Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sesampun selamet dateng lẽq darat, baruq tiang pade taoq bahwe pulao nike aranne Malta.

² Penduduk pulao nike gerasaq gati lẽq tiang pade. Ie pade sambut tiang pade selapuq secare bagus dait nyalaqang api jari tiang pade sẽngaq sampun mulai turun ujan dait hawene telih.

³ Paulus ngumpulang kayuq-kayuq, dait noloq kayuq-kayuq nike lẽq atas api. Sopoq ulah sugul lantaran panasne api nike, terus catok imene.

⁴ Sewaktu penduduk pulao nike serioq ulah nike begantung lẽq ime Paulus, ie pade bebase sopoq kance saq lainne, "Dengan niki pasti sampun nyematẽq dengan, sẽngaq timaq ie sampun selamet lẽman bahaye lẽq segare, Dẽwi Keadilan ndẽq ngalurang ie idup."

⁵ Laguq Paulus kerapang ulah nike ojok dalem api, dait sekediq juaq ndẽqne beridap sakit.

⁶ Pikir ie pade karing seberaq ime Paulus gen baq atao selung-selung ie gen rebaq dait ninggal. Laguq sesampun ngantih ngonẽqan malik, dait ndẽq araq napi-napi saq nimpe Paulus, ie pade berobah pikiran, terus bebase bahwe Paulus nike dẽwe.

⁷ Ndẽq jaoq lẽman taoq nike araq tanaq dowẽne Publius, penguase pulao nike. Tiang pade tesambut secare bagus jari temuẽne sengonẽq telu jelo.

⁸ Lẽq waktu nike bapaqne kenyeke sakit, teserang telih panas dait dẽsentri. Paulus lumbar serioq bapaq saq sakit nike terus bedo'e dait noloq imene lẽq atasne, sehingge ie selah.

⁹ Keranaq peristiwe nike selapuq dengan saq sakit lẽq pulao nike dateng ojok Paulus, dait ie pade teselahang.

¹⁰ Ie pade bẽng tiang luwẽq hadiah, dait sewaktu tiang pade gen belayar, ie pade ngatongang ojok kapal selapuq saq tiang pade perluang lẽq kelampan tiang pade.

¹¹ Sesampun telu bulan lẽq derike, tiang pade berangkat lẽman pulao nike taẽk sopoq kapal lẽman Aleksandria saq belabuh lẽq derike sengonẽq musim telih. Kapal nike kadu simbul "Dẽwe Kembar".

¹² Tiang pade belabuh lẽq kote Sirakusa dait ndot lẽq derike telu jelo.

¹³ Lẽman derike tiang pade belayar malik durus pesisi jangke dateng lẽq kote Regium. Jemaqne angin mulai dateng lẽman lauq, sehingge dalem due jelo tiang pade dateng lẽq kote Putioli.

¹⁴ Lẽq derike tiang pade bedait kance pire dengan saq percaye lẽq Deside Isa, dait lantaran undangan ie pade tiang pade ndot kance ie pade pituq jelo ngonẽqne. Beterus tiang pade berangkat ojok Roma.

¹⁵ Semeton-semeton lẽq Roma saq percaye lẽq Deside Isa pade dengah kabar mengenai tiang pade, sehingge ie pade lumbar jangke dateng Peken Apius dait Tres Taberne jari nyambut tiang pade. Waktu Paulus bedait kance ie pade, ie ngucapang syukur lẽq Allah dait teteguqang atẽne.

¹⁶ Sesampun dateng lẽq Roma, Paulus teijinang ndot mẽsaq dait tekawal siq sopoq prajurit.

¹⁷ Sesampun telu jelo, Paulus pesilaq tokoh-tokoh dengan Yahudi lẽq derike. Dait sesampun ie pade bekumpul, Paulus bebase lẽq ie pade, "Semeton-semeton! Tiang ndẽq salaq napi-napi lẽq bangsente, atao ngelanggar adat istiadat saq ite terimaq lẽman leluhurte. Timaq maraq nike tiang tebau lẽq Yerusalem dait teserahang ojok dengan-dengan Roma.

