Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ia tonna jio unapa kota Korintus to Apolos, malei Paulus llingkai ba'tu pira-pira tondok arannai ratu lako kota Efesus. Ia tonna ratumo jio, den ba'tu pira-pira tomatappa' lako Puang Isa nasitammuan.

² Nakutanaimi nakua, "Ee, todipusile'to! Denmoraka Roh Allataala mitarima tommimatappa' lako Puang Isa?" Napebalii nakua, "Te'dapa. Te'da toopa naden kisa'ding kumua den pale' Roh Allataala."

³ Nakutanai pole' omi nakua, "Ia nasusi tuu, pangjioran apara to dijioran kamu'?" Napebalii nakua, "Pangjioran to napangngajaran Nabi Yahya."

⁴ Nakuamo Paulus, "Ia to pangjioranna Nabi Yahya mpamanassai kumua ia to todijio' mengkatoba'mo jio mai dosana. Apa napangpeissenan tooi Nabi Yahya lako to-Yahudi kumua la nakatappa'i to Puang Isa, mane' la ratu."

⁵ Ia tonna sa'dingmi joo, dijio'mi mpau sangan-Na Puang Isa.

⁶ Ia tonna palullungngi pala'na Paulus joo tau, nakuasaimi Roh Allataala, namangkada mpake mangrupa-rupa basa mejangngaran to nabenni Roh Allataala na mparatu too pepasan-Na Puang Allataala.

⁷ Mbai denni sangpulo dua tau budanna.

⁸ Te'da namalaja' Paulus sipangkada-kada tarruh bang tuu lako tau lan bola passambajangan to-Yahudi jio kota Efesus tallung bulan masainna. Napamanassanni umbo nakua menjaji taun-Na Puang Allataala lan kaparentan-Na.

⁹ Apa denni ba'tu pira-pira to membattuk cia' matappa'. Nacacca mate-matean to pangngajaran-Na Puang Isa jio olona to tosirempun. Iamo joo nasalaii Paulus sola to tongkatappa'imo Puang Isa, namale lako passikolan Tiranus nanii nnajahhi tau keallo-keallo.

¹⁰ Duang taun masainna nanii mangngajahhi tarruh bang susi joo, arannai ssa'ding ngasan kadan-Na Puang to tontorroi propinsi Asia, la to-Yahudi la to-Yunani.

¹¹ Puang Allataala mbenni kuasa to Paulus mpugauk tanda liwa' mejangngaran.

¹² Ianna dibawan tomasaki to saputanganna iarika kaen puramo napake Paulus, malagahhi, napessunni tooi setang.

¹³ Den ba'tu pira-pira to-Yahudi pangjampi-jampi, male bang llelei tondok, nnula'i setang lan mai kalena tau. Nacoba toda ia mpau sangan-Na Puang Isa la nnula'i setang, nakua, "Sangan-Na Puang Isa to napangpeissenan Paulus kupau, messunko!"

¹⁴ Den pitu pea muane anakkana Skewa kapala imang to-Yahudi mpugauk todai susi joo.

¹⁵ Apa nakua ori joo setang, "Ee, kuissen to Puang Isa, moi Paulus kuissen too, apa ia to kamu', inda kamu'?"

¹⁶ Ta'pa lumurumi joo tonatamai setang, nakarangkangngi sola ngasan sanga nacau' bukui, arannai sikinjarasan lan mai bola sikojong-kojongan, na mangkale-kale too, nasaba' narabakkii to pakeanna lan mai kalena.

¹⁷ Nasa'ding ngasan to-Yahudi sola to-Yunani to torro jio kota Efesus joo, namemmalaja'. Sadipakala'bih-la'bihnami to Puang Isa.

¹⁸ Buda tomatappa'mo lako Puang Isa ratu mangngaku jio olona tobuda, nnakui panggaukan salana to wattu pura diboko'.

¹⁹ Na ia to tobiasamo mpake ule-ule, narempun ngasanni to sura'na, nasumpunni jio olona tobuda. Den agi-agi allian limang pulo sa'bu pera' ke dirempun ngasanni.

²⁰ Susimi joo lalanna nasakaissen-issenanna to kadan-Na Puang, nasabuda-budanna tonturu'i.

²¹ Ia tonna mangkamo joo, madoangmi Paulus male lako kota Yerusalem nnola propinsi Makedonia sola propinsi Akhaya, nakua, "Ia angkumangkamo liu jio kota Yerusalem, mane'ra' tarruh lako kota Roma."

²² Nasuami to Timotius sola Erastus to mbalii, najolo lako propinsi Makedonia. Apa torro unapi ia Paulus ba'tu pirang-pirang allo jio propinsi Asia.

²³ Agi-agi ia joo wattu naden kamarongkan la'da' jio kota Efesus, passalan pangngajaran-Na Puang Isa.

²⁴ Den mesa' pande salaka disanga Demetrius nggaraga bola-bola dewata napasusi bola dewata Artemis. Gaja buda panglolonganna to tomangjamanna.

²⁵ Iamo joo narempunni to tomangjamanna sola pande salaka laen, nakuanni, "Ee, kamu' to kupusile'to! Miissen kumua buda panglolonganmi.

²⁶ Na mikita na misa'ding toomo to apa napugauk Paulus. Nakua ia kumua, ia to dewata nagaraga tolino, te'da lalo nasipato' la disompa. Na budamo tau napalao sala ngkatappa'i pangngajaranna, te'da na inde' manda kota Efesus, apa sala-sala lan lili'na propinsi Asia.

²⁷ Cilakanna te'damo nalalolo' tee jaman pangngangaranta', na te'da na ia manda joo, moi bola dewata Artemis te'damo nakasiri'i tau la nasilese-leseimira. Na dewata Artemismo to kaminang mala'bihna nasompa sininna tau lan propinsi Asia na lan lili'na lino."

²⁸ Ia tonna sa'dingmi susi joo, malussu ngasan daun talinganna to tau, napissennii metamba nakua, "Mala'bih Artemis, dewatangki' to-Efesus."

²⁹ Marongka ngasanmi to tau lan joo kota. Najokkoi to Gayus sola Aristarkhus, nagararakki tama panggoloran lan joo kota. (Ia to Gayus sola Aristarkhus to-Makedonia nasolan Paulus lan kalingkanna.)

³⁰ Madoangngi Paulus mentama toda anna sipangkada-kada, apa naanggaii to tomatappa' lako Puang Isa.

³¹ Ba'tu pira-pira tomapangka' jio propinsi Asia siissenna Paulus, mesua mpauanni kumua danggi' namale tama panggoloran.

³² Sirongka bang toomo to tau jio. Simeoli-olian te'da nadiissen ulunna pollo'na to napau, nasaba' budai to te'da naissenni apa to nasirempunni.

³³ Denni to ssangai kumua Aleksander to passabatanna, sanga ia naturrun to-Yahudi lako olo. Nnangka'mi limanna Aleksander napupangngimba-imbai meta'da nadiben wattu mpaui to sitonganna.

³⁴ Apa ia tonna kitai kumua to-Yahudi bang una, ta'pa simeolian pole' omi mbai duang jang masainna nakua, "Mala'bih Artemis dewatangki' to-Efesus."

³⁵ Katampakanna juru tulisi' kotamora mpakamma'i to tau. Nakuanni, "Ee, kamu' to-Efesus! Sininna tau lan lino nnissenni kumua ia tee kota Efesus nnampui bola dewata Baine Artemis to kaminang matonggo, susi toomi to tau-tau batunna polloh jao mai langi'.

³⁶ Moi mesa' tau te'da ngkullei nte'gehhii joo. Iamo joo rapa' melo kamu', danggi' mimesa mangpugaukkuna bang.

³⁷ Ia tee mai tau misolan mai, te'da bangra to mbokoi bola dewata ba'tu ncapa' dewatanta'.

³⁸ Ianna den tau la naparapa' Demetrius sola tomangjamanna, la nabawa lakoi bola pangra'tasan kara-kara. Tuli jio bang to taunna gubernur sadia bang too ntarimai.

³⁹ Apa ianna denpa to laenna miangah penawa, la mipau jio kasirempunan tobuda situru' atoran.

⁴⁰ Nasaba' wa'ding tapusabu' to apa jaji tee allo. Wa'dingki' disanga tonnewa tomangparenta, nasaba' te'da bang pentoeanta' la ntongananni tee kamarongkan."

⁴¹ Ia tonna mangka mpangngingaranni, nasuami juru tulisi' kota pole to tobuda.

Kisah Para Rasul

Video Kisah Para Rasul 19

Ikuti Kami:

KONTAK | PARTISIPASI | DONASI