Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob das hanami hu darat, ibogei hanami ma Malta do goran ni pulou ai.
2 Basar tumang do parpulou ai bannami. Halani roh udan anjaha borgoh homa ari, ipagara sidea ma apuy banggal anjaha isuruh hanami hundul maringgot.
3 Jadi sanggah na patumpuhon ranting-ranting si Paulus, laho mannahkon ai hubagas apuy, luar ma hunjai sada ulog darih halani milasni, lanjar ipagut ma tanganni.
4 Mangidah ulog ai gantung-gantung bani tangan ni si Paulus, nini parpulou ai ma samah sidea, “Tontu pamunuh do halak on. Ai age pe maluah ia hun laut in, seng ipalopas sipambalas in ia manggoluh.”
5 Tapi ipirpirhon ma ulog ai hubagas apuy, anjaha seng pala mahua ia.
6 Tapi anggo sidea iagan do maningon butong ma ia barang mintor matei jurgang, anjaha dob dokah ipaima sidea, tapi seng mahua ia ididah, mubah ma pingkiran ni sidea, gabe ihatahon ma, naibata do ia.
7 Lang daoh humbani ianan ai, adong do kobun ni kopala ni pulou ai, na margoran si Publius. Dear do panjaloni bannami, anjaha itamuei do hanami tolu ari dokahni.
8 Bani panorang ai tibal-tibal do bapa ni si Publius, pane-paneon anjaha disentrion. Jadi masuk ma si Paulus marayaksi, anjaha sanggah martonggo, itampeihon ma tanganni hu bani, gabe malum ma.
9 Dob sonai, roh ma na boritan na legan i pulou ai, jadi malum bei ma.
10 Gabe sangap tumang ma hanami ibahen sidea, anjaha sanggah na misir hanami marlayar, ipasirsir sidea do na porlu bennami.
11 Jadi dob salpu tolu bulan, bingkat ma hanami marlayar bani sada kapal Aleksandria, na martanda Silinduat, na dob pasalpuhon musim borgoh i pulou ai.
12 Das ma hanami hu Sirakusa, anjaha marsaran ma ijai tolu ari dokahni.
13 Hunjai manopi-nopi pasir ma hanami, anjaha das ma i Regium. Patarni marombus ma logou dangsina, gabe das ma hanami ari paduahon i Putioli.
14 Ijai pajumpah ma hanami pakon sanina-sanina, anjaha iontang do hanami rap pakon sidea pitu ari dokahni. Dob sonai, bingkat ma hanami hu huta Rom.
15 Dob ibogei sanina-sanina na ijai ai pasal hanami, roh ma sidea mangalo-alo hanami hu Appiiporum ampa Tres Taberne. Mangidah sidea ai, mangkatahon tarima kasih ma si Paulus bani Naibata, anjaha lambin tenger ma uhurni.
16 Anjaha dob das hanami hu huta Rom ilopas do si Paulus, marianan sandirian rap pakon sada tentera na manjagaisi.
17 Dob salpu tolu ari, idilo si Paulus ma kopala-kopala ni halak Jahudi, anjaha dob roh sidea, nini ma hubani sidea, “Ia ahu, nasiam hasoman, seng dong hubahen barang aha bani bangsanta barang bani adat ni ompungta, hape isangkut do ahu i Jerusalem anjaha iondoskon bani halak Rom.
18 Dob ipareksa sidea ahu, sihol paluahon ni sidea do ahu, halani seng dong jumpah salahku, na mambahen marutang hosah ahu.
19 Tapi halani sai manlawan do halak Jahudi ai, gabe tarpaksa ma ahu mangindo apel bani Kesar, sedo halani adong siaduhononku dompak bangsanta.
20 In do halani, ase hudilo nasiam, ase huidah anjaha huparsahapkon, ai halani pangarapan ni bangsa Israel do mambahen na hona gari ahu.”
21 Jadi nini sidea ma dompaksi, “Seng dong ijalo hanami surat ni sidea pasal ham, anjaha hasoman na roh hunjai pe, seng dong patugahkon atap aha pe na jahat pasal ham.
22 Tapi sihol do bogeionnami pingkiranmu, halani ibotoh hanami ia sekte in jumpahan parlawanan do atap ija-ija pe.”
23 Ase dob itontuhon sidea arini rap pakonsi, roh ma sidea buei marayaksi hubani iananni ai. Jadi ipatorang anjaha isaksihon ma bani sidea humbani sogod das hubani bodari pasal Harajaon ni Naibata, anjaha ilajou ma mambahen marhatongon sidea pasal Jesus maronjolan bani titah ni si Musa ampa nabi-nabi.
24 Deba porsaya do marhitei na hinatahonni ai, tapi na deba lang porsaya.
25 Jadi marsalisih ma sidea samah sidea, gabe laho bei ma, dob lobei ihatahon si Paulus bani sidea, “Sintong ma na hinatahon ni Tonduy Na Pansing marhitei Nabi Jesayas bani ompung nasiam,
26 ai nini do, ʻLaho ma ho bani bangsa in, anjaha hatahon, sai na bogeionmu do in, tapi lang arusanmu, anjaha sai na idahonmu do in, tapi lang tandaonmu.
27 Ai domma mapir uhur ni bangsa on, anjaha pinggol ni sidea borat marbinogei; mata ni sidea itutup sidea, ase ulang marpangidah mata ni sidea, ulang marpanangar pinggolni, ulang mangarusi uhurni anjaha mulak sidea Bangku, gabe Hupamalum sidea.ʼ
28 Botoh nasiam ma, domma itongos Naibata haluahon on bani halak sipajuh begu-begu, anjaha tangihonon ni sidea do in.
29 Ase dob ihatahon ai laho ma Jahudi ai hunjai; buei do parsualan ni sidea samah sidea.
30 Dua tahun do si Paulus marianan bani rumah sewaanni ai, ijalo do sagala na roh hu bani.
31 Marhinsah ni uhur do ia mangambilankon Harajaon ni Naibata, ampa mangajarhon pasal Tuhan Jesus Kristus, anjaha seng dong na mangambat.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA