Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nakua Raja Agripa mangkada lako Paulus, "Wa'dingmoko mpangkadanan kalemu." Mpupangngimbami limanna Paulus mpasadia tau, nakua,

² "Ee, Tomala'bihku' Raja Agripa! Kusanga gaja sannangna' diben wattu mpaui to pebalingku' jio olota', sininna to naparapasanna' to-Yahudi,

³ la'bi-la'bi nasaba' taissen tongan kita' to ada'na sola katangsipatuanna to-Yahudi. Jaji kupeta'da melo lako kita' tasabbara'pa mpesa'dingngina'.

⁴ Naissen ngasan to-Yahudi to katuoanku' mellao jio mai biccu'ku'. Naissen too tongkumatonggomo torro jao kota Yerusalem sola bangsaku'.

⁵ Mellao jio mai naissenna'. Na ia sitonganna, ke la madoangngi, na wa'dingngi la mpangpeissenanni kumua mellao jiona mai, tuomo' susi to-Farisi to mata'da' nturu' atoran agamangki'.

⁶ Na iamo kudiparessa ntee too, nasaba' ngkatappa'ina' basse naben Puang Allataala lako tojoloki'.

⁷ Na ia toomo joo narannuan, namassompa allo bongi lako Puang Allataala to sangpulo dua pangrapuanna to-Israel. Anna ia toomora kita' tee napasalana' to-Yahudi, sanga kurannuan joo basse.

⁸ Matumbari kita' tee to-Yahudi na te'da takatappa'i ke mpatuo pole'i tomate to Puang Allataala?

⁹ Moi aku' tonna tee kusanga gaja kuewali tooi to tonturu' Puang Isa to-Nazaret.

¹⁰ Na iamo kupugauk jio kota Yerusalem. Ia tonna benmo' kuasa kapala imang, buda taun-Na Puang Allataala kupatama pangtarungkuan, na kusitujui too ke dibunoi.

¹¹ Pembudana' ssessai lan bola passambajangan, kuparukui napessakkanni pole'i to Puang Isa. Tanda kamapallanku' lako, angkumale ntiroi moi jio kota laen."

¹² Mpatarruhhi kadanna Paulus nakua, "Ia toomora joo akkattaku' la ssessa Tosarani kumale lako kota Damsyik mbawa sura' kuasa jio mai kapala imang.

¹³ Lan kalingkanku' tonna tangngamo allo, ngkitana' arrang jao mai langi' la'bi manynyarra ia na mata allo. Ia joo arrang nnarrangkan sola to tokusolan.

¹⁴ Sisongkan ngasankan, anna den gamara kusa'ding ngkuanna' lan basa to-Yahudi, 'Ee, Saulus! Ee, Saulus! Matumbai musessa tarruh bangna'? Iko bang una iko la mpa'dikki kalemu, ke nnewa tarruhko Puangmu.'

¹⁵ Mekutanamo' kukua, 'Ie', indariki' kita' Puang?' Nakua mpebalina', 'Aku'mo Puang Isa to musessa.

¹⁶ Ke'dehmoko! Iamo kupangpekitan kale-Ku' lako iko, nasaba' la kupupenjajiko tompangjamanna'. La mupangpeissenan lako tau apa to mukita tee too sola to apa la kupakitanpoko dau.

¹⁷ La kujagaiko, na te'da mumatumba ke mangngoloko lako to-Yahudi iarika bangsa laen. La kusua pole'ko lako

¹⁸ mpami'cikki to matanna, ssolanni jio mai kamalillinan lako macerona, lla'paranni jio mai kuasanna Ballisi' lako kuasan-Na Puang Allataala, anna didampangan, namenjaji umma'-Na to napilei Puang Allataala, sanga matappa'i lako Aku'."

¹⁹ Mpatarruhpa kadanna Paulus nakua, "Tomala'bihku' Raja Agripa! Tuli kupengkullei kita' nturu' meloi apa to mangka napau Puang lan joo pengkita.

²⁰ Iamo joo kupangpeissenan lako sininna tau kumua namengkatoba' jio mai dosana namenturu' lako Puang Allataala. Na la napapajan lan katuoanna kumua mengkatoba' tonganmo. Bungahna kupangpeissenan lako to-Yahudi jio kota Damsyik, na jao kota Yerusalem, na lan lili'na tana Yudea, namane' lako bangsa laen.

²¹ Iamo joo najokkona' to-Yahudi lan Bola Puang Allataala nalambunona'.

²² Apa pammase-Na Puang ratu lako too allo, angkuwa'ding ke'deh ntee mpangpeissenanni la lako tokaissenan, la lako tobiasa. Ia to apa kupau te'da laenna na ia to pura napau Nabi Musa sola nabi laen tonna anu',

²³ kumua, 'Ia to Raja Mangpasalama' nabasse Puang Allataala, la dipakario-rio, apa iamo jolona la tuo pole' jio mai kamatean, dikua anna mbawa arrang, iamo to Kareba Kasalamatan, la lako to-Yahudi la lako bangsa laen.'"

²⁴ Ia tonna da'tan unapa Paulus mangkada mpau pebalinna, kumassakmi Gubernur Festus, nakua, "Ee, Paulus! Totangmalilinganko iko tuu. Liwa' buda paissenmu, na iamo mpatangmalilinganko."

²⁵ Apa napebalii Paulus nakua, "Ie', matanana' kita' tomala'bih! Ia tee kadangku', kada tongan, kada tomalilingan na kutangngah mandalan kumane' mpaui.

²⁶ Tomala'bihku' Raja Agripa to nnissen meloi tee. Iamo joo kubarani ntarrusan bangki' mati'. Kusanga moi mesa' te'da tangtaissen, nasaba' ia tee te'da najaji jio kampong kabunianan.

²⁷ Tabe' kita' tomala'bihku' Raja Agripa, la mekutanapa', 'Takatappa'iraka to nabi? Kuissen kumua takatappa'i!'"

²⁸ Nakua Raja Agripa mebali lako Paulus, "Musangaraka marawa bangna' mupasarani lan tee wattu sangkappidian mata?"

²⁹ Apa nakua Paulus, "Sangkappidian mataraka ba'tu masairaka, apa kupassambajanganki' lako Puang Allataala sola sininna to tossa'ding kadangku' tee allo, ke wa'dingngi, tasusi tee aku', tantu saleanan jio mai tee kadipumpunganku'."

³⁰ Katampakanna ke'dehmi joo raja na gubernur sola Bernike na sininna tonasolan cumadokko.

³¹ Ia tonna saleananmo pada sipangkadami nakua, "Te'da bangra apa napugauk tee tau to sipato'na dinii la ntarungkui iarika mbunoi."

³² Nakua Raja Agripa lako Gubernur Festus, "Wa'dingmo dila'paran, kenna tangngia kalena ia mpeta'dai mpatarruh kara-karana lako Tomaraja Roma."

Kisah Para Rasul

Video Kisah Para Rasul 26

Ikuti Kami:

KONTAK | PARTISIPASI | DONASI