Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Gasagasa we'aso Afolo ba Gorindro, idõrõdõrõi mbanua ba danõ misa Faulo, ba awena irugi Nefeso. Ba falukha ia ba da'õ õsa zi no faduhu tõdõ khõ Yesu.
2 Isofu khõra, imane, "Hadia, no mitema Geheha Lowalangi me faduhu dõdõmi khõ Yesu?" Latema li lamane, "Lõ'õ. Balõ na'i irai marongo wa so Geheha Lowalangi."
3 Isofu Faulo imane, "Na si manõ, hewisa wamayagõ idanõ ya'ami?" Latema li lamane, "Faoma famayagõ idanõ khõ Yohane."
4 Ba imane Faulo, "Ibayagõ idanõ niha Yohane ba wangoroma wa no lafalalini gera'erara ba larõi horõra niha. Ba hiza lõ mamalõ i'ombakha'õ Yohane ba niha Gizera'eli wa lõ tola lõ mamati ira ba niha si tohare moroi furinia, ya'ia Yesu."
5 Me larongo da'õ, lafabayagõ'õ ira idanõ ba dõi Yesu So'aya.
6 Ba me itufa ira tangania Faulo, Ifatõrõ ira Eheha Lowalangi, ba fahuhuo ira ba li bõ'õ awõ wa lafa'ema duria soroi Lowalangi.
7 Fa'atora fefu so mato felendrua niha.
8 Tõlu waw̃a wa'ara lõ aiw̃õ fahuhuo manõ Waulo ba niha sato ba gosali ba ifaduhu'õ khõra wa Ifasindro wamatõrõ-Nia Lowalangi ba gulidanõ andre.
9 Ba so õsa zabe'e hõgõ ba lõ edõna faduhu dõdõra. Fõna niha sato la'o'aya wamahaõ sanandrõsa ba nifakhoi Lowalangi ba wangorifi niha khõ Yesu. Bõrõ da'õ irõi ira Faulo, ba numalõ ira ba nahia zekola Dirano si fao ira sinenge Yesu. Fa'ema'ema li ira niha sato ba da'õ ero ma'õkhõ.
10 Lõ aetu'aetu ilau zi manõ dõfi wa'ara irege fefu niha si so ba danõ Asia, he niha Yahudi ba niha soi bõ'õ, ahori larongo Daroma Li Zo'aya.
11 Ilau zahõlihõli dõdõ si lõ harumani Lowalangi ba khõ Waulo.
12 Na saembutanga ma zui bõbõ lõwilõwi si no irai ifake Faulo la'ohe ba niha sofõkhõ, dõhõ wõkhõra, ba aheta khõra mbekhu si lõ sõkhi.
13 So õsa gõi ndruku niha Yahudi si mõi misa wamofanõ bekhu si lõ sõkhi moroi ba niha. Latandraigõ ira duku andrõ wamake tõi Yesu wamofanõ bekhu. Lamane ba mbekhu si lõ sõkhi andrõ, "Ba dõi Yesu nituriaigõ Waulo andrõ, ufofanõ ndra'ugõ!"
14 Fitu ndraono matua ono zalaw̃a gere, sotõi Sikew̃a, zamalua da'õ.
15 Ba imane bekhu si lõ sõkhi andrõ khõra, "U'ila Yesu ba u'ila gõi Waulo, ba haniha ami andre?"
16 Ifanaoka ia niha nira'u mbekhu andrõ, ira'u ba ibago ira fefu irege lalau moloi moroi ba nomo andrõ, oi mesokho ba lõ nukhanukhara bõrõ me isika nukha andrõ moroi ba mbotora.
17 Ba larongo ngawalõ zalua andrõ ira niha Yahudi fefu awõ niha moroi ba soi bõ'õ si torõi ba Nefeso, tobali ata'u ira. Itugu lasunosuno dõi Zo'aya Yesu.
18 Ato zi no faduhu tõdõ khõ Yesu zi mõi mamaduhu'õ fõna niha sato fefu gamuatara.
19 Ba ya'ira si to'õlõ ba wakelemusa la'owuloi mbuku gelemura ba latunu fõna niha sato. Fa'ebua mbõli mbukubuku andrõ na la'owuloi fefu so mato lima wulu ribu rufia firõ.
20 Ba zalua andrõ itugu tehõngõ daroma li Zo'aya ba itugu mofa'abõlõ.
21 Me no aefa zalua andrõ fefu, ba ifatenge niha Faulo we'amõi ba Makedonia awõ ba Nakhaya. Imane Faulo, "Aefado ba da'õ numalõ ndra'o gõi ba Roma."
