Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nasalama puramo kami nesore ri kabatana, pade nisani kami levuto haitu nosanga Malta.

² Tona nonturo ri levuto haitu najole mpuu nte kami. Nikadambanakara kami pura-pura ante belo bo nipanakira apu rapanderu kami, sabana naranindi bo nompamulamo nauda.

³ I Paulus hau nompasiromu tinggu-tinggu kayu bo nidikana ri apu. Da nompadumpu apu, nesuvumo sanggayu ule mpolari lako ri kayu sabana kapane nu apu, bo ule haitu nanteo pale i Paulus.

⁴ Nikita ntupu ngata ule haitu noloe ri pale i Paulus, nisarumakara i Paulus mamate. Nosimpotesamo ira, "Natantumo tona moitu topepatesi, apa nau ia nasalamamo lako ri tasi, Viata Topotangara ledo mompalamba ia matuvu."

⁵ Tapi i Paulus aga novebataka ule haitu hau ri mata nu apu, bo ledo ntoto nirasaina duana.

⁶ Nisarumaka ntupu ngata haitu bara mebangga pale i Paulus, bara sampesanika ia madungga bo mamate. Tapi nasaemo nipopeara, ledo nakuya-kuya i Paulus. Nanggita haitu pekirira nabali, bo nisarumakara i Paulus haitu *viatamo.

⁷ Ledo nakavao lako ri sia, naria tana i Publius. Ia gubernur levuto Malta. Nitarimana ante damba rara kami bo talu-mbongi kasaena kami nonturo ri banuana.

⁸ Tempo haitu, tuama i Publius kambale-mbale naturu apa nakokora bo nabunjoro. Jadi i Paulus hau nesua nte ia, nombadika palena ri karo ntotua bo nosambaya. Naliu haitu nabelomo totua.

⁹ Nangepepa kajadia haitu, pura-pura tona nadua ri levuto haitu nakava nte i Paulus, bo nipakabelona ira muni.

¹⁰ Nadea hadia nidekeira ka kami, tandana pobilara kami. Bo bara sakuya kasaena naliutaka haitu tempo kami manggalivo malaimo, pura-pura anu niparaluu riara polipa kami, nikenira hau ri kapala nipesavi kami.

¹¹ Talu-mbula kasaena kami nonturo ri levuto Malta, pade nesavi kapala mompapola polipa kami hau ri ngata Roma. Kapala nipesavi kami nakava lako ri ngata Aleksandria bo nesampo ri levuto Malta nompopea maupu tempo mpoiri. Kapala haitu nosanga "Viata Narapi".

¹² Nolipamo kapala kami sampe nakava ri ngata Sirakusa, bo naturu ri sia talu-mbongi kasaena.

¹³ Lako ri sia kapala kami nomparinjoso ri talinti sampe nakava ri ngata Regium. Kamailena nompamulamo poiri neburu lako ri puluna, bo eo karanduana nakavamo kami ri pesampo Putioli ri propinsi Italia, bo nanaumo kami.

¹⁴ Ri sia kami nosintomu ante bara sako-ndua sampesuvu sampomparasaya, bo nikenira kami hau monturo ante ira pitu-mbongi kasaena. Naupu haitu, napolamo kami hau ri ngata Roma.

¹⁵ Sampesuvu-sampesuvu sampomparasaya ri ngata Roma nangepe kareba naparamo kami, nakavamo ira mombatomunaka kami ri ngata Potomu Apius bo ri ngata Banua Tatalu. Nosinggavapa kami ante ira, i Paulus nanguli tarima kasi ka Alatala, bo narosomo rarana.

¹⁶ Nakavapa kami ri ngata Roma, nidekeimo loga ka i Paulus monturo ri banua mboto ante tantara saito anu mombajagai ia ri sia.

¹⁷ Nagana talu-mbongi ri sia, i Paulus nompokio *toYahudi anu naria nturona ri sia. Nasiromupa ira, nangulimo i Paulus, "Sampesuvu-sampesuvuku! Yaku ledo novia sala nuapa-nuapa ka sampesuvuta toYahudi bo ledo muni niliunakaku ada nitarimata lako ri totuata nggaulu. Tapi nau ivesia, yaku nisaka ri ngata Yerusalem bo nidekei ka pomarenta Magau Mbaso Roma.

¹⁸ Naupu parakaraku niparesara, ira nadota mombakabasaka yaku, sabana natantumo ledo ria salaku masipato rahuku mate ka yaku.

¹⁹ Tapi naria sanu toYahudi kana nangeva yaku, ledo nipokonora rakabasaka yaku. Ledo ria dala ntanina, jadi yaku nekitangara ri ngayo Magau Mbaso ri ngata Roma. Naupa ivesia, ledo ria pangaduaku nuapa-nuapa ka sampesuvuku toYahudi.

²⁰ Jadi haitu sampe yaku nerapi mosintomu ante komiu. Yaku madota mombatesa ka komiu parakaraku hitu. Kakanana yaku hii nibalanggu sabana yaku nomparasaya Magau Topepakasalama anu nitongorakata *ntoIsrael pura-pura."

²¹ Nangepe tesa i Paulus, nesanamo toYahudi, "Ledo ria nitarima kami sura lako ri bagia Yudea nombatesa iko. Bo dopa muni naria tona lako rumai nakava nanggeni kareba bara nanguli naria anu nadaa nipoviamu.

²² Tapi kami madota mangepe komiu motesa anu niparasayamiu, sabana nisani kami, ri umba-umba nisalai ntona pepatuduki nioseakamiu tutu."

²³ Jadi nipakatantura eo rakasiromura ante i Paulus. Nanggavapa eo niovora, nadea tona nakava nasiromu ri banua i Paulus. Lako ri mpadondona sampe nggoviana i Paulus nombatesa Poparenta nu Alatala ka ira bo nombatentei pepatuduki i Yesus. Nibacana lako ri Buku Atura Agama nitulisi Nabi Musa bo Buku Nabi-nabi ntanina, ala rasanira tesana nakana bo raparasayara i Yesus mpuu-mpuu Magau Topepakasalama.

²⁴ Naria tona nomparasaya anu niuli i Paulus, tapi naria muni ledo nomparasaya.

²⁵ Kaupuna, nipalaisiramo ponturo haitu apa da nosisalapa panggavara ante pepatuduki i Paulus. Tapi dopame ira nalai, i Paulus nanguli ka ira, "Nakana ntoto Tesa Nosa Gasa nu Alatala anu nipasimbayu Nabi Yesaya ka totuata nggaulu ivei:

²⁶ Alatala nanguli, 'Koi uli ka todea toYahudi ivei: Komiu masaro mangepe, tapi ledo rasanimiu batuana. Komiu masaro manggita, tapi ledo rasanimiu anu najadi.

²⁷ Haitu majadi sabana tona gahaitu nakaa bagara, bo ira aga netibongomo, bo matara nipiriramo. Ane ledo nipoviara ivehaitu, rakita nu matara anu najadi, bo raepe ntalingara bo rasanira batuana, bo rapahara anu nakana bo manjili nte Yaku ala Kupakabelo ira.'"

²⁸ Kaupuna i Paulus nanguli, "Sampesuvu-sampesuvuku. Kareba Belo nanguli berimba Alatala mompakasalama manusia. Jadi nau ledo ratarimamiu, kana rasanimiu, Kareba Belo haitu nipatolelemo ka tona ledo toYahudi bo iramo mangoseakana."

²⁹ [Naupu i Paulus nanguli tesa-tesa haitu, toYahudi nompalaisi banua haitu nosinjanai-naimo.]

³⁰ Rompae kasaena i Paulus nonturo ri ngata Roma ri banua nisioana mboto. Nadea tona nakava nosinggava nte ia bo nadamba rarana nantarima ira pura-pura.

³¹ Ledo nakaja rarana nompopaisani ka ira kareba Poparenta nu Alatala bo nipatudukina muni ka ira kareba i Pue Yesus Kristus. Pura-pura anu nipoviana haitu ledo naria tona nombatagi ia.

Kisah Para Rasul

Video Kisah Para Rasul 28

Ikuti Kami:

KONTAK | PARTISIPASI | DONASI