Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mako bakatolah Rajo Agripa kabake si Paulus, "Mangeceklah lai, angkau di agiah kasampatan untuak mambela diri." Mako di angkeknyolah tangannyo dek si Paulus, sudah tu inyo manyampaikan pambelaannyo, bakcando iko,

² "Tuanku Rajo Agripa nan mulie! Ambo maraso sangaik baruntuang, dek karano ambo dibari kasampatan untuak mambela diri di adok-an Tuanku, untuak manjawab sagalo tuduahan nan dibabankan dek urang-urang Yahudi, taradok diri ambo;

³ nan tarutamu sakali adolah, dek karano Tuanku tawu bana adaik istiadaik kami, sarato jo masalah-masalah urang Yahudi. Dek karano itu ambo mambana, basadiyolah andaknyo Tuanku untuak mandangakan katarangan ambo sacaro saba.

⁴ Kasadonyo urang Yahudi lah tawu, baa caro iduik ambo sajak dari mudo. Inyo lah bi tawu pulo, baraso sajak dari mudo, ambo lah iduik di tangah-tangah banso ambo sandiri di Yerusalem.

⁵ Lah lamo urang-urang tu bi tawu, tantang diri ambo. Santano jikok urang-urang tu lai namuah, mako inyo bisa mambari pangakuan, baraso sajak dari samulo, ambo lah iduik sabagai urang Farisi, ambo lah manjalankan sagalo paratuarannyo nan sangaik sampik di dalam agamo kami.

⁶ Kiniko ambo tagak disiko untuak disidangkan, dek karano ambo picayo kabake janji nan dibuwek dek Allah jo niniak muyang kami.

⁷ Janji itu pulolah, nan di arok-arokkan dek kaduwo baleh suku banso Israel, sainggo inyo lah ba ibadaik siang jo malam kapado Allah. Tuanku nan mulie, dek karano ambo sangaik picayo kabake janji tu, mako ambo dipasalahkan dek urang-urang Yahudi.

⁸ Baa mangko sudaro-sudaro ambo urang Yahudi, indak mampicayoi, baraso Allah ka ma iduikkan baliak urang-urang nan mati?

⁹ Dawulunyo ambo sandiri pun bapandapek, baraso ambo musti ba usawo sakuwaik tanago, untuak malawan Isa Almasih urang Nazaret tu.

¹⁰ Bakcando itulah, nan lah ambo karajokan di Yerusalem. Jo surek kuwaso dari imam-imam kapalo, lah sambuah urang-urang nan saliah, nan ambo puruakkan masuak pinjaro. Malahan ambo manyatujui pulo, supayo urang-urang tu di ukun mati.

¹¹ Lah acok ambo manangani urang-urang tu di rumah-rumah ibadaik, ambo paso inyo untuak ma engkari imannyo. Iyo bana tabik suga ambo kabake urang-urang tu, sampai ambo kaja inyo ka kota-kota nan lain bagai."

¹² "Jo mukasuik itu pulolah ambo mambawok surek kuwaso dari imam-imam kapalo, sudah tu ambo payi ka Damsyik.

¹³ Sawakatu ambo dalam pajalanan, kutiko itu di tangah ari badantang, Tuanku nan mulie, ambo manampak suatu cahayo dari langik, nan labiah tarang daripado matoari. Cahayo tu mamanca di sakuliliang ambo, mamanca pulo di sakuliliang urang-urang nan sapajalanan jo ambo.

¹⁴ Kasadonyo kami bi rabah ka tanah. Sudah tu ambo ado mandanga suwaro, nan bakato kabake ambo jo bahaso Ibrani, 'Oih Saulus, Saulus! Baa mangko angkau aniayo juwo Ambo? Angkau ka marasokan sakik sandiri, jikok angkau ma ilak juwo dari panggielan Baliau, nan manjadi Tuan angkau.'

¹⁵ Mako batanyolah ambo, 'Siya koh Angkau, oih suwaro nan mangecek tu?' Mako manjawablah Tuhan, 'Ambolah nan Isa Almasih, nan angkau aniayo.

¹⁶ Jagolah lai, tagaklah! Mangkonyo Ambo mampanampakkan diri kabake angkau, mukasuiknyo adolah untuak ka ma angkek angkau jadi pisuruah Ambo. Angkau musti payi mambaritokan kabake urang lain, apo nan lah angkau liyek kiniko tantang diri Ambo, baitu pulo tantang apo nan ka Ambo agiah tawu isuak, dimaso nan ka tibo.

¹⁷ Ambo ka ma asiangkan angkau dari banso Israel, sarato dari banso-banso lain nan indak urang Yahudi. Ambo ka manyuruah angkau payi kabake urang-urang tu

¹⁸ untuak ka mambukakkan mato rohaninyo, supayo inyo buliah kaluwa dari nan kalam, sudah tu masuak ka nan tarang; supayo urang-urang tu buliah lapeh dari pangaruah Ubilih, sudah tu buliah Allah nan ka manguwasoinyo. Jo sacaro inyo ba iman kabake Ambo, mako doso-dosonyo ka di ampuni, inyo ka manjadi anggota umaik Allah nan tapiliah.'"

¹⁹ "Dek karano itu Tuanku Rajo Agripa, ambo tatap patuah kapado pangliyatan, nan lah ambo tarimo dari Allah tu.

²⁰ Sacaro taruih tarang ambo mangatokan kabake sadonyo urang, supayo inyo tu musti batobaik dari doso-dosonyo, manyarahkan diri kapado Allah, sarato mampanampakkan dalam caro iduiknyo baraso inyo lah batobaik. Mulo-mulo ambo mangabakan parkaro tu di Damsyik, sudah tu di Yerusalem sarato jo di sadonyo daerah di Yudea, di tangah-tangah urang-urang nan indak urang Yahudi.

²¹ Dek karano itulah, mangkonyo urang-urang Yahudi manangkok ambo di Rumah Tuhan, inyo ba usawo nak ka mambunuah ambo.

²² Tapi sampai kiniko ambo dilinduangi dek Allah, sainggo ambo dapek tagak disiko untuak mambarikan pangakuan kabake sadonyo urang -- kabake nan gadang ataupun nan ketek. Apo nan ambo katokan ko, adolah sasuatu nan lah dinubuatkan dek Nabi Musa sarato jo nabi-nabi nan lain;

²³ iyolah, baraso Rajo Panyalamaik nan lah dijanjikan dek Allah tu, Baliau musti manangguang sansaro, Baliau pulolah urang nan partamu, nan iduik baliak sasudah mati; supayo jo caro nan baitu Baliau dapek mambaritokan tarang -- iyolah kasalamatan -- biya kabake urang-urang Yahudi atau pun kabake urang-urang nan indak urang Yahudi."

²⁴ Samantaro si Paulus manyampaikan pambelaannyo tu, Gubenur Festus ma ariak, "Oih Paulus, angkau lah gilo ko! Alemu angkau nan banyak tu ko, nan lah mampagilo angkau!"

²⁵ Mako manjawablah si Paulus, "Oih apak nan mulie, ambo indak gilo doh. Apo nan ambo katokan ko, batua, kaluwa dari pikieran ambo nan siyaik.

²⁶ Tuanku Rajo Agripa sandiri, mangatawui bana tu sagalo parkaro tu. Itu sababnyo mangko ambo barani mangecek di adok-annyo, sacaro taruih tarang. Ambo yakin, indak ciyek juwo doh dari sagalo apo nan lah ambo katokan tu, nan indak inyo katawui, dek karano kasadonyo tu tajadi indak di tampaik-tampaik nan tasuruak doh.

²⁷ Nan mulie Tuanku Rajo Agripa, apokoh Tuanku picayo, kabake apo nan dikatokan dek nabi-nabi? Ambo raso Tuanku picayo!"

²⁸ Mako bakatolah Rajo Agripa kabake si Paulus, "Angkau sangko mudah manjadikan ambo urang Kristen, dalam wakatu nan singkek ko?"

²⁹ Si Paulus bakato, "Dalam wakatu nan singkek, atau dalam wakatu nan panjang, ambo badowa kapado Allah, supayo Tuanku, sarato jo angku-angku ko kasadonyo, nan sato mandangakan kecek ambo ko, dapek pulo andaknyo bakcando ambo -- nan pilanggu ko, tantu indak!"

³⁰ Akienyo tuanku rajo, gubenur jo Bernike, sarato jo kasadonyo urang nan lain bagai, bi tagak.

³¹ Baru tibo diluwa, inyo tu bi mangecek sasamo inyo, "Indak ado doh urang nan disidangkan cako, mampabuwek suatu karajo nan salah, nan patuik inyo tu di ukun jo ukunan mati atau pun dipinjarokan."

³² Sudah tu, bakatolah Rajo Agripa kabake Gubenur Festus, "Si Paulus tu lah buliah dilapehkan, jikok inyo indak mamintak parkaronyo disidangkan di pangadielan kaisar."

Kisah Para Rasul

Video Kisah Para Rasul 26

Ikuti Kami:

KONTAK | PARTISIPASI | DONASI