Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sug emen emaugwan emedebeij lonog dara emen emina agauwohob, kaba, lugun sungga len len dou emen endag lomos gin moho Malta.

² Hanoba len lebin emen toua, anai len merdoc eineg an emen namcir. Dangga sug los ebiji, kaba, len lec smougb medam naugb lebin emen toua. Anai dugurij toua eba emen namcirohob.

³ Sug len lec smougb debohob, kaba, Paulus en toua ousa len naugb en oho sugwa deisa smougb. Doba sug en odo naugb ec se smougb ineg, kaba, hinogo agunya dau sugwa marani. Hanoba au en mesira behinena icira namcir, anai smougb esij enohob

⁴ Sug lugun len leiya, doba hinogo ehinena icira Paulus mesira dag gin, kaba, len lenara doum, lendagai: Sud hom gin, kaba, surer namcir. Dangga maman seij, moho danehsud, os en mebes dagasa dum mohu. Doba en mena agau dauwunohob. Hang iteitogin, kaba, en emdos en mebes dagasa hinogo emau en deit gini. Anai maman seij gin, kaba, emouwan naugb en maires emeb deitero. Doba en maga ocron en bomom dous.

⁵ Dangga len lauweila en toutou terimda. Anai len loudesa dag cum, kaba, en erisa, hanoba en eijeboho bomom dangga. Doba Paulus mos emecinaga dag emerij touwero, kaba, en etir mesira an hinogo ingga se smougb namcir.

⁶ Dangga sug len leiya, doba en mesira emerisa dara en emomom touwero, kaba, len leperwei len merdoc mes. Hanoba len leigdoumesa en moho doum, lendagai: Sud hom gin, kaba, en edag adeh goho seijohob.

⁷ Doba sug leng Malta meren mougt mera medam, moho Publius, en toua ouman dag ij obrugb an emen dag ginohob, kaba, en ebin emen dara medoc eigouhw naugb emen emeigtou desij en sungga se lona homoi. Anai men sesa dara men tu eb deinyor us gedig emen emdos gin touohob.

⁸ Doba sug emen emeigtou desij Publius gin, kaba, en mena areba dag en mos esrougb dara en ejiseresa toua. Dangga sug Paulus einesa dimei aud enohob, kaba, en ob mesira se en mougt. Hanoba en ocuncum dou Allah an en toua. Sug en ocuncum an en inegohob, kaba, men gareba augwan obsara dau en namcir.

⁹ Dangga leng areber gus sug len louman dau aremer gin, kaba, len toua len len aud Paulus. Hanoba en eic geigouhw dou len laugwan toua.

¹⁰ Hang len lemeic aremougb einyana dag mogud dou emen. Dara edebeij lona sug emen emeihwededau len, kaba, len leic ara ara dou emen se ing mes naugb sug emen emet asa ucina toua.

¹¹ Dangga sug emen emeigtou desij leng se Lomos Malta ingga se igda homoiyohob, kaba, emen emeisa leng Aleksandria meren ij hom deit. Anai se igda goho dugurij gin, kaba, len ledeic meren ij se lomos Malta gin debohob. Ij gin, kaba, len leg Kasdor dara Poluks, lan marucbobaga se mebes toua. Hang len lemeija ij gin en moho toua dag seingmebec.

¹² Sug emen emeihwededau sunggohob, kaba, emen emdebeij beimes Sirakusa. Hanoba emen emdeigtou sungga se lona homoi toua.

¹³ Dau sungga, kaba, emen emeisa ij terimda emen emedebeij cinogo hom se lonog, moho Regium. Se loneinda deit, kaba, emen emeisa ij dau sungga aud beimes moho, Putioli, deit. Anai loungmen ebiji naugb eisa dau dum merohob. Dangga sug emen emaimo loungmen gin se lona hwaiyohob, kaba, emen emedebeij cinogo ingga toua.