22 Ifatenge darua dohutohu dangania Faulo, ya'ia Dimoteo ba Eraso, we'amõi ba Makedonia, gasagasa we'asonia nasa ba danõ Asia.
23 Ba ginõtõ da'õ alua wawukasa sabõlõbõlõ ba Nefeso sanandrõsa ba wamahaõ Yesu.
24 Ba mbanua andrõ so tuka wirõ sotõi Demeterio samazõkhi osali nahia Garitemi famaedo Lowalangi andrõ. Tobali fangalui sebua da'õ ba zohalõw̃õ khõnia.
25 Bõrõ da'õ i'owuloi zohalõw̃õ khõnia awõ duka wirõ tanõ bõ'õ, ba imane, "He ira talifusõ! No aboto ba dõdõmi wa tesõndra zoguna khõda ba halõw̃õ andre.
26 No mi'ila ba mirongo samõsa nifalua Waulo andrõ. No imane wa lowalangi nifazõkhi niha, tenga lowalangi. Ba ato zi faduhu tõdõ ba wamahaõnia, arakhagõ sagõrõ tanõ Asia.
27 Lualuania obou dõi halõw̃õda andre. Ba baero da'õ, lahundrahundragõ, ba lõ ba dõdõ niha sa'ae gosali Garitemi famaedo lowalangi andrõ; ba hiza no lowalangi nifosumange niha fefu ba Asia ia awõ ba zi sagõrõ ulidanõ!"
28 Tobali aukhu dõdõ niha sato me larongo da'õ ba mu'ao ira lamane, "Sauri Garitemi, lowalangi mbanua Nefeso andrõ!"
29 Itugu fawuka zi sambua banua andrõ. Lara'u Gayo ba Arisaro niha Makedonia awõ'awõ Waulo ba lala, ba lasõbi ira numalõ ba danõ lafa sebua ba mbanua andrõ.
30 Edõna Waulo fao khõra, ba hiza latenaw̃a ia niha si faduhu tõdõ khõ Yesu si so ba da'õ.
31 So õsa ndra salaw̃a ba danõ Asia, si fahuwu khõ Waulo, lafatenge niha wangombakha ena'õ bõi iforoma'õ ia ba danõ lafa andrõ.
32 Gasagasa da'õ tobali fawuka niha sato sowulo ba danõ lafa andrõ. So zi'ao sanguma'õ si mane, ba so zi'ao sanguma'õ si manõ, bõrõ me ato ba gotaluara zi lõ aboto ba dõdõ hana wa owulo ira ba da'õ.
33 So õsa zanguma'õ tõdõra, Alesandro mbõrõ, me ya'ia ni'ohe ndra niha Yahudi fõna. I'andrõ faoma kode Alesandro ena'õ labe'e ginõtõ khõnia wamu'a ba hulunia fõna niha sato.
34 Ba me la'ila wa niha Yahudi ia, ha sara lira we'ao lamane, "Sauri Aritemi, lowalangi niha Nefeso!"
35 Ba gafuriata, tola lafahono niha sato andrõ ira salaw̃a zamatõrõ ba mbanua andrõ. Imane, "He ya'ami banua Nefeso! Dozi niha no oi aboto ba dõdõra wa ba Nefeso terorogõ gosali Garitemi awõ gara ni'amoni'õ satoru moroi ba mbanua.
36 Samõsa lõ si tola mowu'ai da'õ. Bõrõ da'õ mihonogõ ami ba bõi milau hadia ia zi lõ gõna.
37 Mi'ohe niha andre tenga bõrõ wa no larabu gosali ma zui no la'o'aya lowalangida.
38 Na so wangadu Demeterio awõ zohalõw̃õ khõnia, akha lafa'ema wangadu andrõ ba zanguhuku. So rafe zanguhuku ba so ndra sanguhuku ba samatõrõ ba da'õ.
39 Ba na so danõ bõ'õ somasi ami, ba te'asiwai da'õ ba walukhata satulõ fõna niha sato.
40 Bõrõ me hadia zalua ma'õkhõ andre tola tobali famakikoda. Tola tobali folaw̃ada, me lõ danedane khõda wamalua famawukaisi andre."
41 Me no aefa iw̃a'õ da'õ, ifofanõ niha sato fefu salaw̃a ba zamatõrõ andrõ ena'õ mangawuli ira ba nomora zamõsana.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA