Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Imane Agerifa khõ Waulo, "Latehegõ khõu fahuhuo ba wamu'a ba hulumõ." Ifazaw̃a dangania Faulo ba ifa'ema wobelegõnia ya'ia si mane da'e,

² "Razo Agerifa nifosumange! Omuso sibai dõdõgu me tola ufa'ema wamelegõ andre fõna Razo nifosumange sanandrõsa ba wangadu nibe'e niha Yahudi khõgu;

³ mendrua manõ me aboto ba dõdõ Razo hada awõ zõndra dõdõ niha Yahudi. Bõrõ da'õ u'andrõ khõ Razo na tola ebolo dõdõnia wamondrondrongo kataranga soroi ndra'o.

⁴ No la'ila fefu niha Yahudi hewisa wa'aurigu i'otarai wa'awuyuwuyugu. No aboto ba dõdõra wa me i'otarai wa'a'ono matuagu, so ndra'o ba gotalua soigu ba Yeruzalema.

⁵ No ara la'ila ndra'odo. Ba na omasi ira ena'õ, tola labe'e wamaduhu'õ wa i'otarai mbõrõta no Farizai'o ndra'o wolo'õ fefu ngawalõ gamakhoita safõkhõ sibai bakha ba agama khõma.

⁶ Ba iada'e muzizio ndra'odo ba da'e ba wanguhuku bõrõ me faduhu dõdõgu ba wawu'usa li Lowalangi khõ ndra tuama.

⁷ Amabu'ula li andrõ gõi nidõnadõna zi felendrua mado niha Gizera'eli, irege lafosumange Lowalangi bongi ma'õkhõ. Ba bõrõ me faduhu dõdõgu ba wawu'usa li andrõ, Razo nifosumange, wa labe'e mosala ndra'o niha Yahudi.

⁸ Hana wa lõ faduhu dõdõ ndra talifusõ niha Yahudi wa I'orifi niha si no mate Lowalangi?

⁹ Ba mbõrõta no u'era'era wa lõ tola lõ'õ ulau fefu hadia ia ba wolaw̃a Yesu moroi ba Nazareta andrõ.

¹⁰ Ba da'õ gõi zi no ulau ba Yeruzalema. Faoma sura kuaso moroi khõ ndra ere sebua, no ato niha ube'e bakha ba gurunga si lõ farõi khõ Lowalangi. Ba fao gõi dõdõgu wa tebe'e huku famunu khõra.

¹¹ Asese sibai ufakao ira ba nomo'omo wangandrõ, ufaso ira ena'õ larõi zi no lafaduhusi tõdõ andrõ. Aukhu sibai dõdõgu khõra, irege mõi ndra'o ba mbanubanua bõ'õ wolohi ya'ira ba da'õ."

¹² "Da'õ gõi gohitõ dõdõgu wa u'ohe zura kuaso moroi khõ ndra ere sebua we'amõi ba Ndramaseko.

¹³ Ba me ba dalu lala so ndra'o, mato laluo, Samatõrõ Nifosumange, ba u'ila haga moroi ba mbanua si yaw̃a, si tõra hagania moroi ba haga luo. Ba takile haga andrõ ba zi fasuigu awõ ba zi fasui niha si fao khõgu.

¹⁴ Oi alau tou ba danõ ndra'aga fefu. Ba urongo li si hede sanguma'õ khõgu, ba li Heberai'o, 'He Saulo, he Saulo! Hana wa lõ mamalõ õgohigohi Ndra'o? Afõkhõ khõu dania, na lõ aetu õlaw̃a wondrõnia'õ-Nia si no So'aya ya'ugõ!'

¹⁵ Ba umane, 'He So'aya, haniha Ndra'ugõ?' Ba Itema li So'aya, 'Yesu andrõ Ndra'odo nigohigohimõ.

¹⁶ Faoso ozizio! Uforoma'õ Ndra'odo khõu ena'õ tobali ndra'ugõ enoni-Gu. Lõ tola lõ õturiaigõ ba niha bõ'õ hadia zi no õ'ila sanandrõsa khõ-Gu ba hadia niforoma'õ-Gu khõu dania ba ginõtõ si so fõna.

