Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Asum Apolos i Korinti, isiari Paulus terus ku kuta-kuta Propinsi Asia Kitik, janah seh pe ia i Epesus. I Epesus jumpa ia ras piga-piga kalak ajar-ajar.

² Isungkun Paulus kalak e nina, "Ialokenndu ka nge Kesah Si Badia asum tangtangna kam mulai tek?" Erjabap kalak e, "Langa, janah langa pernah pe ibegi kami maka lit Kesah Si Badia."

³ Nungkun ka Paulus nina, "Dage, peridin si apai kin si ialokenndu?" Erjabap kalak e nina, "Peridin Johanes."

⁴ Nina Paulus, "Peridin Johanes eme peridin man kalak si nggo jera; janah ikataken Johanes pe man kalak Israel gelah kalak Israel tek man Ia, si reh arah pudina, eme Jesus."

⁵ Kenca ibegi kalak ndai penjelasen Paulus enda, iperidiken ia i bas gelar Tuhan Jesus.

⁶ Janah asum Paulus namaken tanna ku babona, nusur Kesah Si Badia man bana. Jenari ngerana kalak e i bas erbage-bage cakap si deban, janah ernubuat ia.

⁷ Teremna kalak ndai lit kira-kira sepulu dua kalak.

⁸ Telu bulan dekahna Paulus alu la biar-biaren ngerana i rumah persembahen. I bas percakapenna ras kalak e iusahakenna gelah tek kalak e kerna Kinirajan Dibata.

⁹ Tapi lit piga-piga kalak si mersik ukurna janah la ia tek. Icekurakina pe pengajaren kerna Dalan Kegeluhen e i lebe-lebe jelma si nterem. Emaka itadingken Paulus ia, jenari iserapkenna kalak si nggo tek e janah tep-tep wari ia erbahan tanya-jabap ras kalak e i bas sada gedung sekolah, Tiranus empuna.

¹⁰ Dua tahun dekahna si enda ilakokenna. Alu bage kerina kalak si ringan i Propinsi Asia, subuk kalak Jahudi bage pe si labo kalak Jahudi megi Kata Tuhan.

¹¹ Arah Paulus ibahan Dibata tanda-tanda sengget si luar biasa.

¹² Alu namaken saputangan ntah pe uis si nggo ipake Paulus ku babo kalak si sakit malem penakit e janah ndarat pe setan-setan i bas kalak si setanen nari.

¹³ Lit piga-piga kalak Jahudi erdalan-dalan, dahinna mpelawes setan i bas kalak nari. Icubakenna pelawes setan-setan alu make gelar Tuhan Jesus. Nina man setan-setan e, "I bas gelar Jesus si iberitaken Paulus, kusuruh kam ndarat i bas kalak enda nari."

¹⁴ Kalak si erbahan si enda pituna anak Sekewa, si ngakuken dirina imam si mbelin kalak Jahudi.

¹⁵ Tapi ngaloi setan-setan e nina, "Jesus kutandai, Paulus pe kueteh ise ia, tapi kam ise kin kam?"

¹⁶ Irigep si setanen e ia kerina, isintakkenna uisna seh merigat janah iraukina dagingna seh luka-luka. Emaka kiam kerina kalak e i bas rumah kalak si setanen e nari lanai ruis.

¹⁷ Kerina si ringan i Epesus subuk kalak Jahudi bage pe si labo kalak Jahudi meteh kejadin enda. Jengang kalak kerina janah erdandanken si e reh terpujina gelar Tuhan Jesus.

¹⁸ Nterem kalak si nggo tek man Jesus e reh janah iakukenna alu terus terang maka gelgel nari ia make tabas-tabas.

¹⁹ Nterem kalak si lit kinigurunna maba pustakana jenari itutungna i lebe-lebe jelma si nterem. Erga buku-buku e kerina adi ijumlahken lit lima puluh ribu duit pirak.

²⁰ Alu cara si luar biasa enda reh mbarna Kata Tuhan dingen reh teremna kalak si tek.

²¹ Kenca kejadin e itetapken Paulus maka lawes ia ku Makedoni ras Akaya, jenari terus ia ku Jerusalem. Enda itetapkenna erkite-kiteken pang Kesah Si Badia. Janah pe nina, "Kenca kudahi perpulungen Jerusalem terus pe ateku ku Roma."

