Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dhabuna Agripa ka Paulus, "Mara ba’na olle acaca kaangguy abillai aba’na." Daddi Paulus laju nyongjung, pas ngajuwagi pambilla’anna kantha reya:

² "Se Molja Rato Agripa! Abdidalem arassa ce’ pojurra kengeng ngajuwagi pambilla’an ajunannepon junandalem parkara sadaja se earannagi reng-oreng Yahudi ka abdidalem;

³ kong-langkong amarga junandalem ce’ ngagalina ka adat sareng masalah-masalahepon oreng Yahudi. Daddi abdidalem nyo’on ka junandalem ngereng kasokana pasabbar meyarsa’agi katerrangan abdidalem ka’dhinto’.

⁴ Sadajana oreng Yahudi oneng kadi ponapa odhi’ abdidalem ngabidi abdidalem gi’ ngodhana. Sadajana padha oneng ja’ ngabidi gi’ ngodha abdidalem ampon odhi’ e antarana bangsa abdidalem dibi’ e Yerusalim.

⁵ Reng-oreng Yahudi ampon abit se oneng parkara abdidalem. Ban manabi poron, reng-oreng Yahudi gapaneka kengeng nyakse’e ja’ ngabidi gi’ dhimen abdidalem odhi’ menangka oreng Farisi kalaban atoro’ ka sadajana atorannepon se paleng kerras e dhalem agama abdidalem.

⁶ Ban samangken abdidalem badha e ka’dhinto’ eadilana polana abdidalem parcaja ka parjanjiyan se ebadhi Guste Allah ka bangatowa abdidalem sadaja.

⁷ Parjanjiyan gapaneka jugan se erep-arep sareng dhubellas sukuna bangsa Isra’il, kantos padha abakte ka Allah seyang malem. Daddi polana abdidalem parcaja ka parjanjiyan gapaneka, Rato Se Molja, abdidalem esala’agi sareng reng-oreng Yahudi.

⁸ Aponapa tan-taretan reng-oreng Yahudi se badha e ka’dhinto’ me’ ta’ parcaja ja’ Allah maodhi’ pole oreng se seda?

⁹ Gi’ dhimen abdidalem dibi’ gadhuwan pamanggi ja’ ponapa’a saos kodu elakone sareng abdidalem kaangguy ngamoso Isa dhari Nazaret.

¹⁰ Ban pajat gapaneka se elakone abdidalem e Yerusalim. Kalaban sorat kobasa dhari mam-imam kapala abdidalem mamaso’ ka penjara reng-oreng se esto ka Allah sabannya’na. Abdidalem la’-mala’ noro’ mopakat sopaja reng-oreng gapaneka eokom mate.

¹¹ Serreng abdidalem nyeksa reng-oreng gapaneka e ngan-kennengnganna kabakteyan, sopaja maksa reng-oreng gapaneka ta’ ngakone se daddi kaparcaja’annepon dibi’. Ate abdidalem arassa ce’ panassa, kantos abdidalem jugan entar ka tha-kottha laenna nyerser reng-oreng se parcaja ka Isa gapaneka."

¹² "Kalaban maksod gapaneka jugan abdidalem entar ka Damsyik, abakta sorat kobasa dhari mam-imam kapala.

¹³ E bakto abdidalem gi’ badha e tengnga jalan, Rato Se Molja, e baja beddhuk abdidalem nengale badha sonar dhari langnge’ se atera’an dhari are. Sonar gapaneka nera’e sakalengleng abdidalem sareng sakalenglengnga reng-oreng se ajalan asareng abdidalem.

¹⁴ Abdidalem sareng se laen padha labu ka tana. Saamponnepon ka’dhinto’ abdidalem laju mereng sowara se adhabu ka abdidalem ngangguy oca’ Ibrani, ‘Saulus, Saulus! Arapa ba’na me’ terros nganeyaja Sengko’? Ba’na bakal sake’a dibi’, mon ba’na ros-terrosan alaban pimpinanna Salerana se daddi towanna ba’na.’

¹⁵ Daddi abdidalem atanya, ‘Pasera Junandalem, Guste?’ Guste Isa adhabu, ‘Sengko’ reya Isa se ekaneyaja ba’na.

¹⁶ Mara jaga, pas manjeng! Sengko’ ngaton ka ba’na polana ba’na bi’ Sengko’ epadaddiya Tang abdi. Ba’na kodu notorragi ka oreng laen apa se etangale’e ba’na e are teya parkara Sengko’ ban parkara apa se bi’ Sengko’ gi’ eduduwagiya ka ba’na e bakto se bakal dhateng.

