Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sewaktu Apolos masih lẽq Korintus, Paulus kenyeke jelajahin daẽrah-daẽrah pedaleman terus dateng lẽq Epesus. Lẽq derike ie bedait kance pire dengan saq sampun percaye lẽq Deside Isa.

² Paulus beketuan lẽq ie pade, "Napi side pade sampun nerimaq Roh Suci waktu side pade percaye lẽq Deside Isa?" Ie pade bejawab, "Ndẽqman, malahan tiang pade ndẽqman dengah araq Roh Suci."

³ Paulus beketuan, "Lamun maraq nike, kadu baptisan napi side pade tebaptis?" "Kadu baptisan Yahya," Jawab ie pade.

⁴ Terus Paulus bebase, "Yahya baptis dengan jari nyatayang bahwe dengan-dengan nike sampun tobat lẽman dose-dosene. Laguq lẽq waktu nike ẽndah Yahya bebase lẽq dengan-dengan Israel bahwe, ie pade harus percaye lẽq Dengan saq gen rauh sesampun Yahya, nike Deside Isa."

⁵ Sesampun ie pade dengah hal nike, ie pade tebaptis lẽq dalem pesẽngan Junjungan Saq Mulie Deside Isa.

⁶ Dait lẽq waktu Paulus noloq imene lẽq atas ie pade, Roh Suci turun lẽq ie pade, terus ie pade mulai ngeraos kadu base lain dait benubuat.

⁷ Selapuqne nike kire-kire araq due olas dengan luwẽqne.

⁸ Telu bulan ngonẽqne Paulus terus bani bebaos tipaq dengan-dengan lẽq balẽ ibadah dait bedebat kance ie pade mengenai Kerajaan Allah.

⁹ Laguq pire dengan lẽq antare dengan-dengan nike pagah dait ie pade ndẽq mẽlẽ percaye. Lẽq julu selapuq dengan saq bekumpul lẽq derike, ie pade ngewade pengajahan mengenai Tuhan nike. Keranaq nike Paulus bilin ie pade, terus lumbar kance pengiring-pengiringne ojok sekolah Tiranus. Lẽq derike sebilang jelo ie besoal jawab kance dengan-dengan.

¹⁰ Paulus tetep ngelaksaneang hal nike due taun ngonẽqne, jangke selapuq dengan saq ndot lẽq wilayah Asia, timaq dengan Yahudi atao dengan Yunani, selapuqne dengah Manik Tuhan.

¹¹ Allah miaq keajaipan-keajaipan saq luar biase langan Paulus.

¹² Malahan araq dengan saq jauq saputangan atao kẽrẽng saq sampun tekadu siq Paulus ojok dengan-dengan sakit, make penyakit ie pade telang dait roh jahat ẽndah sugul lẽman ie pade.

¹³ Pire dengan belian Yahudi lumbar ojok mbẽ-mbẽ, nyugulang roh jahat lẽman dengan-dengan. Ie pade ẽndah cobaq kadu pesẽngan Junjungan Saq Mulie Deside Isa jari nyugulang roh-roh jahat nike. Basen ie pade lẽq roh-roh jahat nike, "Lẽq dalem pesẽngan Deside Isa saq teberiteang siq Paulus, tiang prẽntahang side sugul!"

¹⁴ Araq sopoq imam kepale, aranne Skewa, bedowẽ pituq bije mame, ie pade saq ngelaksaneang hal saq maraq nike.

¹⁵ Laguq roh jahat nike ngeraos lẽq ie pade, "Tiang kenal Deside Isa dait Paulus ẽndah tiang kenal, laguq side niki sai?"

¹⁶ Terus dengan saq tekuasein siq roh jahat nike nyelontak dait gemes gati entan ie cakrah bije-bije Skewa nike jangke bakat dait ie pade pelai lẽman balẽ nike belondan sẽngaq kelambine soẽk.

¹⁷ Selapuq dengan Yahudi dait dengan bangse-bangse lain saq ndot lẽq Epesus dengah peristiwe nike, terus ie pade jari takut. Make pesẽngan Junjungan Saq Mulie Deside Isa sayan kesohor.

¹⁸ Luwẽq dengan saq sampun jari percaye lẽq Deside Isa, dateng ngakuq lẽq julun dengan luwẽq selapuq perbuatan-perbuatan ie pade.

¹⁹ Dait ie pade saq biase kadu ilmu-ilmu sẽhẽr, ngumpulang buku-buku ie pade terus sedutne lẽq julu dengan luwẽq. Aji buku-buku nike lamun terẽkẽng selapuqne, araq kire-kire sẽket iyu kẽpẽng perak.

²⁰ Make, siq care saq hẽbat nike manik Tuhan sayan nyebar dait sayan kuat pengaruhne.

²¹ Sesampun peristiwe-peristiwe nike, Paulus beniat lumbar ojok Makedonia dait Akaya terus ojok Yerusalem. Basen Paulus, "Sesampun ojok derike, tiang harus lalo ojok Roma ẽndah."

²² Jari ie ngutus due pembantune, Timotius dait Erastus jari lumbar ojok Makedonia, laguq Paulus mẽsaq masih ndot pire waktu ngonẽqne lẽq Asia.

²³ Kire-kire lẽq waktu nike ẽndah araq keributan belẽq lẽq Epesus lantaran pengajahan mengenai Langan saq tepetitoqang siq Junjungan Saq Mulie nike.

²⁴ Sẽngaq lẽq kote nike araq sopoq dengan tukang pandẽ perak aranne Demetrius saq piaqang Dewi Artemis balẽ-balẽan lẽman perak. Usahe dengan nike bau datengang hasil saq belẽq lẽq buruh-buruhne.

²⁵ Keranaq nike ie ngumpulang buruh-buruhne bareng kance buruh-buruh tukang pandẽ perak saq lainne, terus bebase, "Semeton senamian! Side pade nenaoq bahwe ite mauq pengasilan lẽman pegawẽan niki.

²⁶ Mangkin side pade sampun serioq dait dengah mẽsaq napi saq telaksaneang siq Paulus nike. Ie bebase bahwe dẽwe-dẽwe saq tepiaq siq manusie nike ndẽqne dẽwe. Dait ie sampun nyesatang luwẽq dengan, ndẽqne cume lẽq deriki, lẽq Epesus, laguq gen jangke dateng selapuq wilayah Asia.

²⁷ Bahayene bahwe usahente niki gen lengẽ aranne. Dait ndẽqne nike doang, malahan gedẽng Dẽwi Artemis ẽndah terẽmẽhang dait kemulieanne teicaq-icaq; padahal ie dẽwi saq tesembah siq selapuq dengan lẽq Asia dait lẽq seantẽro dunie!"

²⁸ Sesampun ie pade dengah hal nike, angen ie pade jari panas, terus ie pade nyurak-nyurak, "Idup Artemis, dẽwi dengan Epesus!"

²⁹ Make keributan nike sayan belẽq jangke dateng selapuq kote. Beterus perusuh-perusuh bau Gayus dait Aristarkus, ie dengan-dengan Makedonia saq ngiring Paulus lẽq dalem kelampanne, terus ie pade teoros ojok gedung kesenian nike.

³⁰ Paulus mẽlẽ tame turut ie pade, laguq dengan-dengan saq percaye lẽq Deside Isa balaq ie.

³¹ Araq pembelẽq-pembelẽq propinsi Asia nike, saq besahabat kance Paulus, suruq dengan bebadaq lẽq Paulus adẽq ie ndaq tame lẽq gedung kesenian nike.

³² Lẽq waktu nike dengan-dengan saq bekumpul lẽq gedung nike sampun jari biur lantur. Araq saq nyurak maraq niki, araq ẽndah saq nyurak maraq nike, sẽngaq luwẽqan lẽq antare ie pade saq ndẽq nenaoq kembẽq ie pade bekumpul lẽq derike.

³³ Terus sopoq dengan aranne Aleksander tejelek ojok julu siq dengan-dengan Yahudi. Ie mauq keterangan lẽman dengan luwẽq mengenai napi saq telaksane. Make Aleksander ngebẽng tande kadu imene adẽqne tebẽng kesempatan jari bẽle diriqne lẽq julun dengan-dengan nike.

³⁴ Laguq sewaktu ie pade serioq bahwe ie dengan Yahudi, bareng-bareng ie pade nyurak keras-keras, "Idup Artemis! Dẽwi dengan Epesus!"

³⁵ Ahirne jurutulis kote berhasil piaq tenang dengan luwẽq nike. Ie bebase, "Penduduk Epesus! Sebilang dengan nenaoq bahwe Epesus nike kote saq meliharaq gedẽng Dẽwi Artemis dait tetatone saq turun lẽman langit.

³⁶ Ndẽq araq sopoq dengan juaq saq bau nentang hal nike. Keranaq nike side pade tenang, dait ndaq gupuh-gupuh gawẽq napi-napi.

³⁷ Side pade jauq dengan-dengan nike ojok deriki ndẽqne lantaran ie pade sampun ngerampok gedẽng dẽwe atao lantaran ie pade sampun menghine dẽwinte.

³⁸ Lamun Demetrius kance buruh-buruhne nike araq bedowẽ sopoq pengaduan tipaq dengan, alurang ie pade jauq pelekare nike ojok pengadilan. Pengadilan bau nerimaq hal nike dait pejabat-pejabat pemrẽntah ẽndah tetep araq.

³⁹ Laguq lamun masih araq malik pelekare saq lain saq side pade melẽtang, nike harus teselesẽang lẽq dalem rapat umum saq sah.

⁴⁰ Sẽngaq napi saq telaksane jelo niki bau bahayeang ite. Ite bau tetuduh miaq keributan, sẽngaq ite ndẽq bedowẽ sopoq alasan saq kenaq lẽq keributan niki."

⁴¹ Sesampun jelasang selapuq hal nike, jurutulis kote nike suruq dengan luwẽq nike ulẽq.

Kisah Para Rasul

Video Kisah Para Rasul 19

Ikuti Kami:

KONTAK | PARTISIPASI | DONASI