¹⁸ Sesampun pelekare tiang teperiksaq, ie pade mẽlẽ bẽbasang tiang, sẽngaq ternyate tiang ndẽq piaq sopoq kesalaqan saq patut tehukum siq hukuman matẽ.

¹⁹ Laguq lantaran tetentang siq dengan-dengan Yahudi, tiang terpakse nuntut pelekare tiang teadilin lẽq pengadilan Kaisar Roma. Tiang laksaneang nike ndẽqne lantaran tiang bedowẽ sopoq tuntutan tipaq bangse tiang mẽsaq.

²⁰ Keranaq nike tiang tunas bedait kance side pade, jari ngeraos kance side pade. Tiang teborgol cume lantaran tiang percaye lẽq pengharepan saq tetu-tetu tepercaye siq dengan-dengan Israel."

²¹ Terus ie pade bebase lẽq Paulus, "Tiang pade ndẽqman nerimaq surat lẽman Yudea mengenai side. Dait ndẽq araq sopoq semeton juaq lẽman derike saq dateng jauq kabar mengenai side atao nuturang saq lengẽ mengenai side.

²² Laguq tiang pade melẽt ẽndah dengah mengenai pendapet side, sẽngaq tiang pade selapuq sampun dengah dengan-dengan ngewade pengajahan saq side percaye nike."

²³ Beterus ie pade nentuang sopoq jelo jari bedait kance Paulus. Lẽq jelo nike luwẽq dengan dateng ojok taoqne Paulus ndot. Lẽman kelẽmaq jangke bian Paulus jelasang dait ngebẽng kesaksian tipaq ie pade mengenai Kerajaan Allah. Kadu ayat-ayat lẽman Kitab Nabi Musa kance Kitab Nabi-nabi, Paulus berusahe miaq ie pade percaye mengenai Deside Isa.

²⁴ Araq saq percaye lẽq napi saq tesampẽang Paulus, laguq araq ẽndah saq ndẽq percaye.

²⁵ Siq pendapet saq bẽde-bẽde ie pade bilin taoq nike. Paulus masih bebase, "Mule kenaq napi saq temanikang siq Roh Suci langan Nabi Yesaya tipaq leluhurte:

²⁶ 'Pade lumbar sampẽang ojok bangse niki: Side gen tetep dengah, laguq ndẽq ngerti; side gen tetep merhatiang laguq ndẽq taoq napi saq telaksane.

²⁷ Sẽngaq pikiran dengan-dengan nike sampun kongol, kentok ie pade sampun kedok dait penenteng ie pade sampun tepedemang. Hal niki telaksane adẽq penenteng ie pade ndaq nyerioq, kentok ie pade ndaq dedengah, pikiran ie pade ndaq ngerti, terus bebalik, sehingge Tiang, nyelahang ie pade.'"

²⁸ Ahirne Paulus bebase, "Semeton-semeton harus nenaoq bahwe kabar mengenai keselametan saq lẽman Allah mangkin sampun tesampẽang tipaq bangse-bangse lain dait ie pade gen dengah hal nike!"

²⁹ [Sesampun Paulus bebase maraq nike, dengan-dengan Yahudi nike bilin taoq nike sambil betungkasan sopoq kance saq lainne.]

³⁰ Due taun ngonẽqne Paulus ndot lẽq Roma, lẽq balẽ saq ie sẽwe mẽsaq. Paulus seneng nerimaq selapuq dengan saq dateng jangoq ie.

³¹ Dait bani ie nyampẽang tipaq ie pade mengenai Kerajaan Allah, dait mengenai Junjungan Saq Mulie Deside Isa Almasih. Paulus bẽbas ngelaksaneang nike ndẽq araq saq halangin ie.

Kisah Para Rasul

Video Kisah Para Rasul 28

Ikuti Kami:

KONTAK | PARTISIPASI | DONASI