Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Baru lah salamaik kami mandarek, baru lah kami tawu, baraso pulau tu banamo Malta.

² Panduduak di pulau tu sangaik ramahnyo kabake kami. Kasadonyo manyambuik kami sacaro elok, inyo ma iduikkan api untuak kami, dek karano udaro dingin, ujan pun lah muloi pulo turun.

³ Si Paulus mangampuangkan kayu, sudah tu inyo latakkan di ateh api. Samantaro inyo manonggokkan kayu tu, mako kaluwalah ula sikua dari onggok kayu tu, dek karano angeknyo api, ula tu malilik ka tangan si Paulus.

⁴ Kutiko panduduak pulau tu, manampak ula tu mambalik di tangan si Paulus, mako inyo bi mangecek sasamo inyo, "Mungkin urang ko adolah urang pambunuah, biya pun inyo lah lapeh dari bahayo lauik, tapi, Dewi Ka adielan indak mampadiyakan inyo iduik."

⁵ Mako dikalatiakkan si Paulus lah ula tu masuak api, nan inyo indak saketek juwo doh maraso sakik.

⁶ Urang-urang tu bi manyangko, tantu sabanta lai tangan si Paulus ka sambok, kok indak, sacaro indak disangko-sangko inyo ka tagolek, sudah tu mati. Tapi, sasudah mananti babarapo lamo, indak ado doh sasuatu nan luwa biaso nan tajadi di dirinyo, sudah tu, lain pulo lai pandapek urang-urang tu, inyo bi mangatokan baraso si Paulus ko, adolah dewa.

⁷ Indak jauah dari tampaik tu, ado tanah miliak si Publius, panjabaik tinggi di pulau tu. Sacaro jo baiak ati inyo manyambuik kami sabagai tamunyo salamo tigo ari.

⁸ Dikutiko itu apaknyo sadang sakik, dapek damam sarato jo mancirikkan darah. Si Paulus payi maliyek urang gaek nan sakik tu, inyo badowa sambia malatakkan tangannyo ka badan gaek tu, mako cegaklah gaek tu.

⁹ Dek karano di kajadian tu, mako kasadonyo urang nan sakik di pulau tu bi tibo kabake si Paulus, mako bi cegaklah panyakiknyo.

¹⁰ Urang-urang tu sambuah bi ma agiahkan adiyah untuak kami, kutiko kami nak ka balayie, inyo mambawok kasadonyo apo nan ka kami paralukan di ateh kapa, salamo dipajalanan.

¹¹ Sasudah tigo bulan kami disinan, kami barangkek dari pulau tu, nayiak sabuwah kapa nan dari Aleksandria, nan salamo musin dingin inyo balabuah di pulau tu. Kapa tu mamakai lambang "Dewa Kamba Kastor jo Poluks".

¹² Kami balabuah di kota Sirakusa, kami balabuah disinan salamo tigo ari.

¹³ Dari sinan kami balayie baliak manyisi pantai, mako sampailah kami di kota Regium. Bisuak arinyo angin muloi barambuih dari salatan, sainggo dalam duwo ari, kami lah tibo di kota Putioli.

¹⁴ Disinan kami basuwo jo babarapo urang, nan lah ba iman kapado Isa Almasih, dek karano undangannyo kami tingga jo inyo salamo sapakan. Sudah tu kami barangkek ka Roma.

¹⁵ Sudaro-sudaro nan di Roma, nan lah ba iman kapado Isa Almasih, mandanga kaba tantang diri kami, sainggo inyo bi tibo ka Pasa Apius jo ka Pasanggrahan Tigo, untuak manyambuik kami. Baru si Paulus lah basuwo jo urang-urang tu, inyo batarimo kasih kapado Allah, atinyo pun manjadi tabah.

¹⁶ Baru lah tibo di Roma, si Paulus dipabuliahkan tingga surangnyo, tapi dijago dek surang parajurik.

¹⁷ Sasudah tigo ari, si Paulus ma imbau tungganai-tungganai urang Yahudi nan ado di tampaik tu. Baru tungganai-tungganai tu lah bi bakumpua, mako bakatolah si Paulus kabake inyo, "Oih angku-angku! Indak ado doh kasalahan ambo taradok banso kito, atau pun malangga adaik kabiasoan, nan lah kito tarimo dari niniak muyang kito. Tapi, biyapun baitu, nan ambo ditangkok juwo di Yerusalem, sudah tu disarahkan kabake urang-urang Roma.

