 'o dudungokau miaisa kamiosa-sanangi, 'asa de mianako 'ato ma pulo ge'ena ma ronga 'o Malta.

² Ma nyawa ge'enaka gee manga singina yaowa ngomino. 'Ona midawongo yaowa-owa ngomi mioodumu de 'o 'uku midataulu sababu 'ibesaka 'ikuruekau de 'i'alo.

³ 'O Paulus 'o gota wolomu de wositau-taulu, wositau-taulu koge'ena de 'o ngia 'ibisa-bisa 'o ngai moi 'isupu sababu ma 'uku 'isauku, de yatuduku wi giamika.

⁴ Ge'ena ma puloka yomanoa-noa gee yamake 'o ngia ge'ena 'isiarika 'o Paulus wi giamoka, de yomakadongose, "'Etei, 'o nyawa nu'una ge'ena ma raiokau woto-to'oma, sababu 'una ngaro kowido'oawa 'o ngootoka, ma gee posironga 'o Gomanga ma Dutu 'Iloa-loa kowisidabiwa wo'ahu."

⁵ Ma 'o Paulus wosibilarotoka ma ngia ge'ena 'o 'ukuku 'ena kowido'oawa.

⁶ 'Ona yongose dua ma eta-etasi de wi giama 'ioboso bolo kage'ena ma 'orasi de wosongene. Ma gee yodamaa 'o do'ingo ma eta 'ena kowido'oawa, de manga di-dibangi 'ingali so yongose 'ato 'o Paulus ge'ena 'o Gomanga ma Dutu.

⁷ Ge'enaka 'ena koikurutikawa 'o Publius wi tonaka, 'una ge'ena ma puloka ma balusu. De wi singina yaowa-owa midawongo wi woa ma gikiri, so ngomi ge'enaka mia wange sa'angeka.

⁸ Ma 'orasi ge'ena ma dea wigogamuku womadagi-dagi de 'o 'aunu sona wosidagi. 'O Paulus waika wilega de wisilahidoa de wi giama widatamiku so wi panyake 'i'aiki.

⁹ Sababu ge'enau 'idadi so 'o nyawa yopa-panyakeku ma puloka ge'ena yoodumu yoboa 'o Paulusino de wakisi'aiki.

¹⁰ 'Ona posironga mihoromatioka ngomino, de gee miosidetou de ya'asano 'o kapalioka 'iodumu gee mioparaluu mia do-dagioka.

¹¹ Mia mede sa'angeka ge'ena 'o Maltaka, de miotagi mioparene 'o kapali moi 'o Aleksandriano gee 'imatapuku ma puloka ge'ena ma do'ingo 'o 'alo ma 'orasi. Ma kapalioka ge'ena ma gambari, "'O Gomanga ma Dutu 'isago 'o Kastor de 'o Poluks."

¹² Ngomi miomatapuku 'o Sirakusa ma kotaka de mimanoa ge'enaka 'o wange sa'angeka.

¹³ Ge'enaka de miotagi miosidetoli ka ma batingi mialili sigado 'o Regiumoka. Ma bibinie de 'ikurue 'o dadoko dakuuku 'o koresaraku, sigado 'o wange modidi 'ena 'o Putioli ma kotakau miauku.

¹⁴ Ge'enaka ngomi mimakadaenino de yamuruo naga yongaku-ngaku 'o Yesusika, de mi'asoko so miomanoa de de 'ona 'o minggu moino. Ge'enaka de miotagi 'o Romaku.

¹⁵ 'O Romaka gee yongaku-ngaku 'o Yesusika migi'isene, sigado yoboa 'o Apius ma pasari de 'o Pasanggrahan Tiga ma soanoka ma ngale misoboko. Gee ma Paulus de 'ona yomakadaenino, de wi 'amalaha wositotara ma Jo'oungu ma Dutuka de wi singina 'idadi 'ikuata.

¹⁶ 'O Romaka mia'adonuku, de ma pamareta wisidabi 'o Paulus womasido-dogumu womatingaika, ma tentara wimoi wijagano.

¹⁷ 'O wange sa'ange 'ipasano, de 'o Paulus waki'asoko 'o Yahudioka ma balu-balusu so yomalomuno de kawongosekau, "'Esa moi riaka dodoto! Ngoi kokiawa tasowono 'o Yahudioka ma nyawaka, bolo nanga 'adati gee nanga edete de nanga dotumino. Ngaro koge'ena ma 'o Yerusalemuoka de 'itagoko so 'i'asa 'o Romako.