¹⁷ Sengko’ mabebasa ba’na dhari bangsa Isra’il ban dhari sa-bangsa laenna se banne Yahudi. Bi’ Sengko’ ba’na esorowa entar ka sa-bangsa jareya;

¹⁸ ba’na kodu mokka’ matana reng-oreng jareya sopaja kalowar dhari pettengnga sarta maso’ ka terrangnga, sopaja sa-bangsa jareya lopoda dhari kakobasa’anna Iblis ban ekobasae Allah, sopaja kalaban parcaja ka Sengko’ reng-oreng jareya bakal esapora’a sarta bakal daddiya anggotana ommat peleyanna Allah.’"

¹⁹ "Daddi, Rato Agripa, abdidalem terros aehteyar sopaja abdidalem ta’at ka pangatonan se etarema abdidalem dhari Allah gapaneka.

²⁰ Abdidalem rang-terrangan malae reng-oreng sopaja padha’a atobat dhari sa-dusana sarta massra’agi aba’epon ka Allah, sareng noduwagi e dhalem tengka gulina ja’ aba’epon pajat ampon atobat ongguwan. Abdidalem notorragi parkara gapaneka dha’-adha’epon e Damsyik, saamponnepon gapaneka e Yerusalim sareng e saantero Yudea, jugan e antarana reng-oreng se banne Yahudi.

²¹ Ka’dhinto’ se daddi lantarannepon reng-oreng Yahudi nangkep abdidalem e Padalemman Socce sareng aehteyar mateyana abdidalem.

²² Namong kantos samangken abdidalem gi’ etolong sareng Allah, kantos abdidalem kengeng manjeng e ka’dhinto’ notorragiya kasakseyan abdidalem ka sadajana oreng — se raja sareng se kene’. Sadaja se eatorragi abdidalem ka’dhinto’ ta’ laen dhari se ampon enobuwattagi sareng bi-nabbi, kadi ka’dhinto’ jugan sareng Mosa;

²³ enggi ka’dhinto’ ja’ Rato Panyalamet se ejanjiyagi Allah ka’dhissa’ kodu nanggung sangsara, sareng kodu daddi oreng se dha’-adha’ kadibi’ odhi’ pole saamponna seda; sopaja kalaban jalan gapaneka Salerana kengeng aberta’agi parkara terrang — enggi paneka kasalameddan — ka reng-oreng Yahudi sareng se banne Yahudi."

²⁴ Parappa’na Paulus ngotara’agi pambilla’anna jareya, Festus aera’, "Ba’na la gila, Paulus! Elmona ba’na se bannya’ jareya andaddiyagi ba’na gila!"

²⁵ Tape Paulus nyaot, "Abdina ta’ gila, Guste Se Molja! Sadajana se eatorragi abdidalem ka’dhinto’ lerres, sareng kalowar dhari pekkeran se baras.

²⁶ Rato Agripa ngagali onggu ka sadajana parkara ka’dhinto’. Daddi abdina bangal mator rang-terrangan e ajunanna Rato. Abdina yakin tadha’ settonga dhari sadajana parkara gella’ se ta’ ekaonenge sareng Rato, sabab sadajana gapaneka ta’ kadaddiyan e kennengngan se ta’ tek-ngetek.

²⁷ Guste Rato Agripa, ponapa junandalem parcaja ka sadajana se edhabuwagi bi-nabbi? Manabi ca’epon babudhun abdidalem, junandalem tanto parcaja!"

²⁸ Rato Agripa laju adhabu ka Paulus, "Apa bi’ ba’na esanggu gampang madaddiya sengko’ oreng Kristen e dhalem bakto se sakejja’ reya?"

²⁹ "E dhalem bakto se sakejja’ otaba se abit," ca’na dhabuna Paulus, "abdidalem nyo’on ka Allah sopaja junandalem sareng sadajana se meyarsa’agi abdidalem e are mangken kengenga daddi padha sareng abdidalem — kajabana kalenthong ka’dhinto’!"

³⁰ Dhi-budhina rato, gubennor ban Bernike sarta sakabbiyanna oreng se badha e jadhiya laju padha jaga.

³¹ Sanapa’na kalowar, kabbi padha saleng ngoca’, "Oreng rowa ta’ andhi’ kasala’an settonga se pantes eokom bi’ okoman mate, otabana epenjara."

³² Agripa laju adhabu ka Festus, "Oreng reya la ekenneng ocol, ja’ sakenga ta’ agugat sopaja parkarana eadili Kaisar."

Kisah Para Rasul

Video Kisah Para Rasul 26

Ikuti Kami:

KONTAK | PARTISIPASI | DONASI