¹⁴ Doba se cinogo ingga, kaba, merug hosa dau leng merdoc ebdebin an Yesusohob len toua merugwengga. Dangga sug emen emagasa lenohob, kaba, len lebin emen naugb emen ematou desij len se ari hom deb sungga. Hang emen emedebeij se cinogo Roma gin touohob.

¹⁵ Sug emen ematou desij leng merdoc ebdebin an Yesus se Putioli se ari homohob, kaba, emen emec emohora dau sungga dig Romeda. Doba sug emen emaguner dara emdamouwer se Krisdus len louman emen emin, kaba, len len dau Roma naugb ledagasa emen toua. Dangga ligbum, kaba, len lekirsa naugb ledagasa emen se Apius men usi sug lusud lohwaresa. Doba lingma, kaba, lemeigtou se usi, moho Tu Mebec Homoi, naugb emen sungga toua. Sug emen emagasa lenohob, kaba, Paulus mena eisa mecdemaga namcir. Hanoba en en sijo dou Allah an len toua.

¹⁶ Sug emen emdebeij se Romohob, kaba, leng Roma meren mougtir len lemouf Paulus se tu gesisugero. Doba len lebin en naugb en atou se tu hom dou eninahabi, len lemohw sadodor hom naugb en emesedougwo en dous.

¹⁷ Sug Paulus eigtou debin en mog se lona homoiyohob, kaba, en eija leng Yahudi meren mougtir naugb len loucimdeb dara en se men tu ingga. Dangga sug len laugwan lacinimohob, kaba, en ens dau men aremer geisaugb enin meijouhw augwan asesa dou len toua, hanoba en enara dou len, endagai: Dan indagunerij, dau mamang Israel, dan demeicara demaihagab mamang gaben. Dara dan demedreg maman mamjemouwer meren gomnomna gedig len lomnomnan dou mamanohob augwan mougwa hom touebma. Doba dan deicara daimo augwan gini dag misenohob. Doba maman mougtir se Yerusalem, kaba, len lagaigeij dan augwougb. Hanoba len lohw dan se leng Roma merisira naugb len logod gomom deinaugb dan toua.

¹⁸ Doba sug leng Roma meren mougtir len leijidougwo dan an ara ara ginohob, kaba, len lemesma aremer hom ingma naugb sug len leic gomom dou dan touwero. Hang len louwan larges dan dous.

¹⁹ Doba leng Yahudi meren mougtir, kaba, len lenara laugbtarera dougwo leng Roma merir dag len lemamsoho dan deb touwero. Doba len leic gomom dou dan namcir. Hang emederougb dan naugb dan demacgeij dau leng Roma gini, dauntoba len lemogod indan aremer gin deitero. Doba len lesa dan aud meren mougt mera medam se Roma ginahabi, enin eng emogod aremer naugb dan dous. Dangga hang, dan demen sugini naugb dan demoho demas leng Yahudi graga deseino mougt mera medam ginero. Doba dan den sugini naugb dan dens dau areg maman mougtir loho las dan an deseino leng Roma se Yudeohob men meijouhw augwan asesa dou en dous.

²⁰ Hanoba dan dacgeij yen naugb yen yen sugini, dauntoba dan dens sud hom, moho Yesus, gini meijouhw augwan asesa dou yen toua. Anai enin eng sud hom gedig mamang Israel maman maod mamina debsa Allah anohob naugb sug en esa en dou maman. Dauntoba en eigdoc maman dau sesar men gogom aud maireseb menau geb huhugb gin toua. Hang lusud lahud dan insira dara lanta emeigdoc dan insira icira gin touohob.

²¹ Sug leng Yahudi meren mougtir len louman gin, kaba, len launi ucugb dou Paulus, lendagai: Leng Yudea, kaba, len lemog surad hom dou emen, dara leng dau sungga, kaba, lingma lemdecic dau aban aremer, dara lemesmesman ban dou emen touebma.

²² Doba eisaugb sud hom, moho Yesus, men ucina menau gin, kaba, emen emouman dag lusud sungga sungga lesbes an gin namcir. Hang emen emacgeij, dauntoba ban becic dau areg geb se ban abdoc mes eisaugb gini meijouhw augwan asesa dou emenahabi. Anai emen emecinaga dag ban toua baimo ucina ginohob.