¹⁷ U'efa'õ ndra'ugõ moroi ba soi Gizera'eli ba moroi ba soi bõ'õ si tenga niha Yahudi. Ufatenge ndra'ugõ khõra,

¹⁸ ba wamokai hõrõra, ena'õ laheta ira moroi ba zogõmigõmi ba mõi ira bakha ba haga, ena'õ aefa ira barõ wa'abõlõ Gafõkha, ba ena'õ ifatõrõ ira Lowalangi. Ba wa'afaduhu dõdõra khõ-Gu te'efa'õ horõra ba tobali ira ndrotondroto mbanua Lowalangi si no mufili.'"

¹⁹ "Bõrõ da'õ, Razo Agerifa, u'osindruhugõ wolo'õ fangombakha andrõ nitemagu moroi khõ Lowalangi.

²⁰ Lõ ubini'õ wangombakha ba niha fefu ena'õ lafalalini gera'erara ba larõi horõ awõ wa latou'õ wa'aurira khõ Lowalangi ba la'oroma'õ ba wa'aurira sero ma'õkhõ wa no lafalalini gera'erara ba no larõi horõ. U'ofõnai'õ wangombakha'õ ba Ndramaseko aefa da'õ ba Yeruzalema awõ ba zi sagõrõ tanõ Yudea, ba ba soi bõ'õ si tenga niha Yahudi.

²¹ Ba bõrõ da'õ wa lara'u ndra'o niha Yahudi ba Nomo Zo'aya ba laforege wangalui lala wamunu ya'odo.

²² Ba hiza irugi da'e no itolo ndra'odo Lowalangi, irege tola muzizio ndra'o ba da'e wamuduhu'õ ba niha fefu -- satua ba iraono. Hadia niw̃a'õgu lõ baero zi no lafa'ele'õ ira sama'ele'õ ba Moze,

²³ ya'ia wa lõ tola lõ'õ tefakao Razo Sangorifi nifabu'u Lowalangi andrõ, ba Ya'ia zi fõfõna auri mangawuli me no aefa mate; ena'õ ba zi manõ tola i'ombakha'õ haga -- fangorifi -- ba niha Yahudi awõ ba soi bõ'õ si tenga niha Yahudi gõi."

²⁴ Fatua ifa'ema wamelegõnia andrõ Faulo, ba mu'ao Weso imane, "Owõhõ'õ Faulo! Fa'atuatuamõ andrõ zamowõhõ ya'ugõ!"

²⁵ Ba hiza itema li Faulo imane, "Tenga sowõhõ ndra'odo, Razo nifosumange. Duhu niw̃a'õgu andrõ ba no si otarai wangerangeragu si sõkhi.

²⁶ Aboto ba dõdõ Razo Agerifa wa sindruhu da'õ. Da'õ mbõrõ wa barani ndra'o ba lõ ubini'õ wahuhuosa fõnami. Faduhu dõdõgu wa ma'ifu lõ si lõ i'ila, bõrõ me tenga ba zi lõ oroma alua fefu da'õ.

²⁷ He Razo nifosumange, hadia faduhu dõdõu ba niw̃a'õ ndra sama'ele'õ? Faduhu dõdõgu wa si faduhu tõdõ Razo!"

²⁸ Imane Agerifa khõ Waulo, "Hadia õwalinga aoha manõ wombali'õ ya'odo Niha Keriso ba ginõtõ si lõ ara sibai andre?"

²⁹ Itema li Faulo, "Ba ginõtõ salio ma ba ginõtõ sara, mangandrõdo khõ Lowalangi ena'õ Razo awõ zamondrongo fefu fehedegu ma'õkhõ andre tola tobali si mane ya'o, -- baero mbilagu andre si so ba dangagu!"

³⁰ Ba gafuriata lalau muzizio ira razo, gubernur ba Berenike awõ niha bõ'õ fefu.

³¹ Me so ira baero faoma lamane khõ nawõra, "Lõ hadõi nilau niha andre si tobali bõrõ wa lahuku famunu ma zui labe'e ba gurunga ia."

³² Aefa da'õ imane Agerifa khõ Weso, "Tola te'efa'õ niha andre, na lõ i'andrõ ena'õ tefareso warakaronia fõna rafe zanguhuku khõ Kaizaro."

Kisah Para Rasul

Video Kisah Para Rasul 26

Ikuti Kami:

KONTAK | PARTISIPASI | DONASI