²² Emaka isuruhna Timotius ras Erastus leben ku Makedoni. Tapi Paulus lit piga-piga wari nari dekahna i Propinsi Asia.

²³ Paksa si e jadi ka keributen i Epesus erdandanken Dalan Kegeluhen si ituduhken Tuhan.

²⁴ Lit sekalak tukang pirak gelarna Demetrius. Ibahanina patung-patung rumah pertoton Dewi Artemis i bas pirak nari. Arah usahana enda melala untungna ras kalak si erdahinna.

²⁵ Ipepulungna si erdahinna bage pe kalak si seri pendahinna ras ia, jenari nina man kalak e, "O teman-teman, ietehndu maka kebayakenta rehna arah usahanta enda.

²⁶ Genduari banci idahndu dingen ibegindu kai si ibahani Paulus. Ikatakenna maka patung-patung si ibahan manusia labo dibata. Nggo nterem kalak papak ibahanna, labo saja i Epesus tapi pe menam i belang-belang Propinsi Asia.

²⁷ Si enda tuhu-tuhu bahaya, sabap labo saja perusahanta enda icekuraki kalak, tapi Rumah Sembah-sembahen Dewi Artemis si mbelin e pe lanai lit ertina. Janah Dewi Artemis si isembah kalak i Asia ras i belang-belang doni enda lanai ipehaga."

²⁸ Megi kata enda ngamuk kalak e janah alu sora megang kerina ia ngerana nina, "Terpujilah Artemis Dewi si isembah kalak Epesus!"

²⁹ Guntar kuta e ibahanna. Itangkapna Gayus ras Aristarkus; kalak enda duana i Makedoni nari janah duana teman Paulus sada dalanen. Isaren kalak si nterem e ia duana ku stadion.

³⁰ Idahi Paulus atena ku tengah-tengah jelma si nterem e, tapi la ipelepas ajar-ajar.

³¹ Bage pe piga-piga kalak pembesar Propinsi Asia teman Paulus mindo gelah ula ia bengket ku bas stadion e.

³² Tupung e megang-megang kerina ngerana kalak si pulung e; lit si ngataken bagenda lit si ngataken bagah, sabap teremen si la meteh kai sabapna maka pulung.

³³ Jenari ijembaken kalak Jahudi si Aleksander ngerana ku lebe. Erkiteken si e iakap jelma si nterem e ia me bena-benana si erbahan guntar e. Ibahan Aleksander tanda alu tanna gelah ula gejek sabap atena ngerana mereken penjelasen man kalak si nterem maka labo kalak Jahudi si erbahan guntar e.

³⁴ Tapi kenca ieteh kalak si nterem maka ia kalak Jahudi, serko-serko ia kerina seh dua jam dekahna nina, "Terpujilah Artemis, Dewi si isembah kalak Epesus!"

³⁵ Dungna kalak si nterem e banci ipeteneng Sekretaris daerah. Janah kenca teneng nina, "O kalak Epesus! Kerina kalak meteh maka Epesus me si mada rumah pertoton Dewi Artemis si mbelin ras patungna si nusur i langit nari.

³⁶ Labo ise pe ngatakenca lang. Emaka tenenglah kam, janah ukuri lebe kai si atendu ibahanndu.

³⁷ Sabap nggo ibabandu kalak enda duana ku jenda aminna gia labo irampokna rumah pertoton janah labo lit ikatakenna si jahat kerna dewinta e.

³⁸ Dage adi lit pengadun Demetrius ras si erdahinna nandangi sekalak jelma, lit kap pengadilen, janah lit kap hakim-hakim, ku jelah ia ngadu.

³⁹ Janah adi lit tuntutenndu si deban, cakapkenlah e i bas sidang si resmi.

⁴⁰ Sabap banci jadi arah kejadin i bas wari enda kita ituduh pemerentah Roma erbahan pemberontaken. Janah la lit alasenta guna mpertanggung-jawabken perpulungen si ngguntari enda."

⁴¹ Kenca dung ngerana sekretaris e, isuruhna kalak si nterem e mulih.

Kisah Para Rasul

Video Kisah Para Rasul 19

Ikuti Kami:

KONTAK | PARTISIPASI | DONASI