²³ Dangga sug len louci lona hom naugb ginohob, kaba, leng Yahudi leinyana gougwa len loucimdeb se tu sug Paulus eigtou se graga deit. Dauntoba en ens meijouhw eisaugb Yesus augwan asesa dou len toua. Hang dau lonamen terimda edebeij losog, kaba, en ens dou len dag Allah men lona naugb sug en oiharaga lusud ucugb, kaba, edagasohob. Hanoba en edidib meijouhw eisaugb gin augwan asesa dou len toua. Dara en eic mouwemougb esesa naugb en eic medagas dau Musa men gomnomna, dara areg leng lesai Allah moro nosa, len log deb eisaugb Yesus bagodro ucan dou len toua. Dauntoba len lemoududa Yesus ginero. Doba len lobsara aud en dag eni Sud Hom Gedig En Eigdoc Len Dau Meren Gogom Augwan touohob.

²⁴ Sug Paulus ens meijouhw dau augwan dag graga dou lenohob, kaba, len leisa lesa naugb leihwededau tu ingga. Hanoba len lenara merir eisaugwim icira gin toua namcir. Anai lingma, kaba, len merdoc eica Paulus mer an ginohob. Doba ligbum, kaba, len merdoc emeica en mer an gin touwero.

²⁵ Sug Paulus eiya, doba ligbum, len merdoc emeica en mer an dag ginero, kaba, en enara debin len, endagai: Meijen geicara gin, kaba, esogwa deisa areg Allah esa mer dou Yesaya ogdoc Mena Gogoufu naugb en enara dou maman mamjemouwer sug nosa touohob. Anai en, kaba, eni sud hom gedig en esai Allah en moro sug nosohob.

²⁶ Anai Allah enara dou en, endagai: Dan demouwan naugb indan lusud gin, kaba, len lemeiya dau indan geicara. Dara len lemouman dan indir. Hanoba len meru emobgesa, dara len lemeineg aud dan toua deitero.

²⁷ Anai len leic len meru edgom. Dara len loc dou lenin merums dougwo dan indir. Dara len leic lenin meriresmougb dougwo indan geicara augwan namcirohob. Dangga hang, ban bemenara dou len dag dau iteitogini, kaba, len louman dan indir ucucugb terimda. Doba len meru emobgesa deitero. Dara ban ben dou len dag len leiya dau indan geicara augwan. Doba len lemecinaga meijouhw augwan asesa touwero.

²⁸ Sug Paulus enara debin len dag graga dauwohob, kaba, en esulou len debin deit, endagai: Sug yen meigdoc emeica dan indir an ginerohob, kaba, dan denara se misen dou yen namcir dag Allah mer eisaugb maireseb huhugb gin, kaba, dan demesai dou yen deitero. Doba dan desai dou lugmahara dous. Anai len, kaba, len lemoc dou merums dougwo dag yen ginero. Doba len leic dan indir an, hanoba len laimo namcir toua.

²⁹ [Sug Paulus enara debin len dag ginohob, kaba, leng Yahudi graga leihwededau en. Dara len merir eisaugwim icira gin medam toua terimda.]

³⁰ Doba Paulus, kaba, en eigtou se tu hom ingga se arisogomoc hwai. Anai en ohw aregoufu dou lusud gedig meren tu ingga dauwohob. Hang gareg en ouwan naugb edebeij en, kaba, en ebin len toua.

³¹ Hanoba en eic mos naugb en ens dau sug Allah oiharaga lusud ucugb. Dara en esai Mer Geigouhw eisaugb maman Adehsud Yesus Krisdus dou len toua. Dara leng Roma meren mougtir, kaba, len lemen dougwo en an gin touwero. Doba len lamsoho en an gin namcir.

Kisah Para Rasul

Video Kisah Para Rasul 28

Ikuti Kami:

KONTAK | PARTISIPASI | DONASI