Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Agripa hamauh dengan Paulus, "Akam inenga katika uka hakotak mambela arepm." Maka Paulus manggatang lengee palus manyampai auh pambelaae kalotoh,

² "Je Paham Ihormat Tuan Raja Agripa! Aku mangkeme ontong toto tau manyampai pambelaan akan arepku, pas intu taharep Tuan Raja tahiu kakare pangaduan je inyampai awi kare oloh Yehudi mawi aku;

³ Je mambatang basa Tuan Raja katawan toto kakare hadat dasar tuntang kare hal ain oloh Yehudi. Tagal te aku balaku Tuan Raja mahining katarangan ayungku hapan kasabar.

⁴ Kakare oloh Yehudi katawan kilen ampie aku belom bara metoh aku tabela. Ewen katawan bara katika aku manjadi oloh tabela, aku jari belom hong marak bangsa ayungku kabuat hong Yerusalem.

⁵ Jari tahi ewen katawan tahiu aku. Tuntang amon ewen handak, ewen tau manenga kasaksian je bara solake aku jari belom kilau oloh Parisi awiku manumon kare atoran je paling karas huang agaman ikei.

⁶ Tuntang toh aku mendeng intu hetoh uka inyidang awi aku percaya janji je inampa Hatalla dengan kare tato hiang ikei.

⁷ Janji te je ihara-harap awi due walas suku bangsa Israel, sampai ewen manyembah Hatalla handau hamalem. Tuntang puna awi aku percaya dengan janji te, Tuan raja je ihormat, aku inyalan awi kare oloh Yehudi.

⁸ Mbuhen kare paharingku oloh Yehudi dia olih percaya Hatalla tau mambelom haluli oloh matei?

⁹ Solake bihin aku kabuat mahin manirok, je aku musti malalus kare taloh handiai uka malawan Yesus bara Nasaret te.

¹⁰ Tuntang puna jete ih je iawiku hong Yerusalem. Hapan surat kuasa bara kare imam kapala, aku jari manamean akan huang penjara are oloh je baketep dengan Hatalla. Aku mahin omba kea pakat uka ewen ihukum matei.

¹¹ Kinjap kea aku mangapehe ewen hong kare huma sombayang, uka mamaksa ewen mundur bara taloh je imercaya ewen te. Angat ateiku puna ombet ih mawi ewen te, sampai akan kare lewu beken mahin aku haguet uka manggoang ewen intu hete."

¹² "Akan maksud jete aku mimbit surat kuasa bara kare imam kapala tuntang haguet akan Damaskus.

¹³ Tuntang metoh aku hong benteng jalan, katika bentok andau, o Tuan Raja Je Ihormat, aku mite ije kalawa bara langit je labih balawa bara matanandau. Kalawa te mamancar hakaliling aku tuntang hakaliling kare oloh je mananjong haya-hayak dengangku.

¹⁴ Ikei samandiai balongkang akan petak. Palus aku mahining auh je hamauh dengangku huang basa Ibrani, 'Saulus, Saulus! Mbuhen ikau bajuju mangapehe aku? Ikau akan mangkeme kapehe kabuat, amon ikau bajuju malawan pimpinan Ayue je manjadi Tuan ayum.'

¹⁵ Maka aku hamauh, 'Eweh ikau Tuan?' tuntang Tuhan tombah, 'Aku toh Yesus je ingapehem.

¹⁶ Keleh hingkat tuntang mendeng! Aku mamparahan arep-Ku akam awi-Ku handak mangkat ikau manjadi saksi ayung-Ku. Ikau musti mambarita akan oloh beken taloh je jari gitam andau toh tahiu Aku tuntang tahiu taloh je imparahang-Ku kareh akam hong katika je rahian.

¹⁷ Aku akan malapas ikau bara bangsa Israel tuntang bara kare bangsa beken je dia Yehudi. Aku kareh manyoho ikau haguet manalih ewen,

¹⁸ uka mamparenang matan ewen, mangat ewen balua bara kakaput tuntang tame akan huang kalawa; mangat ewen lapas bara pangaruh Setan, palus inguasa awi Hatalla. Maka awi percaya dengang-Ku kare dosan ewen kareh iampun tuntang ewen kareh manjadi anak ungkup ain Hatalla je iintih.'"

¹⁹ "Tagal te Tuan Raja Agripa, aku harajur manggau jalan manumon kahandak taloh je gitangku je jari inarimaku bara Hatalla te.

²⁰ Hapan auh tarus-tarang ih aku mansanan akan kare oloh je ewen musti hobah bara kare dosan ewen tuntang manyarah arep ewen akan Hatalla hayak mamparahan huang pambelom ewen je ewen jari hobah bara kare dosan ewen. Aku mambarita hal te nampara bara Damaskus, limbah te hong Yerusalem tuntang hong hapus Yuda tuntang hong marak kare oloh je dia Yehudi.

²¹ Maka tagal te kea kare oloh Yehudi manawan aku hong Human Tuhan tuntang manggau jalan handak mampatei aku.

²² Tapi sampai katika toh aku ingalindong awi Hatalla, sampai aku tau mendeng intu hetoh uka manenga kasaksian ayungku akan oloh handiai -- hai atawa korik. Taloh je insanangku toh jaton beken bara taloh je jari inujum awi kare nabi tuntang Moses;

²³ iete Raja Panyalamat je injanji Hatalla te musti buah kapehe, tuntang manjadi oloh je solake belom haluli limbah pampatei; uka hapan jete ie tau mambarita kalawa -- iete salamat -- aloh akan kare oloh Yehudi atawa akan kare oloh je dia Yehudi."

²⁴ Metoh Paulus manyampai auh pambelae te, Pestus mangkariak, "Ikau jadi gila Paulus! Ilmu ayum je are te jari mawi ikau gila!"

²⁵ Tapi Paulus tombah, "Aku dia gila, Tuan je ihormat. Kare auh je impaluaku te toto tuntang balua bara tirok je barendeng.

²⁶ Tuan Raja Agripa kabuat katawan toto tahiu kare hal te. Jete bukue aku bahanyi hakotak intu taharep Tuan Raja tarus-tarang. Aku percaya ije mahin jaton bara kare hal te je hindai ingatawan awi raja, awi kakare hal te jari manjadi hong kare eka je dia basilim.

²⁷ Tuan Raja Agripa Je Ihormat, en Tuan Raja percaya dengan taloh je insanan awi kare nabi? Angatku Tuan Raja percaya!"

²⁸ Palus Agripa hamauh dengan Paulus, "Ikau mangira murah manun aku manjadi oloh Kristen hong katika je pandak toh?"

²⁹ "Hong katika je pandak atawa hong katika je panjang," koan Paulus tombah, "aku balakudoa intu Hatalla uka Tuan Raja tuntang kare Tuan samandiai je mahining auhku andau toh tau manjadi kilau aku -- kacuali pasong toh, punae!"

³⁰ Kajariae Tuan Raja, gubernur tuntang Bernike, tuntang ewen handiai je beken mendeng.

³¹ Limbah jari intu luar, ewen hamauh sama arepe, "Oloh toh jaton mawi taloh en-en je patut ihukum matei atawa inamean akan penjara."

³² Palus Agripa hamauh dengan Pestus, "Oloh toh jari tau ilapas, jaka ie dia manuntut perkarae inyidang hong pangadilan Kaisar."

Kisah Para Rasul

Video Kisah Para Rasul 26

Ikuti Kami:

KONTAK | PARTISIPASI | DONASI