¹⁸ Gedagee 'i'urusoka de yomau 'ipidilou, sababu 'inyatakau kokiawa tasala gee yadaene 'ihukumu 'iso-songene.

¹⁹ Ma 'o Yahudi ma nyawa yomalawani ma sala, so ma rai toga'asoko 'ai hali ge'ena 'i'urusu 'o Romaka nanga Koana ma Amoko. Koge'ena todiai bukangi la 'ai nyawa ma sirete naga 'o kianikia tinikalaki.

²⁰ Ge'enau so toga'asoko pomakamakesi de de ngini la pomabi-bicara; sababu ngoi 'ipusuku ma ngale tongaku Wosilaha-laha gee 'o Israeloka ma nyawa powida-damaa woboakau."

²¹ Ma 'ona kayongosekau 'unaka, "Ngomi komiamakewasi 'o surati 'o Yudeano ma ngale ngona ka 'o ngai moi ma. De dokaino komoiwa moi yaino nisijarita bolo nisigurubungu.

²² Ma ngomi miomau mio'isene mita to ngona 'ani ngo-ngaku, sababu ngomi mio'isenokau yosito-torou 'o do-dotoko gee namote-moteke."

²³ So 'ona de ma Paulus yosito-togumuku ma ngale yomakamake ma wange. Ge'ena ma wange 'o nyawa ma gudai yoboa 'o Paulus womasido-dogumino. 'O ngoru-ngorumika sigado 'o wange 'alo 'o Paulus wosiwaiti de wosihabari 'onaka, ma ngale kokia ma Jo'oungu ma Dutu wopareta ma ngale wokoana. 'O Paulus wosimaigoungu womau 'ona yongaku 'o Yesusika, ge'ena wopake 'o Musa de 'o Nabii 'iregu manga buku ma bo-bulaka.

²⁴ Munuka yongaku 'okia naga wongose gee, ma munuka koyongakuwa.

²⁵ De manga di-dibangi 'imakakalimodi 'ona yoma'aiki ge'enaka, 'ena 'o Paulus wongosesi koneda: "Ma goungu yadae-daene monga 'okia naga gee 'o Ngomasa 'Itebi-tebini 'isitotarokau nanga edete de nanga dotumika ma ngekomo ma Nabii Yesaya!

²⁶ Ma Jo'oungu ma Dutu wongose 'o Yesayaka, 'Tagi nosidemo ne'ena ma Yahudioka ma nyawaka: Ngini 'asa kaitaurika niosigisene ma koniasahewa; ngini 'asa kaitaurika niodi-diriidi ma koniosikanakowa 'okia 'idadi.

²⁷ Sababu 'o nyawa no'ona yooluku yasahe, yomatopongonokau de yomaruutukou. Kone'ena 'idadi la manga ako 'uwau yosimake, manga ngauku 'uwau yosi'isene, de manga di-dibangi 'uwau yosikanako, de 'uwa yolioli ngoino la takisilaha.'"

²⁸ Ge'enau so 'o Paulus wongoseli, "'Esa moi riaka dodoto, salingou nianako 'ato 'o habari ma ngale 'o laha ma Jo'oungu ma Dutuno, ne'ena naga 'isihabariokau ko 'o Yahudiokawa manga soa-soanika. 'Ona 'asa yodomoteke!"

²⁹ ['O Paulus koge'ena wongoseka, de 'o Yahudioka yomakoki'aiki ge'enaka ma de yomakangamo moi de moi.]

³⁰ 'O Paulus 'awi taunu modidioka 'o Romaka gee 'o woa wosewa-sewaka. 'Una posironga wakikalesangioka 'o nyawa gee yaino wililara.

³¹ De womo-moroini wosihabari 'onaka ma ngale kokia ma Jo'oungu ma Dutu wopareta ma ngale wokoana, de ma ngale ma Jou Yesus gee ma Jo'oungu ma Dutu Wiiri-iriki 'o Nyawa Wosilaha-laha. 'O Paulus wodiai ge'ena, komoiwa wikatatoko.

Kisah Para Rasul

Video Kisah Para Rasul 28

Ikuti Kami:

KONTAK | PARTISIPASI | DONASI