¹⁸ Sasudah parkaro ambo dipareso, mako urang-urang Roma tu nak ka malapehkan ambo, dek karano, indak ciyek juwo doh kasalahan ambo nan tabukti, nan patuik ambo di ukun jo ukunan mati.

¹⁹ Tapi, dek karano urang-urang Yahudi bi manantang kaputusan tu, mako tapasolah ambo manuntuik, supayo parkaro ambo disidangkan dipangadielan Kaisar Roma. Ambo tuntuik nan bakcando itu, indak dek karano ado, nan ka ambo kadukan tantang banso ambo sandiri doh.

²⁰ Itulah sababnyo, mangko ambo mintak basuwo jo angku-angku untuak mangecek-ngecek; dek karano di Rajo Panyalamaik nan di arok-arokkan dek banso Israellah, mangkonyo ambo di pilanggu."

²¹ Mako bakatolah urang-urang tu kabake si Paulus, "Alun ciyek juwo lai kami manarimo surek tantang diri angku, dari Yudea. Indak surang juwo doh sudaro nan dari sinan, nan mambawok kaba tantang diri angku, atau mangatokan nan buruak tantang diri angku.

²² Tapi kami niyo pulo, nak mandangakan tantang kaparcayaan angku, dek karano kami kasadonyo lah mandanga, baraso urang bi mancacek-i pangajaran nan angku picayoi tu."

²³ Mako si Paulus jo urang-urang tu, manantukan suatu ari untuak batamu baliak. Di ari tu sambuah urang bi tibo ka tampaik tingga si Paulus. Dari pagi sampai sanjo si Paulus manarangkan, sarato jo mambaritokan kabake urang-urang tu, barito tantang baa caronyo Allah mamarentah sabagai Rajo. Jo sacaro mamakai ayaik-ayaik dari Kitab Nabi Musa, sarato jo dari Kitab Nabi-nabi, si Paulus ba usawo supayo urang-urang tu buliah picayo kapado Isa Almasih.

²⁴ Ado nan picayo kabake apo nan dikatokan dek si Paulus, tapi ado pulo nan indak.

²⁵ Sasudah si Paulus mangatokan nubuat Nabi Yesaya kabake urang-urang tu, mako jo pandirian nan balawan-lawanan, inyo bi barangkek dari tampaik tu, si Paulus mangatokan, "Iyo tapek bana apo nan lah dikatokan dek Roh Allah, malalui Nabi Yesaya kabake niniak muyang angku-angku!

²⁶ Allah mangatokan, 'Payilah katokan kabake banso ko: Kalian layi taruih juwo ka mandanga, tapi kalian indak ka mangarati; kalian layi taruih juwo ka mamparatikan tapi kalian indak tawu, apo nan tajadi.

²⁷ Dek karano pikieran banso ko lah mada, talingonyo lah pakak, matonyo lah piciang. Tajadi nan bakcando itu, supayo matonyo jan maliyek, talingonyo jan mandanga, pikierannyo jan mangarati, supayo inyo jan babaliak kabake-Den, sainggo inyo Den cegakkan.'"

²⁸ Akienyo si Paulus bakato, "Angku-angku musti tawu andaknyo, baraso kaba tantang kasalamatan nan dari Allah, kiniko lah dibaritokan kabake banso-banso nan lain, banso nan indak urang Yahudi. Urang-urang tu ka ma ikuik-inyo!"

²⁹ [Sasudah si Paulus bakato nan bakcando itu, mako urang-urang Yahudi tu bi barangkek dari tampaik tu, sambia batangka sasamo inyo.]

³⁰ Duwo tawun lamonyo si Paulus tingga di Roma, di rumah nan disewonyo sandiri. Inyo suko manarimo sadonyo urang, nan tibo manamuinyo.

³¹ Sacaro jo barani, inyo mambaritokan kabake urang-urang tu, tantang baa caronyo Allah mamarentah sabagai Rajo, sarato tantang Tuhan Isa Almasih. Si Paulus laluaso mangarajokan nan bakcando itu, indak ado doh di ambek-ambek.

Kisah Para Rasul

Video Kisah Para Rasul 28

Ikuti Kami:

KONTAK | PARTISIPASI | DONASI